1 Ḿpʋ́ɣʋ́ pǝ tɑlɑ ɩsɔtʋ nɑɑtosompɔɣɔlɑɣɑ nyǝŋ, ɩlɛnɑ Ɩsɛɣɛlɩ nyǝ́mɑ tǝnɑ mpɑ pɑɑ mǝlɑ ɑcɑlɛɛ tɑɑ tɔ pɑ́ koti nɔɣɔ kʋlʋmɑɣɑ kɛ Yosɑlɛm. 2 Ɩlɛnɑ Yosɑtɑkɩ pǝyɑlʋ kɔtʋlʋ Yesuwɑ, nɑ ɩ tɛɛtʋnɑɑ nɑ kɔtǝlɑɑ lɛlɑɑ, nɑ Selɑtǝyɛlɩ pǝyɑlʋ Solopɑpɛɛlɩ, nɑ ɩ lʋlʋɣʋ nyǝ́mɑ pɑ niki Ɩsɔ kɔtɑɣɑ tǝlɑtɛ kɛ ŋmɑʋ sɩ pɑ lɑkɩ kɔtɑsɩ nsi kɔkɔ lusɑ sɩ tǝnɑ tɔ, ɩsɩɩ pɑ kɛɛsʋɣʋ Ɩsɔ yʋlʋ Moisi kiiŋ tɑɑ tɔ. 3 Pɑɑ nɑ pɑ cɔlɔ piitimnɑɑ cɑɑkɑɣɑ-wɛɣɛ nyɑɑsʋɣʋ tɔ, pɑ ŋmɑwɑ kɔtɑɣɑ tǝlɑtɛ kɛ tǝ lonte tɑɑ nɑ pɑ́ lɑkɩ Tɑcɑɑ kɛ kɔtɑsɩ nsi kɔkɔ lusɑ sɩ tǝnɑ tɔɣɔ tǝ tɔɔ kɛ tɑnɑŋ nɑ tɑɑnɑɣɑ. 4 Pǝ wɑɑlɩ kɛ́ pɑ tɔɣɑ cokɑ ɑcimɑ ɩsɩɩ pɑɑ kɛɛsʋɣʋ tɔ nɑ pɑ́ lɑkɩ kɔtɑɣɑ ŋkɑ kɔkɔ lusɑ kɑ tǝnɑ tɔɣɔ tɔm ɩsǝnɑ pɑɑ sɩɩwɑ pɑɑ kʋyɑkʋ ŋku tɔ. 5 Pǝ kpɑɣɑʋ wɑɑtʋ ɩnɩ tɔɣɔ pɑɑ sʋʋ pɑɑ kʋyɑkʋ ŋku kʋ kɔtɑsɩ lɑpʋ kɛ tɑm, nɑ nsi pɑ lɑkɩ pɑɑ ɩsɔtʋ wei ɩ kɑncɑɑlɑɣɑ kʋyɑkʋ tɔ, nɑ Tɑcɑɑ ɑcimɑ kʋyɛɛŋ nyǝnsɩ, nɑ luɣu kʋlʋmʋɣʋ nyǝnsɩ. 6 Mpʋ pǝ yelinɑ nɑ pɑ́ cɑɑlɩ kɔtɑsɩ nsi kɔkɔ lusɑ sɩ tǝnɑ tɔɣɔ lɑpʋ kɛ Tɑcɑɑ kɛ ɩsɔtʋ nɑɑtosompɔɣɔlɑɣɑ nyǝŋ kʋyɑkʋ kɑncɑɑlɑɣɑ nyǝŋkʋ wule, nɑ pɑ́ tɑ tɩɩ sɩɩtɑ Ɩsɔ tǝsɛɛlɛ kʋfɑtɛ kite.

