1 Ḿpʋ́ɣʋ́ Soopu tɑsɑɑ sɩ:

Pepe tɔɔ kɛ́ Ɩsɔ Tomɑ tǝnɑ tʋ tɑ sɩɩ kʋyɑkʋ

ŋku ɩ nyǝntɑɑ kɑ́ nɑ-ɩ nɑ ɩ́ hʋʋkǝnɑ tɔ?

2 Pǝyele yǝlɑɑ tuusiɣi pɑ tɛtʋ toosi,

nɑ lɛlɑɑ nɑ́ɑ́ tiikiɣi kɑlǝkǝŋ kʋŋmɩɩlǝŋ.

3 Pɑ lɛɛkǝɣɩ sulɑʋ kɛ ɩ kpɑŋɑɣɑ,

nɑ pɑ́ kpɑɣɑ leelu nɑʋ kɛ tɔlʋmɑ.

4 Ɩlɛnɑ pɑ́ suliɣi kʋnyɔntʋnɑɑ kɛ mpɑɑʋ tɑɑ,

nɑ pɑ́ yɔkǝɣɩ-wɛ nɑ pɑ́ tusiɣi.

Nɑ pɑ́ cɑɑlǝɣɩ-wɛ sɩ pɑ́ ŋmɛlǝɣɩ.

5 Pɑ pǝsɑ ɩsɩɩ tɑɑlɛ kpɑŋɑsɩ kɛ nyɩɩtʋ tɑɑ kɛ́.

Tɑnɑŋ ɑhulɑ kɛ pɑ lɩɩkɩ nɑ pɑ́ puki

pɑ piyɑ tɔɣɔnɑɣɑ pɛɛkʋɣʋ kɛ wʋlɑɣɑ tɛtʋ nti tǝ tɑɑ fɛɩ cɑɣɑʋ tɔ.

6 Tɛtɛlɑtʋ tɑɑlɛ tɑɑ kɛ́ pɑ kʋŋ.

Ɩlɛnɑ pɑ́ kunti ɩsɑɣɑʋ tɩɩŋ wei pɑ yɑɑ sɩ lɛsɛŋnɑɑ tɔ.

7 Pɑ hǝntǝɣɩ ɑhoo kɛ kpɛtɛ kɛ́, kʋtɑkǝm fɛɩ.

Pɑ fɛɩnɑ sɑɣɑtɑnɑɑ kɛ sɑɑ wei wɑtʋ kpɑɑkɩ tɔ.

8 Tɛʋ nɩɩkɩ-wɛɣɛ pulɑsɩ tɑɑ kɛ́.

Tǝsʋʋlɛ fɛɩ.

Ɩlɛnɑ pɑ́ cɔɔsǝɣǝnɑ kʋkpɑmǝŋ.

9 Pɑ kɔɔlǝɣɩ sulɑʋ kɛ hǝlɑ tɔɔ,

nɑ pɑ́ lɛɛkɩ-ɩ nɑ toŋ.

Ɩlɛnɑ pɑ́ kpɑkǝɣɩ kʋnyɔntʋnɑɑ tokonɑɑ kɛ tɔlʋmɑ.

10 Pǝ wɑɑlɩ ɩlɛnɑ pɑ́ tʋ-wɛɣɛ tɔntɛ kɛ kpɛtɛ, wontu fɛɩ.

Nɑ pɑ́ sʋkǝɣɩ-wɛɣɛ tɔɣɔnɑɣɑ kɛ nyɔɣɔsɩ.

11 Pɑ mʋlǝɣɩ tʋɣʋ ŋku pɑ yɑɑ sɩ Olifi tɔ kʋ pee nim,

nɑ pɑ́ nyɑɑsǝɣɩ tʋɣʋ ŋku pɑ yɑɑ sɩ lɛsɛŋ tɔ kʋ pee lʋm nɑ lʋkɔtʋ.

12 Acɑlɛɛ tɑɑ yǝlɑɑ mpɑ pǝ kʋwɑ

nɑ mpɑ pɑ cɑɑkɩ sǝpʋ tɔ,

pɑ mɔlǝɣɩ nɑ pɑ́ mɑkɩ kɑpusi nɑ pɑ́ pɛɛkǝɣɩ sɩ pɑ́ wɑɑsɩ-wɛ.

Amɑ Tɑcɑɑ nɑɑ pɑɑsǝɣǝnɑ ɑcɑɑlǝtʋ ntɩ.

13 Lɛmpɑ nɑ́ kɛ́ mpɑ pɑɑ cɑɑkɩ nyɑɑlǝm tɔ.

Anɩ pɑ tɑ nyɩ Ɩsɔ mpɑɑŋ,

pǝ́cɔ́ pɑɑ tɩɩ tǝŋǝɣɩ-ɩ.

