1 Ḿpʋ́ɣʋ́ Yosɛɛfʋ pǝyɑlʋ Mɑnɑsee, nɑ Mɑnɑsee pǝyɑlʋ Mɑkii, nɑ Mɑkii pǝyɑlʋ Kɑlɑɑtɩ nɑ Kɑlɑɑtɩ pǝyɑlʋ Hefɛɛ, nɑ Hefɛɛ pǝyɑlʋ Selofɑtɩ. Selofɑtɩ ɩnɩ ɩ pɛɛlɑɑ Mɑlɑ nɑ Nowɑ nɑ Hokǝlɑ nɑ Milikɑ nɑ Tiisɑ pɑ polǝnɑ 2 Moisi nɑ kɔtʋlʋ Ɩlɑsɑɑ nɑ Ɩsɛɣɛlɩ kʋpɑɣɑlɑɑ tǝnɑ kiŋ kɛ Ɩsɔ cokǝle nɔnɔɣɔ nɑ pɑ́ tɔ sɩ: 3 Tɑ́ cɑɑ sǝpɑ wʋlɑɣɑ tɛtʋ tɑɑ kɛ́ ɩ ɩsɑɣɑtʋ tɔɔ, ɩ tɑ yele ɑpɑlʋpǝyɑɣɑ. Amɑ ɩ fɛɩ Kolee nɑ ɩ wɑɑlɩ nyǝ́mɑ mpɑ pɑ kʋlɑ Tɑcɑɑ tɔɔ kɛ́ wʋlɑɣɑ tɛtʋ tɑɑ tɔ pɑ tɑɑ. 4 Mpʋ tɔ, ɩ́ hɑ tɑ́ nɑ tɑ́ cɑɑ yǝlɑɑ kɛ tɛtʋ. Pǝ́ tɑɑ kɔɔ nɑ ɩ hǝtɛ sɑɑlɩ yem. Mpi tɔ, ɑlʋpiyɑ tike kɛ ɩ lʋlɑɑ. 5 Ḿpʋ́ɣʋ́ Moisi hʋlɑ Tɑcɑɑ kɛ pɑ kʋsǝlǝmʋtʋ ntɩ. 6 Nɑ ɩ́lɛ́ ɩ tɔ́ sɩ: 7 Pɛɛlɑɑ mpɛ pɑ kʋsǝlǝmʋtʋ wɛ teu. Ɩ́ cɛlɛ-wɛɣɛ pɑ cɑɑ tɛtʋ kɛ ɩ́lɛ́ ɩ lʋlʋɣʋ nyǝ́mɑ nyǝntʋ kiŋ. 8 Pǝ wɛɛ sɩ ń tɛlǝsɩ Ɩsɛɣɛlɩ nyǝ́mɑ sɩ ye ɑlʋpiyɑ tike kɛ yʋlʋ lʋlɑɑ nɑ ɩ́ sɩ, pɑ́ cɛlɛ-sǝɣɩ ɩ kpɑncoou. 9 Ye ɩ fɛɩnɑ ɑlʋpǝyɑɣɑ, ɩlɛ pɑ cɛlɑ ɩ kpɑncoou kɛ ɩ neu yɑɑ ɩ tɑɑlʋ. 10 Yɑɑ ye ɩ fɛɩnɑ neu yɑɑ tɑɑlʋ, ɩlɛ pɑ cɛlɑ ɩ kpɑncoou kɛ ɩ cɑɑ tɑɑlʋ yɑɑ ɩ neu. 11 Yɑɑ ye ɩ cɑɑ fɛɩnɑ tɑɑlʋ yɑɑ neu, ɩlɛ pɑ cɛlɑ ɩ kpɑncoou kɛ ɩ lʋlʋɣʋ nyǝ́mɑ tɑɑ wei ɩ kǝlɑ-ɩ kpǝtǝnɑʋ tɔ. Pǝ kɛ́ Ɩsɛɣɛlɩ nyǝ́mɑ kɛ kʋsǝsɩɩtʋ kɛ́ ɩsɩɩ mɑ kɛɛsʋɣʋ-wɛ tɔ.

