1 Mpʋɣʋlɛ Sɑlʋmɔŋ sɑmɑ Ɩsɔ sɩ:

3 Ɩsɛɣɛlɩ nyǝ́mɑ tǝnɑ kɑ kotɑɑ kɛ́ nɑ pɑ́ sǝŋɑɑ. Ḿpʋ́ɣʋ́ Sɑlʋmɔŋ kɛɛsǝnɑ pɑ tɔɔ nɑ ɩ́ kooli-wɛɣɛ kʋpɑntʋ. 4 Ɩlɛnɑ ɩ́ tɔ sɩ: Mɑ sɑmɑ Ɩsɛɣɛlɩ Ɩsɔ Tɑcɑɑ. Mpi tɔ, tomɑ kɛ n lɑpǝnɑ teitei ɩsɩɩ n kɑ sɩɩʋ mɑ cɑɑ Tɑfiiti kɛ nɔɣɔ tɔ sɩ: 5 Hɑtoo kʋyɑŋku n lǝsʋɣʋ nyɑ́ yǝlɑɑ kɛ Icipiti tɑɑ tɔ, n tɑ lǝsǝtɑ pɑ ɑcɑlɛɛ tɑɑ nɑtǝlɩ sɩ pɑ́ ŋmɑ-ŋ nyɑ́ tǝsɛɛlɛ nɑ ń cɑɣɑ. Pǝyele n tɑ kpɑ yʋlʋ nɔɣɔlʋ nɑ ɩ mpɑɑ sɩ pʋntʋ ɩ́ lɑ nyɑ́ yǝlɑɑ wulɑʋ. 6 Amɑ Yosɑlɛm ɩcɑtɛ kɛ n lǝsɑɑ sɩ n kɑ́ cɑɣɑ. Nɑ ń lǝsɩ Tɑfiiti sɩ ɩ́ lɑ nyɑ́ yǝlɑɑ wulɑʋ. 7 Ḿpʋ́ɣʋ́ Sɑlʋmɔŋ tɑsɑɑ sɩ: Hɑlɩ mɑ cɑɑ Tɑfiiti mɑɣɑsɑɑ sɩ ɩ ŋmɑɑkɩ kutuluɣu nɑ Tɑcɑɑ Ɩsɛɣɛlɩ nyǝ́mɑ Ɩsɔ hǝtɛ tɑɑ. 8 Amɑ Tɑcɑɑ tɔmɑ-ɩ sɩ: N mɑɣɑsʋɣʋ nyɑ́ tɑɑ kɛ́ mpʋ tɔ pǝ wɛ teu. 9 Ɩlɛ pǝ tɑɣɑ nyɑ́ mɑɣɑmɑɣɑ n kɑ́ ŋmɑnɑ kutuluɣu ŋkʋ. Amɑ nyɑ́ pǝyɑɣɑ kʋlʋlɑɣɑ kɑ́ ŋmɑnɑ-kʋ nɑ mɑ hǝtɛ tɑɑ. 10 Ḿpʋ́ɣʋ́ Sɑlʋmɔŋ tɑsɑɑ sɩ: Tɑcɑɑ tɔkɑ ɩsǝnɑ ɩ kɑ sɩɩwɑ tɔ, nɑ mɑ́ lɛɛtɩ mɑ cɑɑ Tɑfiiti lonte tɑɑ kɛ́ Ɩsɛɣɛlɩ nyǝ́mɑ kɑwulɑɣɑ kumte tɔɔ. Nɑ mɑ́ ŋmɑ́ Ɩsɔ tǝsɛɛlɛ tǝnɛ nɑ Tɑcɑɑ Ɩsɛɣɛlɩ nyǝ́mɑ Ɩsɔ hǝtɛ tɑɑ. 11 Hɑlǝnɑ mɑ́ sɩɩ Ɩsɔ ɑtɑkɑɑ ɩnɩ ɩ tɑɑ kɛ́ nɔɣɔ ŋkɑ Ɩsɔ nɑ tɑ́ cɑɑnɑɑ pɑ pɛɛlɑɑ tɔ kɑ pɛɛ kpɑɑtɑnɑɑ.

