1 Nepukɑnɛsɑɑ mɑ́, mɑ cɑɣɑ mɑ kɑwulɑɣɑ tǝyɑɣɑ tɑɑ. Mɑ tɔkɑɣɑ kɛ́ nɑ mɑ́ nyɔɔkɩ nɑ mɑ́ sumɑ. 2 Ḿpʋ́ɣʋ́ mɑ hǝntɑ ɑhoo nɑɑlɩ nɑ mɑ́ toosi. Sɔɣɔntʋ kpɑ-m, nɑ pǝ́ pǝsɩ mɑ lɑŋlɛ. 3 Ḿpʋ́ɣʋ́ mɑ yɑɑ Pɑpiloni nyǝntɑɑ tǝnɑ sɩ pɑ́ heeli-m mɑ toosee ɑnɩ ɑ hʋwɛɛ. 4 Kɛlɛnɑ tʋwɑɑ nɑ ɩsɔtʋlʋŋɑsɩ tɔm nyǝntɑɑ nɑ pee nɑlɑɑ nɑ topotopo nyǝ́mɑ pɑ kɔɔ nɑ mɑ́ heeli-wɛɣɛ toosee ɑnɩ. Amɑ pɑ tɑ pǝsɩ nɑ pɑ́ sɛɣɛsɩ-m ɑ hʋwɛɛ. 5 Wɑɑlɩ wɑɑlɩ kɛ́ Tɑniyɛɛlɩ wei ɩ wɛnɑ Ɩsɔ Nɑŋŋtʋ lǝmɑɣɑsǝlɛ nɑ pɑ cuɣusɑ-ɩ mɑ tʋɣʋ hǝtɛ sɩ Pɛlǝtɑsɑɑ tɔ ɩ kɔmɑ. 6 Ḿpʋ́ɣʋ́ mɑ heelɑ-ɩ mɑ toosee. Mɑ sɩ: Tʋwɑɑ wulɑʋ Pɛlǝtɑsɑɑ, mɑ nyǝmɑ́ sɩ, n wɛnɑ Ɩsɔ Nɑŋŋtʋ lǝmɑɣɑsǝlɛ. Tɔm kʋŋmɛlǝtʋ nɑtǝlɩ tɩɩ cɔɔsǝɣɩ-ŋ. Ɩlɛ sɛɣɛsɩ-m mɑ toosee ɑnɩ ɑ hʋwɛɛ. 7 Mɑ hǝntɑɑ kɛ́, ɩlɛnɑ mɑ́ toosi sɩ:

10 Pǝ tɑsɑɑ ɩlɛ, mɑ nɑ́ ɩsɔtɑɑ tillu nɔɣɔlʋ ɩ tiinɑ ɩsɔtɑɑ kɛlɛ. 11 Ḿpʋ́ɣʋ́ ɩ kiisinɑ nɔɣɔ sɔsɑɣɑ sɩ:

14 Ɩsɔtɑɑ tillɑɑ kɔnnɑ tɔm tǝnɛ ɩnɩ. Antulinyɑ yǝlɑɑ tǝnɑ ɩ nyɩ sɩ, ɩsɔtɑɑ Ɩsɔ tǝnnɑ yǝlɑɑ kɑwulɑsɩ tǝnɑ. Ɩ́ nɔkɑ pɑɑ yʋlʋ sǝkpelu ɩ tʋ-ɩ.

15 Mɑ toosee ɑnǝɣǝlɛ. Mɑ kɑwulɑɣɑ tɑɑ nyǝntɑɑ tǝnɑ tɑ pǝsɩ nɑ pɑ́ heeli-m ɑ hʋwɛɛ. Ɩlɛ mɑ nyǝmɑ́ sɩ Pɛlǝtɑsɑɑ, n wɛnɑ Ɩsɔ Nɑŋŋtʋ lǝmɑɣɑsǝlɛ. N kɑ́ pǝsɩ nɑ ń heeli-m-yɛ.

