1 Wiswisngit pun chi Chuminggu, ummoy cha Mary Magdalene si lobon. Gummatongcha pun, intullongcha un lakaan chi bilatuʼn olobla. 2 Ot lalodchakcha ot ummoy kan Peter ya hachiʼn disipuluslaʼn ay-ayaton Jesus ot kalala kan chicha, “Illaɏacha lecheg chi Apu taku si lobon ya lappun ammumi lu chilu langiggaancha!”

3 Oli pun ummoy cha Peter ya hachiʼn osaʼn disipulus si lobon. 4 Lalodchakchaʼn chuwa ngim labibbilog chi hachiʼn disipulus ot ummula gummatong si lobon. 5 Lan-okog un langitullong ud chaɏom ot intullongla luput un libyebyellat, ngim achipun lilumlok. 6 Ot si Peter un lisagsagulud kan siya, langaw-as ud chaɏom chi lobon. Ot intullongla luput un libyebyellat, 7 ya luput un liyabungus si uɏula, latitipli ked litalin si luput un libyebyellat. 8 Oli pun lilumlok hachiʼn disipulus. Intullongla pun chi lakwa, lamati un ummuli latagu si Jesus. 9 Ti hachiʼn timpu chaampuncha maawatan chi liigili un ugud Apudyus un masapuɏn umuli matagu kasin si Jesus. 10 Ot ummoyon cha disipulus.

11 Ngim si Mary Magdalene, summisiked si lasin chi lobon un lan-ibiibin. Ot si lan-ibiibilala, lan-okog un isiimla ud chaɏom. 12 Ot intullongla chuwaʼn anghel un lansisillupcha si mamputilak. Ummaammuy si libyelatan chi lecheg Jesus. Ha osa, ummaammuy si uɏuwan ked ha osa, ummaammuy si ikiyan. 13 Ot ilimuscha, “Byebyai, pakaggey man-ibiibin?”

Ot summongbyat si Mary, “Simman ti intallaycha lecheg chi Apumi ya lappun ammuk lu chilu langiggaancha!”

14 Oli pun, lantuwili ot intullongla Jesus un summisiked, ngim achipunla immatulan siya. 15 Ot kalan Jesus, “Byebyai, pakaggey man-ibiibin? Silu singsingtom?”

Ngim si Mary, kalala si somsomokla un siya palagechin, ot kalala, “Apu, lu sika langitallay kan siya, ibyegam u langiggaam ta inyak aɏan siya.”

16 Oli pun imbyegan Jesus kan siya, “Mary!” Ot lasalagung kan Jesus ot kalala si Hinebrew, “Rabboni!” (Piolaʼn ibyega mistulu).

17 Kalan Jesus kan siya, “Là, achim sakon oglen* 20:17 Matthew 28:9 ti chaampulak mangulin kan Ama ud langit. Ngim ingka ibyega kan cha susulud taku un mangulilak kan Amak un Amayu, ya Apudyusku un siya bo Apudyusyu.”

18 Ot ummoy Mary Magdalene imbyega kan cha disipulus un intullongla si Apu Jesus. Ot impakaammula imbyegan Jesus kan siya.

19 Lummaschom pun si hachiʼn Chuminggu, lachagup cha disipulus ot inchakigcha byeɏoy, ti umogyatcha kan cha papangat cha Judio. Oli pun lasalawang si Jesus ot lakasiked si inggewancha ot kalala, “Mallin-awa kayu losan.” 20 Ot impailala imala ya butikla kan chicha. Ot amod chi galascha un langitullong kan siya.

21 Ot kasin Jesus imbyega kan chicha, “Mallin-awa kayu otyan losan. Ibuunku chikayuʼn umoy mantudtuchu un isun chi lambubuun Ama kan sakon.” 22 Imbyegala pu hachi, insap-uyla kan chicha ot kalala, “Awatonyu Ispiritun Apudyus. 23 Lu silu pakawalonyuʼn byasuɏn cha tagu, tuttuwaʼn mapakawan. Ked lu silu achipunyu pakawalon, achipun bo Apudyus pakawalon chicha.”

24 Lampaila pun si Jesus kan cha disipulusla, lappun chi osa kan chicha, si Thomas un ngadloncha Kapin. 25 Ot imbyegan cha uchum un disipulus kan siya, “Intullongmi si Apu Jesus!”

Ngim kalala, “Achipunku patiyon lu achipunku itullong chi pilat chi imalan lilansa ya achipunku appachen chi butikla.”

26 Lummaus pu sinchuminggu, kasin bo lachagup cha disipulus Jesus ot illinggew si Thomas kan chicha. Lichakig chi olob ngim lasalawang si Jesus ot lakasiked kan chicha ot kalala, “Mallin-awa kayu otyan losan.” 27 Oli pun kalala kan Thomas, “Itullonglu imak ya appachem chi butikku. Ageylun manchuwachuwa ngim mamatika!”

28 Ot kalan Thomas, “Sika Ap-apuk ya Apudyusku.”

29 Kalan Jesus kan siya, “Mamatika ti intullonglu sakon. Pian cha tagun achipun langitullong kan sakon ngim mamaticha!”

30 Achu cha lakaskaschaaw un killingwan Jesus si sangwalan cha disipulusla, ngim achipun liigili si libluʼn alla. 31 Ngim liigili cha laoy taplu mamati kayu un si Jesus chi Kristu un Alak Apudyus. Ked lu mamati kayu, matatagu kayu ing-inggala gapu si litimpuyugenyu kan siya.