12-13 Sɑlʋmɔŋ kɑ lupɑ nyǝɣǝlʋɣʋ kʋsɛɛmʋɣʋ kumte tɑkɑ kɛ́, nɑ ɩ́ sɩɩ tɑɣɑ hɛkʋ tɑɑ. Tǝ tɑɣɑlǝŋ nɑ tǝ wɑŋ kɑ wɛ teitei kɛ́. Mɛɛtǝlǝnɑɑ nɑɑlɛ nɑ hɔɣɔlʋɣʋ hɔɣɔlʋɣʋ. Tǝ kʋŋkʋlʋmǝŋ kɛ mɛɛtǝlɩ kʋlʋm nɑ titite. Ḿpʋ́ɣʋ́ ɩ kpɑwɑ tǝ tɔɔ, nɑ ɩ́ luŋ kotilɑɑ tǝnɑ ɩsɛntɑɑ kɛ kɔtɑɣɑ tǝlɑtɛ kɔŋkɔŋ tɑɑ tǝnɑ. Nɑ ɩ́ kpɑɑsɩ ɩ niŋ nɑ ɩsɔ nɑ ɩ́ sǝlǝmɩ sɩ: 14 Hɑɩ, Tɑcɑɑ, Ɩsɛɣɛlɩ nyǝ́mɑ Ɩsɔ. Ɩsɔ nɔɣɔlʋ ɩ fɛɩ ɩsɩɩ nyɑ́. Pɑɑ ɩsɔtɔnʋɣʋ tɑɑ, pɑɑ tɛtʋ tɔɔ kɛ́ ɑtɛ cǝnɛ. N sɔɔlɑ mpɑ pɑ lɑkɩ nyɑ́ tǝmlɛ nɑ lotu kʋlʋmtʋ tɔɣɔ, nɑ ń lɑkɩ-wɛɣɛ ɩsǝnɑ n kɑ sɩɩwɑ tɔ. 15 Ḿpʋ́ɣʋ́ n tɔkɑ nɔɣɔ ŋkɑ n kɑ́ sɩɩ mɑ cɑɑ Tɑfiiti tɔ, nɑ sɑŋɑ ń yoosi nti n kɑ yɔɣɔtǝnɑ nyɑ́ nɔɣɔ tɔ nɑ nyɑ́ toŋ. 16 Hɑɩ, Tɑcɑɑ Ɩsɛɣɛlɩ Ɩsɔ, lɑ tɔtɔɣɔ nɔɣɔ ŋkɑ n kɑ sɩɩ mɑ cɑɑ Tɑfiiti tɔ. Sɩ ye ɩ lʋlʋɣʋ nyǝ́mɑ tɔmɑ teu ɩsɩɩ ɩnɩ ɩ tɔm tɔ, mpɛ pɑɑ tɔkǝnɑ kɑwulɑɣɑ kɛ ɩ wɑɑlɩ kɛ tɑm tɔɔ. Nɑ pɑ́ kɑɑsǝɣɩ tǝmɑɣɑ Ɩsɛɣɛlɩ yǝlɑɑ tɔɔ. 17 Hɑɩ, Tɑcɑɑ Ɩsɛɣɛlɩ Ɩsɔ, lɑ nɔɣɔ ŋkɑ n kɑ sɩɩ mɑ cɑɑ Tɑfiiti tɔ.

