1 Ḿpʋ́ɣʋ́ Tɑcɑɑ heelɑ-m sɩ: Tɑsɑ nyɑ́ ɑlʋ kɛ kpɑɣɑʋ. Pɑɑ ɩ mǝlɑ ɑpɑlɑɑ tǝnɑ ɑlʋtʋ tɑɑ tɔ. Mɑ sɔɔlɑ ḿpʋ́ɣʋ́ Ɩsɛɣɛlɩ nyǝ́mɑ kɛ́ nɑ pɑ́ tǝŋǝɣɩ tɩɩŋ nɑ pɑ́ sɔɔlɑ pǝ lɛsɛŋ kɑkɑlɑsɩ. 2 Mɑ mʋwɑ mɑ ɑlʋ nɑ liɣitee nyǝɣǝtʋ nɑɑnʋwɑ nɑ kɑkpɑsɩ, nɑ tɔɣɔnɑɣɑ pee sɑɑkǝnɑɑ nɑɑtoso. 3 Mɑ heelɑ-ŋ sɩ: Cɑɣɑ nɑ pǝ tɑɑŋɩ, tɑŋɩ-m nɑ ń yele wɑsɑŋkɑlǝtʋ. Mɑ mɑɣɑmɑɣɑ mɑɑ tɑŋɩ-ŋ mpʋ tɔtɔ.

4 Mpʋ ɩnǝɣɩ Ɩsɛɣɛlɩ nyǝ́mɑ mɛ ɩ́ kɑ́ cɑɣɑ, ɩ́ kɑɑ wɛɛnɑ wulɑʋ nɑ pɑɑsǝnlʋ. Yɑɑ kɔtɑsɩ nɑ kɔtǝlɑɑ toko wei pɑ pɔɔsǝɣǝnɑ Tɑcɑɑ kɛ tɔm tɔ, yɑɑ tǝlɑɑlɛ. 5 Ɩ́ kɑ́ tɛ nɑ ɩ́ mǝlɩ mǝ tɛtʋ tɑɑ, nɑ ɩ́ mǝlǝnɑ mǝ Ɩsɔ nɑ mǝ wulɑʋ Tɑfiiti lʋlʋɣʋ tʋ tɔɔ. Ɩ́ kɑ́ nyɑnɑ Tɑcɑɑ mɑ́ nɑ mɑ́ɑ́ kooli-mɛɣɛ kʋpɑntʋ.