14 Tefemle kɛ yʋlʋkʋlʋ kʋlǝɣɩ

nɑ ɩ́ kʋ́ wɑhɑlɑ tʋ nɑ kʋnyɔntʋ,

nɑ ɑhoo yu, ɩlɛnɑ ɩ́ tɛɛ ŋmɩɩlǝm.

15 Apɑlʋ wɑsɑŋkɑlɩ feŋiɣi sǝkpɛtʋɣʋ tɑɑ kɛ́,

nɑ ɩ́ tɑkǝɣɩ ɩ ɩsɛntɔɔ kɛ́ pǝcɛkǝlɛ

nɑ ɩ́ tɔŋ sɩ: Nɔɣɔlʋ kɑɑ nɑ-m.

16 Ahoo kɛ ŋmɩɩlʋ yɔkǝɣɩ kutuluɣu nɑ ɩ́ ŋmɩɩlɩ.

Ilim tɑɑ, ɩlɛnɑ ɩ́ tǝkɩ ɩ tǝɣɩ ɩ tɛ.

Ɩ tɑ nyɩ ɩsǝnɑ nyɑɑlǝm wɛɛ tɔ.

17 Pɑɑ tɑnɑŋ ŋku kʋ kɛ́ mpɛɣɛ sǝm sǝkpɛtʋɣʋ kɛ́.

Mpi tɔ, pɑ nɩɩkɩ pǝ sɔɣɔntʋ sɔsɔɔntʋ.

18 Ɩsɑɣɑʋ wɛɛ kɛ́ ɩsɩɩ lʋm tɛɛkʋɣʋnɑ kɑɑwʋlɑɣɑ tɔ.

Ɩ tǝcɑɣɑlɛ kɛ́ mpusi nyǝntɛ kɛ tɛtʋ tɑɑ kɛ́,

ɩ kɑɑ tɑsɑ tɩɩŋ wei pɑ yɑɑ

sɩ lɛsɛŋnɑɑ tɔ ɩ tɑɑlɛ mpɑɑʋ kɛ́ tǝŋʋɣʋ.

19 Teitei ɩsɩɩ wʋlɑɣɑ

nɑ hɑŋɑɣɑ nyɔɔkʋɣʋ tɛʋ tɔmpɛɛ lʋm tɔ.

Ḿpʋ́ɣʋ́ ɑtɛtǝlɛ tɛɛkǝnɑ ɩsɑɣɑʋ.

20 Ɩ too kʋlʋlʋ kɑ́ sɔɔ ɩ tɔɔ.

Pɑ kɑɑ ŋmɑɑ ɩ hǝtɛ kɛ tiili.

Ɩlɛ pǝ pɛlɑ ɩsɑɣɑʋ ntɛ́ ɩsɩɩ tʋɣʋ.

21 Mpi tɔ, ɩ tʋɣɩ wɑhɑlɑ kɛ kɑɑlʋlɑɣɑ kɛ́,

nɑ ɩ́ kisiɣi kʋpɑntʋ lɑpʋ kɛ leelu.

22 Aɑɩ, Ɩsɔ toŋ tɔɔ,

ɩ yeki kɛ́ nɑ mʋsʋŋtʋnɑɑ weesiŋ tɑɣɑlǝɣɩ.

Pɑ tɑɣɑnǝɣɩ pɑ nɔɔhɛɛ tɔɔ kɛ́ sǝŋʋɣʋ,

pǝyele pɑ tɑɑ tɛɛlǝɣɩ weesuɣu.

23 Ɩsɔ yeki nɑ pɑ́ cɑɣɑnɑ pɑ tɩ.

Amɑ ɩ feŋiɣi pɑ tɔntɛ tɑɑ.

24 Lɑɑsɑɣɑ tɔɔ kɛ́ yǝlɑɑ

mpɛ pɑ sǝŋǝɣɩ, ɩlɛnɑ pǝ́ sɑɑlɩ.

Nɑ pɑ́ kpili nyɔɔŋ, ɩsɩɩ tʋɣʋ hɛtʋɣʋ wʋlʋɣʋ tɔ.

Nɑ pɑ́ lontili, ɩsɩɩ pɑ sɛtʋɣʋ lɔɔlʋɣʋ tɔ.

25 Awe kɑ kpɛɛsǝnɑ-m sɩ pǝ tɑɣɑ mpʋ?

Awe kɑ́ pǝsɩ mɑ tɔm kɛ kpɛtɛ?