1 Tɑcɑɑ yɔɣɔtɑ ɩ tɔm

nɑ tə́ tɑlɑ Hɑtəlɑkɩ tɛtʋ tɑɑ.

Tə nɩɩ Tɑmɑsɩ ɩcɑtɛ tɑɑ.

Ɩlɛ pə tɑɣɑ Ɩsɛɣɛlɩ nyə́mɑ tike kɛ ɩ pɑɑsəɣənɑ.

Amɑ yəlɑɑ tənɑɣɑ.

2 Tɑmɑsɩ ɩcɑtɛ cɔlɔ Hɑmɑtɩ ɩcɑtɛ,

nɑ Tiii nɑ Sitɔŋ ɑcɑlɛɛ nnɑ ɑ wɛnɑ

kpelikpekɑ sɔsɑɣɑ tɔɣɔ Tɑcɑɑ yɔɣɔtəɣənɑ.

3 Tiii nyə́mɑ ɩ́ ŋmɑwɑ mə ɩcɑtɛ kɛ koluŋɑ kɛ́.

Ɩ́ kɑɑ liɣitee ɩsɩɩ kɑnyəŋɑ nɑ wʋlɑ ɩsɩɩ ɑfəlɑ.

4 Amɑ Tɑcɑɑ kɑ́ lɛɛkɩ-tɛ.

Ɩ kɑ́ tusi tə koluŋɑ kɛ teŋku tɑɑ

nɑ ɩ́ nyɑɣɑsɩ-tɛɣɛ kɔkɔ.

5 Filiisi ɑcɑlɛɛ Asəkɑlɔŋ, nɑ Kɑsɑ,

nɑ Ɩkoloŋ nyə́mɑ kɑ́ nɑ́ mpʋ.

Sɔɣɔntʋ kɑ́ kpɑ-wɛ nɑ pɑ́ kpisi kɑntəlʋɣʋ.

Wulɑʋ kɑɑ kɑɑsɩ Kɑsɑ.

Pəyele Asəkɑlɔŋ ɩcɑtɛ nɑ́ kɑɑ nɑ tə yəlɑɑ.

6 Yəlɑɑ sitɑɑ kɛ́ nɑ pɑ́ kɔɔ pɑ́ cɑɣɑ Asətɔtɩ.

Mɑɑ ləsɩ mpi pə tʋɣɩ Filiisi nyə́mɑ kɛ kɑlɑmpɑɑnɩ tɔ.

7 Mɑɑ ləsɩ mə nɔɔsɩ tɑɑ kɛ́

nɑntʋ nti pɑ tɑ lɛntɩ tɔ,

yɑɑ kʋlɑlɑɑtʋ.

Mə tɑɑ mpɑ pə kɑɑsɑɑ tɔ,

nɑ Yutɑ nyə́mɑ ɩ́ kɑ́ yɑɑnɑ-m mə Ɩsɔ.

Ɩkoloŋ nyə́mɑ kɑ́ sʋʋ mə yəlɑɑ tɑɑ ɩsɩɩ

Yepusi nyə́mɑ lɑpɑ tɔ.

8 Mɑɑ tɑŋ Ɩsɛɣɛlɩ tɛtʋ kɛ́.

Yoolɑɑ nɑpəlɩ kɑɑ pəsɩ-tɩ,

pɑɑ tɛɛlɑɑ yɑɑ kɔntɑɑ.

Pə́cɔ́ ŋmɑkəllʋ kɑɑ tɑsɑ mə tɔɔ kɛ́ təŋnɑʋ.

Mpi tɔ, mɑ pɑɑsəɣənɑ-mɛɣɛ.

9 Ḿpʋɣʋ Tɑcɑɑ tɑsɑɑ sɩ:

Yosɑlɛm ɩcɑtɛ nyɑ́,

nyɑ́ lɑŋlɛ ɩ́ hʋlʋmɩ sɔsɔm.

Siyɔŋ nyə́mɑ mɛ,

mə wulɑʋ kɔŋnɑ ntɛɣɛ mə cɔlɔ.

Ɩ siɣisɑɑ nɑ ɩ kɛ́ ɑkɑ.

