1 Ḿpʋ́ɣʋ́ Yesu kotɑ pɑ nɑɑnʋwɑ nɑ nɑɑlɛ nɑ ɩ́ tʋ ɑlɔɣɑɑ kɛ pɑ niŋ tɑɑ, nɑ ɩ́ hɑ-wɛɣɛ tomɑ sɩ pɑ́ looki-wɛ pɑɑ mpɑ, nɑ pɑ́ wɑɑkɩ kʋtɔmǝŋ. 2 Nɑ ɩ́ tili-wɛ sɩ pɑ́ polo pɑ́ kpɑɑlɩ Ɩsɔ Kɑwulɑɣɑ tɔm, nɑ pɑ́ wɑɑsǝɣɩ kʋtɔntʋnɑɑ kɛ pɑ kʋtɔmǝŋ. 3 Ɩlɛnɑ ɩ tɔ-wɛ sɩ: Ye ɩ́ tɛɛkɩ ɩ́ tɑɑ kpɑɣɑ pʋlʋ, pɑɑ kpɑ́tʋ́ɣʋ́, pɑɑ huluɣu, pɑɑ tɔɣɔnɑɣɑ, pɑɑ liɣitee, pǝ́cɔ́ ɩ́ tɑɑ kpɑɣɑ cɑpɑnɑɑ kɛ nɑɑlɛ nɑɑlɛ. 4 Ye ɩ́ tɑlɑ timpi nɑ ɩ́ lɑɑlɩ nɑ ɩ́ sʋʋ tǝyɑɣɑ ŋkɑ kɑ tɑɑ, ɩ́ sɑɑlɩ tǝnɑ hɑlɩ mǝ tɛɛʋ. 5 Nɑ ye ɩ́ tɑlɑ timpi nɑ yǝlɑɑ ɩ́ tɑ mʋ-mɛ, ɩ́ lɩɩ nɑ ɩ́ kpiisi-wɛɣɛ mǝ nɔɔhɛɛ mʋsʋɣʋ, nɑ pǝ́ hʋ́lɩ́ sɩ ɩ́ lɑpɑ-wɛɣɛ tɔʋ, ɩ́ yele.

6 Ḿpʋ́ɣʋ́ pɑ tɛɛwɑ nɑ pɑ́ cɔɔkɩ ɩcɑtɛ ɩcɑtɛ nɑ pɑ́ heeliɣi Lɑɑpɑɑlɩ Kʋpɑŋ, nɑ pɑ́ wɑɑsǝɣɩ kʋtɔntʋnɑɑ kɛ pɑ kʋtɔmǝŋ.

7 Wulɑʋ Helɔtɩ nɩɩ pǝ tǝnɑ mpi pǝ tɔŋɑ lɑpʋ kɛ mpʋ tɔ, ɩlɛnɑ pǝ liɣiti-ɩ sɔsɔm, ɩ tɑ nyɩ ɩsǝnɑ ɩ́ lɑ tɔ. Pǝ tɑɣɑ pʋlʋ, lɛlɑɑ nɑ́ tɔŋɑɣɑ kɛ́ sɩ Yohɑɑnɩ wei pɑɑ kʋwɑ tɔ ɩnɩ ɩ femnɑ.

8 Lɛlɑɑ sɩ Ilii lɩɩnɑ.

Hɑlǝnɑ lɛlɑɑ sɩ Ɩsɔ kʋyɔɣɔtʋtʋ tɛlǝsǝlɑɑ kʋpǝmɑ tɑɑ nɔɣɔlʋ lɩɩnɑ.

9 Ɩlɛnɑ Helɔtɩ sɩ: Mɑ yelɑɑ nɑ pɑ́ sɛtɩ Yohɑɑnɩ nyʋɣʋ ɩlɛ, ɑweɣelɛ pʋntʋ wei ɩnɩ ɩ tɔm mɑ nɩɩ pɑ yɔɣɔtǝɣɩ ɩsǝntɔ tɔ?

