1 Yesu kɔmɑ nɑ ɩ́ tɛ yǝlɑɑ kɛ fɑɑci lɑpʋ, ɩlɛnɑ ɩ́ mǝlɩ Kɑpǝnɑhum. 2 Lom yoolu sɔsɔ nɔɣɔlʋ kɑ wɛnɑ yom nɑ ɩ luɣu sʋʋ-ɩ sɔsɔm. Yom ɩnǝɣɩ pǝ wɩɩkɑɣɑ nɑ ɩ́ cɑɑkɩ sǝm. 3 Ɩ nɩɩ Yesu tɑŋ, ɩlɛnɑ ɩ́ tili Yutɑ nyʋɣʋ nyǝ́mɑ nɑpǝlɩ sɩ pɑ́ wiinɑ-ɩ nɑ ɩ́ kɔɔ ɩ́ wɑɑsɩ ɩ yom ɩnɩ. 4 Pɛlɛ pɑ tɑlɑ Yesu kiŋ, ɩlɛnɑ pɑ́ wiinɑ-ɩ tǝkpɛɛ sɩ: Apɑlʋ ɩnɩ ɩ nǝɣǝsǝnɑ ń wɑɑsɩ-ɩ. 5 Pǝ tɑɣɑ pʋlʋ, ɩ sɔɔlɑ tɑ piitim kɛ sɔsɔm, hɑlɩ ɩ ŋmɑ-tʋɣʋ tǝkotile.

6 Tǝnɑɣɑ Yesu tǝŋɑ-wɛ. Ɩ kɔmɑ ɩ́ kpǝtǝnɑ tǝyɑɣɑ, ɩlɛ yoolu ɩnɩ ɩ tilɑ ɩ tɑɑpɑlɑɑ ntɛ́ sɩ: Tɑcɑɑ, tɑɑ kʋ nyɑ́ tǝɣɩ yem, mɑ tɑ tɑlɑ sɩ ń sʋʋ mɑ tǝyɑɣɑ. 7 Hɑlɩ mpʋ ɩnǝɣɩ mɑɑ hʋʋwɑ sɩ mɑ tɑ tɑlɑ mɑ́ kɔɔ mɑ mɑɣɑmɑɣɑ kɛ nyɑ́ kiŋ. Pǝ tɔɔ ɩlɛ, yɔɣɔtɩ kʋyɔɣɔtʋ kɛ tɔm kʋlʋm nɑ mɑ yom hiki ɑlɑɑfǝyɑ. 8 Pǝ tɑɣɑ pʋlʋ, mɑ ɩsǝntɔ mɑ see mɑ sɔsɑɑ kɛ́. Pǝ́cɔ́ mɑ wɛnɑ mɑ sǝkpemɑ nɑ pɛlɛ pɑ lɑkɩ mɑ luɣu nyǝntʋ. Nɑ mɑ́ heelɑ pɑ tɑɑ wei sɩ ɩ́ polo cǝnɛ, ɩ puki kɛ́. Nɑ mɑ́ heelɑ wei sɩ ɩ́ kɔɔ, ɩ́lɛ́ ɩ kɔɔ tɔtɔ. Pǝ́cɔ́ ye mɑ heelɑ mɑ yom sɩ ɩ́ lɑ pǝnɛ, ɩ lɑkɩ kɛ́.

9 Yesu nɩɩ mpʋ, ɩlɛnɑ ɩ́ sɑ yoolu sɔsɔ ɩnɩ, nɑ ɩ́ pǝsǝnɑ sɑmɑɑ wei ɩ tǝŋɑɣɑ-ɩ tɔ ɩ tɔɔ nɑ ɩ́ tɔ sɩ: Pɔpɔtʋ fɛɩ leleŋ, pɑɑ Ɩsɛɣɛlɩ tɑɑ mɑɣɑmɑɣɑ mɑ tɑ nɑtɑ yʋlʋ nɑ ɩ́ tɛmɑ ɩ tɑɑ nɑ Ɩsɔ kɛ́ ɩsǝntɔ.