18 Ɩlɛ tɑmpɑnɑ Ɩsɔ pǝsǝɣɩ nɑ ɩ́ cɑɣɑ yǝlɑɑ hɛkʋ kɛ ɑtɛɣɛlɛ? Mpi tɔ, pɑɑ ɩsɔtɔnʋɣʋ nɑ kʋ tɔɔmǝŋ tɔ, ɩ tɑ mɑɣɑ kʋ tɑɑ. Pǝyele kutuluɣu ŋku mɑ ŋmɑ-ɩ tɔ kʋlɛ kʋ tɑ hɑŋnɑ mpʋ. 19 Hɑɩ, Tɑcɑɑ, pɑɑ nɑ mpʋ kɛɛsɩ nyɑ́ ɩsɛ nɑ mɑ tɔɔ. Nɩɩ nyɑ́ tǝmlɛ tʋ mɑ́ mɑ wiinɑʋ nɑ mɑ yɑɑʋ. 20 Kuli nyɑ́ ɩsɛ nɑ ń pɑɑsǝnɑ kutuluɣu kʋnɛɣɛ ilim nɑ ɑhoo. Mpi tɔ, tǝnɑɣɑ n tɔmɑ sɩ n kɑ́ cɑɣɑ. Nɩɩ nyɑ́ tǝmlɛ tʋ mɑ́ mɑ kʋsǝlǝmʋtʋ. 21 Nɩɩ yɑɑʋ mpi nyɑ́ tǝmlɛ tʋ mɑ nɑ nyɑ́ yǝlɑɑ Ɩsɛɣɛlɩ nyǝ́mɑ yɑɑkɩ-ŋ cǝnɛ tɔ. Hɑɩ, nɩɩ tɑ kʋsǝlǝmʋtʋ kɛ ɩsɔtɑɑ timpi n wɛɛ tɔ, nɑ ń hɩɩsɩ tɑ́ ɩsɑɣɑtʋ.

22 Ye nɔɣɔlʋ wɑkǝlǝnɑ ɩ tɔɣɔntǝlɛ nɑ pɑ́ cɑɑlɩ-ɩ, sɩ ɩ́ tuunɑ. Ɩlɛnɑ pʋntʋ kɔɔ kutuluɣu kʋnɛ kʋ tɑɑ nɑ ɩ́ tuunɑ kɔtɑɣɑ tǝlɑtɛ. 23 Nɩɩnɑ pʋntʋ kɛ ɩsɔtɑɑ nɑ ń hʋʋnɑ nyɑ́ tǝmlɛ nyǝ́mɑ nɑ ń kʋ́ tɑsǝkǝlɛ tʋ tɔm nɑ pǝ́ mǝlɩ ɩ nyʋɣʋ tɑɑ. Ɩlɛnɑ ń kɛɛsǝnɑ kʋpɑŋ kʋpɑntʋ nɑ ń hɑ-ɩ tɑmpɑnɑ.

24 Yɑɑ ye pǝ kɔmɑ nɑ Ɩsɛɣɛlɩ nyǝ́mɑ wɑkǝlǝnɑ-ŋ. Ɩlɛnɑ pɑ kolontunɑɑ kǝlɩ-wɛ, nɑ pɑ́ lɑɣɑsɩ nɑ pɑ́ mǝlɩ nyɑ́ kiŋ nɑ pɑ́ tʋ nyɑ́ hǝtɛ kɛ teeli. Ɩlɛnɑ pɑ́ sǝlǝmɩ-ŋ nɑ pɑ́ wiinɑ-ŋ kutuluɣu kʋnɛ kʋ tɑɑ cǝnɛ. 25 Ɩlɛ hɑɩ, Tɑcɑɑ, nɩɩ pɑ tɔm kɛ hɑtoo ɩsɔtɑɑ, nɑ ń tɑɣɑnɩ nyɑ́ yǝlɑɑ Ɩsɛɣɛlɩ nyǝ́mɑ ɩsɑɣɑtʋ. Nɑ ń mǝŋnɑ-wɛɣɛ pɑ tɛtʋnɑɑ mpɑ n kɑ hɑ pɑ nɑ pɑ cɑɑnɑɑ tɔ.

