68
Ɩsɔ ɑkɑɩtʋ yontu
1 Tɑfiiti yontu nti tə wɛ yonyoolɑɑ
nyʋɣʋ tʋ yontunɑɑ tɑɑ tɔɣɔlɔ.
2 Ɩsɔ kʋlɩ nɑ nyɑ́ kolontunɑɑ yɑ yem.
Mpɑ pɑɑ cɑɑkɩ-ŋ tɔ, pɑ́ se nyɑ́ ɩsɛntɑɑ.
3 Yele nɑ ɑsɑɣɑɑ mpɛ pɑ́ sɑɑlɩ yem kɛ
Ɩsɔ ɩsɛntɑɑ, ɩsɩɩ nyɔɔsɩ sɑlʋɣʋ tɔ,
yɑɑ ɩsɩɩ keetu hookuɣu kɔkɔ tɑɑ tɔ.
4 Ɩlɛnɑ siɣisilɑɑ lɑŋɑ nɑ́ɑ́ hʋlʋmɩ nɑ pɑ́ ŋmɑɑlɩ.
5 Ɩ́ yoo Ɩsɔ kɛ́ yontu nɑ ɩ́ sɑ ɩ hətɛ,
ɩ́ hɛɛ-ɩ mpɑɑʋ, ɩnɩ ɩ fɑɣɑnɑ tɛtɛkɑ tɑɑ nɑ ɩ́ kɔŋ.
Ɩ hətɛ ntɛ́ Tɑcɑɑ, ɩ́ yɔɔlɩ ɩ ɩsɛntɑɑ.
6 Ɩnəɣəlɛ suluwɑɑ cɑɑ, nɑ leelɑɑ pɑɑsənlʋ.
Ḿpʋɣʋ Ɩsɔ wɛ ɩ təcɑɣɑlɛ nɑŋŋ nyəntɛ tɑɑ tənɑ.
7 Ɩ hɑɑkɩ kɑtɑyəlɑsɩ kɛ tɛɛsɩ,
nɑ ɩ́ yeki nɑ sɑləkɑtʋnɑɑ hɛɛsəɣɩ.
Asɑɣɑɑ tike kɛ ɩ yeki wʋlɑɣɑ tɑɑ.
8 Hɑɩ, Ɩsɔ, wɑɑtʋ wei n lɩɩ nyɑ́ yəlɑɑ nɔɣɔ tɔɔ tɔ,
wɑɑtʋ wei n tɛɛ pɑ lɔlɔ kɛ wʋlɑɣɑ tɛtʋ tɑɑ tɔ,
9 tɛtʋ selɑɑ kɛ́, nɑ ɩsɔtɔnʋɣʋ pəsɩ lʋm.
Sinɑyi pʋɣʋ selɑ Ɩsɛɣɛlɩ Ɩsɔ nyɑ́, nyɑ́ ɩsɛntɑɑ.
10 Hɑɩ, Ɩsɔ, n yelɑɑ nɑ tɛʋ kʋpɑŋkʋ nɩɩ,
nɑ ń məŋnɑ nyɑ́ kpɑncoou ŋku kɩɩ tɛmɑ tɔ.
11 Hɑɩ, Ɩsɔ, nyɑ́ yəlɑɑ lɑpɑ pɑ təcɑɣɑlɛ kɛ tɛtʋ tɑɑ.
Lonte ntɛɣɛ n tɑɣɑnɑ wɑhɑlɑ nyə́mɑ kɛ nyɑ́ kʋpɑntʋ tɔɔ.
12 Tɔmʋɣʋ kɛ Tɑcɑɑ yɔɣɔtɑɑ.
Tɔm kʋpɑntʋ kɔntɑɑ nɑ́ kɛ́ kpekəle sɔsɔɔlɛ.
13 Kolontunɑɑ ɑwulɑɑ kpekəle tʋ cɑsəlɛ.
Ɩlɛnɑ ɑlɑɑ mpɑ pɑ wɛ təyɑɣɑ tɔ pɑ́ tɑlɑ wontu kukukuutu.