16 Ḿpʋ́ɣʋ́ Tɑniyɛɛlɩ wei pɑ cuɣusɑɑ sɩ, Pɛlǝtɑsɑɑ tɔ, ɩ lɑɑkɑlɩ pǝsɑɑ. Pǝ pɛkǝlɑ-ɩ ɩ hʋwɛɛ tɑɑ kɛ́ lɑɑsɑɣɑ tɔɔ. Ntɛnɑ wulɑʋ mɑ mɑ́ tɔmɩ-ɩ sɩ: Mɑ toosee ɑnɩ ɑ tɔm ɩ́ tɑɑ pɛkǝlɩ-ŋ. Ɩlɛnɑ ɩ́ cɔ-m sɩ: Hɑɩ, tɑ cɑɑ, toosee ɑnɩ ɑ́ pǝsɩ nyɑ́ kolontunɑɑ nyǝntʋ. 17 Tʋɣʋ sɔsɔɔŋkʋ toŋ nyǝŋkʋ ŋku n nɑ kʋ kpɑ mpʋ tǝliɣiliɣi tɔ, pɑ nɑɑkɑɣɑ-kʋɣʋ ɑntulinyɑ tǝnɑsɩ tǝnɑ tɑɑ kɛ́. 18 Kʋ hɑtʋ kɑ suwɑɣɑ nɑ kʋ́ lʋlɑ pee kɛ sɔsɔm. Tɑɑlɛ wontu cɔɔsɑɣɑ kʋ ɩsotom tɑɑ kɛ́. Sumɑsɩ nɑ́ tʋkɑɣɑ sɩ tɑnɑ kɛ kʋ piliŋɑsɩ tɔɔ. Weesuɣu nyǝm tǝnɑ hikiɣi pǝ tɔɣɔnɑɣɑ nɑ kʋ kiŋ. 19 Tɑ cɑɑ, nyɑɣɑlɛ tʋɣʋ ŋkʋ. Nyɑ́ lɑpǝnɑ sɔsɔ nɑ ń lɑ toŋ nɑ ń pɩɩ nɑ ń kɑlǝsǝnɑ ɩsɔtɑɑ. N ŋmɑkǝlɑ ɑntulinyɑ tǝnɑsɩ tǝnɑɣɑ. 20 Pǝlɛ pǝ wɑɑlɩ n nɑwɑ ɩsɔtɑɑ tillu tiinɑ ɩsɔtɑɑ nɑ ɩ́ tɔ sɩ, pɑ́ hu-kʋ nɑ pɑ́ wɑkǝlɩ-kʋ. Amɑ pɑ́ yele kite nɑ tǝ lilɑ kɛ tɛtʋ tɑɑ. Ɩlɛ pɑ́ hɔkɔ-tɛ nɑ nyǝɣǝlʋɣʋ mɑɣɑmɑɣɑ, nɑ kʋsɛɛmʋɣʋ ɑlukpɑlɑ kɛ tɑɑlɛ nyɩɩtʋ hɛkʋ tɑɑ. Aŋkpǝlɛɛ ɩ́ sɔ-tɛ, nɑ tǝ nɑ wontu pɑ́ kɑɑ tɑɑlɛ nyɩɩtʋ kɛ pɩɩsɩ nɑɑtosompɔɣɔlɑɣɑ. 21 Wulɑʋ, nyɑ́ toosee ɑnɩ ɑ hʋwɛɛ ntɛ́ sɩ, ɩsɔtɑɑ Ɩsɔ kɑ́ pɑɑsǝnɑ-ŋ. 22 Pɑɑ tɔɣɔnɩ-ŋ yǝlɑɑ hɛkʋ. Nyɑnɑ tɑɑlɛ wontu ɩ́ kɑ kɑɑ tǝcɑɣɑlɛ nɑ ń tɔkɩ nyɩɩtʋ ɩsɩɩ nɑɑŋ. Aŋkpǝlɛɛ kɑ́ sɔ-ŋ nɑ ń wɛɛ ḿpʋ́ɣʋ́ pɩɩsɩ nɑɑtosompɔɣɔlɑɣɑ. Ɩlɛnɑ pǝ́cɔ́ ń nyɩ sɩ ɩsɔtɑɑ Ɩsɔ tǝnnɑ yǝlɑɑ kɑwulɑsɩ tǝnɑ. Ye ɩ nɔkɑ wei ɩ tʋ-ɩ. 23 Tɔm nti pɑ yɔɣɔtɑɑ sɩ pɑ́ yele kite tɔ. Tǝlɛɣɛlɛ sɩ, ye n kɔmɑ nɑ ń cɛkǝnɑ sɩ Ɩsɔ kɛlɛ pǝ tǝnɑ pǝ tʋ. Ɩlɛ n mǝlɩ nyɑ́ kɑwulɑɣɑ tɑɑ. 24 Tɑ cɑɑ wulɑʋ, pǝ tɔɔ tɔ, tɔkɩ lɑɣɑtʋ nti mɑ tɑsǝɣɩ-ŋ tɔ. Lɔ ɩsɑɣɑtʋ, nɑ ń tǝŋ kʋsiɣisim. Wɛɛnɑ ɑcɑmɑɑ pǝtɔɔtǝlɛ nɑ nyɑ́ lɑŋhʋlʋmlɛ kɑ́ leeli.

25 Ḿpʋ́ɣʋ́ pǝ lɑpɑ teitei ɩsɩɩ Tɑniyɛɛlɩ kɑ kɛɛsɑɑ tɔ. 26 Pǝnɑɣɑ sikɑɑ ɩlɛnɑ kʋyɑkʋ nɑkʋlɩ wulɑʋ cɔɔkɩ ɩ kɑwulɑɣɑ kutuluɣu nyʋɣʋ tɑɑ kɛ́ Pɑpiloni. 27 Ɩlɛnɑ ɩ mɑ́, ɩ lɑŋlɛ tɑɑ nɑ ɩ́ tɔ sɩ: Mɑ́ ŋmɑnɑ mɑ kɑwulɑɣɑ ɩcɑtɛ sɔsɔɔlɛ Pɑpiloni ɩnɛ. Mɑ lɑpɑ ḿpʋ́ɣʋ́ sɩ mɑ toŋ nɑ mɑ sɔsɔɔntʋ, nɑ mɑ teeli ɩ́ nɑ́.

