1 Ummoy bo cha Paul ud Derbe ya Lystra. Udchi inggewan Timothy, un osaʼn mamati, ha ilala ked Judio un mamati ngim ha amala Grego. 2 Masmas-om cha mamati ud Lystra ya Iconium kan Timothy. 3 Pion Paul un iyawit siya. Ngim gapu ta ammun cha losan un tagu udchi un Gentil chi amala, impasogyatla siya ta achipun mansigeb chi somsomok cha Judio si kaili-ili un ayancha. 4 Si kacha ili un ummoyancha, impakaammucha kan cha mamati cha bilin un lan-uuguchen cha apostoles ya cha pallakayon ud Jerusalem un masapuɏʼn tuttuwaoncha. 5 Ot kummoscheɏ pammatin cha mamati ya lachogchog-an chi bilangcha si ileɏgew.

6 Ot ummoy cha Paul si iliʼn sakupon Phrygia ya Galatia, ti impalit chi Ispiritun Apudyus un mambyegbyega si ugud Apudyus ud Asia. 7 Gummatongcha pun si kiged chi Mysia un probinsiya, umoycha oyya ud Bithynia, ngim achipun chi Ispiritun Jesus impalubus chicha. 8 Ot langoycha ud Mysia ot lan-osogcha ud Troas.

9 Si hachiʼn labi, inggew chi impailan Apudyus kan Paul un isun chi in-ilop, intullongla osaʼn leɏakiʼn iMacedonia un summisiked un mangkadkachegu kan siya, “Umalika ud Macedonia ta tuɏungam chikami.”

10 Lagamput pu hachi lipaila, kakma kami lansingit si lanlugelanmi un umoy ud Macedonia ti ammumi un siya mangibuulan Apudyus kan chikami ta ibyegami bibiɏuʼn chameg kan cha tagu udchi* 16:10 Ha ‘kami’ si alla, piolaʼn uguchon si Luke un langigili si liblun alla litun-ud kan cha Paul..

11 Lanlugen kami si bapur ud Troas ot langkaw-as kami ud Samothrace. Labigat pun, intuɏuymi ud Neapolis. 12 Lanchissaeg kami udchi ot malidchaɏan kami un ummoy ud Philippi, osaʼn kachakɏan un siudad si sakup chi Macedonia. Kaachuwan un taguʼn inggew udchi ked iRome. Ked iRome bo cha turay. Ot illinggew kami si pigan eɏgew.

13 Si eɏgew chi Sabyechuʼn man-illongan, ummoy kami si lasin chi siudad un igid chi chewwang, ti kalanmi pun lu siya lugeɏ un luluwaluwan. Ummamuy kami ot lakaug-uggud kami kan cha byebbyebyai un lachagup udchi. 14 Osa kan cha lanchochongngeɏ ked si Lydia un iThyatira un mallalaku si langilan luput un man-ayumamon. Siya ked Gentil, lanchaychayaw kan Apudyus. Si lanchochongngeɏyala si imbyegbyegan Paul, impakaawat Apudyus kan siya ot lamati. 15 Ot lampabunyeg cha losan un simbyeyan. Ot ilayagela chikami ud uwacha, un kalala, “Lu ibilangyuʼn lamatiyak kan Apu Jesus, umali kayu inggew ud uwami.” Ot impatutla un ingkami uwacha.

16 Si osaʼn eɏgew un ummoyanmi si lugeɏʼn luluwaluwan, ilabotmi osaʼn musassun byebyeɏasang un lalaing un pin-a mammadtu, ti alla aɏunganla. Gapu si kilalaingla, achu-achu cha pilak un pin-an chi sinmusassu kan siya aɏan. 17 Lituntun-ud kan chikami kan Paul, ked ip-ipkawla, “Cha allaʼn leɏaki ked bubùulon chi Kangatuwan un Apudyus, ibyegbyegacha kan chikayu chi chaɏan un mataguwan.” 18 Achun eɏgew un kamatchi pin-ala killingwa inggalà lasngay si Paul. Ot lansagung kan siya ot kalala si aɏunganla, “Gapu si kilabyelin chi ngachen Jesu Kristu ibyegak un lumawaka kan siya.” Ot kakma lummawa chi aɏunganla.

