Mokanda ŋwa Polo oka
Filemɔ
Maphɔɔ ma etatele
Filemɔ aɓaka moanosi mɔnɔmɔ wa kaa onte ya ingomba sa Kolose. Aɓaka nwɛbi na Polo (Etee ya 1). Ambaka ɓaa na moombo mɔnɔmɔ nkombo yɛ Onesime, owa molotaka. Waɓa Polo o bɔlɔkɔ, aesi ya vana na Onesime, amba ya moɓatisa. Polo aesi ya kana oɓokye kamobuya oka kolo yɛ Filemɔ. Amba ya mokomela mokanda phɔ ya imoonga oɓokye ayambe Onesime ndokolo moombo phe (phɔ moombo munsɔ awalotaka koloyɛ aɓaka kazwe etumbu ekusi), kasi Filemɔ amokpe ndokolo nwɛbi moanosi.
Polo amba ya komela nwebi nɛ Filemɔ na ɓokonde ɓosɔ, taikaka moɓalimisa ɓoɓalimise, tamba na moonga na ɓokusi, tambaka na bunga oɓokye Filemɔ ali kolo wa Onesime. Kasi aongaka nɛ nde oɓokye aumunya. Na ɓomɔ, mokanda mumu moteya ɓaanosi ɓasɔ ndengye ekyeɓɔngya lozingo la Klisto maphɔɔ na moɓesi ŋwa ma ɓato.
Mokanda ŋwa Filemɔ moli na maphɔɔ mama:
- Etee ya 1-3: Iɓeya
- Etee ya 4-7: Polo kakumole Ŋwaphongo phɔ ianola na munzaka ŋwa Filemɔ
- Etee ya 8-22: Polo kaɓɔndɛlɛ Filemɔ phɔ ya Onezime
- Etee ya 23-25: Ndɔngɔlɔ
1
Iɓeya
1 Inga Polo, moto wa bɔlɔkɔ phɔ ya Yesu Klisto, na Timote, toeɓeye iwɛ Filemɔ nwɛbi na ɓanga wa etoma. 2 Toɓeye na Apia, nkanasa wa ɓanga, na Alisipɛ, nwɛbi na ɓanga wa eɓasi, na ingomba siangane o ingambi sa wɛ. 3 Lɛ oɓokye ngɔlu na ɓose pha Ŋwaphongo Ango wa ɓanga na Nkolo wa ɓanga Yesu Klisto iɓe na ɓɛ̀ɛ.
4 Naphɛ Ŋwaphongo wa nga mɛlɛsi nkɔlɔ isɔ phɔ ya wɛ waaɓɔndɛlɛ nga. 5 Phɔ naokye ɓawɔ phɔ ya lozingo loli na wɛ oka ɓato ɓa Ŋwaphongo na ianola sili na wɛ oka Nkolo Yesu. 6 Lɛ oɓokye iyangana sawɛ na ɓanga o ianola siɓe sikusi, phɔ ya iteya ɓolaa ɓosɔ ɓoli na ɓanga onte ya Klisto. 7 Nwɛbi, natondi na nkyisa ɓoikye na ná nzoto nkusi phɔ ya lozingo la wɛ, olenze ntema ya ɓato ɓa Ŋwaphongo.
Polo kaɓɔndɛlɛ Filemɔ phɔ ya Onezimɛ
8 Yango mɛna, naɓo nali na makokyi onte ya Klisto ma iephɛ etoma esengyesi wɛ ikyela, 9 kasi nazingye na ɓoikye o nkombo ya lozingo ieyonga lowɔ lolo. Phɛlɛ nga Polo, oli phomba, uŋwaŋwa eye nambi na kula ɓa o bɔlɔkɔ phɔ ya Yesu Klisto. 10 Naongye na wɛ phɔ ya ŋwana wa nga, Onezimɛ, owa ɓota nga onte ya bɔlɔkɔ. 11 Taikaka ɓa phanza na ntina phɔ ya wɛ, kasi uwaŋwa eye, abuto na ntina phɔ ya ɓanga ɓasɔ, eɓe wɛ eɓe nga.
12 Naetomesi yo, iyo oli ndokolo ndondo ya nga solongo. 13 Ɓo taaɓa nga o bɔlɔkɔ phɔ ya Simo Elaa, naɓakyi na phowa ya ikala nɛ wawa phɔ ansungye o elele ya wɛ. 14 Kasi sikyi anola ikyela ɓaɓona sataa etuna, phɔ ya oɓokye ɓolaa mɛ phango saɓa ndokolo pha ikandindisa, kasi ɓoute na phowa ya wɛ.
15 Naumunya oɓokye Onezimɛ atangwaka na wɛ phɔ ya ɓana nkɔlɔ, phɔ ya oɓokye ambe ya ebutwela phɔ ya ɓoɓɛlɛ. 16 Takuli ɓa nde moombo na moombo kasi abuto na ntina iikye koleka moombo: Abuto nwɛbi wa lozingo, na ɓoikye phɔ ya nga, amba kula leka phɔ ya wɛ, eɓe o miyo ma ɓato na ma Nkolo.
17 Ɓo konpke ndokolo nwɛbi na wɛ o nzela ya ianola, omokpe ndokolo eli nde nga. 18 Ka ɓo aekyela ɓoɓe naa ɓo ali na mbɔngɔ ya wɛ, namoeyita. 19 Eli nga Polo okoekomele mokanda mumu nde na maɓɔkɔ ma nga mampenza. Eli nde nga owamoeyitela. Emba simbe na kula eyimola oɓokye na wɛ oli na mbɔngɔ ya nga, emba mbɔngɔ mɛ eli nde wɛ mampenza. 20 Nwɛbi, phɔ ya iangana sa ɓanga onte ya Nkolo, kyela ɓoeyongyi nga, o nkombo ya Klisto, kuya ndondo ya nga. 21 Naeɓe na ɓolaa ɓotosi pha wɛ yango mɛna naekomele. Naeɓe oɓokye wamokyela koleka ikyi wɔɔ nga.
22 Nawɔ na ná wɛ ɓoɓɛlɛ oɓokye o mbɔngyisa elele ya imilangya, phɔ nalemele oɓokye, phɔ ya iyonga sa ɓɛ̀ɛ oka Ŋwaphongo, namokula ekomela omɔ.
Ndɔngɔlɔ
23 Epafras, nwɛbi na nga wa bɔlɔkɔ phɔ ya Yesu Klisto, aelɔngɔsi. 24 Maalako, Aristarke, Demasi na Luka, ɓɛbi na nga ɓaetoma na ɓɛ́ɛ ɓaelɔngɔsi. 25 Lɛ oɓokye Ngɔlu ya Nkolo Yesu Klisto eɓe na ɓɛ̀ɛ.