10 Yoolu ɩnɩ ɩ tillɑɑ kɔmɑ nɑ pɑ́ mǝlɩ tǝyɑɣɑ, ɩlɛ pɑ mɑɣɑnɑ yom ɩnǝɣǝlɛ nɑ ɩ ɑlɑɑfǝyɑ tǝmɑmmɑm.

11 Pǝlɛ pǝ wɑɑlɩ Yesu polɑ ɩcɑtɛ nte pɑ yɑɑ sɩ Nɑyiŋ tɔ tǝ tɑɑ kɛ́ kpɑkpɑɑ, nɑ ɩ ɩfɑlɑɑ nɑ sɑmɑɑ pɑɣɑlɛ kɛ ɩ wɑɑlɩ. 12 Yesu kɔmɑ ɩsɩɩ ɩ sʋʋkɩ ɩcɑtɛ, ɩlɛ ɑlʋ leelu nɔɣɔlʋ ɩ pǝyɑɣɑ sǝpɑɣɑlɛ nɑ pɑ́ pukinɑ-kɛɣɛ pim, nɑ ɩcɑtɛ nyǝ́mɑ sɑmɑɑ tǝŋ leelu ɩnɩ ɩ wɑɑlɩ. Nkɛ ɩnɩ kɑ tike kɛ leelu ɩnɩ ɩ kɑ lʋlɑɑ. 13 Tɑcɑɑ nɑ-ɩ, ɩlɛnɑ ɩ tɔm lɑpɩ-ɩ pǝtɔɔtǝlɛ, nɑ ɩ́ tɔmɩ-ɩ sɩ: Tɑɑ wii.

14 Ḿpʋ́ɣʋ́ Yesu polɑɑ nɑ ɩ́ tɔkɩ sǝtʋ kpɑtǝlɛ, ɩlɛnɑ sǝɣǝllɑɑ nɑ́ɑ́ sǝŋ, nɑ Yesu tɔ sɩ: Ɩfepu nyɑ́ mɑ cɑɑ sɩ ń kʋlɩ.

15 Tǝnɑɣɑ sǝtʋ ɩnɩ ɩ kʋlɑɑ nɑ ɩ́ sʋʋ yɔɣɔtɑɣɑ, nɑ Yesu cɛlɛ-ɩ ɩ too. 16 Ḿpʋ́ɣʋ́ sɔɣɔntʋ kpɑ pɑ tǝnɑ nɑ pɑ́ sɑŋ Ɩsɔ nɑ pɑ́ tɔŋ sɩ: Ɩsɔ kʋyɔɣɔtʋtʋ tɛlǝsʋlʋ sɔsɔ lɩɩ tɑ hɛkʋ tɑɑ. Nɑ pɑ́ tɑsɑ tɔtɔ sɩ: Pʋwɛ, Ɩsɔ kɔmɑ sɩ ɩ teŋ ɩ yǝlɑɑ.

17 Ḿpʋ́ɣʋ́ mpi Yesu lɑpɑ mpʋ tɔ pǝ tɔm yɑ Yutɑ tɛtʋ tǝnɑ, nɑ pǝ cɔlɔ tɛtʋnɑɑ tǝnɑ tɑɑ.

18 Ḿpʋ́ɣʋ́ Yohɑɑnɩ ɩfɑlɑɑ heelɑ-ɩ tɔm ntɩ tǝ tǝnɑ. Ɩlɛnɑ ɩ́ yɑɑ pɑ tɑɑ nɑɑlɛ, 19 nɑ ɩ́ tili-wɛɣɛ Yesu kiŋ sɩ pɑ́ pɔɔsɩ-ɩ sɩ ɩnǝɣǝlɛ wei ɩ tɔm pɑɑ tɔmɑ sɩ ɩ kɑ́ kɔɔ tɔ, yɑɑ nɔɣɔlʋ wɛɛ ɩ kɔŋ, tǝ tɑŋ ɩlɛ? 20 Pɛlɛ pɑ tɑlɑ Yesu cɔlɔ, ɩlɛnɑ pɑ́ tɔ sɩ: Ɩsɔ Lʋm sɔlʋ Yohɑɑnɩ kʋsǝnɑ-tʋ sɩ tǝ pɔɔsɩ-ŋ sɩ: Nyɑɣɑlɛ wei ɩ tɔm pɑɑ tɔmɑ sɩ ɩ kɑ́ kɔɔ tɔ, yɑɑ nɔɣɔlʋ wɛɛ ɩ kɔŋ, tǝ tɑŋ ɩlɛ?