Hɑlǝnɑ ɩ́ pɛɛkǝɣɩ sɩ ɩ́ nɑ-ɩ.

10 Yesu Tillɑɑ kɔmɑ pɑ́ mǝlɩ Yesu kiŋ, ɩlɛnɑ pɑ́ kɛɛsɩ-ɩ pǝ tǝnɑ mpi pɑ lɑpɑ tɔ. Ḿpʋ́ɣʋ́ ɩ kpɑɣɑ-wɛ nɑ ɩ́ ponɑ-wɛɣɛ kpeeŋɑ kɛ ɩcɑtɛ nte pɑ yɑɑ sɩ Pɛtɛsɑitɑ tɔ tǝ kiŋ. 11 Pɑɑ nɑ mpʋ tɔ, sɑmɑɑ nɩɩwɑ nɑ pɑ́ hu ɩ wɑɑlɩ, nɑ ɩ lɑŋlɛ hʋlʋmǝnɑ pɑ kɔntɛ. Nɑ ɩ́ heelɑ-wɛɣɛ Ɩsɔ Kɑwulɑɣɑ tɔm, nɑ ɩ́ wɑɑsɩ pɑ tǝnɑ mpɑ pɑ fɛɩnɑ ɑlɑɑfǝyɑ tɔ.

12 Pǝ kɔmɑ nɑ ilim cɑɑ tɛm, ɩlɛ ɩ ɩfɑlɑɑ nɑɑnʋwɑ nɑ nɑɑlɛ kɔmɑ ɩ kiŋ ntɛ́, nɑ pɑ́ tɔmɩ-ɩ sɩ: Tɔɣɔnɩ sɑmɑɑ ɩnɛ ɩnɩ nɑ ɩ́ polo ɑcɑlɛɛ tɑɑ nɑ pǝ cɔlɔ cɑcɑkǝŋ tɛɛ nɑ pɑ́ hiki tǝsʋʋlɛnɑɑ nɑ tɔɣɔnɑsɩ. Pǝ tɑɣɑ pʋlʋ, cǝnɛ kɛ́ nyɩɩtʋ tɑɑ kɛ́.

13 Ḿpʋ́ɣʋ́ Yesu cɔwɑ sɩ: Mɩɩ hɑnɑ sɑmɑɑ ɩnǝɣɩ tɔɣɔnɑɣɑ kɛ mǝ mɑɣɑmɑɣɑ.

Tǝnɑɣɑlɛ pɑ cɔ-ɩ sɩ: Ntɔŋ potopotonɑɑ kɑkpɑsɩ nɑ tiinɑ nɑɑlɛɣɛ tǝ wɛnɑ yɑɑ? Yɑɑ n cɑɑ sɩ tɑ́ɑ́ yɑnɑ tɔɣɔnɑɣɑ nɑ tǝ cɛlɑ sɑmɑɑ tuutuumɑ ɩnɛ ɩ tǝnɑ?

14 Apɑlɑɑ kɑ wɛ ɩsɩɩ yʋlʋpee iyisi kɑkpɑsɩ (5000) kɛ mpʋ. Ḿpʋ́ɣʋ́ Yesu heelɑ ɩ ɩfɑlɑɑ sɩ: Ɩ́ cɑɣɑsɩ-wɛɣɛ tintikɑ tintikɑ ɩsɩɩ yʋlʋpee nɩɩlɛ nɑ nɑɑnʋwɑ nɑɑnʋwɑ.

