1 Ḿpʋ́ɣʋ́ kʋyɑkʋ kʋhɛɛsʋɣʋ nɑkʋlɩ Yesu sʋʋ Fɑlisɑnɑɑ sɔsɔ nɔɣɔlʋ ɩ tɛɣɛ tɔɣɔʋ. Mpɑ pɑɑ wɛ tǝnɑ tɔ pɑ cɑɣɑɑ nɑ pɑ́ keŋnɑ-ɩ teu. 2 Yʋlʋ nɔɣɔlʋ ɩ kɑ sǝŋɑ ɩ ɩsɛntɑɑ, nɑ tɔnʋɣʋ tɔɔ ɑsilimɑ kʋtɔŋ wɛnɑ-ɩ. 3 Ḿpʋ́ɣʋ́ Yesu pɔɔsɑ Ɩsɔ Tɔm sɛɣɛsǝlɑɑ nɑ Fɑlisɑnɑɑ sɩ: Tɑ mpɑɑʋ tɑɑ, pǝ mʋnɑ pɑ́ wɑɑsɩ kʋtɔntʋ kɛ kʋyɑkʋ kʋhɛɛsʋɣʋ wule yɑɑ pɑ́ tɑɑ wɑɑsɩ-ɩ?

4 Amɑ Fɑlisɑnɑɑ mpɛ pɑ tɑ tisi cɔʋ. Tǝnɑɣɑ Yesu hɔmɑ kʋtɔntʋ nɑ ɩ́ wɑɑsɩ-ɩ, nɑ ɩ́ heeli-ɩ sɩ ɩ́ tɛɛ. 5 Ḿpʋ́ɣʋ́ Yesu pɔɔsɑ Fɑlisɑnɑɑ sɩ: Kʋyɑkʋ kʋhɛɛsʋɣʋ wule, mǝ tɑɑ ɑwe nɑwɑ ɩ pǝyɑɣɑ yɑɑ ɩ nɑʋ hotɑ lɔkɔ tɑɑ, nɑ ɩ́ yele lǝsʋɣʋ kɛ kpɑkpɑɑ sɩ kʋyɑkʋ kʋhɛɛsʋɣʋ wule? 6 Ɩlɛnɑ pɑ́ mɑɣɑsɩ-tǝɣɩ cɔʋ nɑ pɑ́ kpisi.

7 Yesu nɑwɑ sɩ mpɑ pɑ yɑɑ tɔɣɔʋ kɛ mpʋ tɔ, pɑ huliɣinɑ tǝmɑɣɑ kpelee kʋpɑnɑ tɔɔ cɑɣɑʋ. Ɩlɛnɑ ɩ́ sɛɣɛsɩ-wɛ sɩ: 8 Ye nɔɣɔlʋ kpɑɣɑ ɑlʋ nɑ ɩ́ yɑɑ-ŋ tɔɣɔʋ, ń tɑlɑɑ, tɑɑ hulinɑ tǝcɑɣɑlɛ kʋpɑntɛ nɑ pǝ́cɔ́. Ntɑnyɩ ɩsǝntɔ pɑ yɑɑ nɔɣɔlʋ ɩ́lɛ́ nɑ ɩ́ kǝlɑ-ŋ. 9 Pǝ́ tɑɑ kɔɔ nɑ wei ɩ yɑɑ-mɛɣɛ tɔɣɔʋ tɔ ɩ́ heeli-ŋ sɩ: Kʋlɩ nɑ ń kɑɑsɩ ɩnɛɣɛ tǝcɑɣɑlɛ. Ɩlɛ n kʋlǝnɑ fɛɛlɛ ntɛ́ tǝnyɔɔmɩɩ, nɑ ń cɑɣɑnɑ wɑɑlɩ tɔɔ. 10 Amɑ ye pɑ yɑɑ-ŋ tɔɣɔʋ, ń tɑlɑɑ, cɑɣɑnɑ wɑɑlɩ tɔɔ. Ɩlɛ wei ɩ yɑɑ-mɛɣɛ tɔɣɔʋ tɔ ye ɩ kɔmɑ ɩ́lɛ́ ɩ kɑ́ tɔnɑ-ŋ sɩ: Apɑŋ nyɑ́, tuusinɑ cǝnɛ tɔɔ nɑ ń cɑɣɑ tǝcɑɣɑlɛ kʋpɑntɛ. Sɑɑ ɩnɩ pɑ tʋ-ŋ teeli kɛ nyɑ́ nɑ pɑ tǝnɑ mpɑ ɩ́ cɑɣɑ ḿpʋ́ɣʋ́ tɔɣɔʋ tɔ pɑ ɩsɛntɑɑ kɛ́. 11 Pǝ tɑɣɑ pʋlʋ tɔɔ, wei ɩ́ hɔŋ ɩ tɩ pɑɑ tisi-ɩ, nɑ wei ɩ́ pɑsǝɣɩ ɩ tɩ, pɑɑ kʋsɩ ɩ nyʋɣʋ.

