1 Sakon si Paul un chilutukan Apudyus un man-apostoles Jesu Kistu. Allaya suɏatku kan chikayuʼn tagun Apudyus un mangipapati si pammaticha kan Jesu Kristu utlat Ephesus.

2 Iluwaluk ta kacheguwan chikayu losan kan Ama takuʼn Apudyus ya Apu Jesu Kristu, ya palin-awaoncha somsomokyu.

3 Igettok takuʼn chaychayawon si Apudyus, un Aman Jesu Kristu un Apu taku ti ha litimpuyugen taku kan Kristu, illidchon Apudyus kan chitaku cha losan un bumaɏuwan un lampeɏpuʼd langit mipagapu si Ispiritula. 4 Somsomkonyu killingwala: Si chaampunla mangwaan si allaʼn lubung, gilamputla chitaku chilutukan un man-alakla gapu si litimpuyugen taku kan Kristu taplu lappun byasuɏ taku ya lappun machillawan taku si sangwalanla. 5 Gapu si ayatla, lisisigud si somsomok Apudyus un alakola chitaku mipagapu si latoyan Jesu Kristu. Allaya piola ya panggopla. 6 Ked chaychayawon taku siya gapu si lakaskaschaaw un kachegula kan chitaku, un inchuyala alaklaʼn Jesu Kristu un tagtagopola. 7 Gapu si latoyan Kristu, un libukbukan chi chaɏala, lawayawayaan taku ya lapakawan cha byasuɏ taku. Ked allaya main-an chi amod un kachegula 8 kan chitaku un lappun miyisuwala. Achu-achu kilalaing ya pallakaammu un illidchola kan chitaku ta maawatan taku mipanggop kan siya ya bibiɏuʼn mambibiyeg un tuɏachon taku otyan. 9 Impatigammula kan chitaku planula un achipun lipakaammu si awi un simsimmoklaʼn matungpeɏ gapu kan Kristu. 10 Allaya planula: lu makwa losan un masapuɏ un mapasamak ya chumtong chi ustuʼn timpu, mantitimpuyugon Apudyus cha losan un awed ud langit ya utla pita ta si Kristu abus chi man-Apucha.

11 Losan un mapaspasamak ked mibyeseɏ si sigud un planun Apudyus, siya bo si lanchutukala kan chikami ta mambyalin kami tagula gapu si mitimpuyugenmi kan Kristu. Hachi simsimmokla lalipud si chamchamu, 12 ta maichayaw chi kila-Apudyusla gapu kan chikami un ummula lamati kan Kristu. 13 Ked si sala, chikayuʼn uchum, lambyalilon bod Apudyus chikayu mantagula si langngeɏanyu si tuttuwan ugudla un Bibiɏuʼn Chameg un siya mataguwanyu. Ked ha lamatiyanyu kan Jesu Kristu, illidchon Apudyus chi Ispiritula ta inggew kan chikayu, ti siya ingkarila un maluttuwaan un tagula chitaku losan. 14 Ha inggewan chi Ispiritun Apudyus kan chitaku, siya mawayawayaan taku ya maluttuwaan taku un idchon Apudyus cha losan un ingkarila kan chitaku si umaliʼn eɏgew. Ked chaychayawon taku kilabiɏun Apudyus!

15 Ked inggan chi chamuʼn langngeɏak un lamati kayu kan Apu Jesus ya amod chi ayatyu kan cha losan un tagun Apudyus, 16 achipunku iyagey un manyamayaman kan Apudyus mipagapu kan chikayu. Kan cha losan un malluwaluwak, pasigku ikagasmok chikayu. 17 Ya iluwaluk kan Apudyus, un patunged machaychayaw un Ama taku ya siya ustuʼn Apudyus ya Aman Jesu Kristu un Apu taku, ta idchen chikayu si kilalaing un mampeɏpu si Ispiritun Apudyus ya ipakaammula bo kan chikayu mipanggop kan siya. 18 Ya iluwaluk bo ta silawan Apudyus cha somsomokyu ta pumadcha mangilasilanyu lu silu hachiʼn losanyu lamlamaon un awaton si umaliʼn eɏgew. Gapu si lanchutukala kan chitaku ya maawatanyu kilapotog ya kilabiɏun cha idchola kan cha tagula, 19 ya ta maliklayu kilakoscheɏn chi pallakabyelinla un maluɏutuɏung kan chitakuʼn mamati. Ya siya bo pallakabyelinla un impailala 20 si lalaguwala kan Kristu si latoyala, ya langipatugewala kan siya si machuwalala ud langit. 21 Ked inggan chi lallugiyan chi lubung inggala si sala ya umaliʼn eɏgew, lappun miyisuwan chi kilangatun Jesu Kristu, ti siya kangatuwan kan cha losan un alla kilabyelincha un manturay utla pita ya ulay ud langit, ti siya kangatuwan kan cha losan un papangat ya losan un aɏan kan ulay siluʼn ibyegan chi tagu. 22 Ti killingwan Apudyus si Jesu Kristu un manturay kan cha losan ya killingwala bo siya un pallakauɏu taku un mamati. 23 Ked cha losan un mamati, chicha pallakalong-egla. Ked cha losan un awed kan Jesu Kristu un uɏu, makabingaycha bo un pallakalong-egla.