15 Ɩlɛnɑ Yesu ɩfɑlɑɑ nɩɩ ntɩ nɑ pɑ́ cɑɣɑsɩ pɑ tǝnɑ tǝmɑm. 16 Tǝnɑɣɑ Yesu kpɑɣɑ potopotonɑɑ kɑkpɑsɩ nɑ tiinɑ nɑɑlɛ ɩnɩ, nɑ ɩ́ teki ɩ ɩsɛ nɑ ɩ́ sɛɛ Ɩsɔ kɛ́ ɩ nɑ tǝmlɛ. Ɩlɛnɑ ɩ́ fɑɣɑ-wɛ nɑ ɩ́ cɛlɑ ɩ ɩfɑlɑɑ sɩ pɑ́ tɑlɑ sɑmɑɑ ɩnɩ. 17 Ḿpʋ́ɣʋ́ pɑ tǝnɑ pɑ tɔɣɑɑ nɑ pɑ́ hɑɣɑ. Hɑlǝnɑ pɑ́ tɔɔsɩ hɔɣɔlɑsɩ kʋkpisɑsɩ kɛ tɔkǝŋ nɑɑnʋwɑ nɑ nɑɑlɛ.

18 Kʋyɑkʋ nɑkʋlɩ Yesu sǝlǝmɑɣɑ Ɩsɔ kɛ́ ɩ tike kɛ kpeeŋɑ. Ɩlɛnɑ ɩ ɩfɑlɑɑ polo ɩ kiŋ. Ḿpʋ́ɣʋ́ ɩ pɔɔsɑ-wɛ sɩ: Yǝlɑɑ tɔŋ sɩ mɑ kɛ́ ɑwe?

19 Ḿpʋ́ɣʋ́ Yesu ɩfɑlɑɑ cɔwɑ sɩ: Pɑ tɔŋ sɩ Ɩsɔ lʋm sɔlʋ Yohɑɑnɩ, nɑ lɛlɑɑ sɩ Ilii, nɑ lɛlɑɑ sɩ Ɩsɔ kʋyɔɣɔtʋtʋ tɛlǝsǝlɑɑ kʋpǝmɑ tɑɑ nɔɣɔlʋ lɩɩnɑ. 20 Tǝnɑɣɑ Yesu pɔɔsɑ ɩ ɩfɑlɑɑ sɩ: Nɑ mɛ se, mǝ hʋʋkɩ sɩ mɑ kɛ́ ɑwe?

Ḿpʋ́ɣʋ́ Piyɛɛ nɔɣɔ tǝkpɑʋ sɩ: N kɛ́ Ɩsɔ Mesii.

21 Tǝnɑɣɑ Yesu kpɑɑlɑ-wɛɣɛ teu sɩ pɑ́ tɑɑ heeli-tǝɣɩ nɔɣɔlʋ. 22 Ḿpʋ́ɣʋ́ ɩ heelɑ-wɛ tɔtɔ sɩ: Yʋlʋ Pǝyɑɣɑ mɑ́ mɑɑ tɔɣɔ kʋnyɔŋ kɛ sɔsɔm. Nyʋɣʋ nyǝ́mɑ nɑ kɔtǝlɑɑ sɔsɑɑ nɑ Ɩsɔ Tɔm sɛɣɛsǝlɑɑ kɑ́ lɔ-m, hɑlɩ pɑ́ kʋ-m. Amɑ mɑɑ fe kʋyɛɛŋ tooso wule.