12 Ḿpʋ́ɣʋ́ Yesu heelɑ wei ɩ yɑɑ-ɩ tɔɣɔʋ tɔ sɩ: Ye n lɑpɑ tɔɣɔnɑɣɑ yɑɑ ɑcimɑ, tɑɑ yɑɑ nyɑ́ cewɑɑ, yɑɑ nyɑ́ tɛɛtʋnɑɑ, yɑɑ nyɑ́ lʋlʋɣʋ nyǝ́mɑ, yɑɑ nyɑ́ toŋtʋnɑɑ lɛlɑɑ. Pǝ tɑɣɑ pʋlʋ tɔɔ, pɛlɛ pɑ pǝsǝɣɩ tɔtɔ nɑ pɑ́ yɑɑ-ŋ tɔɣɔʋ, nɑ pɑ́ lɛɛtɩ-ŋ nyɑ́ kʋcɔɔʋ kɛ kpɑkpɑɑ. 13 Amɑ ye n lɑpɑ ɑcimɑ, koti kʋnyɔntʋnɑɑ, nɑ ɑcɑmɑɑ, nɑ kɑɑkɑlɑsɩ, nɑ yʋlʋmɑɑ, nɑ pɑ́ tɔɣɔ. 14 Wɑɑtʋ ɩnǝɣǝlɛ n hikɑ kʋpɑntʋ. Pǝ tɑɣɑ pɑ tɑɑ nɔɣɔlʋ kɑ́ pǝsǝnɑ nɑ ɩ́ lɛɛtɩ-ŋ-tɩ. Amɑ Ɩsɔ kɑ́ fɛlǝnɑ-ŋ kʋyɑŋku ɩ kɑ́ feesi sǝtɑɑ mpɑ pɑɑ lɑpɑ kʋpɑntʋ tɔ.

15 Pɑ nɩɩ tɔm tǝnɛ ɩnɩ ɩlɛnɑ Yesu nɑ mpɑ pɑ cɑɣɑ tɔɣɔʋ tɔ pɑ tɑɑ lɛlʋ yɔɣɔtɩ-ɩ sɩ: Wei ɩ kɑ́ cɑɣɑ tɔɣɔʋ kɛ Ɩsɔ Kɑwulɑɣɑ tɑɑ tɔɣɔlɛ ɩsɩɩ leleŋ nɩɩlʋ te.

