1 Mete tʋ Aselusi pǝyɑlʋ Tɑliyusi, wei ɩ tɔɣɔ Pɑpiloni tɛtʋ tɔ, ɩ kɑwulɑɣɑ 2 pǝnɑɣɑ kɑncɑɑlɑɣɑ nyǝŋkɑ tɑɑ kɛ́ Tɑniyɛɛlɩ mɑ́, mɑ kɑlɑ Ɩsɔ Tɔm tɑkǝlɑsɩ tɑɑ. Mɑ cɛkǝnɑɑ sɩ pɩɩsɩ nɩɩtoso nɑ nɑɑnʋwɑ kɛ́ Yosɑlɛm ɩcɑtɛ kɑ́ wɛɛ ncɑɑlɛ. Ḿpʋ́ɣʋ́ Tɑcɑɑ kɑ heelɑ Ɩsɔ kʋyɔɣɔtʋtʋ tɛlǝsʋlʋ Selemii. 3 Ḿpʋ́ɣʋ́ mɑ lɑŋlɛ wɑkǝlɑɑ, nɑ mɑ́ suu lǝyɑɣɑ wontu fɔlǝtɔnɑɑ tɑkɑ. Nɑ mɑ́ pǝlɩ mɑ nyʋɣʋ tɑɑ kɛ́ tɔlʋmɑ nɑ mɑ́ hɔkɔ nɔɣɔ. Ɩlɛnɑ mɑ́ kɛɛsɩ ɩsɛ nɑ Tɑcɑɑ Ɩsɔ tɔɔ, nɑ mɑ́ sǝlǝmǝɣɩ-ɩ nɑ mɑ́ wiikinɑ-ɩ. 4 Ḿpʋ́ɣʋ́ mɑ hʋlɑ mɑ Ɩsɔ Tɑcɑɑ kɛ mɑ yǝlɑɑ ɩsɑɣɑtʋ. Nɑ mɑ́ sǝlǝmɩ-ɩ sɩ, Tɑcɑɑ Ɩsɔ Sɔsɔ wei nyɑ́ tǝ seekɩ nɑ ń tɔkǝɣɩ nyɑ́ nɔɣɔ sɩɩʋ tɔ. N hʋlǝɣɩ suulu kɛ mpɑ pɑ sɔɔlǝɣɩ-ŋ nɑ pɑ́ tɔkǝɣɩ nyɑ́ kiiŋ tɔɣɔ. 5 Tǝ wɑkǝlɑɑ kɛ́ nɑ tǝ́ pǝsɩ ɑsɑɣɑɑ. Tǝ kʋlɑ nyɑ́ tɔɔ nɑ tǝ́ kisi nyɑ́ kiiŋ. 6 Tǝ tɑ nɩɩnɑ nyɑ́ kʋyɔɣɔtʋtʋ tɛlǝsǝlɑɑ mpɑ pɑ kpɑɑlǝnɑ nyɑ́ hǝtɛ kɛ tɑ́ ɑwulɑɑ, nɑ tɑ́ sɔsɑɑ, nɑ tɑ́ cɑɑnɑɑ, nɑ tɑ́ piitim tǝnɑ yǝlɑɑ tɔ. 7 Tɑcɑɑ, nyɑɣɑlɛ tɑmpɑnɑ tʋ, tɑɣɑlɛ tɑsǝkǝlɛ nyǝ́mɑ. Pǝ kpɑɣɑʋ Yutɑ yǝlɑɑ, nɑ Yosɑlɛm nyǝ́mɑ, nɑ Ɩsɛɣɛlɩ nyǝ́mɑ, nɑ pǝcɔlɔ nyǝ́mɑ, nɑ pooluŋ nyǝ́mɑ mpɑ pɑ wɛ ɑcɑlɛɛ wenɑ ɑ tɑɑ n kɑ tɔɣɔnɑ-wɛɣɛ ɩsɑɣɑtʋ nti pɑ lɑpɑ-ŋ tɔ tǝ tɔɔ tɔ. 8 Tɑcɑɑ, tɑnɑ tɑ ɑwulɑɑ nɑ tɑ́ sɔsɑɑ, nɑ tɑ́ cɑɑnɑɑ ntɛ́ tɑsǝkǝlɛ nyǝ́mɑ. 9 Tɑcɑɑ Ɩsɔ, n wɛnɑ yʋlʋ pǝtɔɔtǝlɛ. N kɑ wii-tʋɣʋ timpi tǝ kʋlɑ nyɑ́ tɔɔ tɔ. 10 Tǝ tɑ nɩɩ nyɑ́ kiiŋ wei nyɑ́ tǝmlɛ nyǝ́mɑ, nyɑ́ kʋyɔɣɔtʋtʋ tɛlǝsǝlɑɑ tɛlǝsɑ-tʋ tɔ. 11 Ɩsɛɣɛlɩ nyǝ́mɑ tǝnɑ yɔkɑ nyɑ́ kiiŋ, pɑ kisɑ nyɑ́ nɔɣɔ nɩɩʋ. Ɩlɛnɑ mpusinɑɑ nɑ wɑhɑlɑnɑɑ mpɑ pɑ tɔm nyɑ́ tǝmlɛ tʋ Moisi ŋmɑɑwɑ ɩ kiiŋ tɑkǝlɑɣɑ tɑɑ tɔ, pɑ́ wɑtɩ-tʋɣʋ timpi tǝ pǝntǝnɑ-ŋ tɔ. 12 N kɔnɑ Yosɑlɛm tɔɔ kɛ́ wɑkǝlʋɣʋ sɔsɔɔŋkʋ ŋku kʋ tɑkɑ pɑ tɑ nɑtɑ ɑntulinyɑ tǝnɑ tɑɑ tɔ. Ɩsɩɩ n kɑ kpɑɑlʋɣʋ tɑ́ nɑ tɑ́ ɑwulɑɑ nɑ tɑ́ sɔsɑɑ tɔ. 13 Wɑhɑlɑ ɩnɩ ɩ mɑɣɑnɑ-tʋɣʋ ɩsɩɩ Moisi ŋmɑɑwɑ ɩ kiiŋ tɑkǝlɑɣɑ tɑɑ tɔ. Pɑɑ nɑ mpʋ tɔ, tǝ tɑ nɩɩtɑ tɑ ɩsɑɣɑtʋ sɔŋ kɛ hɑlǝnɑ sɑŋɑ sɩ tǝ́ pɑɑsǝnɑ nyɑ́ tɑmpɑnɑ. 14 Pǝ tɔɔ kɛ́ n yelɑɑ nɑ wɑhɑlɑ ɩnɩ ɩ́ kɔɔ-tʋ. Mpi tɔ, n tǝŋǝɣɩ tɑmpɑnɑ kɛ nyɑ́ kʋlɑpǝm tǝnɑ tɑɑ kɛ́. Amɑ tɑ́ tɑ nɩɩnɑ nyɑ́ nɔɣɔ.

15 Tɑcɑɑ Ɩsɔ, nyɑ́ lǝsǝnɑ-tʋɣʋ Icipiti tɛtʋ tɑɑ. Ɩlɛnɑ nyɑ́ tomɑ sɔsɔɔnɑ nɑ nyɑ́ hǝtɛ yɑɑkɩ hɑlǝnɑ sɑŋɑ. Amɑ tɑ́ tɑ́ nɩɩnɑ-ŋ ɩlɛnɑ tɑ́ tɔm sɩ. 16 Tɑnɑ tɑ́ cɑɑnɑɑ tɑ́ ɩsɑɣɑtʋ tɔɔ kɛ́ Yosɑlɛm nɑ nyɑ́ yǝlɑɑ wɛ fɛɛlɛ tɑɑ kɛ́ mpɑ pɑ cɔɔnɑ-tʋ tɔ pɑ hɛkʋ tɑɑ. Ɩlɛ hɛɛsɩ nyɑ́ pɑ́ɑ́nɑ́ kɛ nyɑ́ pulɑɣɑ nɑŋŋ nyǝŋkɑ ɩcɑtɛ Yosɑlɛm tɔɔ kɛ́ nyɑ́ suulu sɔsɔ tɔɔ. 17 Hɑɩ, tɑ Ɩsɔ, nɩɩ mɑ sǝlǝmʋɣʋ nɑ mɑ wiinɑʋ. Nyǝnnɑ suulu kɛ nyɑ́ tǝsɛɛlɛ nte tǝ yɔkɑɑ tɔɣɔ nyɑ́ sɔɔlʋɣʋ tɔɔ. 18 Mɑ Ɩsɔ ke ŋkpɑŋʋɣʋ nɑ ń nɑ ɩsǝnɑ tɑ́ nɑ nyɑ́ ɩcɑtɛ tǝ wɑkǝlɑɑ tɔ. Pǝ tɑɣɑ tɑ teu tɔɔ kɛ́ tǝ wiikinɑ-ŋ. Amɑ nyɑ́ sɔɔlʋɣʋ sɔsɔɔŋkʋ tɔɔ kɛ́. 19 Hɑɩ, Tɑcɑɑ, ke ŋkpɑŋʋɣʋ nɑ ń nɩɩ tɑ́ sǝlǝmʋɣʋ nɑ ń wii-tʋ. Mɑ Ɩsɔ pɑɑsǝnɑ nyɑ́ ɩcɑtɛ nɑ nyɑ́ yǝlɑɑ kɛ lɔŋ kɛ nyɑ́ suulu tɔɔ.