23 Ḿpʋ́ɣʋ́ Yesu tɑsɑ pɑ tǝnɑɣɑ heeluɣu sɩ: Wei ɩ cɑɑ sɩ ɩ́ tǝŋɩ-m pʋntʋ ɩ́ lɑ ɩ tǝɣɩ ɑwusɑ, nɑ ɩ́ sǝɣǝlǝɣɩ ɩ sǝm tesikɑ kɛ pɑɑ ɩfemle nte, nɑ ɩ́ tǝŋǝɣǝnɑ-m. 24 Pǝ tɑɣɑ pʋlʋ, ye wei ɩ pɛɛkǝɣɩ ɩ weesuɣu tǝcututu, ɩ tɛŋnɑ sǝpʋ. Amɑ wei ɩ́ lɑpɑ ɩ tǝɣɩ ɑwusɑ kɛ mɑ tɔɔ, pʋntʋ kɑ́ hikinɑ weesuɣu. 25 Ye yʋlʋ pǝsɑɑ nɑ ɩ́ hiki ɑntulinyɑ nyǝm tǝnɑ, nɑ ɩ mɑɣɑmɑɣɑ ɩ́ wɑkǝlɑɑ, yɑɑ ɩ lɑpɑ yem, leɣelɛ pʋntʋ kɑsǝyɑɣɑ ɩlɛ? 26 Ye wei ɩ sǝpɑ mɑ fɛɛlɛ yɑɑ mɑ kʋsɛɣɛsǝtʋ fɛɛlɛ, Yʋlʋ Pǝyɑɣɑ mɑ́ mɑɑ sɩ pʋntʋ fɛɛlɛ tɔtɔɣɔ wɑɑtʋ wei mɑɑ kɔnnɑ mɑ teeli nɑ mɑ Cɑɑ nyǝŋ nɑ mɑ ɩsɔtɑɑ tillɑɑ nɑŋŋ nyǝ́mɑ nyǝŋ tɔ. 27 Tɑmpɑnɑ kɛ mɑ heeliɣi-mɛ, mpɑ pɑ wɛ cǝnɛ tɔ pɑ tɑɑ nɑpǝlɩ kɑ́ nɑ́ Ɩsɔ Kɑwulɑɣɑ nɑ pǝ́cɔ́ pɑ́ sɩ.

28 Ɩ tɛmɑ tɔm ntǝɣɩ yɔɣɔtʋɣʋ nɑ kʋyɑkʋ siki kɛ́ ɩlɛnɑ ɩ́ kpɑɣɑ Piyɛɛ nɑ Yohɑɑnɩ nɑ Sɑɑkɩ nɑ pɑ́ kpɑ pʋɣʋ tɔɔ kɛ́ Ɩsɔ sǝlǝmʋɣʋ. 29 Ɩ tɔŋnɑ sǝlǝmʋɣʋ, ɩlɛnɑ ɩ ɩsɛntɑɑ lɑɣɑsɩ, nɑ ɩ wontu hʋlʋmɩ, hɑlǝnɑ tǝ tee kɔkɔ kɛ sɔsɔm. 30 Tǝnɑɣɑ pɑ tutɑ ɑpɑlɑɑ nɑpǝlǝɣɩ ɩ kiŋ kɛ nɑɑlɛ nɑ pɑ́ nɑ-ɩ pɑ́ yɔɣɔtǝɣɩ. Apɑlɑɑ mpɛ sɛsɛ Moisi nɑ Ilii kɛlɛ. 31 Mpɛ pɑ kɔmnɑ nɑ ɩsɔtɑɑ teu sɔsɔɔm, nɑ pɑ́ yɔɣɔtǝɣǝnɑ-ɩ ɩ kpente nte tǝ cɑɑ Yosɑlɛm kɛ lɑpʋ ɩsɩɩ Ɩsɔ kɑ sɩɩwɑ tɔ tǝ tɔm. 32 Mpʋ tɔ nɑ Piyɛɛ nɑ ɩ tɑɑpɑlɑɑ pɑ tɔŋɑ tom kɛ pǝ fɛɩnɑ. Pɑɑ nɑ mpʋ pɑ femɑ, nɑ pɑ́ nɑ́ Yesu teu sɔsɔɔm nɑ ɑpɑlɑɑ mpɑ pɑ nɑɑlɛ pɑ sǝŋɑ ɩ kiŋ tɔ. 33 Pǝ kɔmɑ ɩsɩɩ ɑpɑlɑɑ mpɛ pɑ yeki Yesu, ɩlɛnɑ Piyɛɛ tɔ sɩ: Tɑcɑɑ, ɩsɩɩ tǝ wɛʋ cǝnɛ ɩnɩ ɩsǝntɔ tɔ, pǝ wɛ teu nɑpǝlǝɣɩ te. Ɩlɛ pǝ mʋnɑ ɩsɩɩ tǝ́ siki cokɑ toosoɣo. Nyɑɣɑ lɛntɛ, Moisi kɛ lɛntɛ, nɑ Ilii kɛ lɛntɛ. Nti ɩnɩ ɩ yɔɣɔtʋɣʋ mpʋ tɔ tǝ lɩɩ yem kɛ́, ɩ tɑ nɑ-tɩ.