16 Tǝnɑɣɑ Yesu cɔ pʋntʋ ɩnɩ sɩ: Apɑlʋ nɔɣɔlʋ ɩ lɑpǝnɑ tɔɣɔnɑɣɑ tǝkpɛtɛkpɛtɛ. Ɩlɛnɑ ɩ́ yɑɑ yǝlɑɑ sɑmɑɑ sɩ pɑ́ kɔɔ pɑ́ tɔɣɔ. 17 Pǝ kɔmɑ nɑ pǝ pɩɩ, ɩlɛnɑ ɩ́ tili ɩ pǝyɑlʋ sɩ ɩ́ polo nɑ ɩ́ heeli mpɑ ɩ yɑɑ tɔɣɔʋ tɔ sɩ pɑ́ kɔɔ mpʋ, pǝ tɑlɑɑ. 18 Amɑ pɑ tǝnɑ pɑ sʋʋ-ɩ wiinɑʋ sɩ pɑ kɑɑ pǝsɩ. Kɑncɑɑlɑɣɑ nyǝŋ heelɑ tillu sɩ: Mɑ yɑpɑ tɑɑlɛ, ye mɑ tɑ polo mɑ nɑ-tɛ pǝ kɑɑ lɑ-m teu. Mpʋ tɔ, mɑ sǝlǝmǝɣɩ-ŋ mpɑɑ, mɑ kɑɑ pǝsɩ nɑ mɑ́ kɔɔ. 19 Lɛlʋ nɑ́ɑ́ tɔ sɩ: Mɑ yɑpɑ nɑɑŋ kʋhɑlǝŋ kɛ nɑɑnʋwɑ, mɑ cɑɑ mɑ tɑmsɩ-ɩ nɑɑlɛ nɑɑlɛ nɑ mɑ fɑlǝsɩ-ɩ. Mpʋ tɔ, mɑ sǝlǝmǝɣɩ-ŋ mpɑɑ, mɑ kɑɑ pǝsɩ nɑ mɑ́ kɔɔ. 20 Nɑ lɛlʋ tɔ tɔtɔ sɩ: Nɔɔnɔɔ kɛ́ mɑ kpɑɣɑ ɑlʋ, mɑ kɑɑ pǝsɩ nɑ mɑ́ kɔɔ. 21 Ḿpʋ́ɣʋ́ tillu mǝlɑ ɩ cɑɑ kiŋ nɑ ɩ́ kɛɛsɩ-ɩ ɩsǝnɑ pǝ lɩɩwɑ tɔ. Tǝnɑɣɑ tǝyɑɣɑ cɑɑ ɩnɩ pɑ́ɑ́nɑ́ lɑpɑ-ɩ, nɑ ɩ́ tɑɣɑnɩ tillu kɛ tiluɣu sɩ: Polo lɔŋ kɛ kʋyɛɛŋ tɑɑ nɑ hɑpɛɛ nɔɔsɩ nɑ ń kuu kʋnyɔntʋnɑɑ, nɑ ɑcɑmɑɑ, nɑ yʋlʋmɑɑ, nɑ kɑɑkɑlɑsɩ, nɑ ń kɔnɑ. 22 Pǝ tɑsɑ pǝcɔ ɩlɛnɑ tillu tɑɣɑnɩ mǝlʋɣʋ nɑ ɩ́ heelɩ-ɩ sɩ: Tɑcɑɑ, mɑ lɑpɑ nti n kɛɛsɑɑ tɔ, pɑɑ nɑ mpʋ tǝcɑɣɑlɛ kpisɑ yem kɛ́. 23 Tǝnɑɣɑ tǝyɑɣɑ cɑɑ tɑsɑ-ɩ tɔm sɩ: Cɛ mpɑɑŋ tɑɑ nɑ ń cɔɔ kutuluŋ kilɑ kilɑ, ye n hikɑ mpɑ n kpɑ-wɛɣɛ yem yem nɑ ń sʋʋnɑ nɑ mɑ tǝyɑɣɑ su. 24 Mɑ heeliɣi-mɛ sɩ yǝlɑɑ mpɑ pɑ hǝtɛ pɑ yɑɑnɑɑ tɔ, pɑ tɑɑ nɔɣɔlʋ kɑɑ tɔɣɔ mɑ tɔɣɔnɑɣɑ.

