1 Oli pun kalan Jesus kan cha disipulusla, “Achi kayu machalagen ya malilibukan. Mamati kayu kan Apudyus, ya mamati kayu bo kan sakon. 2 Ti achu inggewan si byeɏoy Amak, ked inyak isagala cha inggewanyu. Achipunku ibyega alla kan chikayu lu achipun tuttuwa. 3 Ked lu gamputok isagala inggewanyu, mangulilak un mangaɏa kan chikayu, ta lu chilu inggewak, hachi bo inggewanyu. 4 Ammuyu chaɏan un umoy si ayak.”

5 Ot kalan Thomas kan siya, “Apu, lappun ammumi lu chilu ayam. Ma in-ilonmi un mangammu si chaɏan?”

6 Ot kalan Jesus kan siya, “Sakon chi chaɏan, katuttuwaan ya biyeg. Lappun makaoy kan Ama lu achipun mangoy kan sakon. 7 Lu tuttuwaʼn ammuyu sakon, ammuyu bo si Amak. Ked mallugi si sala, tuttuwaʼn am-ammuyu siya ya intullongyu siya.”

8 Oli pun kalan Philip kan siya, “Apu, ipailam u kan chikami si Ama ta matmat-op kami.”

9 Summongbyat si Jesus, “Philip, labyeyeg chi illiinggewak kan chikayu, ngim achipunlu pay laing am-ammu sakon? Ha langitullong kan sakon, intullongla bo si Amak. Puggey ibyega un ipailak si Amak kan chikayu? 10 Ha achipunlu patiyon un awechak kan Amak ya awed bo si Amak kan sakon? Chakampun si lampeɏpu si somsomokku cha imbyegbyegak kan chikayu, ngim lampeɏpu kan Amak un awed kan sakon, koola chi kawachila. 11 Mamati kayu un awechak kan Amak ked awed bo si Amak kan sakon. Lu achipun kayu mamati, mamati kayu gapu si allaʼn pin-ak koon.

12 “Tuttuwa allaʼn ibyegak kan chikayu: lu silu mamati kan sakon, koola bo cha kawachik, ya chakchakeɏ kawachila lu cha alla, ti inyak kan Amak. 13 Ked lu silu chawatonyu kan Ama gapu si ngachenku, kook ta michayaw si Ama gapu si Alakla.* 14:13 Ha ibyegala si Greek ked ulay silu chawatonyu si ngachenku. Chuwa piolaʼn uguchon: ulay silu chawatonyu un kamad mangisaop kan sakon willu ulay silu chawatonyu mipagapu ta mantegod kayu si kalobbongak. 14 Lu manchawat kayu mipagapu si ngachenku, kook.”

15 Intuɏuy Jesus un lan-ugud, “Lu ay-ayatolak kan chikayu, koonyu cha bilinku. 16 Ked chawatok kan Ama ta ibuunla mipasali kan sakon un Katuɏunganyu. Siya Ispiritun Apudyus un inggew kan chikayu ing-inggala. 17 Siya mangipakaammu si katuttuwaan mipanggop kan Apudyus. Achipun makwaʼn awaton chi taguʼn achipun mamati chi Ispiritu, ti achipuncha mailasin siya ya achipuncha bo ammu siya. Ngim am-ammuyu siya, ti iinggew kan chikayu ya awed kan chikayu.

18 “Ked lu umoyolak, achipunku telan chikayu un isun cha ulila. Ti mangulilak kan chikayu. 19 Achipun mabyeyeg ked achipun cha taguʼn achipun mamati mitullong sakon, ngim chikayuʼn mamati kan sakon, mitullongyu sakon kasin. Gapu ta mataguwak kasin, matagu kayu bo si ing-inggala. 20 Lu chumtong chi hachiʼn eɏgew, siya mangammuwanyu un awechak kan Amak, ked awed kayu bo kan sakon, isun chi kilaawedku kan chikayu. 21 Lu silu mangipotog ya tumuttuwa si bilinku, siya mangay-ayat kan sakon. Ked lu silu mangay-ayat kan sakon, ay-ayaton bo Amak siya. Ked ay-ayatok siya ya ipatigammuk kan siya chi mipanggop kan sakon.”

22 Ot kalan Judas (chakampun kan Judas Iscariote), “Apu, puggey chikamin abus chi mangipatigammuwam mipanggop kan sika, chakampun kan cha tagu utla lubung?”

23 Silongbyatan Jesus siya, kalala, “Cha mangay-ayat kan sakon, siya maluttuwa si ugudku. Ked ay-ayaton Amak siya, ked sakon ya si Ama umali kami inggew kan siya. 24 Ha achipun mangay-ayat kan sakon, achipunla bo tuttuwaon cha ugudku. Chakampun si lampeɏpu si somsomokku cha ugudku un chingngeɏyu, ngim lampeɏpu kan Ama un langibuun kan sakon.

25 “Imbyegak cha alla ti awechak kan chikayu. 26 Ked ha Katuɏunganyu un ibuun Ama mipagapu si ngachenku, siya Ispiritun Apudyus. Siya mantudtuchu kan chikayu si cha losan un byaleg ya ipaspasmokla losan un imbyegak kan chikayu.

27 “Telak kan chikayu chi mallin-awaan chi somsomokyu. Ked idchok kan chikayu lin-awa un mampeɏpu kan sakon. Chakampun un isun chi man-aatod cha tagu utla lubung chi man-aatodku kan chikayu. Achi kayu machalagen ya achi kayu malilibukan ya achi kayu umogyat. 28 Chingngeɏyu imbyegbyegak kan chikayu un inyakon, ngim mangulilak kasin kan chikayu. Lu ay-ayatonyu sakon, magalasan kayu otyan ti inyak kan Ama un langatngatu lu sakon. 29 Imbyegak cha alla kan chikayu sakbyey un makwa, ta lu makwa cha losan, mamati kayu.

30 “Chakpun mabyeyeg un makaug-uggud kan chikayu, ti umali si Satalas un ap-apun cha achipun mamati. Lappun kilabyelinla un mangituray kan sakon. 31 Ngim masapuɏʼn ammuwon cha tagu utla pita un ay-ayatok si Ama. Siya gapula un kook cha losan un imbilinla kan sakon. Wayyu, intakun.”