2 Wɑɑtʋ wei kɛ́ ɩ́ kɑ su yɔɣɔtɑɣɑ,

nɑ ɩ́ kpɑɣɑ lǝmɑɣɑsɛɛ.

Ɩlɛnɑ tǝ́ yɔɣɔtɩ tɔm kʋpɑntʋ.

3 Ɩ́ sumɑ sɩ Soopu ɩ́ nyǝnɩ-tʋɣʋ heeŋ suwe?

Pepe tɔɔ kɛ́ ɩ nyǝnǝɣɩ-tʋɣʋ kʋmɛlɛmǝŋ?

4 Soopu ɩsɩɩ n huɣutuɣu lotu kɛ mpʋ nɑ pɑ́ɑ́nɑ́ tɔ,

n hʋʋ sɩ nyɑ́ tɔɔ kɛ́ pǝ lɔ tɛtʋ

nɑ kʋkpɑmǝŋ kpɛsɩ nɑ ɩ́ lɑɣɑsɩ lonɑ nɑ?

5-6 Ɩsɑɣɑʋ tǝyɑɣɑ tɑɑ kɔkɔ

kɑ te kɛ́ nɑ kɑ nyɑlǝmǝlɛ mʋkɩ.

7 Ɩsǝnɑ ɩ kɑ tɔŋɑɣɑnɑ nɑɑni tɔ pɩɩ pɑsɑ.

Ɩlɛnɑ ɩ mɑɣɑmɑɣɑ ɩ tɑɑ lɑɣɑtʋ nɑ́ɑ́ yele nɑ ɩ́ hoti.

8 Mpi tɔ, puluɣu tɑɑ kɛ́ ɩ nɔɔhɛɛ tiiwɑ,

nɑ ɩ́ tɔŋ kʋ kpɑlɑhuuŋ tɔɔ.

9 Kɑtɔkɑ kɑ́ kpɑ ɩ nɔntɑɑlʋɣʋ

nɑ kɑ ŋmɩɩsɩ nɑ́ɑ́ hɔkɔ-ɩ.

10 Puluɣu pimɑ ɑtɛɣɛ,

nɑ kʋnyǝpǝm kɛ ɩ mpɑɑʋ tɑɑ.

11 Sɔɣɔntʋ sɔsɔɔntʋ kpɑɑ-ɩ nɑ pɑɑ timpiɣi,

nɑ tǝ́ tǝŋǝɣɩ-ɩ nɔɔhǝlɛ nɔɔhǝlɛ.

12 Pɑɑ ɩ kɑ kɛ́ toŋ tʋ,

nyɔɣɔsɩ kɑ́ lɩɩ-ɩ kɛ́ nɑ ɩ́ sʋʋ kʋnyɔŋ tɑɑ.

13 Kʋtɔŋ ɩsɑɣɑʋ tɔɣɔ ɩ nɑntʋ kɛ

pǝ kpɑɣɑʋ ɩ niŋ nɑ ɩ nɔɔhɛɛ tǝnɑ tɔ.

14 Pɩɩ lǝsɩ-ɩ nɑ toŋ kɛ ɩ tɛ́ timpi

ɩ cɑɣɑnɑ nɑɑni tɔ, nɑ pǝ́ ponɑ-ɩ sǝtɑɑ wulɑʋ tɛ́.

15 Ɩ tǝyɑɣɑ tɑ kɛ ɩ nyǝŋkɑ tɔtɔ,

yʋlʋ pǝsǝɣɩ nɑ ɩ́ sʋʋ kɑ tɑɑ.

Pɑ ŋmɩɩsɑ kɑ tɑɑ kɛ́ kɔkɔ mɑmɑcǝɣǝlɑsɩ.

16 Ɩlɛnɑ ɩ́ pǝsɩ ɩsɩɩ tʋɣʋ sǝkʋɣʋ too

kʋ lilɑ nɑ pǝ́ yoosinɑ kʋ piliŋɑsɩ tɔ.

17 Ɩ hǝtɛ kɑ́ sɑɑlɩ tɛtʋ tǝnɑ tɑɑ.

Nɔɣɔlʋ kɑɑ tɔɔsɩ ɩ tɔɔ.

18 Pɑɑ lǝsɩ-ɩ nyɑɑlǝm tɑɑ nɑ ɩ́ sʋʋ sǝkpɛtʋɣʋ tɑɑ,

nɑ pɑ́ tɩɩ lǝsɩ-ɩ tɛtʋ.

19 Ɩ kɑɑ yele pǝyɑɣɑ, yɑɑ lʋlʋɣʋ tʋ,

yɑɑ pǝ́ kɑɑsɩ nɔɣɔlʋ nɑ ɩ ɩsɛ kɛ ɩ tǝcɑɣɑlɛ.

20 Ilim tǝlɩɩlɛ, nɑ pǝtǝtʋlɛ nyǝ́mɑ kɑ́ nɩɩ

ɩ wɑkǝlʋɣʋ tɔm, nɑ pǝ́ sʋsɩ-wɛɣɛ wɑtʋ.

21 Ɩsǝnɑ kʋtɑkɛɛsǝŋ tɛɛsɩ kɑ́ tɛɛsǝnɑ tɔɣɔlɛ.

Mpɑ pɑ tɑ nyɩ Ɩsɔ tɔ pɑ lonte ntɛ́.