1 Lummaus pu liman eɏgew, gummatong chi kangatuwan un pachi ya cha uchum un pallakayon cha Judio ud Caesarea. Inggew bo abugachu un inyawitcha un mangngachen Tertullus. Ummoycha losan si inggewan Gubillachuɏ Felix ot ichiɏumcha si Paul kan siya. 2 Impaayeg pun Gubillachuɏ si Paul, lan-ugud si Tertullus un pabyasuɏola siya. Kalala, “Apu Gubillachuɏ! Gapu si kilalainglu un mangituray kan chikami, lummin-awa biyegmi si labyeyeg. Achu cha killingwam un bummaɏuwan chi ili taku. 3 Ked chiluman un ayanmi ya losan un timpu, chakeɏn iyamanmi kan sika. 4 Ngim achipunku pion un taktakon sika. Kewam ta chongɏom yan akit chi allan ibyegami.

5 “Inchesanmi allaʼn tagu un kagugulu, ti pin-a ummoy langgulu kan cha Judio si intilun chi lubung, ked siya bo osaʼn pangat chi grupun chi Nazarenes. 6 Impachasla bo chilimok chi temploʼd Jerusalem, ot chilokmaanmi siya. 7 Ngim gummatong si komander Lysias ya cha suɏchachula ot pilloscha kan chikami, 8 ked imbilinla un umali kami utla ta ichiɏummi kan sika.* 24:8 Ha bogas chi alla ked lappun si uchum un manuscript si Greek. Lu imbistigeɏom siyaʼn mismu, asim maammuwan kan siya un tuttuwa losan cha ipabyasuɏmi kan siya.” 9 Lipati cha kadwalaʼn Judio pilaloklokancha un tuttuwa losan cha imbyegala.

10 Ot silinyasan pun chi Gubillachuɏ si Paul un man-ugud. Kalan Paul, “Apu Gubillachuɏ, ammuk un labyeyegka un lanturay ya langkuis kan chikamiʼn Judio si allaʼn ili. Ked magalasalak un malongbyat si impabyasuɏcha kan sakon. 11 Lalaka un maammuwam un simpuɏu ya chuwaʼn eɏgew chi lummaus si ummoyak ud Jerusalem lakachaychayawan kan Apudyus. 12 Si inggewak udchi, lappun langitullong kan sakon un lakasongsongbyat ud templo willu langgulu kan cha amod un tagu ud sinagoga willu uchum un lugeɏ. 13 Lappun ustù mampaloklokcha kan cha ipabyasuɏcha kan sakon si sala. 14 Ngim awed chi ibyegak kan sika. Suysuɏutok chi pammatin cha kristiano si manchaychayawak si Apudyus cha chachakkeɏ taku ked hachi kalancha un achipun ustuʼn tudtuchu. Ngim mamatiyak si losan un liigili si Lintog Moses ya cha losan un inggilin cha propeta. 15 Mallamlamaak kan Apudyus un taguwola kasin cha losan un latoy, cha bibiɏu man kan lawwik un isun chi mallalamlaman cha allaʼn tagu. 16 Gapu ta hachi patiyok, iggak chi kabyeeɏak un mangwa si bibiɏu ta mampeɏkas chi somsomokku si sangwalan Apudyus ya cha tagu.

17 “Lummaus ka pigan tawon un lalelak ud Jerusalem,† 24:17 Olom tawon malipud si ummoyalaʼd Jerusalem ta tungpaɏola ingkarila 18:22. Siyam tawon lummaus malipud si langabtala kan cha apostoles ya pallakayon cha mamati 15:1-29. ummoyak udchi ta inyak idchon chi pilak kan cha chogak un Judio un makasapuɏ ya inyak bo manchatun kan Apudyus si templo. 18 Katla cha pin-ak kingwa si langchesancha kan sakon udchi templo. Kaggamputku ugali takuʼn manchiɏus. Lappun amod si tagu ya lappun bo langgulu. 19 Ngim inggew cha uchum un Judio un lampeɏpuʼd Asia. Masapuɏʼn awedcha utla si sangwalam ked manchiɏumcha lu awed ipabyasuɏcha kan sakon. 20 Ngim lu lappuncha, ibyegan otyan cha allaʼn tagu lu simma byasuɏk un inchesancha si summisikkachek si sangwalan cha kukunsiseɏ ud Jerusalem. 21 Ti ha inggewak udchi, illipkawku un kalak, ‘Mamatiyak un umuli matagu kasin cha latoy. Siya chi lichiɏumak si sala.’ Hachi abus un imbyegak kan chicha.”

22 Gapu ta ad-achu ammun Gubillachuɏ Felix mipanggop si pammatin cha kristiano, pilagilokla imbistigeɏn chi kasus Paul un kalala, “Lu gumatong si komander Lysias, asik mangamung si kasuslu.” 23 Ot imbilinla si kapitan ta byentayancha si Paul ngim idchencha si wayala ya palubusancha cha gagayyomla un mangtod si kasapuɏala.

24 Lummaus ka pigan eɏgew, ummoy cha Felix kan Drusilla un asawalaʼn Judio udchi. Impaayegla si Paul ta chongɏoncha ibyegala mipanggop si pammati kan Jesu Kristu. 25 Ngim si lantudtuchuwan Paul mipanggop si lalintog un ugali, kilaattom ya gumatngan chi eɏgew un manguisan Apudyus kan cha tagu, ummogyat si Felix ot kalala, “Ustu hachi, ingkan yan si sala. Asik sika ayagen kasin lu awed wayak.” 26 Si hachi met laing un timpu lilamlamala un idchen Paul siya si pilak, ked siya gapu un pin-ala ayagen siya ya kaug-uggud siya.

27 Lummaus pu chuwaʼn tawon, lipasali si Porcius Festus kan Felix un Gubillachuɏ. Ngim ummoyon pun si Felix, tilelala si Paul si byabyayɏuchen ti pion cha Judio siya.