34 Ɩ tɔŋɑ ḿpʋ́ɣʋ́ yɔɣɔtɑɣɑ, ɩlɛnɑ ɩsɔ ŋmʋntʋɣʋ nɑkʋlɩ kʋ kɔɔ nɑ kʋ tɑkɩ pɑ tɔɔ. Kʋ tɔŋɑ pɑ tɔɔ kɛ́ tiiu, ɩlɛnɑ sɔɣɔntʋ kpɑ Piyɛɛ-wɛɣɛ sɔsɔm. 35 Ḿpʋ́ɣʋ́ pɑ nɩɩ pǝ yɔɣɔtɑ ɩsɔ ŋmʋntʋɣʋ tɛɛ sɩ: Ɩnǝɣǝlɛ mɑ Pǝyɑɣɑ kʋlǝsɑɣɑ, ɩ́ nɩɩnɑ-kɛ.

36 Pǝ yɔɣɔtʋɣʋ mpʋ nɑ pǝ tɛ tɔ, Yesu tike ntɛ́ pɑ nɑɑkɩ. Ḿpʋ́ɣʋ́ ɩ ɩfɑlɑɑ tɔkɑ pǝ tǝnɑ mpi pɑ nɩɩ mpʋ tɔɣɔ pɑ tɑɑ, pɑ tɑ yele nɑ nɔɣɔlʋ nɩɩ-tɩ.

37 Pǝ kɔmɑ pǝ fe nɑ pɑ́ tiikinɑ pʋɣʋ tɔɔ, ɩlɛnɑ sɑmɑɑ ɑnɑɑm nɔɣɔlʋ ɩ́ kɑtɩ Yesu. 38 Ḿpʋ́ɣʋ́ yʋlʋ nɔɣɔlʋ ɩ yɔɣɔtǝnɑ nɔɣɔ sɔsɑɣɑ kɛ sɑmɑɑ ɩnɩ ɩ tɑɑ sɩ: Tɑcɑɑ, mɑ wiinɑ-ŋ nyǝnɩ mɑ pǝyɑlʋ yee. Anɩ ɩ tike kɛ mɑ lʋlɑɑ. 39 Ye ɩlɔɣɔʋ kʋlɑ ɩ tɔɔ ɩ mɑkɩ kɑpusi kɛ́, nɑ pǝ́ pɛtɩ-ɩ ɑtɛ nɑ kuhulɑŋ lɩɩkǝnɑ ɩ nɔɣɔ. Ye pǝ lɑpɑ-ɩ mpʋ, pǝ wɛɛ kɛ́ nɑ pǝ tʋɣʋ-ɩ wɑhɑlɑ, pɩɩ cɛkɩ ɩ tɔɔ kɛ́ lɔŋ. 40 Mɑ wiinɑ nyɑ́ ɩfɑlɑɑ sɩ pɑ́ loo-ɩ, pɑ tɑ pǝsɩ.

41 Ḿpʋ́ɣʋ́ Yesu tɔmɑ-wɛ sɩ: Lɑŋkpɩɩsǝŋ nyǝ́mɑ nɑ kʋtɑkɛɛsǝŋ mɛ, wɛɛ ɩsǝnɑɣɑ mɑ́ nɑ-mɛ tɩɩ cɑɣɑ nɑ mɑ́ tɔkɩ mǝ kʋnyɔŋ? Kɔnɑ nyɑ́ pǝyɑlʋ ɩnǝɣɩ cǝnɛ.

