4
Ha Ingkarin Apudyus Un Lumin-awaan Cha Tagula
1 Ha ingkarin Apudyus un insagalalaʼn lumin-awaan kan siya ked sissiya. Ked masapuɏʼn an-allechen taku ta lappun otyan matokchey kan chitaku un mallak-am si lumin-awaan. 2 Ti chingngeɏ taku Bibiɏuʼn Chameg, un isun chi langngeɏan cha aappu taku si awi. Ngim kan chicha, lappun simbin chi chingngeɏcha ti achipuncha lamati. 3 Chitakuʼn lamati chi mallak-am si hachiʼn lumin-awaan un ingkarin Apudyus. Ngim lu mipanggop kan cha achipun lamati, alliya imbyegala,
“Summangaak ot insapatak: Pulus lu malak-amcha
chi lumin-awaan un insagalak!”
Imbyegala hachi, ulay lu gilamputla insagala hachiʼn lumin-awaan lalipud si langwaala si lubung. 4 Ti awed bo liigili si ugud Apudyus mipanggop si mikapitu un eɏgew. “Ti ha mikapituʼn eɏgew, lan-illong si Apudyus si gilamputla losan un killingwala.”* 4:4 Genesis 2:2 5 Ot imbyegala bo kasin: “Pulus lu malak-amcha lumin-awaan un insagalak.”† 4:5 Psalm 95:11
6 Ked cha ummun-ulaʼn langngeɏ si Bibiɏuʼn Chameg achipuncha lilak-am chi lin-awa ti achipuncha lamati. Ngim alla cha uchum un lallak-am. 7 Ot kasin langikodchong si Apudyus si osaʼn eɏgew un mallak-aman cha tagu si lumin-awaan, ked ha hachiʼn eɏgew ked sala. Lummaus pu achuʼn tawon, imbyegala bo kan David si liigiliʼn ugud Apudyus un kalala,
“Si salaʼn eɏgew, lu chongɏonyu ugud Apudyus,
achiyu patangkilon cha somsomokyu.”
8 Ti lu impuyut Joshua cha aappu taku si hachiʼn lumin-awaan un ingkarin Apudyus, achipun otyan Apudyus imbyega kasin un awed chi sabyaliʼn eɏgew un lumin-awaan. 9 Ked sissiyaʼn awed chi lumin-awaan cha tagun Apudyus, un isun chi maka-illongan kan siya si mikapituʼn eɏgew. 10 Ti cha losan un makalin-awa kan Apudyus, man-illongcha bo si kawachicha un isun chi lan-illongan Apudyus si kawachila. 11 Ked ipapati taku kabyeeɏan takuʼn mallak-am si lin-awa kan Siya, ta lappun mikama ulay ossaan kan chitaku si killingwan cha aappu taku gapu ta lappun pammaticha.
12 Ha ugud Apudyus ked latattagu ya mallakabyelin. Latattachom lu sabli un lansupang chi tachomla ti makwalaʼn chuuton inggalad mansilaan chi kalichodwa ya Ispiritu, cha um-um ya utok. Chuutola cha somsomok taku kan milasinla cha losan un somsomok chi tagu ya migagaɏa un bibiɏu willu lawwing un somsomkon.‡ 4:12 Kalichodwa - ha kachaɏoman un somsomok chi tagu. Bukitkitala cha lachaɏom un somsomok. 13 Losan un killingwan Apudyus, ked lappun mitaɏu kan siya ti mampapattak losan si sangwalanla. Ked siya malongbyatan taku kan cha losan un killingwa taku ya ulay cha simsimmok taku.
Si Jesus Chi Kangatuwan Un Pachi
14 Ked popotpotan taku chi pammati taku, ti si Jesus un Alak Apudyus, siya Kangatuwan un Pachi taku un ummoy kan Apudyus ud langit. 15 Ti ha Kangatuwan un Pachi taku, maawatala cha losan un kilakapsut taku, ti pilachasla cha kilalasin chi masubsubyen un isu taku bo, ngim kan siya, achipun lakabyasuɏ. 16 Ked mantegod taku un umacheliʼn malluwalu kan Apudyus un malagchegu, ta awaton taku kachegula ya tuɏungla kan chitaku si timpu un kasapuɏan taku.