1 Ḿpʋ́ɣʋ́ Ɩsɔ Feesuɣu kʋlǝnɑ Otɛtɩ pǝyɑlʋ Asɑliyɑ. 2 Ɩlɛnɑ ɩ́ lɩɩ nɑ ɩ́ polo ɩ́ mɑɣɑnɑ Asɑ nɑ ɩ́ heeli-ɩ sɩ: Hɑɩ, tɑ́ cɑɑ wulɑʋ. Yutɑ nyǝ́mɑ, nɑ Pɛncɑmɛɛ nyǝ́mɑ mɛ ɩ́ nɩɩ mɑ tɔm. Ye ɩ́ wɛ Tɑcɑɑ wɑɑlɩ, ɩ́lɛ́ ɩ kɑ́ wɛɛ mǝ wɑɑlɩ kɛ́ ḿpʋ́ɣʋ́. Ye ɩ́ pɛɛkǝɣɩ-ɩ ɩ kɑ́ yele nɑ ɩ́ nɑ-ɩ. Amɑ ye ɩ́ lɔ Ɩsɔ, ɩ́lɛ́ ɩ kɑ́ lɔ-mɛ tɔtɔ. 3 Ɩsɔ yelɑ Ɩsɛɣɛlɩ nyǝ́mɑ tɔ, pǝ leelɑɑ kɛ́. Kɔtʋlʋ nɔɣɔlʋ ɩ fɛɩ sɩ ɩ kɑ́ sɛɣɛsɩ-wɛ. Pǝyele pɑ fɛɩnɑ kiiu. 4 Amɑ pɑ mǝlɑ Ɩsɛɣɛlɩ Ɩsɔ Tɑcɑɑ kiŋ nɑ lɑŋwɑkǝllɛ, nɑ pɑ́ pɛɛkɩ-ɩ nɑ ɩ́ yele nɑ pɑ́ nɑ-ɩ. 5 Wɑɑtʋ ɩnɩ ɩ tɑɑ, yʋlʋ ɩɩ pǝsǝɣɩ nɑ ɩ́ polo tiili nɑ ɩ́ mǝlǝnɑ weesuɣu. Pɩɩ kɛ́ wɑhɑlɑ wɑɑtʋ kɛ tɛtʋ yǝlɑɑ tǝnɑɣɑ. 6 Piitim lɛmpɩ nɑ́ kʋɣɩ lɛmpɩ kɛ́. Nɑ ɩcɑtɛ lɛntɛ nɑ́ɑ́ kʋ́ lɛntɛ. Mpi tɔ, Tɑcɑɑ ciɣitɑɣɑ yǝlɑɑ kɛ́ nɑ wɑhɑlɑnɑɑ tǝnɑ. 7 Amɑ mɩɩ nyɔɔ toŋ, ɩ́ tɑɑ yele nɑ mǝ ɑpɑlʋtʋ yɔɔlɩ. Ɩ́ kɑ́ hiki mǝ tǝmlɛ kɑsǝyɑɣɑ.