28 Ɩ nɔɣɔ tɑ tiitɑ ɑtɛ, ɩlɛ ɩ nɩɩ pǝ yɔɣɔtǝnɑ ɩsɔtɑɑ kɛlɛ sɩ: Wulɑʋ Nepukɑnɛsɑɑ, nɩɩ teu yoo. Pɑɑ tɛ nɑ pɑ́ lɛɛkɩ-ŋ nyɑ́ kɑwulɑɣɑ ŋkɛ. 29 Pɑɑ tɔɣɔnɩ-ŋ yǝlɑɑ hɛkʋ. Nyɑnɑ tɑɑlɛ wontu ɩ́ kɑ́ kɑɑ tǝcɑɣɑlɛ. N kɑ́ tɔkɩ nyɩɩtʋ ɩsɩɩ nɑɑŋ. Hɑlǝnɑ pɩɩsɩ nɑɑtosompɔɣɔlɑɣɑ. Ɩlɛnɑ pǝ́cɔ́ ń nyɩ sɩ ɩsɔtɑɑ Ɩsɔ tǝnnɑ yǝlɑɑ kɑwulɑsɩ tǝnɑ. Ye ɩ nɔkɑ wei ɩ tʋ-ɩ.

30 Ḿpʋ́ɣʋ́ pǝ lɑpɑ ḿpʋ́ɣʋ́ kpɑkpɑɑ. Ɩlɛnɑ pɑ́ tɔɣɔnɩ Nepukɑnɛsɑɑ kɛ yǝlɑɑ hɛkʋ, nɑ ɩ́ tɔɣɔ nyɩɩtʋ ɩsɩɩ nɑɑŋ. Aŋkpǝlɛɛ sɔ-ɩ, hɑlǝnɑ ɩ nyɔɔsɩ pɩɩ ɩsɩɩ hɛkǝlɛnɑɑ hʋntʋ, nɑ ɩ sǝkpɑŋ ɩsɩɩ sumɑsɩ.

31 Pɩɩsɩ nɑɑtosompɔɣɔlɑɣɑ tɛɛwɑ ɩlɛnɑ Nepukɑnɛsɑɑ mɑ́ mɑ kʋsɩ ɩsɛ nɑ ɩsɔtɑɑ. Ḿpʋ́ɣʋ́ mɑ lǝmɑɣɑsɛɛ mǝlɑɑ, nɑ mɑ́ sɛɛ Ɩsɔ sɩ: Hɑɩ, ɩsɔtɑɑ Ɩsɔ, mɑ sɑmɑ-ŋ. Mɑ sɛɛ Ɩsɔ Tɑcɑɑ nyɑ́. Nyɑ́ kɑwulɑɣɑ wɛ tɑm tɔɔ kɛ́. Nyɑ́ sɔsɔɔntʋ kɑɑ sɩɩ tǝnɑɣɑ. 32 Antulinyɑ yǝlɑɑ tǝnɑ tɑ hɑŋnɑ-ŋ. N lɑkǝnɑ pɑ nɑ ɩsɔtɑɑ tillɑɑ kɛ ɩsǝnɑ n cɑɑ tɔɣɔ. Nɔɣɔlʋ ɩɩ pɔɔsǝɣɩ-ŋ nɑtǝlǝɣɩ pǝ tɑɑ.

33 Ḿpʋ́ɣʋ́ mɑ lǝmɑɣɑsɛɛ mǝlɑ-m. Ɩlɛnɑ pɑ́ mǝlǝnɑ-m mɑ kɑwulɑɣɑ, nɑ kɑ teeli, nɑ mɑ teu nɑ mɑ sɔsɔɔntʋ. Ntɛnɑ mɑ wɑɑlɩ nyǝ́mɑ nɑ mɑ ɑkewenɑɑ sɔsɑɑ koti mɑ kiŋ. Ɩlɛnɑ pɑ́ tɑɣɑnɩ-m mɑ kɑwulɑɣɑ tɑɑ kɛ́ sɩɩʋ nɑ kɑ́ kǝlɩ ɩsɩɩ kɑɑ wɛʋ tɔ. 34 Pǝ tɔɔ kɛ́ Nepukɑnɛsɑɑ mɑ́ mɑ sɑŋ, nɑ mɑ́ pʋɣʋlǝɣɩ nɑ mɑ́ tʋɣɩ teeli kɛ ɩsɔtɑɑ Wulɑʋ. Ɩnɩ ɩ tǝŋǝɣǝnɑ tɑmpɑnɑ kɛ pǝ tǝnɑ pǝ tɑɑ nɑ ɩ́ lɑkɩ kʋsiɣisim. Ɩ tisiɣi wei ɩ hɔŋ ɩ tɩ tɔɣɔ.