12 Ḿpʋ́ɣʋ́ Tɑcɑɑ tɔmɑ Moisi sɩ: Kpɑ Apɑlim pʋɣʋ tɔɔ nɑ ń loosi tɛtʋ nti mɑ hɑɑkɩ Ɩsɛɣɛlɩ nyǝ́mɑ tɔ. 13 N kɑ́ nɑ-tɩ yɑɑ. Amɑ n kɑ́ sɩ teitei kɛ́ ɩsɩɩ nyɑ́ tɑɑlʋ Alɔŋ. 14 Pǝ tɑɣɑ pʋlʋ, ɩ́ tɑ́ tɔkɩ mɑ tɔm kɛ Siŋ wʋlɑɣɑ tɛtʋ tɑɑ kɛ́ wɑɑtʋ wei sɑmɑɑ yookɑɣɑnɑ-m tɔ. Ɩ́ tɑ́ fɑɣɑsɩ-m nɑ mɑ mpɑɑ kɛ wɑɑtʋ wei ɩ́ sǝlǝmɑɣɑ lʋm tɔ. Yoou lʋm mpi pɑ yɑɑnɑ pɑ tɛ tɑɑ sɩ, Melipɑ kɛ Siŋ wʋlɑɣɑ tɛtʋ tɑɑ kɛ́ Kɑtɛɛsɩ tɔ pǝ tɔm kɛ ɩ yɔɣɔtǝɣɩ.

15 Mpʋɣʋlɛ Moisi cɔwɑ Tɑcɑɑ sɩ: 16 Hɑɩ, Ɩsɔ Tɑcɑɑ nyɑ́ wei n hɑɑkɩ weesuɣu tɔ, kpɑ yǝlɑɑ pɑnɛ pɑ nyʋɣʋ tʋ, 17 wei ɩ kɑ pǝsɩ nɑ ɩ́ pɑɑsǝnɑ-wɛɣɛ pɑɑ wɑɑtʋ wei tɔ, nɑ pɑ́ tɑɑ wɛɛ ɩsɩɩ kɑlǝkʋ ŋku kʋ lɑŋɑ tiikilu tɔ.

18 Mpʋɣʋlɛ Tɑcɑɑ tɔmɑ Moisi sɩ: Nuŋ pǝyɑlʋ Yosuwee kɛ́ yʋlʋ wei ɩ tɑɑ mɑ Feesuɣu hɑɣɑɑ tɔɣɔ. Yɑɑ-ɩ nɑ ń tʋ-ɩ tǝmlɛ ntɛ́. 19 Ponɑ-ɩ kɔtʋlʋ Ɩlɑsɑɑ kiŋ kɛ Ɩsɛɣɛlɩ nyǝ́mɑ tǝnɑ ɩsɛntɑɑ, nɑ ń lɑpɩ-ɩ wei ɩ kɑ lɛɛtɩ nyɑ́ lonte tɑɑ tɔ. 20 Pɑsɑ-ɩ nyɑ́ sɔsɔɔntʋ hɔɣɔlʋɣʋ. Ɩlɛnɑ Ɩsɛɣɛlɩ nyǝ́mɑ nyɑnɑ-ɩ. 21 Kɔtʋlʋ Ɩlɑsɑɑ kɑ́ pɛɛkǝɣǝnɑ-ɩ Tɑcɑɑ luɣu nyǝntʋ nɑ kɔtɑɣɑ wontu nti pɑ yɑɑ sɩ wulim nɑ tumimɑ wulim nɑ tumim: Ɩsɔ kɔtɑɣɑ wontu nti pɑ nɑɑkɑɣɑnɑ ɩ luɣu nyǝntʋ tɔɣɔ pɑ yɑɑkɩ mpʋ. tɔ. Ɩlɛnɑ ɩnɩ nɑ Ɩsɛɣɛlɩ sɑmɑɑ pɑ́ tǝŋǝɣɩ-tɩ. 22 Ḿpʋ́ɣʋ́ Moisi mʋwɑ Tɑcɑɑ tɔm, nɑ ɩ́ yɑɑ Yosuwee kɛ kɔtʋlʋ Ɩlɑsɑɑ kiŋ kɛ Ɩsɛɣɛlɩ nyǝ́mɑ tǝnɑ ɩsɛntɑɑ. 23 Nɑ Moisi tǝnɩ niŋ kɛ Yosuwee tɔɔ, nɑ ɩ́ lɑpɩ-ɩ ɩ lonte tɑɑ lɛɛtʋlʋ ɩsɩɩ Tɑcɑɑ kɛɛsʋɣʋ-ɩ tɔ.