8 Wɑɑtʋ wei wulɑʋ Asɑ nɩɩ Ɩsɔ kʋyɔɣɔtʋtʋ tɛlǝsʋlʋ Asɑliyɑ tɔm ntɩ, ɩlɛnɑ ɩ́ kɑɑsɩ ɩ tɩ nɑ ɩ́ kpiisi Yutɑ nɑ Pɛncɑmɛɛ pɑ tɛtʋ tǝnɑ tɑɑ tɩɩŋ. Nɑ ɩ́ lɑ mpʋ tɔtɔɣɔ ɑcɑlɛɛ nnɑ ɩ kɑ lɛɛkɑ Ɩfǝlɑyim pɔɔŋ tɑɑ tɔ ɑ tɑɑ. Pǝ wɑɑlɩ, ɩlɛnɑ ɩ́ tɑɣɑnɩ Tɑcɑɑ kɔtɑɣɑ tǝlɑtɛ nte tɩɩ wɛ Ɩsɔ tǝsɛɛlɛ tɔ. 9 Ḿpʋ́ɣʋ́ wulɑʋ kotɑ Yutɑ nɑ Pɛncɑmɛɛ nyǝ́mɑ tǝnɑ, nɑ Ɩfǝlɑyim nɑ Mɑnɑsee nɑ Simiyɔŋ pǝ nyǝ́mɑ mpɑ pɑɑ kɔmɑ nɑ pɑ́ cɑɣɑ pɑ tɛ tɔ. Pɑ nɑwɑ sɩ Tɑcɑɑ wɛ ɩ wɑɑlɩ, ɩlɛnɑ pɑ́ polo ɩ kiŋ. 10 Ɩlɛnɑ pɑ́ koti Yosɑlɛm kɛ Asɑ kɑwulɑɣɑ pɩɩsɩ nɑɑnʋwɑ nɑ kɑkpɑsɩ nyǝŋkɑ ɩsɔtʋ tooso nyǝŋ tɑɑ. 11 Kʋyɑŋku pɑ tɑlɑɑ, ɩlɛnɑ pɑ́ lɑ́ Tɑcɑɑ kɛ kɔtɑɣɑ kɛ tɔlɑ nnɑ pɑ kpɑ kolontunɑɑ kiŋ tɔ. Nɑɑŋ kɑ wɛ nɑsǝtoso nɑ nɩɩnʋwɑ (700) nɑ heeŋ kɛ iyisi nɑɑtosompɔɣɔlɑɣɑ (7000). 12 Ḿpʋ́ɣʋ́ pɑ sɩɩ pɑ nɔɣɔ sɩ pɑɑ tɑɣɑnɩ Ɩsɔ kɛ́ sɛɛʋ nɑ lotu kʋlʋmtʋ. Nɑ pɑ lǝsɑɣɑ sʋʋ pɑ cɔsɔnɑɑ Ɩsɔ Tɑcɑɑ kɛ teu. 13 Ye wei ɩ tɑ tɑɣɑnɩ Ɩsɛɣɛlɩ Ɩsɔ Tɑcɑɑ kɛ sɛɛʋ, ɩsɩɩ pɑ kʋ-ɩ. Pɑɑ ɑpɑlʋ, yɑɑ ɑlʋ, yɑɑ sɔsɔ, yɑɑ pǝyɑɣɑ. 14 Ɩlɛnɑ pɑ́ tuunɑ nɔɔsɩ sɔsɔɔnsɩ nɑ pɑ́ hʋlɩ tutuuŋ nɑ ɑkɑntɛɛ nɑ pɑ́ wiliti. 15 Ḿpʋ́ɣʋ́ Yutɑ nyǝ́mɑ tǝnɑ lɑŋlɛ hʋlʋmǝnɑ pɑ lotu kʋlʋmtʋ tuunɑʋ mpɩ. Nɑ ɩsǝnɑ pɑ tɑɣɑnɑ pɑ Ɩsɔsɛɛlɛ nɑ luɣu kʋlʋmʋɣʋ tɔ. Nɑ Tɑcɑɑ mʋ nɑ ɩ́ yele nɑ tɛtʋ hɛɛsɩ.

16 Ḿpʋ́ɣʋ́ Asɑ lǝsɑ ɩ too Mɑɑkɑ tɔɔ kɛ́ ɩ ɑlʋ kɑwulɑɣɑ toŋ. Mpi tɔ, Mɑɑkɑ kɑ sikɑ tʋɣʋ, ɩsɑɣɑʋ ŋku pɑ yɑɑ sɩ Aselɑ tɔɣɔ. Ntɛnɑ wulɑʋ tɔ sɩ: Ɩ́ kpɛsɩ tʋɣʋ ŋkʋ nɑ ɩ́ yɔkɩ-kʋ nɑ ɩ́ wɔ-kʋɣʋ Setǝlɔŋ lɔɔʋ nɔɣɔ. 17 Pɑɑ nɑ wulɑʋ ɩnɩ ɩ sɔɔlɑ Tɑcɑɑ nɑ lotu kʋlʋmtʋ tɔ, ɩ tɑ wɑkǝlɩ tǝkɔtǝlɛnɑɑ mpɑ pɑɑ wɛ Ɩsɛɣɛlɩ tɛtʋ tɑɑ tɔ. 18 Amɑ ɩ yelɑɑ nɑ pɑ́ kɔnɑ Ɩsɔ tǝsɛɛlɛ tɑɑ kɛ́ wʋlɑ, nɑ liɣitee nyǝɣǝtʋ, nɑ wontunɑɑ lɛmpɑ mpɑ ɩ nɑ ɩ cɑɑ pɑɑ hɑwɑ Tɑcɑɑ tɔ.

19 Yoou tɑ tɑsɑ kʋlʋɣʋ, hɑlǝnɑ Asɑ kɑwulɑɣɑ pǝnɑɣɑ hiu nɑ nɑɑnʋwɑ nɑ kɑkpɑsɩ nyǝŋkɑ.