1 Gilamput pun Jesus chi intudtuchula kan cha tagu, ummoy ud Capernaum. 2 Udchi illinggew chi osaʼn kapitan cha susuɏchachu un iRome. Lasakit ya mamattoyon chi potpotgolaʼn bubùulola. 3 Chingngeɏn pun chi kapitan un awed si Jesus, imbuunla cha uchum un pallakayon cha Judio ta ayagencha si Jesus ta umoyla palin-awaon chi bubùulola. 4 Ot ummoycha kan Jesus ot langkadkachegucha kan siya un kalancha, “Bibiɏu hachiʼn kapitan, lobbonglaʼn tuɏungam siya, 5 ti memeɏyed kan chitakun Judio ked siya bo lampakwa si osaʼn sinagogan maup-uppulanmi.” 6 Ot litun-ud si Jesus kan chicha.

Ummachalicha pun si byeɏoy chi kapitan, imbuunla cha uchum un bubuɏunla ta umoycha ibyegan man-olat si Jesus, ot kalancha, “Apu, achim taktakon chi long-egluʼn umaliʼd byeɏoymi ti chakpun lumbong un mammangili kan sika, 7 ya achipunku kalobbongan un umali kan sika. Ngim umalay chi man-ugudka ked lummin-awa chi bubùulok. 8 Ti maawatak chi mipanggop si kalobbongan, ulay sakon un kapitan, masapuɏʼn tuttuwaok chi ibyegan chi ap-apuk. Katchi bo cha suɏchachun iturayak, tuttuwaoncha ibyegak, ti lu ibyegak si osa, ‘Ingka,’ ked ummoy, ked lu ibyegak si osa, ‘Umalika,’ ked umali. Ked lu ibyegak si bubùulok, ‘Koom chi alla,’ ked kingwala bo.”

9 Laschaaw si Jesus si chingngeɏla ot lasalagung kan cha amod un taguʼn lituntun-ud kan siya ot kalala, “Ibyegak kan chikayu, lappun inchesak si kamatchi pammatila si losan un galak Israel.” 10 Langulin pun cha hachiʼn libuun si byeɏoy chi kapitan, inchesanchaʼn lummin-awa bubùulola.

11 Lapalos pun, ummoy cha Jesus ya disipulusla si osaʼn ili un mangngachen Nain. Lakabuɏog cha disipulusla ya cha amod un tagu. 12 Ummachalicha pun si liwangan chi hachiʼn ili, ilabotcha cha amod un taguʼn lakabuɏog si osaʼn labyaɏu un umoycha mallobon si os-osaan un alaklaʼn bumaru. 13 Intullong pun Jesus chi labyaɏu, kilacheguwala siya ot kalala, “Achika man-ibi-ibin.”

14 Oli pun ummachali si Jesus ot ummoyla ilappachen chi lungun ot ummillong cha lamubukud. Ot kalala, “Bumaru, bumangonka!” 15 Ot bummangon chi latoy ot gumminga, ot impuɏang Jesus siya kan ilala.

16 Ot ummogyat losan cha langitullong ot chilaychayawcha si Apudyus, un kalancha, “Lummoswa kan chitaku osaʼn langatun propeta. Ummali Apudyus ta taguwola cha tagula!” 17 Ot lanchilongeɏ chameg mipanggop kan Jesus si losan un ili ud Judea ya ili-ili un mampalikwos.

18 Imbyegan pun cha disipulus John chi mipanggop kan Jesus ya losan un lakwa, ilayagela chuwaʼn disipulusla, 19 ot imbuunla chicha ta umoycha imuson kan Apu Jesus, “Sika kamma hachiʼn ingkarin Apudyus un umali willu man-uway kamì sabyali?”

20 Gummatongcha pun kan Jesus, kalancha kan siya, “Imbuun chikami kan John un Mambubunyeg ta imusonmi kan sika lu sika ingkarin Apudyus un umali willu man-uway kamì sabyali?”

21 Si hachiʼn uras un gummatngancha, pilalin-awan Jesus cha achuʼn taguʼn lakalakalasi sakitcha ya pin-ala bo pileɏyaw cha aɏan un inggew si uchum, ya cha lakuɏap ked makatullongcha. 22 Ot silongbyatan Jesus chicha, kalala, “Mangulin kayu kan John, ibyegayu kan siya cha intullongyu ya chingngeɏyu un killingwak. Cha lakuɏap, makatullongcha, cha lapilay, makatidchaɏancha, cha laleprosy lakalin-awaancha, cha latuɏong, makadngeɏcha, cha latoy, latagu cha kasin. Ked cha kakapus, mibyegbyega kan chicha Bibiɏuʼn Chameg.* 7:22 Isaiah 35:5-6, 61:1 23 Ked ibyegayu bo kan siya un pian chi taguʼn achipun manchuwachuwa pammatila kan sakon.”

24 Ummoyon pun cha biluun John, imbyegan Jesus kan cha tagu chi mipanggop kan John. Kalala, “Simma ummoyyu intullong si lugeɏʼn lappun ummili? Kalanyu pun lin lu isun chi guɏun siya un chupa-chupaliyon chi bidbid? Chakampun! 25 Ked lu chakampun, simma ummoyyu intullong? Ha taguʼn lansilup si kangilaan? Ngim chakampun si lansilup si katchi ti byeɏoy chi Ari inggewan chi lakasilup si katchiʼn langila. 26 Ibyegayu u lu simma ummoyyu intullong? Osaʼn propetan Apudyus. O, ibyegak kan chikayu si John langatngatu lu osaʼn propeta, 27 ti siya hachiʼn tagu un imbyegan chi liigili si ugud Apudyus, un kalala, ‘Awed chi osaʼn taguʼn un-ulaok ibuun lu sika ta umoyla isagala chaɏan un ayom.’† 7:27 Malachi 3:1 28 Tuttuwa ibyegak kan chikayu un lappun tagu un liyalak utla pita un langatngatu lu John. Ngim lu silu kabyabyaan si Mampangatan Apudyus, mibilang un langatngatu lu John.”