42 Pǝyɑɣɑ kpɛɣɛtǝnɑ-ɩ, ɩlɛnɑ ɩlɔɣɔʋ selisi-kɛɣɛ teu, nɑ ɩ́ pɛtɩ-kɛɣɛ ɑtɛ. Amɑ Yesu nɑ́ kɑlǝnɑ ɩlɔɣɔʋ nɑ toŋ, nɑ ɩ́ lɑ nɑ pǝyɑɣɑ hiki ɑlɑɑfǝyɑ, nɑ ɩ́ cɛlɑ-kɛɣɛ kɑ cɑɑ. 43 Ɩlɛnɑ Ɩsɔ tomɑ sɔsɔɔnɑ ɑnɛ ɑ tɔm kpɑ pɑ tǝnɑɣɑ sɔɣɔntʋ.

Pɑ tǝnɑ pɑ tɔŋnɑ ɩ kʋlɑpʋtʋ tǝnɑɣɑ sɑm, ɩlɛnɑ Yesu heeli ɩ ɩfɑlɑɑ sɩ: 44 Pɑɑ tʋ Yʋlʋ Pǝyɑɣɑ mɑɣɑ yǝlɑɑ niŋ tɑɑ, ɩ́ nɩɩ ḿpʋ́ɣʋ́ teu yoo.

45 Amɑ Yesu ɩfɑlɑɑ nɑ́ tɑ́ cɛkǝnɑ tɔm tǝnɛ ɩnɩ. Tǝ hʋwɛɛ kɑ wɛ-wɛɣɛ ɩŋmɛsɑʋ kɛ́, sɩ pɑ́ tɑɑ cɛkǝnɑ tǝ tɑpʋɣʋ. Pɑɑ nɑ mpʋ pɑ nyɑ́mnɑ tǝ pɔɔsʋɣʋ.

46 Ḿpʋ́ɣʋ́ Yesu ɩfɑlɑɑ hɔmɑ sɔsɔɔntʋ tɔɔ sɩ pɑ nɑɑ sɩ pɑ tɑɑ ɑweɣelɛ sɔsɔ. 47 Yesu nɑ́ cɛkǝnɑ pɑ lotu tɑɑ hʋwɛɛ, ɩlɛnɑ ɩ́ kpɑɣɑ peiyɑ nɑ ɩ́ sǝŋsɩ-kɛɣɛ ɩ cɔlɔ, 48 nɑ ɩ tɔ sɩ: Ye wei ɩ mʋ peiyɑ kɑnɛɣɛ mɑ nyʋɣʋ tɔɔ, mɑɣɑ pʋntʋ mʋwɑ. Nɑ wei ɩ́ tɩɩ mʋ-m, ɩ mʋ wei ɩ tilɑ-m tɔɣɔ. Pǝ tɑɣɑ pʋlʋ, wei ɩ́ pǝsɑ ɩsɩɩ mǝ tɑɑ sǝkpelu, pʋntʋ ntɛ́ sɔsɔ.

49 Tǝnɑɣɑlɛ Yohɑɑnɩ nɔɣɔ tǝkpɑʋ sɩ: Tɑcɑɑ tǝ nɑ nɔɣɔlʋ nɑ ɩ́ looki ɑlɔɣɑɑ nɑ nyɑ́ hǝtɛ, pǝ́cɔ́ ɩɩ tǝŋǝɣɩ-tʋ. Ɩlɛnɑ tɑɑ kisinɑ-ɩ.

50 Ḿpʋ́ɣʋ́ Yesu cɔwɑ sɩ: Ɩ́ tɑɑ tɑŋɩ-ɩ sɩ ɩ́ tɑɑ lɑ. Pǝ tɑɣɑ pʋlʋ, yʋlʋ ɩ́ tɑ kɛ mǝ kolontu, mǝ nyǝŋ kɛ́ te.