7 Pǝlɛ pǝ wɑɑlɩ kɛ́ pɑ cɑɑ tǝmlɛ nyǝ́mɑ sɩ pɑ́ sɑɑkǝɣɩ tɑɑsɩ nɑ pɛɛ nɑ pɑ́ fɛlɩ-wɛ. Ɩlɛnɑ pɑ́ cɛlɑ Sitɔŋ nɑ Tiii nyǝ́mɑ kɛ tɔɣɔnɑɣɑ nɑ kʋnyɔnyɔɔm nɑ nim sɩ pɛlɛ pɑ́ tilinɑ-wɛɣɛ kpeŋkpelɑsɩ kʋpɑŋsɩ nɑ teŋku tɑɑ sɩ pǝ́ tɑlɑ Sɑfɑŋ. Pɛɛsɩ wulɑʋ sɔsɔ Silusi hɑnɑ-wɛɣɛ pǝ mpɑɑʋ. 8 Ḿpʋ́ɣʋ́ pɑ mǝlɑ Yosɑlɛm tɑɑ, nɑ pǝnɑɣɑ nɑɑlɛ nyǝŋkɑ ɩsɔtʋ nɑɑlɛ nyǝŋ siki. Ɩlɛnɑ Selɑtǝyɛlɩ pǝyɑlʋ Solopɑpɛɛlɩ, nɑ Yosɑtɑkɩ pǝyɑlʋ Yesuwɑ, nɑ ɩ tɛɛtʋnɑɑ kɔtǝlɑɑ lɛlɑɑ, nɑ Lefii nyǝ́mɑ mpɑ pɑ lɩɩnɑ Pɑpiloni tɔ, pɑ niki tǝmlɛ nɑ pɑ́ lǝsɩ Lefii nyǝ́mɑ mpɑ pɑ tɑlɑ ɩsɩɩ pɩɩsɩ hiu nɑ wɑɑlɩ tɔ sɩ pɑ́ pɑɑsǝnɑ Ɩsɔ tǝsɛɛlɛ ŋmɑʋ. 9 Ḿpʋ́ɣʋ́ Lefii tʋ Yesuwɑ nɑ ɩ pǝyɑlɑɑ nɑ ɩ tɛɛtʋnɑɑ, nɑ Hotɑfiyɑ lʋlʋɣʋ tʋ Kɑtǝmǝyɛlɩ nɑ ɩ pǝyɑlɑɑ pɑ kpɛntɑ nɔɣɔ nɑ pɑ́ mʋ Ɩsɔ tǝsɛɛlɛ tǝmlɛ lɑtɑɑ pɑɑsǝnɑʋ. Nɑ Henɑtɑtɩ lʋlʋɣʋ nyǝ́mɑ Lefii nyǝ́mɑ sǝnɑ-wɛ.

10 Wɑɑtʋ wei Ɩsɔ tǝsɛɛlɛ ŋmɑlɑɑ sɩɩ kite, ɩlɛnɑ pɑ́ kɔnɑ kɔtǝlɑɑ nɑ pɑ́ suu pɑ kɔtɑɣɑ wontu nɑ Lefii nyǝ́mɑ mpɑ pɑ kɛ́ Asɑfɩ lʋlʋɣʋ nyǝ́mɑ tɔ nɑ ɑkɑntɛɛ nɑ cǝmǝŋ nɑ pɑ́ sɑŋ Tɑcɑɑ ɩsɩɩ Ɩsɛɣɛlɩ wulɑʋ Tɑfiiti kɑ sɩɩʋ tɔ. 11 Ɩlɛnɑ pɑ́ sɑŋ Tɑcɑɑ nɑ pɑ́ pʋɣʋlǝɣɩ-ɩ nɑ pɑ́ yooki yontu nɑ pɑ́ kɑɑsǝɣɩ tǝmɑ sɩ: Tɑcɑɑ wɛ teu, nɑ ɩ sɔɔlʋɣʋ kɛ Ɩsɛɣɛlɩ fɛɩ tǝnɑɣɑ. Ḿpʋ́ɣʋ́ sɑmɑɑ nɑ́ pʋɣʋlɑ-ɩ tɔtɔ nɑ kɑwilitɑsɩ sɔsɔɔnsɩ. Mpi tɔ, pɑ sɩɩ pɑ Ɩsɔ tǝsɛɛlɛ kite.

12 Ḿpʋ́ɣʋ́ kɔtǝlɑɑ nɑ Lefii nyǝ́mɑ pɑɣɑlɛ nɑ lʋlʋŋ nyɔɔŋ nyǝ́mɑ kʋkpɑtǝlɑɑ mpɑ pɑɑ nyǝmɑ Ɩsɔ tǝsɛɛlɛ kʋpǝntɛ tɔ pɑ wiiwɑ tǝkpoo kɛ sɑɑ wei pɑ tɔŋnɑ kʋfɑtɛ kite kɛ sɩɩʋ tɔ. Amɑ lɛlɑɑ nɑ́ wilitɑɣɑ kɛ́ nɑ lɑŋhʋlʋmlɛ sɔsɔɔlɛ. 13 Hɑlɩ yʋlʋ ɩɩ pǝsǝɣɩ nɑ ɩ́ fɑɣɑ lɛlɑɑ lɑŋhʋlʋmlɛ nɑ kɑwilitɑsɩ nɑ lɛlɑɑ wulɑ. Mpi tɔ, pɑ mɑkɑɣɑ kɑpusi sɔsɔɔnsɩ kɛ́ nɑ pǝ́ nɩɩkɩ pooluŋ.