Ɩ pɑsɑ ɩ tɩ nɑ ɩ́ cɑɣɑ kpɑŋɑɣɑ tɔɔ.

10 Mɑɑ ləsɩ Ɩfəlɑyim tɑɑ kɛ́ yoou kɛɛkɛnɑɑ

nɑ Yosɑlɛm tɑɑ kɛ́ pə kpɑɣɑnəŋ nɑ pə tɔɔŋ.

Wulɑʋ ɩnɩ ɩ kɑ́ tʋ piitimnɑɑ kɛ hɛɛsʋɣʋ.

Ɩ kɑ́ tɔɣɔ kɑwulɑɣɑ kɛ ɑntulinyɑ tənɑ təpɑɩ.

11 Ḿpʋɣʋ Tɑcɑɑ yɔɣɔtɑɑ sɩ:

Mɑɑ cɛ mə nyə́mɑ mpɑ pɑ təkɑ sɑləkɑ

kɛ lɔkɔ wei ɩ tɑɑ lʋm fɛɩ tɔ.

Mɑ́ nɑ mɛ tɑ́ nɔɣɔ pɛɛlʋɣʋ kɔtɑɣɑ

cɑləm tɔɔ kɛ́ mɑɑ lɑ mpʋ.

12 Sɑləkɑtʋnɑɑ mɛ,

ɩ́ məlɩ koluŋɑ ɩcɑtɛ tɑɑ nɑ tɛɛlʋɣʋ.

Sɑŋɑ mɑ tɑsəɣɩ yɔɣɔtʋɣʋ sɩ

mɑɑ lɛɛtɩ-mɛɣɛ kʋpɑntʋ kɛ tɔm nɑɑlɛ.

13 Mɑɑ pəsɩ Yutɑ kɛ tɔɔʋ,

nɑ Ɩfəlɑyim kɛ nyəmɑ́.

Mɑɑ kʋsɩ Siyɔŋ nyə́mɑ

nɑ pɑ́ yoonɑ Kəlɛɛkɩ nyə́mɑ

nɑ mɑ́ lɑ́ nɑ pɑ́ pəsɩ ɩsɩɩ ɑkɑ lɑɣɑtɛ.

14 Tɑcɑɑ mɑ́ mɑɑ sɔɔsɩ mɑ yəlɑɑ tɔɔ.

Mɑɑ yɑɣɑ ɑpɑlʋtutuɣu ɩsɩɩ tɛʋ holɑ.

Mɑɑ tɔ nyəmɑ́ ɩsɩɩ tɛʋ ŋmɛləsʋɣʋ.

Mɑɑ hɔkɔ mə wɑɑlɩ ɩsɩɩ ilim mpətəŋ tɔɔ kɑcuculɑɣɑ.

15 Pə tənɑ pə tʋ Tɑcɑɑ mɑ́ mɑɑ kenti mɑ yəlɑɑ tɔɔ.

Mɑɑ tɔ mə kolontunɑɑ kɛ pəntɔlʋpɛɛ nɑ mɑ́ wɑkəlɩ-wɛ.

Ɩsɛɣɛlɩ nyə́mɑ ɩ́ kɑ́ kʋ mə kolontunɑɑ.

Cɑləm kɑ́ kpe ɩsɩɩ sʋlʋm.

Yɑɑ ɩsɩɩ kɔtɑɣɑ təlɑtɛ cɑləm sukuɣu poosiisi,

nɑ pɑ́ ŋmɩɩsɩ tə ŋkuluŋɑsɩ tɔɔ tɔ.

16 Wɑɑtʋ ɩnɩ ɩ tɑɑ kɛ́

Ɩsɔ Tɑcɑɑ kɑ́ wɑɑsɩ ɩ yəlɑɑ.

Ɩsɩɩ tiikilu wɑɑsʋɣʋ ɩ kɑləkʋ tɔ.

Ɩ́ kɑ́ teeki kɔkɔ ɩsɩɩ liɣitee pɛɛ.

17 Mə tɛtʋ tɑɑ,

lɑŋhʋlʋmlɛ nɑ kɑcɔkɑ kɑ́ wɛɛ.

Tɔɣɔʋ nɑ nyɔɔʋ kɑ́ hɑ ɩfepiyɑ kɛ kpelikpekɑ.