14 Ɩ́ kɑ́ həntɩ mə cɑcɑkəŋ tɛɛ nɑ ɩ́ hɛɛsəɣɩ,
nɑ liɣitee wɑɑsɑ ɑlukuku keŋ tɔɔ,
nɑ wʋlɑ kʋpɑŋ wɑɑsɑ ɩ hʋntʋ tɔɔ*fɑ*? ɑ Looŋɑ kɑnɛ kɑ nɩɩʋ wɛ kɑtɛ. Ɩlɛ lɛlɑɑ hʋʋkɩ sɩ Ɩsɛɣɛlɩ nyə́mɑ ɩlɛ, ɑlukuku kɛlɛ Ɩsɛɣɛlɩ nɑ wʋlɑ nɑ liɣitee nnɑ ɑ tee kɔkɔ kɛ mpʋ tɔ, ɑ hʋləɣɩ pɑ ɑkɑɩtʋ. Wɛnɑʋ ŋku yoolɑɑ kuuki təyoole tɑɑ tɔ.
15 Wɑɑtʋ wei Tomɑ tənɑ tʋ yɑsɑ ɑwulɑɑ kɛ tɛtʋ tɑɑ tɔ,
tɛtʋ hʋlʋmɑɑ kɛ ɩsɩɩ kponkpontu.
16 Hɑɩ, Pɑsɑŋ pʋɣʋ kɛ́ Ɩsɔ nyəŋkʋ kɛ́,
nɑ kʋ hɛlɑ tɔm pɑɣɑlɛ.
17 Pepe tɔɔ kɛ́ pʋɣʋ kʋhɛlʋɣʋ lɑkɩ ɩsɛsɛɛmlɛ,
kɛ ŋku Ɩsɔ ləsɑɑ sɩ ɩ kɑ cɑɣɑ tɑm tɔɔ tɔ?
Tənɑɣɑ Tɑcɑɑ kɑ́ cɑɣɑ hɑlənɑ tənɑɣɑ.
18 Ɩsɔ wɛnɑ yoou kɛɛkɛnɑɑ kɛ iyisi iyisi kɛ́,
Tɑcɑɑ wɛ pɑ hɛkʋ, nɑ Sinɑyi nɑ́ɑ́ wɛ Ɩsɔ təsɛɛlɛ tɑɑ.
19 N kpɛŋnɑ yəlɑɑ mpɑ pɑ kpɑwɑ tɔ nɑ ń kpɑɑnɑ,
yəlɑɑ kɛ pɑ lɑpɑ-ŋ kʋcɔɔʋ*fɑ*.
Tɔɔ kʋllɑɑ mɑɣɑmɑɣɑ kɑ́ cɑɣɑ nyɑ́ kiŋ. ɑ kʋcɔɔʋ: Lɛlɑɑ nɑ́ hʋʋkɩ sɩ pə hʋwɛɛ ntɛ́ sɩ pɑ hɑ Ɩsɔ kɛ́ kʋcɔɔŋ. Looŋɑ kɑnɛ kɑ hʋwɛɛ wɛ kɑtɛ.
20 Tɑcɑɑ kɛlɛ sɔsɔ kɛ pɑɑ kʋyɑkʋ ŋku,
ɩnɩ ɩ pɑɑsəɣənɑnɑ tʋ nɑ ɩ́ wɑɑsəɣɩ-tʋɣʋ
sɑɑ wei pɑ ŋmɑkələɣɩ-tʋ tɔ.
21 Ɩsɔ kɛ́ wei ɩ wɑɑsəɣɩ-tʋ tɔɣɔ.
Tɑcɑɑ Ɩsɔ ɩnɩ ɩ wɛnnɑ tomɑ sɩ ɩ́ fiti-tʋɣʋ səm tɑɑ.
22 Amɑ Tɑcɑɑ kɑ́ yɔkɩ ɩ kolontunɑɑ nyɔɔŋ,
ɩ kɑ́ yɔkɩ mpɑ pɑ wɛ ɩsɑɣɑtʋ tɑɑ tɔ pɑ nyʋmpɔɣɔlɑsɩ.
23 Tɑcɑɑ yɔɣɔtɑɑ sɩ: Mɑɑ ləsɩ
mɑ kolontunɑɑ kɛ Pɑsɑŋ pʋɣʋ tɑɑ nɑ mɑ́ kɔnɑ.
Mɑɑ ləsɩ-wɛɣɛ teŋku lʋm tɛɛ nɑ mɑ́ kɔnɑ.
24 Nɑ ń fɛlɩ pɑ cɑləm tɑɑ kɛ́ nɔɔhɛɛ,
nɑ nyɑ́ hɑsɩ tɔɣɔ-wɛ.
25 Hɑɩ, mɑ Ɩsɔ, mɑ wulɑʋ,
pɑ nɑwɑ nyɑ́ cɑŋɑ kɛ nyɑ́ təyɑɣɑ tɑɑ.