29 Chingngeɏn pun cha losan un tagu ya cha manchachagup si bugis chi imbyegan Jesus, biligbigcha pion Apudyus ked ustu, ot lampabunyegcha kan John. 30 Ngim cha Pariseo ya cha mimistulun chi lintog, ilissancha pion Apudyus kan chicha ked achipuncha lampabunyeg kan John.

31 Intuɏuy Jesus un lan-ugud, kalala, “Simma mangiyisuwak kan cha tagu si salaʼn lolap? 32 Iyaligku chicha un isun cha aalak un man-iillangu un langiyip-ipkaw si asin-allakcha, ‘Tilupayyami gangsa ngim achipun kayu lalagli. Langkanta kami si kachegchegu ngim achi kayu lanlangchu.’ 33 Ti ha ummaliyan John un Mambubunyeg, pin-a lallaun ya achipun ummilum si byeyas, ot ilam-amsiwyu siya un ngadlonyu, ‘Laaɏan siya!’ 34 Ngim Sakon un Alak chi Tagu, ummaliyak pun boʼn langa-langan ya ummilu-ilum, ilam-amsiwak bo un ngadlolak, ‘Leɏawot ya kabubuuk. Ya ngadlolak bo bubuɏun cha manchachagup si bugis ya cha malagbyasuɏ!’ 35 Ngim ulay lu katchi, losan cha mamati kan Apudyus, chicha ustuʼn mangipaila si tuttuwaʼn kilalaing Apudyus.”

36 Osaʼn eɏgew, ilayagen chi Pariseo si Jesus ta mangan ud byeɏoycha. Ot ummoy si Jesus lakakan. 37 Inggew bo si hachiʼn ili osaʼn byebyaiʼn malagbyasuɏ. Chingngeɏla pun un awed si Jesus un mangan si byeɏoy chi Pariseo, ummoy ot langawit si apɏus un mambyangu un inggew si bilatuʼn angang un ngadloncha alabaster. 38 Lilumlok chi hachiʼn byebyai ot summiked si ochogen Jesus,‡ 7:38 Ugalin cha Judio, sumiked si ochogen lu mangancha, siya un lalaka un umoy hachiʼn byebyai si ikiyan Jesus. ot lan-ibin un lantodtodtod chi luwala si chepan Jesus. Ot pilulasala si buukla ot ap-appupuyola ya kilikisla chepanla si mangipain-ala si lispitula, asila ot ibukbuk chi apɏus si chepan Jesus.

39 Ngim intullong pun chi Pariseo kingwan chi byebyai, kalala si somsomokla, “Lu gettok un propeta si Jesus, ammula otyan chi kilatatagun chi byebyai un mangap-appupuy kan siya, ked ilomeɏala.”

40 Hachi ked gumminga si Jesus ot kalala si hachiʼn Pariseo, “Simon, awed chi ibyegak kan sika.”

Kalan Simon, “O, simma ibyegam Apu?”

41 Ot lan-alig si Jesus un kalala, “Inggew chi osaʼn leɏakiʼn lampappautang si pilak kan cha chuwaʼn leɏaki. Ha osa ummutang si limanggasut un denari, ked ha osa ummutang si limampuɏu. 42 Ot gapu ta achipuncha makabyayed, pilakawanla chicha si utangcha. Awed chi imusok kan sika, kan cha chuwaʼn lan-utang, silu chakchakeɏ ayatla si hachiʼn lampautang?”

43 Kalan Simon, “Ha taguʼn ad-achu lapakawan un utangla.” Ot kalan Jesus kan siya, “O, siya, tuttuwa kalam.” 44 Ot tiluwilila byebyai ot kalala kan Simon, “Itullonglu allaʼn byebyai? Ti lilumlokak pun si allaʼn byeɏoyyu, lappun illidchom si chelum un mambyebyek si ikik, ngim siya, imbyebyela luwala si chepanku ot pilulasala si buukla. 45 Ked sika, achipunlu sakon kilikis si lilumlokak. Ngim siya, malipud si lilumlokala achipunla inyagey un kilikis chi chepanku. 46 Ked sika bo, achipunlu ilapɏusan chi uɏuk, ngim siya, ilaminla ilapɏusan chi chepanku si langilan apɏus un mambyangu. 47 Ibyegak kan sika, gapu si amod un ayat chi allaʼn byebyai kan sakon, hachi mangipaila un lapakawan cha achun byasuɏla. Ngim ha taguʼn akit chi lapakawan un byasuɏla, akit bo ipailalaʼn ayatla kan sakon.”

48 Oli pun kalan Jesus si hachiʼn byebyai, “Lapakawan cha byasbyasuɏm.”

49 Ngim cha uchum un lakakan, kalancha si somsomokcha, “Himmaga taguʼn alla un pakawalola byasuɏ?”

50 Kalan bo Jesus si hachiʼn byebyai, “Gapu si pammatim kan sakon, matataguka. Ingkan mallin-awaka.”