25 Ḿpʋ́ɣʋ́ sɑmɑɑ tuutuumɑ hu Yesu wɑɑlɩ. Tǝnɑɣɑ Yesu pǝsɑɑ nɑ ɩ́ tɔ-wɛ sɩ: 26 Ye yʋlʋ ɩ́ cɑɑ ɩ tǝŋɩ-m nɑ ɩ́ tɑ lɩɩ luɣu kɛ ɩ cɑɑ nɑ ɩ too, nɑ ɩ ɑlʋ nɑ ɩ piyɑ, nɑ ɩ tɑɑlʋnɑɑ nɑ ɩ kɔɣɔnɑɑ nɑ ɩ newɑɑ, hɑlǝnɑ ɩ́ kpɛntǝnɑ ɩ mɑɣɑmɑɣɑ ɩ tɩ, pɑɑ ɩ tǝŋɑ-m, ɩ kɑɑ pǝsɩ nɑ ɩ́ lɑ mɑ ɩfɑlʋ. 27 Ye wei ɩ tɑ sǝɣǝlɩ ɩ sǝm tesikɑ nɑ ɩ́ tǝŋɩ-m, pʋntʋ kɑɑ pǝsɩ nɑ ɩ́ lɑ mɑ ɩfɑlʋ. 28 Ye mǝ tɑɑ nɔɣɔlʋ cɑɑ kutuluɣu sɔsɔɔŋkʋ ŋmɑʋ, ɩ cɑkɩ kɛ́ nɑ ɩ́ mɑɣɑsɩ pǝ tǝnɑ pǝ liɣitee nyʋɣʋ, sɩ ɩ nɑɑ sɩ ɩ liɣitee kɑ́ tɑlɑ-ɩ yɑɑ ɑ kɑɑ tɑlɑ-ɩ. 29 Tɛfɛ ɩ kɔŋ ɩ́ tɛ kite sɩɩʋ, ɩlɛnɑ ɩ́ kpisi kʋ kʋɣʋ, nɑ tɛɛlɑɑ kɔɔ nɑ pɑ́ woŋi-ɩ, 30 sɩ hɑlɩ yʋlʋ ɩ́ sɩɩ kutuluɣu nɑ ɩ́ kpisi kʋ kʋɣʋ nɑ? 31 Mpʋ tɔtɔɣɔ pǝ wɛɛ, ye wulɑʋ nɔɣɔlʋ ɩ cɑɑ ɩ yoonɑ wulɑʋ lɛlʋ, ɩ cɑkɩ kɛ́ nɑ ɩ́ mɑɣɑsɩ teu nɑ ɩ́ nɑ́ sɩ yoolɑɑ iyisi nɑɑnʋwɑ (10000) wei ɩ wɛnɑ tɔ, ɩ pǝsǝɣɩ nɑ ɩ́ yoonɑ ɩ kolontu wei ɩ́lɛ́ ɩ wɛnɑ yoolɑɑ iyisi hiu (20000) tɔ, yɑɑ ɩ kɑɑ pǝsɩ. 32 Ye ɩ nɑwɑ sɩ ɩ kɑɑ pǝsɩ, ɩ kʋsǝɣɩ yǝlɑɑ kɛ kʋtɑtʋɣʋ kɛ́ nɑ ɩ́ tili sɩ pɑ́ heeli ɩ kolontu kɛ lɔŋ sɩ ɩ́ yele tɔm ntɩ, nɑ pɑ́ suli tiili nɑ pɑ́ tɑɣɑnɩ. 33 Tǝnɑɣɑ Yesu tɑsɑ-wɛɣɛ yɔɣɔtʋɣʋ sɩ: Mpʋ tɔtɔɣɔ mǝ tɑɑ nɔɣɔlʋ kɑɑ pǝsɩ nɑ ɩ́ lɑ mɑ ɩfɑlʋ, ye pʋntʋ ɩ́ tɑ lǝsɩ ɩ kʋnyɩɩlʋɣʋ kɛ ɩ nyǝm tǝnɑ tɔɔ.

34 Tɔm kɛ pʋlʋpʋ mpi pǝ wɑɑsǝɣɩ tɔɣɔ. Amɑ ye tɔm mpɩ pǝ lɔŋ kɔmɑ nɑ ɩ́ sɩ, pepeɣe pɑɑ lɑ nɑ pǝ lɔŋ ɩnɩ ɩ́ mǝlɩ? 35 Pǝlɛ tɔ pɩɩ wɑɑsǝɣɩ pʋlʋ. Pɑɑ n ŋmɩɩsɑ hɑlǝm tɑɑ, pɑɑ n pɛtɑ hute tɑɑ, ɩsɩɩ pɑ lɔ-wɩ pɑɑsi. Mpɑ pɑ wɛnɑ lǝmɑɣɑsɛɛ tɔ pɑ́ ke ŋkpɑŋŋ nɑ tɔm tǝnɛ.