21 Pǝ pɑmnɑ wɑɑtʋ ɩnɩ ɩ tɑɑ Yesu wɑɑsɑɣɑ yǝlɑɑ pɑɣɑlɛ kɛ pɑ kʋtɔmǝŋ, nɑ ɩ́ lɑkɩ nɑ ɑcɑmɑɑ hikiɣi ɑlɑɑfǝyɑ, nɑ ɩ́ looki ɑlɔɣɑɑ, nɑ ɩ́ kuliɣi yʋlʋmɑɑ pɑɣɑlɛ ɩsɛ. 22 Ɩlɛnɑ ɩ́ tɔ-wɛ sɩ: Ɩ́ polo nɑ ɩ́ heeli Yohɑɑnɩ kɛ mpi ɩ́ nɑwɑ nɑ nti ɩ́ nɩɩwɑ tɔ sɩ: Yʋlʋmɑɑ nɑɑkɩ, kɑɑkɑlɑsɩ tɔŋ, tɔnʋɣʋ tɔɔ ɑsilimɑ kʋtɔŋ nyǝ́mɑ nɑɑkɩ nyʋɣʋ, nɑ ntɑmɑɑ nɑ́ nɩɩkɩ, nɑ sǝtɑɑ nɑ́ feŋ. Pǝ́cɔ́ kʋnyɔntʋnɑɑ nɑ́ tɔŋɑ Lɑɑpɑɑlɩ Kʋpɑŋ kɛ nɩɩʋ. 23 Wei ɩ nɑɑni kɑɑ lɩɩ mɑ tɔɔ tɔ, pʋntʋ nɩɩ leleŋ kɛ́.

24 Yohɑɑnɩ tillɑɑ mpɛ pɛlɛ pɑ kɔmɑ nɑ pɑ́ kpe, ɩlɛnɑ Yesu sʋʋ sɑmɑɑ kɛ Yohɑɑnɩ ɩnɩ ɩ tɔm kɛ pɔɔsʋɣʋ sɩ: Pepeɣe ɩ́ kɑ polɑ wʋlɑɣɑ tɛtʋ tɑɑ kɛ́ nɑʋ ye? Heelim mɑkɩ nɑ pǝ́ ciɣitiɣi sǝsǝncɑŋɑ ŋkɑ tɔ? 25 Ɩlɛ pepe nɑʋ kɛ ɩ polɑɑ? Yɑɑ yʋlʋ wei ɩ suu kɑcɔkɑ wontu tɔ? Tɔʋ, mpɑ pɛlɛ pɑ suuki kɑcɔkɑ wontu nɑ pɑ́ wɛ leleŋ tɑɑ tɔ, ɑwulɑɑ tɛɛsɩ tɑɑ kɛ́ pɛlɛ pɑ wɛɛ. 26 Ɩlɛ pepe mɑɣɑmɑɣɑ kɛ ɩ kɑ tɩɩ polɑ nɑʋ? Yɑɑ Ɩsɔ kʋyɔɣɔtʋtʋ tɛlǝsʋlʋ nɔɣɔlʋ? Tɑmpɑm, Ɩsɔ kʋyɔɣɔtʋtʋ tɛlǝsʋlʋ kɛ́, hɑlɩ mɑ heeliɣi-mɛ sɩ ɩ tɩɩ kǝlɑ mpʋ. 27 Ɩ tɔm kɛ pɑ tɩɩ ŋmɑɑwɑ Ɩsɔ Tɔm tɑɑ sɩ:

28 Tɑmpɑnɑ kɛ mɑ heeliɣi-mɛ yoo, tuu tɔ pɑ tɑ lʋlǝtɑ nɔɣɔlʋ nɑ pʋntʋ tɛɛ Yohɑɑnɩ fɑ. Ɩlɛ pɑɑ nɑ mpʋ tɔ, ye mpɑ pɑ tisɑɑ nɑ Ɩsɔ tɔɣɔ pɑ tɔɔ kɛ́ kɑwulɑɣɑ, pɑ tɑɑ sǝkpelu mɑɣɑmɑɣɑ tɛɛ-ɩ.

29 Pɑ tǝnɑ mpɑ pɑ nɩɩ tɔm ntɩ tɔ pɑ hɑ Ɩsɔ kɛ́ tɑmpɑnɑ, hɑlɩ pǝ kpɛŋnɑ lɑmpuu mʋlɑɑ mɑɣɑmɑɣɑ. Pǝ tɑɣɑ pʋlʋ, pɑɑ tɛmɑ tisuɣu sɩ Yohɑɑnɩ ɩ́ sɔ-wɛɣɛ Ɩsɔ lʋm. 30 Amɑ Fɑlisɑnɑɑ nɑ Ɩsɔ Tɔm sɛɣɛsǝlɑɑ nɑ́ kisɑ tǝmlɛ nte Ɩsɔ kɑ hʋʋwɑ sɩ ɩ kɑ́ lɑ-wɛ tɔ, pɑ tɑ tisi sɩ Yohɑɑnɩ ɩ́ sɔ-wɛɣɛ Ɩsɔ lʋm.

