1 Wulɑʋ nɔɣɔlʋ kɑ́ tǝŋǝɣɩ

siɣisuɣu kɛ ɩ kɑwulɑɣɑ tɔɣɔʋ tɑɑ,

nɑ ɑwulumpiyɑ nɑ́ɑ́ tǝŋǝɣɩ tɑmpɑnɑ kɛ pɑ tɛtʋ tɔkʋɣʋ tɑɑ.

2 Pɑɑ wei ɩ kɑ wɛɛ kɛ́ ɩsɩɩ tǝcɔɔsǝlɛ kɛ heelim nɑ

kpʋlʋɣʋ tǝtʋlɛ kɛ tɛʋ heelim sɔsɔɔm wɑɑtʋ.

Yɑɑ ɩsɩɩ lʋm kpeŋuɣu tɔɣɔ wʋlɑɣɑ tɛtʋ tɑɑ.

Yɑɑ ɩsɩɩ kʋkpɑmʋɣʋ sɔsɔɔʋ ɩsotom kɛ ilim tɛtʋ tɑɑ.

3 Ɩlɛ nɑlɑɑ kɑɑ tɑsɑ yʋlʋmʋɣʋ.

Pǝyele nɩɩlɑɑ kɑ́ ke ŋkpɑŋŋ.

4 Yǝlɑɑ nyɔɔŋ fɛɩnɑɑ, kɑ́ wɛɛnɑ nyɔɔŋ

nɑ pɑ́ sʋʋ kpɛlǝmʋɣʋ.

Ɩlɛnɑ mɑtǝlɑɑ nsǝmɑ hɛtɩ,

nɑ pɑ nsǝmɑ lɛɛsɩ nɑ pɑ́ wɛɛnɑ nɔɔleleŋ.

5 Pɑ kɑɑ tɑsɑ kpɑŋtʋ kɛ yɑɑʋ sɩ kɑsɑɣɑmpu.

Yɑɑ ɑcilɑɣɑtʋ tʋ sɩ sɔsɔ.

6 Pǝ tɑɣɑ pʋlʋ, kpɑŋʋɣʋ tɔm kɛ

kpɑŋtʋ yɔɣɔtǝɣɩ.

Kpɑŋtʋ tʋɣɩ ɩ lotu tɑɑ kɛ́ ɩsɑɣɑtʋ lɑpʋ tɔm.

Ɩ lɑkɩ ɑsilimɑ nɑ ɩ́ yɔɣɔtǝɣɩ kɑloolɑɣɑ tɔm kɛ Tɑcɑɑ tɔɔ.

Ɩ yeki nyɔɣɔtʋ nɑ ɩ nyɔɣɔsɩ.

Ɩ pɛŋ kʋnyɔnyɔɔm kɛ wei ɩ sǝkɩ lʋkɔtʋ tɔ.

7 Acilɑɣɑtʋ tʋ kʋyɔɣɔtʋtʋ kʋɣɩ kɛ́.

Ɩ mɑɣɑsǝɣɩ ɩ tɑɑ kɛ́ tɑsǝkǝlɛ tɔm,

nɑ ɩ́ tʋsǝɣɩ wɑhɑlɑ tʋ nɑ kɑloolɑɣɑ.

Pɑɑ wɑɑtʋ wei kʋnyɔntʋ wɛnɑ ɩ tɑmpɑnɑ tɔ.

8 Amɑ kɑsɑɣɑmpu nɑ́ lɑkɩ mpi pǝ tewɑ tɔɣɔ,

nɑ ɩ́ sɛɛsǝɣɩ ɩsǝlɛ kɛ pǝ tɑɑ.

9 Alɑɑ mpɑ mɛ ɩ́ kǝlɑ pɑmm tɔ,

ɩ́ kʋlɩ nɑ ɩ́ nɩɩ mɑ nɔɣɔ.

Pɛɛlɑɑ mpɑ mɛ mɩɩ nǝɣǝsǝɣɩ pʋlʋ tɔ,

ɩ́ ke ŋkpɑŋʋɣʋ nɑ ɩ́ nɩɩ mɑ tɔm.