20 Mɑ tɔŋnɑ sǝlǝmʋɣʋ nɑ mɑ́ tisiɣi mɑ́ nɑ Ɩsɛɣɛlɩ yǝlɑɑ tɑ́ ɩsɑɣɑtʋ. Nɑ mɑ́ wiikinɑ-ɩ Ɩsɔ tǝsɛɛlɛ tɔm kɛ mpʋ 21 tɔɣɔ ɩsɔtɑɑ tillu Kɑpǝyɛɛ wei mɑɑ nɑwɑ toosee tɑɑ tɔ ɩ kʋlɑ hʋntʋ kɛ lɔŋ nɑ ɩ́ kpǝtǝnɑ-m tɑɑnɑɣɑ kɔtɑɣɑ lɑpʋ wɑɑtʋ. 22 Ɩlɛnɑ ɩ́ sɛɣɛsɩ-m Ɩsɔ kʋyɔɣɔtʋtʋ tɛlǝsʋlʋ tɔm nti mɑɑ kɑlɑɑ tɔ. Ɩlɛnɑ ɩ́ tɔ-m sɩ: Mɑ kɔmɑɣɑ sɩ mɑ kilisiɣi-ŋ tǝ hʋwɛɛ. 23 N cɑɑlɑ sǝlǝmʋɣʋ tɔ, Tɑcɑɑ heelɑ-m tɔm sɩ mɑ́ heeli-ŋ. Mpi tɔ, ɩ sɔɔlɑ-ŋ kɛ́. Ke ŋkpɑŋʋɣʋ kɛ teu nɑ ń nɩɩ toosee ɑnɩ ɑ hʋwɛɛ. 24 Nyɑ́ ɩcɑtɛ nɑ nyɑ́ yǝlɑɑ pɑ tɔɔ kɛ́ pɑ sɩɩ pɩɩsɩ nɩɩtoso nɑ nɑɑnʋwɑ kɛ tɔm nɑɑtosompɔɣɔlɑɣɑ. Pɑ lɑpɑ ḿpʋ́ɣʋ́ sɩ pɑ́ hɛɛsɩ kiiu yɔkʋɣʋ nɑ ɩsɑɣɑtʋ lɑpʋ. Pɑ wii-wɛ nɑ pɑ́ tǝŋ siɣisuɣu tɑm nyǝŋkʋ, nɑ toosee. Ɩlɛnɑ Ɩsɔ kʋyɔɣɔtʋtʋ tɛlǝsʋlʋ tɔm yoosi, nɑ pɑ́ tɑɣɑnɩ ɩsɔ tǝsɛɛlɛ. 25 Pǝ wɛɛ sɩ ń nyɩ nɑ ń cɛkǝnɑ sɩ, pǝ kpɑɣɑʋ wɑɑtʋ wei pɑ kpɑɑlɑɑ sɩ, pɑɑ tɑɣɑnɩ Yosɑlɛm kɛ ŋmɑʋ tɔ, nɑ pǝ́ polo nyʋɣʋ tʋ wei pɑ pǝlɑ nim nɑ pɑ́ kpɑ tɔ ɩ kɔntɛ tɔ. Pǝ wɛ pɩɩsɩ nɑɑtosompɔɣɔlɑɣɑ kɛ tɔm nɑɑtosompɔɣɔlɑɣɑ kɛ́. Pǝlɛ pǝ pɑɑsi, pɩɩsɩ nɑɑtosompɔɣɔlɑɣɑ tɔm nɩɩtoso nɑ nɑɑlɛ tɑɑ kɛ́ pɑɑ tɑɣɑnɩ ɩcɑtɛ ŋmɑʋ nɑ tǝ koluŋɑ. Amɑ pǝ wɑɑtʋnɑɑ kɑ wɛɛ kɑtɛ kɛ́. 26 Wɑɑtʋnɑɑ mpɛ pɑ wɑɑlɩ kɛ́ pɑɑ kʋ ɑpɑlʋ nɔɣɔlʋɣʋ mʋsʋŋ. Apɑlʋ ɩnɩ pɑɑ pǝlɑ-ɩ nim kɛ́ nɑ pɑ́ kpɑ-ɩ nyʋɣʋ tʋ. Wulɑʋ nɔɣɔlʋ nɑ ɩ yoolɑɑ pɑɑ wɑtǝnɑ ɩcɑtɛ, ɩsɩɩ lʋm nɑ pɑ́ wɑkǝlɩ-tɛ nɑ ɩsɔ tǝsɛɛlɛ. Ḿpʋ́ɣʋ́ ɩ nɑ ɩ yoolɑɑ pɑ wɑkǝlǝɣɩ ɩsɩɩ pǝ sɩɩwɑ tɔ. 27 Ɩ kɑ́ cɑɑlɩ yǝlɑɑ pɑɣɑlɛ kɛ pɩɩsɩ nɑɑtosompɔɣɔlɑɣɑ tɑɑ. Ɩ kɑ́ lɑ nɑ pɑ́ yele kɔtɑsɩ lɑpʋ kɛ ɩsɔ tǝsɛɛlɛ tɑɑ kɛ́ pɩɩsɩ nsɩ sɩ hɛkʋ tɑɑ. Ɩ kɑ́ lɑ ɑcɑɑlǝtʋ tǝmɑ kɛ lɔŋlɔŋ. Hɑlǝnɑ pǝ́ tɑlɑ ɩnɩ ɩ wɑkǝlʋɣʋ ɩsɩɩ Ɩsɔ kɑ sɩɩʋ tɔ.