31 Ḿpʋ́ɣʋ́ Yesu tɑsɑɑ sɩ: Pepeɣelɛ mɑ́ kɛɛsǝnɑ kʋfɑlɑŋ yǝlɑɑ pɑnɛ? Ɩsɩɩ pepe cɑʋ kɛlɛ pɑ nǝɣǝsǝnɑɑ tɔ? 32 Pɑ nǝɣǝsǝnɑ kɛ́ ɩsɩɩ piyɑ cɑkʋɣʋ kɑtɑɣɑ tɑɑ nɑ sɩ tɔŋ tǝmɑ sɩ: Anɩ tǝ hʋlɑ hǝsɩ ɩ́ tɑ pɑɑ. Pǝ́cɔ́ tǝ wii lǝyɑɣɑ wulɑ, ɩ́ tɑ́ wii. 33 Pǝ tɑɣɑ pʋlʋ, lʋm sɔlʋ Yohɑɑnɩ kɔmɑ tɔ, ɩɩ tɔkɩ tɔɣɔnɑɣɑ, pǝ́cɔ́ ɩɩ nyɔɔkɩ sʋlʋm. Ɩlɛnɑ mɩɩ tɔŋ sɩ ɩlɔɣɔhilu kɛ-ɩ kɛ́. 34 Yʋlʋ Pǝyɑɣɑ mɑ́, mɑ mǝlɑɑ nɑ mɑ́ kɔɔ nɑ mɑ́ tɔkɩ nɑ mɑ́ nyɔɔkɩ, ɩlɛnɑ ɩ́ tɑɣɑnǝɣɩ mɑɣɑ yɔɣɔtʋɣʋ tɔtɔ sɩ mɑ kɛ́ hilitu nɑ sʋlʋnyɔɔlʋ. Aɑɩyee sɩ lɑmpuu mʋlɑɑ nɑ ɑsɑɣɑɑ pɑ ceu kɛ́. 35 Amɑ Ɩsɔ lǝmɑɣɑsɛɛ tewɑɣɑ, hɑlɩ pǝ nɑɑkɩ ḿpʋ́ɣʋ́ mpɑ pɑ tǝŋǝɣɩ-yɛ tɔ pɑ kiŋ.

36 Kʋyɑkʋ nɑkʋlɩ Fɑlisɑ nɔɣɔlʋ ɩ yɑɑ Yesu kɛ́ tɔɣɔʋ. Ɩlɛnɑ Yesu sʋʋ ɩ tɛ nɑ ɩ́ cɑɣɑ nɑ ɩ́ tɔŋnɑ tɔɣɔʋ. 37 Apɑlɑɑ tǝnɑ ɑlʋ nɔɣɔlʋ ɩ kɑ wɛ ɩcɑtɛ ńtɛ́ tǝ tɑɑ. Ḿpʋ́ɣʋ́ ɑlʋ ɩnɩ ɩ nɩɩwɑ sɩ Yesu cɑɣɑ tɔɣɔʋ kɛ Fɑlisɑ tǝyɑɣɑ tɑɑ, ɩlɛnɑ ɩ́ kɔnɑ tulɑɑlʋ kʋpɑŋ nɔɣɔlʋ nɑ ɑkpɑlǝpiyɑ. 38 Nɑ ɩ́ luŋ Yesu nɔɔhɛɛ tɛɛ nɑ ɩ wɑɑlɩ tɔɔ nɑ ɩ́ wiiki. Ḿpʋ́ɣʋ́ ɩ tɑɑnɑ Yesu nɔɔhɛɛ kɛ ɩsǝlʋm, ɩlɛnɑ ɩ́ hɩɩsɩ-yɛ nɑ ɩ́ nyɔɔsɩ, nɑ ɩ́ wɑɣɑlɩ-yɛ nɑ ɩ́ sɑɣɑlɩ-yɛɣɛ tulɑɑlʋ. 39 Fɑlisɑ wei ɩnɩ ɩ yɑɑ-ɩ tɔɣɔʋ kɛ mpʋ tɔ ɩ nɑ mpʋ. Ɩlɛnɑ ɩ́ mɔlɩ ɩ tɑɑ sɩ: Ye ɑpɑlʋ ɩnɛ ɩ kɑ kɛ́ Ɩsɔ kʋyɔɣɔtʋtʋ tɛlǝsʋlʋ ɩ kɑ nyǝmɑ́ ɑlʋ wei ɩnɩ ɩ tokiɣinɑ-ɩ ɩsǝntɔ tɔ ɩ cɑkǝlɛ nɑ ɩ yɑɑsi wɛ ɩsǝnɑ tɔ. Ɩ kɑ nyǝmɑ-ɩ sɩ ɩ fɛɩ teu. 40 Mpʋɣʋlɛ Yesu tɔmɑ-ɩ sɩ: Simɔŋ mɑɑ heeli-ŋ tɔm nɑtǝlɩ. Tǝnɑɣɑlɛ Simɔŋ cɔwɑ sɩ: Tɑcɑɑ yɔɣɔtɩ.

