1 Ḿpʋ́ɣʋ́ ləmɑɣɑsɛɛ tʋ tɔmɑ sɩ: Mɑ nɑwɑ wɑhɑlɑ wei ɩ kəlɑ yʋlʋ kɛ ɑtɛ cənɛ tɔ. 2 Ye ɩsɩɩ Ɩsɔ hɑ yʋlʋ ntɛ́ toŋ nɑ wɛnɑʋ nɑ ɩ́ kʋsɩ ɩ nyʋɣʋ ɩ tɑ lɑŋ pʋlʋ. Amɑ ɩ tɑ hɑ-ɩ mpɑɑʋ sɩ ɩ́ tɔɣɔ-wɩ, ɩlɛnɑ ɩ́ yele nɑ kpɑɩ tʋ nɔɣɔlʋ ɩ́lɛ́ ɩ tɔɣɔ. Təlɛ tə cɛkənɑʋ wɛ kɑtɛ kɛ́ nɑ lɑŋwɑkəllɛ sɔsɔɔlɛ. 3 Yɑɑ ɩsɩɩ yʋlʋ lʋlənɑ ntɛɣɛ piyɑ nɩɩnʋwɑ (100) nɑ ɩ́ kpɑtəlɩ teu, ɩlɛ ɩ tɑ yɔɔlənɑ ɩ wɛnɑʋ mpɩ nɑ ɩ lɑŋlɛ hʋlʋmɩ, ɩlɛnɑ ɩ́ sɩ nɑ pɑ́ pimi-ɩ. Pəyɑɣɑ ŋkɑ pə hɔləsɑɑ tɔ kɑ lɑpɑ-ɩ nɑ sɑnɑ. 4 Pə lʋlɑ pəyɑɣɑ ŋkɛɣɛ yem kɛ́ nɑ kɑ́ məlɩ səkpɛtʋɣʋ tɑɑ nɑ kɑ́ hətɛ sɑɑlɩ tənɑ. 5 Kɑ tɑ tɩɩ nɑʋ ilim pəyele kɑ tɑ nyɩ sɩ pə wɛɛ. Kɑ kəlɑ hɛɛsʋɣʋ kɛ yʋlʋ ɩnɩ. 6 Sɩ yʋlʋ ɩ́ tɔɣɔ pɩɩsɩ ɩyisi nɑɑlɛ (2000), nɑ kɑwɑɑɣɑ fɛɩ pə tɑɑ tɔ pepeɣelɛ ɩ wɑɑwɑ? Anɩ lonte kʋlʋmtəlɛ tɑɑ kɛ́ pɑ tənɑ pɑ puki.

7 Yʋlʋ ɩwɩɩlɛ tənɑ, ɩ nɔɣɔ pʋ́ʋ́ɣʋ́ tɔɔ kɛ́ ɩ lʋkɩ, pɑɑ nɑ mpʋ ɩ kʋnyɩɩlʋɣʋ ɩɩ səkɩ. 8 Kɑwɑɑɣɑ ŋkɑɣɑ ləmɑɣɑsɛɛ tʋ wɛnɑ nɑ ɩ́ tɛɛ kʋmɛlɛŋ? Nɑ ye kʋnyɔntʋ ɩ́ nyəmɑ́ ɩ tɩ kɑɑsʋɣʋ kɛ weesuɣu tɔm tɑɑ, ɩlɛ ɩ wɑɑ weɣelɛ? 9 Pə kəlɑ teu sɩ yʋlʋ ɩ́ yɔɔlənɑ mpi ɩ nɑwɑ tɔ, nɑ mpi ɩ kɑ́ yɔɔlənɑ ɩ kʋnyɩɩləm tɔ. Pəlɛ pə wɛ kɑtɛ tɔtɔɣɔ ɩsɩɩ yʋlʋ lʋkʋɣʋ sɩ ɩ́ tiiki heelim tɔ.

10 Pə tənɑ mpi pə wɛɛ tɔ, pɑ tɛmɑ-wəɣɩ nyəm kɛ hɑtoo lɔŋ, tə nyəmɑ́ teu kɛ mpi pɑ yɑɑ sɩ yʋlʋ tɔ, ɩ́ nɑ mpi pə kəlɑ-ɩ toŋ tɔ pɑɑ hɔŋ. 11 Ye yɔɣɔtɑɣɑ ɩ́ kəlɑ kɑtɑtəlɑɣɑ, mpʋ tɔtɔɣɔ tɔmnɑɑ pɑɣɑlɛ hɛləɣɩ. Ɩlɛ yʋlʋ kɑwɑɑɣɑ ntɛ́ we? 12 Awe nyəmɑ́ mpi pə mɑɣɑ yʋlʋ kɛ ɩ weesuɣu wɑɑtʋ tɑɑ tɔ? Kʋ kʋyɛɛŋ wɛ kpɛtɛ kɛ́ ɩsɩɩ ɩlɛɛmʋɣʋ. Yɑɑ ɑwe kɑ́ heelinɑ-ɩ mpi pɩɩ lɑ ɩ səm wɑɑlɩ kɛ́ tɛtʋ tɔɔ kɛ cele tɔ?