10 Pǝ kɑɑsɑ pǝnɑɣɑ nɑ kʋyɛɛŋ kɛ pǝcɔ.

Alɑɑ mpɑ mɛ mǝ pɑɑ fɛɩ tɔ, ɩ́ kɑ sele.

Mpi tɔ, lɛsɛŋ kooluɣu kɑɑ lɑ, pǝyele kʋmtʋ kɑɑ wɛɛ.

11 Mpɑ mɛ mǝ kǝlɑ pɑmm tɔ, sɔɣɔntʋ ɩ́ kpɑ-mɛ.

Mpɑ mɛ mɩɩ nǝɣǝsǝɣɩ pʋlʋ tɔ ɩ́ sele.

Ɩ́ wɔɣɔsɩ mǝ wontu nɑ pǝ́ yele-mɛɣɛ kpɛtɛ.

Ɩ suu lǝyɑɣɑ wontu.

12 Ɩ́ kpɑ mǝ lɑŋɑ nɑ ɩ wii mǝ tɑwɑ,

nnɑ ɑ kɑ wɛ teu tɔ ɑ tɔɔ.

Ɩ wii mǝ lɛsɛŋnɑɑ mpɑ pɑ lʋlɑɣɑ tɔ pɑ tɔɔ.

13 Amɑ pǝnɛntɛ sɔwɑ nɑ kɔlɔŋ

pǝ nyɔɔkɩ mɑ yǝlɑɑ tɛtʋ tɑɑ kɛ́.

Nɑ pǝ kpɛŋnɑ mǝ ɩcɑtɛ nte tǝ sɔɔlɑ ɑliɣilɑ tɔ

tǝ lɑŋhʋlʋmlɛ tɛɛsɩ tɑɑ.

14 Ɩ́ lɔwɑ kɑwulɑɣɑ tǝyɑɣɑ.

Ɩ́ yelɑ lɑŋhʋlʋmlɛ ɩcɑtɛ.

Pulɑɣɑ nɑ tǝtɑŋlɛ kutuluɣu kɑ́ pǝsɩ tɑɑlɛ kpɑŋɑsɩ

nɑ kɑlǝkǝŋ tǝtɔɣɔlɛ.

15 Kʋyɑkʋ nɑkʋlɩ Feesuɣu kɑ́ lɩɩnɑ ɩsɔtɑɑ

nɑ kʋ tii tɑ́ tɔɔ.

Wʋlɑɣɑ tɛtʋ kɑ́ pǝsɩ tɩɩŋ tɑɑlɛ,

nɑ tɩɩŋ tɑɑlɛ nɑ́ɑ́ pǝsɩ hɔtʋɣʋ.

16 Ɩlɛnɑ tɑmpɑnɑ tǝŋʋɣʋ wɛɛ wʋlɑɣɑ tɛtʋ tɑɑ,

nɑ siɣisuɣu tǝŋʋɣʋ kɛ tɩɩŋ tɑɑlɛ tɑɑ.

17 Siɣisuɣu tǝmlɛ ntɛ́ hɛɛsʋɣʋ.

Hɛɛsʋɣʋ kʋlʋlʋm ntɛ́ yʋlʋ ɩɩ nyɑŋnɑ pʋlʋ,

nɑ nɑɑni kɛ tɑm tɔɔ.

18 Mɑ yǝlɑɑ kɑ cɑɣɑ hɛɛsʋɣʋ lonte tɑɑ.

Ɩ́ kɑ́ cɑɣɑ tǝcɑɣɑlɛ nɑɑni nyǝntɛ tɑɑ kɛ́ tɛɛsɩ

nsi sɩ wɛ tǝpɑmm tɔ sɩ tɑɑ.

19 Amɑ tɛʋ tɔmpɛɛ kɑ́ pɛtɩ hɔtʋɣʋ.

Pɩɩ tisi ɩcɑtɛ tǝfɛ.

20 Nyʋleleŋ nyǝ́mɑ ntɛ́ mɛ.

Ɩ kɑ́ tuuki pɑɑ timpi nɑ ɩ tǝŋǝɣɩ lʋm sɔsɔɔm.

Ɩ́ kɑ́ yele mǝ nɑɑŋ nɑ mǝ kpɑŋɑsɩ

nɑ sɩ́ yɛlǝɣǝnɑ sɩ tɩ.