41 Ɩlɛnɑ ɩ́ tɔ sɩ: Liɣitee kǝntʋlʋ nɔɣɔlʋ ɩ kɑ wɛnnɑ kǝmɑ nyǝ́mɑ kɛ nɑɑlɛ, lɛlʋ fɛlǝɣɩ-ɩ liɣitee nyǝɣǝtʋ nɑsǝlɛ nɩɩnʋwɑ (500), nɑ lɛlʋ kɛ nyǝɣǝtʋ nɩɩlɛ nɑ nɑɑnʋwɑ. 42 Pɑ tɑ hiki sɩ pɑ́ fɛlɩ-ɩ, ɩlɛnɑ ɩ́ cɛ pɑ nɑɑlɛ ɩnɩ. Tɔʋ, pɑ tɑɑ ɑwe lɑŋlɛ kɑ́ kǝlǝnɑ-ɩ hɛɛnɑʋ?

43 Tǝnɑɣɑ Simɔŋ cɔwɑ sɩ: Mɑ hʋʋ sɩ, wei ɩ nyǝntɛ kǝlɑ tɔɔʋ tɔ. Yesu sɩ: Amɑ n hʋʋ teu.

44 Ɩlɛnɑ ɩ́ pǝsǝnɑ ɑlʋ tɔɔ nɑ ɩ́ tɔ Simɔŋ sɩ: Simɔŋ n nɑ́ ɑlʋ ɩnɛ? Mɑ sʋʋ nyɑ́ tǝyɑɣɑ tɑɑ tɔ, n tɑ hɑ-m lʋm sɩ mɑ́ kɔ mɑ nɔɔhɛɛ. Amɑ ɩ́lɛ́ ɩ tɑɑnɑ-yɛɣɛ ɩsǝlʋm, nɑ ɩ́ hɩɩsɩ-yɛ nɑ ɩ nyɔɔsɩ. 45 Mɑ tɑlɑ nyɑ́ tɛ tɔ, n tɑ wɑɣɑlɩ-m. Amɑ tuu ɩsɩɩ mɑ sʋʋʋ tɔ, ɩ́lɛ́ ɩ tɑ hɛɛsɩ mɑ nɔɔhɛɛ wɑɣɑlʋɣʋ. 46 N tɑ pǝlɩ mɑ nyʋɣʋ tɑɑ kɛ́ nim. Amɑ tulɑɑlʋ kʋpɑmpɑŋ kɛ ɩ́lɛ́ ɩ pǝlɑ, hɑlɩ mɑ nɔɔhɛɛ tɔɔ. 47 Pǝ tɔɔ kɛ́ mɑ heeliɣi-ŋ sɩ, ɩ sɔɔlʋɣʋ ḿpʋ́ɣʋ́ sɔsɔm tɔ pǝ hʋ́lǝ́ɣɩ́ kɛ́ sɩ pɑɑ ɩ ɩsɑɣɑtʋ nɑ tǝ tɔɔʋ kɛ mpʋ tɔ pɑ hɩɩsɑ-tɩ. Pǝ tɔɔ ɩnǝɣɩ wei ɩ wɛnɑ ɩsɑɣɑtʋ kɛ pǝcɔ nɑ pɑ́ hɩɩsɑ-tɩ tɔ, pʋntʋ sɔɔlǝɣɩ mɑɣɑnɑ kɛ́.

48 Tǝnɑɣɑ ɩ heelɑ ɑlʋ ɩnɩ sɩ: Nyɑ́ ɩsɑɣɑtʋ hɩɩsɑɑ.

49 Ḿpʋ́ɣʋ́ ɩ́ nɑ mpɑ pɑ cɑɣɑ tɔɣɔʋ tɔ pɛlɛ pɑ sʋʋ pɑ tɑɑ kɛ́ yɔɣɔtʋɣʋ sɩ: Aweɣelɛ ɩnɛ ɩnɩ nɑ hɑlɩ ɩnɩ ɩ tɑkɑ ɩ hɩɩsǝɣɩ ɩsɑɣɑtʋ? 50 Amɑ Yesu nɑ́ heelɑ ɑlʋ ɩnɩ sɩ: N tɛmɑ nyɑ́ tɑɑ nɑ Ɩsɔ tɔɣɔ ɩ yɑpɑ nyɑ́ nyʋɣʋ. Tɛɛnɑ lɑŋhʋlʋmlɛ.