26 Yɑɑ ye pɑ wɑkǝlǝnɑ-ŋ, nɑ ń yele nɑ tɛʋ wʋlɩ-wɛ nɑ pɑ́ cɛkǝnɑ mpʋ. Ɩlɛnɑ pɑ́ kɛɛsǝnɑ kutuluɣu kʋnɛ kʋ tɔɔ nɑ pɑ́ sǝlǝmɩ-ŋ nɑ pɑ́ sɛɛ-ŋ, nɑ pɑ́ pɑsɑ pɑ tɩ nɑ pɑ́ tɑɣɑnɩ timpi tɑɑ pɑ wɑkǝlǝnɑ-ŋ tɔ. 27 Ɩlɛ Tɑcɑɑ, nɩɩ pɑ tɔm kɛ hɑtoo ɩsɔtɑɑ, nɑ ń hɩɩsɩ pɑ ɩsɑɣɑtʋ. Mpi tɔ, pɑ kɛ́ nyɑ́ yǝlɑɑ kɛ́ nɑ nyɑ́ tǝmlɛ nyǝ́mɑ. Ɩlɛ hʋ́lɩ́-wɛɣɛ ɩsǝnɑ pɑɑ tɔ teu tɔ. Ɩlɛnɑ ń yele nɑ tɛʋ nɩɩ tɛtʋ nti n hɑ-wɛ sɩ tǝ́ pǝsɩ pɑ nyǝntʋ tɔ.

28 Yɑɑ ye yʋlʋkʋsʋkʋ lɩɩnɑ, yɑɑ kʋtɔɣɔʋ mɔɔnɑɑ yɑɑ kʋ sǝpɑ. Pɑɑ kʋtoloŋ yɑɑ nyɔɣɔsɩ lɩɩnɑ, yɑɑ kolontunɑɑ sʋʋnɑ Ɩsɛɣɛlɩ nyǝ́mɑ koloosi ɑcɑlɛɛ tɑɑ nɑ pɑ́ ŋmɑkǝlɩ-wɛ. Pɑɑ wɑhɑlɑ nɔɣɔlʋ yɑɑ kʋtɔŋ nɑkʋlɩ kʋ tɩɩ kɔmnɑ, 29 nɑ pǝ́ hɑ-ŋ nyɑ́ yǝlɑɑ Ɩsɛɣɛlɩ nyǝ́mɑ nɑ pɑ tɑɑ nɔɣɔlʋ nɩɩ ɩ ɩsɑɣɑtʋ sɔŋ, nɑ ɩ́ kɛɛsǝnɑ nyɑ́ kutuluɣu kʋnɛ kʋ tɔɔ, nɑ ɩ́ wiinɑ-ŋ, nɑ ɩ́ tɛɣɛ-ŋ niŋ. 30 Ɩlɛ hɑɩ, Tɑcɑɑ, nɩɩ ɩ tɔm kɛ nyɑ́ tǝcɑɣɑlɛ kɛ hɑtoo ɩsɔtɑɑ nɑ ń tɑɣɑnɩ pɑɑ wei ɩ tǝwɑkǝllɛ nɑ ń kɛɛsǝnɑ ɩ tɔntɛ. Mpi tɔ, nyɑ́ tike n nyǝmnɑ pɑɑ yʋlʋ wei ɩ lotu. 31 Lɑkɩ mpʋ, ɩlɛnɑ Ɩsɛɣɛlɩ nyǝ́mɑ tɔ́ ɩsɩɩ n sɔɔlɑɑ tɔ, nɑ pɑ́ seeki-ŋ tɑm kɛ́ tɛtʋ nti n hɑ pɑ cɑɑnɑɑ tɔ tǝ tɑɑ.

32 Ye ɩsɩɩ kpɑɩ tʋ wei ɩ tɑ kɛ Ɩsɛɣɛlɩ tʋ tɔ ɩ nɩɩ nyɑ́ hǝtɛ sɔsɔɔlɛ nɑ nyɑ́ toŋ wei n lɑkǝnɑ tɔ ɩ tɔm, nɑ ɩ́ lɩɩnɑ tɛtʋ pooluŋ nɑ ɩ́ kɔɔ kutuluɣu kʋnɛ kʋ tɑɑ sɩ ɩ sǝlǝmǝɣɩ-ŋ. 33 Ɩlɛ Tɑcɑɑ, nɩɩ ɩ tɔm kɛ nyɑ́ tǝcɑɣɑlɛ kɛ hɑtoo ɩsɔtɑɑ, nɑ ń lɑpɩ-ɩ ɩ kʋsǝlǝmǝm. Mpʋ pɩɩ yelinɑ nɑ ɑtɛ yǝlɑɑ tǝnɑ nyɩ-ŋ nɑ pɑ́ seeki-ŋ, ɩsɩɩ nyɑ́ yǝlɑɑ Ɩsɛɣɛlɩ nyǝ́mɑ seekuɣu-ŋ tɔ. Pɑɑ nyɩ tɔtɔ sɩ kutuluɣu ŋku mɑ ŋmɑ-ŋ tɔ kʋ kɛ́ nyɑ́ nyǝŋkʋ tǝkpɑtɑɑ.