19 Laammuwan pun chi sinmusassu kan siya un lappun mangeancha si pilak, chilokmaancha cha Paul kan Silas ot giluyuguyudcha chicha illiyoy si inggewan cha papangat chi ili. 20 Illiyoycha chicha kan cha kuis cha Romano ot kalancha, “Cha allaʼn Judio, pin-acha manggulu si siudad taku, 21 ti itudtuchucha ugalin sumupling si lintog taku ya achipun makwan suɏuton takuʼn Romano.”

22 Si hachi lichoga cha amod un tagun simpapakuy mamabyasuɏ kan chicha. Ot imbilin cha kuis un lusayancha chicha ya impabyautcha chicha. 23 Lagamputcha pun chicha pilatunged bilaubyautan, illiggacha chicha si byabyayɏuchen ot imbilincha si man-aachug ta ammala chicha aadchugen. 24 Illiggan chi man-aachug chicha si sugok chi byabyayɏuchen ot inyusukla ikicha si mambyeatan chi manchegson un kayuʼn lagoobyen.

25 Gawan labi pun, lalluwaluwalu ya langkankanta cha Paul kan Silas un manchaychayaw kan Apudyus. Manchochongngeɏ cha kadwachaʼn byaɏud kan chicha. 26 Oli pun, illiggala kaog-ogyat un chita ot liyog-on chi lisaachen chi byabyayɏuchen. Ot kakma liwalit cha losan un sawang ot laamin lapuksay cha kaweɏn cha byaɏud.

27 Bummangon pu man-aachug, intullongla un laamin liwalit cha sawang chi byabyayɏuchen, lilukpusla sablila ta otoyola oyya long-egla, ti kalala lu ummawid losan cha byaɏud. 28 Ngim lapalakuy si Paul, un kalala, “Achim otoyon chi long-eglu, ti wechewed kami utla!”

29 Lampaaɏa hachiʼn man-aachug si silaw kan cha kadwala. Ot masaswok si inggewancha Paul kan Silas, ot lamaypayogpog un lampalintuming si sangwalancha. 30 Ot illawala chicha ot makaimus, “Simma masapuɏʼn kook ta mataguwak.”

31 Kalancha, “Mamatika kan Apu Jesus ked matataguka, ya pati bo cha kabyeɏoylu.” 32 Ot intuɏuycha imbyegbyega ugud chi Apu kan chicha losan un inggew si byeɏoyla. 33 Si hachiʼn gawan labi, intallay chi man-aachug chicha si awechen chi chelum ot chuɏsala cha sugatcha. Lagamput pun, kakma lampabunyeg ya losan un kabyeɏoyla. 34 Intallayla cha Paul kan Silas ud uwacha ot pilakalala chicha. Lagalas siya ya losan un kabyeɏoyla gapu ta lamaticha kan Apudyus.

35 Labigat pun, lambuun cha kuis cha iRome si pulis un umoy mangibyega si man-aachug, “Ibukatlu cha hachiʼn leɏaki.”

36 Ot kalan chi man-aachug kan Paul, “Imbilin cha kuis un mibukat kayu kan Silas. Ked bibiɏuʼn umoyon.”† 16:36 Ha piolaʼn uguchon si Greek, ingkayun ked mallin-ot chi somsomokyu.

37 Ngim kalan Paul kan cha pulis, “Bilautancha chikami si inggewan cha achuʼn tagu un lappun inchesancha si lakabyasuɏanmi ya imbyaɏudcha chikami ked sigud un Romano kami. Ked si sala pionchaʼn gigillok kamiʼn umoyon. Achipun makwa katchi! Cha kuis cha umali utla ta chicha mismuʼn mangitallay kan chikami.”

38 Ot ummoy cha pulis imbyega hachiʼn ugud kan cha kuis, ot ummogyatcha si chingngeɏcha un Romano cha Paul kan Silas. 39 Ot ummoycha si byabyayɏuchen ta mampakawancha kan chicha. Lagamput pun impeɏawacha chicha ot ilàaɏukcha chicha ta telancha siudad. 40 Lummawacha si byabyayɏuchen ot ummoycha ud uwan cha Lydia. Udchi inchesancha cha mamati ot silegegcha chicha. Ot umoyoncha.