26 Yonyoolɑɑ ntɛ́ nɔɣɔ tɔɔ,
pɑ wɑɑləɣɩ wontu mɑtɑɑ,
hɛkʋ tɑɑ kɛ́ ɑlʋpiyɑ mpɑ pɑ mɑkɩ ɑkilimisi tɔ.
27 Ɩ sɑ Ɩsɔ kɛ́ təkotilenɑɑ tɑɑ.
Ɩsɛɣɛlɩ lʋlʋŋ nyə́mɑ mɛ ɩ́ sɑ Tɑcɑɑ.
28 Mə tənʋɣʋ Pɛncɑmɛɛ kpekəle ntɛ́ mə nɔɣɔ tʋ,
nɑ pə́ kɑɑsɩ Yutɑ nɑ Sɑpulɔŋ nɑ Nɛfətɑli pə ɑwulumpiyɑ.
29 Mə Ɩsɔ cɑɑ kɛ́ sɩ ɩ́ wɛɛ toŋ.
Hɑɩ, Ɩsɔ, sɔɔsɩ toŋ kɛ mpi n lɑpɑ-tʋ tɔ.
30 Nyɑ́ təsɛɛlɛ tɑɑ kɛ́ n wɛɛ,
nɑ ń tɔkɩ kɑwulɑɣɑ kɛ Yosɑlɛm tɔɔ.
Awulɑɑ kɑ́ kɔnɑ-ŋ kʋcɔɔŋ.
31 Nyɑɑsɩ Icipiti wei ɩ kɛ́ səsəncɑɑsɩ tɛɛ wontuɣu tɔ.
Ɩ wɛ kɛ́ ɩsɩɩ lɑtəcɛnɑɑ kɑləkʋ nɑ ɩ́ ŋmɑkələɣɩ yəlɑɑ.
Ɩ pɑsɑ ɩ tɩ nɑ ɩ́ hɑɑkɩ-ŋ liɣitee nyəɣətʋ.
32 Sɔsɑɑ kɑ́ lɩɩnɑ Icipiti nɑ pɑ́ kɔɔ.
Ɩtiyopii nyə́mɑ nɑ́ kɔŋ nɑ pɑ́ tɛkəɣɩ Ɩsɔ kɛ́ niŋ.
33 Atɛ kɑwulɑsɩ mɛ ɩ́ yoo Ɩsɔ kɛ́ yontu.
Ɩ́ sɑ Tɑcɑɑ.
34 Ɩ́ yoo yontu kɛ wei ɩ wɛ ɩsɔŋmʋntʋ
tɑm tɔɔ nyəntʋ tɔɔ nɑ ɩ́ kɔŋ tɔ.
Ɩ yɔɣɔtəɣənɑ ntɛ́ nɑ toŋ.
35 Ɩ́ nyɩ Tɑcɑɑ toŋ.
Ɩ sɔsɔɔntʋ wɛ Ɩsɛɣɛlɩ tɔɔ kɛ́,
nɑ ɩ toŋ wɛ ɩsɔtɑɑ.
36 Hɑɩ, Ɩsɔ, pɑ nyɑŋnɑ-ŋ nyɑ́ təyɑɣɑ tɑɑ kɛ́.
Ɩsɛɣɛlɩ nyə́mɑ Ɩsɔ hɑɑkɩ ɩ yəlɑɑ kɛ toŋ nɑ pəsʋɣʋ.
Ɩsɔ kɛlɛ teeli tʋ.
ɑ68:14 Looŋɑ kɑnɛ kɑ nɩɩʋ wɛ kɑtɛ. Ɩlɛ lɛlɑɑ hʋʋkɩ sɩ Ɩsɛɣɛlɩ nyə́mɑ ɩlɛ, ɑlukuku kɛlɛ Ɩsɛɣɛlɩ nɑ wʋlɑ nɑ liɣitee nnɑ ɑ tee kɔkɔ kɛ mpʋ tɔ, ɑ hʋləɣɩ pɑ ɑkɑɩtʋ. Wɛnɑʋ ŋku yoolɑɑ kuuki təyoole tɑɑ tɔ.
ɑ68:19 kʋcɔɔʋ: Lɛlɑɑ nɑ́ hʋʋkɩ sɩ pə hʋwɛɛ ntɛ́ sɩ pɑ hɑ Ɩsɔ kɛ́ kʋcɔɔŋ. Looŋɑ kɑnɛ kɑ hʋwɛɛ wɛ kɑtɛ.