51 Pǝ kɔmɑ pǝ kpɛɣɛtǝnɑ Yesu kʋlʋɣʋ kɛ ɑntulinyɑ tɑɑ, ɩlɛnɑ ɩ́ sɩɩ sɩ ɩ kɑ́ polo Yosɑlɛm. 52 Ḿpʋ́ɣʋ́ ɩ kʋsɑ yǝlɑɑ nɑ ɩ́ tɛlǝsɩ nɔɣɔ sɩ pɑ́ polo Sɑmɑlii ɩcɑliyɑ kɑlɩ kɑ tɑɑ, nɑ pɑ́ cɑɑ-ɩ tǝsʋʋlɛ. 53 Amɑ pɛlɛ pɑ kisɑ-ɩ mʋɣʋ, sɩ ɩ pukinɑ Yosɑlɛm tɔɔ tɔ pǝ tɔɔ. 54 Ɩ ɩfɑlɑɑ Sɑɑkɩ nɑ Yohɑɑnɩ pɑ nɑ́ mpʋ, ɩlɛnɑ pɑ́ tɔ sɩ: Tɑcɑɑ, yɑɑ tǝ yele nɑ ɩsɔtɑɑ kɔkɔ tii nɑ kɑ́ nyɑɣɑ-wɛ?

55 Amɑ Yesu pǝsɑ pɑ tɔɔ nɑ ɩ́ kɑlǝnɑ-wɛ. 56 Ɩlɛnɑ pɑ́ tɛɛ ɩcɑtɛ lɛntɛ tɑɑ.

57 Yesu nɑ ɩ ɩfɑlɑɑ pɑ wɛ mpɑɑʋ tɑɑ nɑ pɑ́ tɔŋɑ pote tɔ nɔɣɔlʋ tɔmɑ Yesu sɩ: Mɑɑ tǝŋǝɣɩ-ŋ nyɑ́ tǝpote tǝnɑ tɑɑ.

58 Mpʋɣʋlɛ Yesu cɔ-ɩ sɩ: Tɑɑlɛ hɑsɩ wɛnɑ sɩ lonɑ nɑ sumɑsɩ nɑ́ wɛnɑ sɩ tɑnɑ. Amɑ Yʋlʋ Pǝyɑɣɑ mɑ́, mɑ fɛɩnɑ nyʋɣʋ tǝtʋlɛ mɑɣɑmɑɣɑ.

59 Ɩlɛnɑ Yesu tɔ lɛlʋ sɩ: Nyɑɑ kɔɔ nɑ ń tǝŋɩ-m.

Ḿpʋ́ɣʋ́ ɑpɑlʋ ɩnɩ ɩ́ tɔ sɩ: Tɑcɑɑ, yele mɑ́ polo mɑ́ pi mɑ cɑɑ nɑ pǝ́cɔ́.

60 Tǝnɑɣɑlɛ Yesu tɔmɑ-ɩ sɩ: Yele nɑ sǝtɑɑ pi pɑ sǝtɑɑ. Amɑ nyɑɑ polo nɑ ń kpɑɑlɩ Ɩsɔ Kɑwulɑɣɑ tɔm.

61 Ɩlɛnɑ lɛlʋ nɑ́ɑ́ tɔ sɩ: Tɑcɑɑ mɑɑ tǝŋɩ-ŋ, ɩlɛ yele nɑ mɑ́ polo mɑ́ lɑ mɑ nyǝ́mɑ kɛ pǝ lɑpɑ wulee nɑ pǝ́cɔ́.

62 Amɑ Yesu cɔ ɩ́lɛ́ sɩ: Ye yʋlʋ kpɑɣɑ ɑkuɣu sɩ ɩ hɑlǝɣɩ nɑ ɩ́ nyǝnǝɣǝnɑ kpɑɩ tɑɑ, pʋntʋ tɑ mʋnɑ Ɩsɔ Kɑwulɑɣɑ.