1 Allaya ibyegak kan chikayu mipanggop si mangalan si makan un liyatang si silan-apudyus. Tuttuwa mibyegbyega un alla losan ammu taku. Ngim an-allechen taku, ti ha ammu taku kagga mangichaɏan si tumangsitan chi somsomok taku. Ngim ha ayat pakoskoscheɏola pammati taku losan. 2 Ti ha taguʼn mamas-om si long-egla un achu kalu ammula, hachi mangipaila un tuttuwaʼn kuɏang chi ammula. 3 Ngim ha taguʼn mangay-ayat kan Apudyus ked ibilang Apudyus un tagula siya.

4 Lu mipanggop si mangalan si makan un liyatang si silan-apudyus: Ammu taku un chakampun si tuttuwaʼn Apudyus, ti ammu taku un ossaan si Apudyus. 5 Ti ulay lu achu cha kalanchaʼn apudyus ud langit willu utla pita ked tuttuwaʼn achu cha apudyus ya achu cha ap-apu, 6 ngim kan chitaku, ossaan si Apudyus. Siya Ama taku un langwa kan cha losan ya siya gapun chi allaʼn mataguwan taku. Ya ossaan bo Apu taku un Siya si Jesu Kristu, ked mipagapu kan siya lakwa cha allaʼn losan ya matagu taku ing-inggala.

7 Ngim achipun cha losan un tagu ammu allaʼn katuttuwaan. Awed cha uchum un tagu un piliingsacha un manchayaw kan cha silan-apudyus, ked lu kaloncha makan un liyatang si silan-apudyus, kalancha lu killancha kalon cha silan-apudyus. Gapu ta lakapsut chi somsomokcha, makabyasuɏcha kan Apudyus lu kaloncha. 8 Ngim ha katuttuwaan, chakampun un makan chi mampabiɏuwan Apudyus kan chitaku. Ti lappun kalala kan Apudyus ulay kalon taku willu achipun, ti lappun ituɏung chi makan ya lappun bo yam-alola si pammati.

9 Ngim masapuɏʼn an-allechen taku kilawaya taku ta achipun cha kadwa taku makabyasuɏan un lakapsut chi pammatila. 10 Ta lu awatla un sika alla ammula, ked manga-manganka si chaɏom chi templon cha silan-apudyus. Lu itullong chika si osaʼn tagu un lakapsut chi somsomokla, siya maay-ayan chi somsomokla un makakan si makan un liyatang kan cha silan-apudyus. 11 Ked gapu si achuʼn ammum, mayam-an chi suludluʼn lakapsut chi somsomokla un langkatoyan Jesu Kristu byasuɏla. 12 Ked lu makabyasuɏka si suludlu un lakapsut chi pammatila ya am-amchom saktan chi lakapsut un somsomokla, makabyasuɏka kan Kristu. 13 Ked lu siyad makabyasuɏan chi suludku mangalak si makan un liyatang si silan-apudyus, iyageykuʼn mangan kan cha kamatchi taplu achipun makabyasuɏ suludku.