34 Yɑɑ ye n tʋ́ nyɑ́ yǝlɑɑ Ɩsɛɣɛlɩ nyǝ́mɑ sɩ pɑ́ yoonɑ pɑ kolontunɑɑ. Ɩlɛnɑ pɑ́ kɛɛsǝnɑ nyɑ́ ɩcɑtɛ kʋlǝsǝlɛ tǝnɛ tǝ kutuluɣu ŋku mɑ ŋmɑ-ŋ ɩsǝntɔ tɔ kʋ tɔɔ nɑ pɑ́ sǝlǝmɩ-ŋ. Ɩlɛ, 35 nɩɩ pɑ wiinɑʋ kɛ hɑtoo ɩsɔtɑɑ nɑ ń wɑɑsɩ-wɛ.

36 Yɑɑ ye pǝ kɔmɑ nɑ pɑ́ wɑkǝlǝnɑ-ŋ. Mpi tɔ, yʋlʋ nɔɣɔlʋ fɛɩ sɩ ɩɩ wɑkǝlǝɣɩ. Ntɑnyɩ n kɑ mʋ-wɛ nɑ pɑ́ɑ́nɑ́, nɑ ń yele nɑ pɑ kolontunɑɑ kǝlɩ-wɛ, nɑ pɑ́ kpɑ-wɛ, nɑ pɑ́ ponɑ-wɛɣɛ kolontunɑɑ ɑcɑlɛɛ tɑɑ kɛ pǝ cɔlɔ pǝ cɔlɔ, yɑɑ pooluŋ tɑɑ. 37 Ye pɑ pǝsǝnɑ lɑɑkɑlɩ kɛ ɩcɑtɛ nte tǝ tɑɑ pɑ ponɑ-wɛ tɔ, nɑ pɑ́ mǝlɩ nyɑ́ tɛɛ nɑ pɑ́ wiinɑ-ŋ tɛtʋ nti tǝ tɑɑ pɑ wɛ mpʋ tɔ nɑ pɑ́ tɔ́ sɩ pɑ pǝntɑɑ, pɑ lɑpɑ mpi pǝ fɛɩ teu tɔ, pɑ lɑpɑ ɩsɑɣɑtʋ. 38 Ɩlɛnɑ pɑ mǝlɩ nyɑ́ tɛɛ nɑ pɑ lotu tǝnɑ nɑ pɑ lǝsɑsɩ tǝnɑ kɛ tɛtʋ nti tǝ tɑɑ pɑ ponɑ-wɛ tɔ. Nɑ pɑ́ kɛɛsɩ pɑ lǝmɑɣɑsɛɛ nɑ nyɑ́ ɩcɑtɛ tǝnɛ nɑ kutuluɣu ŋku mɑ ŋmɑnɑ nyɑ́ hǝtɛ ɩsǝntɔ tɔ kʋ tɔɔ kɛ́ tɛtʋ nti n hɑ pɑ cɑɑnɑɑ tɔ tǝ tɑɑ cǝnɛ. 39 Ɩlɛ hɑɩ, Tɑcɑɑ, nɩɩ pɑ wiinɑʋ kɛ nyɑ́ tǝcɑɣɑlɛ kɛ hɑtoo ɩsɔtɑɑ. Nɑ ń wɑɑsɩ-wɛ nɑ ń tɑɣɑnɩ timpi pɑ wɑkǝlǝnɑ-ŋ tɔ.

40 Mɑ Ɩsɔ kuli nyɑ́ ɩsɛ nɑ ń ké ŋkpɑŋŋ nɑ ń nɩɩ sǝlǝmʋɣʋ ŋku mɑ sǝlǝmǝɣɩ-ŋ nɔɔnɔɔ ɩsǝntɔɣɔ cǝnɛ tɔ.