Ɩ́ sɑmɩ-ɩ hɑtoo ɩsɔtɔnʋɣʋ tɑɑ,

ɩ́ sɑmɩ-ɩ hɑtoo ɩsɔtɑɑ.

2 Ɩsɔtɑɑ tillɑɑ mɛ mə tənɑ ɩ́ sɑ Ɩsɔ,

Ɩsɔ yoolɑɑ mɛ mə tənɑ ɩ́ sɑmɩ-ɩ.

3 Ilim nɑ ɩsɔtʋ ɩ́ sɑmɩ-ɩ,

ɩsɔtʋlʋŋɑsɩ mɛ mpɑ ɩ́ tee kɔkɔ tɔ ɩ́ sɑmɩ-ɩ.

4 Ɩsɔtɑɑ ɩsɔtɔnəŋ mɛ ɩ́ sɑ Ɩsɔ,

nɑ lʋmnɑɑ mpɑ mɛ ɩ wɛ ɩsɔtɔnʋɣʋ tɔɔ tɔ mɩɩ sɑmɩ-ɩ.

5 Pɑ tənɑɣɑ mpʋ pɑ́ sɑ Tɑcɑɑ hətɛ.

Mpi tɔ, Ɩsɔ yɔɣɔtənɑ nɑ pə́ ŋmɑ-mɛ.

6 Ɩnɩ ɩ sɩɩnɑ-mɛɣɛ mə lonɑ kɛ tɑm tɔɔ,

ɩ sɩɩ-mɛɣɛ kiiŋ, pə fɛɩ sɩ ɩ́ yɔkɩ-ɩ.

7 Tɛtʋ tɔɔ nyə́mɑ mɛ ɩ́ sɑ Tɑcɑɑ,

teŋkunɑɑ nɑ pɑ tɑɑ tʋmɑɑ sɔsɑɑ ɩ́ sɑmɩ-ɩ.

8 Nɑ kɔkɔ nɑ tɛʋ tɔmpɛɛ nɑ kʋ kpɑɑkpɑɑcɑʋ,

nɑ ɩhunte nɑ tɛʋ heelim sɔsɔɔm mɛ mpɑ

ɩ́ lɑkɩ ɩsɩɩ ɩ yɔɣɔtʋɣʋ tɔ.

Ɩ́ sɑ Tɑcɑɑ.

9 Pɔɔŋ nɑ pulɑsɩ mɛ mə tənɑ,

nɑ tɩɩŋ kʋlʋlʋŋ nɑ sɔsɔɔŋ tənɑ ɩ́ sɑmɩ-ɩ.

10 Tɑɑlɛ wontu nɑ təyɑɣɑ nyəntʋ,

nɑ ɑtɛ kututuutu nɑ sumɑsɩ.

Ɩ́ sɑ Tɑcɑɑ.

11 Atɛ ɑwulɑɑ nɑ yəlɑɑ tənɑ,

nɑ ɑwulumpiyɑ nɑ ɑtɛ hʋʋlɑɑ tənɑ.

Ɩ́ sɑ Tɑcɑɑ.

12 Akpɑtəlɑɑ nɑ piyɑ

ɩfepiyɑ nɑ pɛɛlɑɑ ɩ sɑmɩ-ɩ.

13 Ɩ́ sɑ Tɑcɑɑ hətɛ.

Mpi tɔ, tə tike ntɛ́ sɔsɔɔlɛ.

Ɩsɔ sɔsɔɔntʋ wɑɑsɑ ɩsɔtɔnʋɣʋ nɑ tɛtʋ kɛ́.

14 Tɑcɑɑ hɑ ɩ yəlɑɑ kɛ toŋ kɛ́.

Pə tɔɔ kɛ́ ɩ yəlɑɑ kʋpɑmɑ sɑŋɩ-ɩ.

Ɩsɛɣɛlɩ yəlɑɑ mpɑ mɛ ɩ kpətənɑ-ɩ tɔ ɩ́ sɑŋɩ-ɩ.

Ɩ́ sɑ Tɑcɑɑ.