1 ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤸᤗᤧ ᤁᤢᤈᤢᤵᤛᤠᤱ ᤜᤢᤰᤁᤥ ᤀᤣᤃᤠᤱ ᤋᤃᤠᤱ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤛᤠᤵᤁᤡᤳᤋᤡᤴ ᤁᤳᤋᤢᤒᤠ ᤏᤡ᤺ᤛᤢᤱ॥ ᤂᤧᤴ ᤛᤠᤵᤁᤡᤳᤋᤡᤴ ᤔᤧᤛᤢᤒᤢᤀᤠᤱ ᤏᤢᤛᤡ ᤀᤣ᤺ᤵᤛᤠᤵᤜᤠ᤹ ᤔᤧᤕᤢᤰᤋᤢᤀᤠᤱ ᤐᤳᤇᤧᤖᤥ॥ 2 ᤜᤧᤰᤁᤩᤠᤱ ᤂᤧᤵᤔᤥ ᤔᤢᤰᤛᤠᤶᤛᤠᤒᤠ ᤔᤠᤱᤗᤠᤀᤡᤱᤒᤠᤴ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠᤖᤧᤒᤠ ᤀᤡᤱᤃᤠ᤹ ᤏᤡ᤺ᤛᤢᤱ. “ᤁᤴ ᤀᤣ᤺ᤵᤛᤠᤵᤜᤠ᤹ ᤀᤱᤔᤠ ᤁᤧᤛᤢᤰᤐᤠ ᤏᤢ ᤛᤠᤵᤁᤡᤳᤋᤡᤴ ᤑᤠ᤺ᤱᤔᤠ ᤁᤧᤛᤢᤰᤐᤠ ᤜᤠ᤺ᤳ ᤘᤠ᤹ᤒᤣ᥅” 3 ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤛᤡᤃᤠᤱᤅᤠᤱ ᤂᤧᤴ ᤛᤠᤵᤁᤡᤳᤋᤡᤴ ᤁᤧᤓᤠ᤺ᤱᤒᤠᤀᤠᤱ ᤛᤡᤃᤠᤱ ᤀᤥᤔᤧᤵᤔᤠ ᤁᤧᤛᤢᤰᤐᤠ ᤀᤠᤳᤋᤡᤴᤏᤠᤱ ᤜᤥ᤺ᤵᤋᤧᤖᤥ॥ 4 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤛᤠ᤹ᤖᤡᤰ ᤜᤠᤒᤠᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤠᤵᤁᤡᤳᤋᤡᤴ ᤁᤧᤓᤠ᤺ᤱᤒᤠᤀᤠᤱ ᤛᤡᤃᤠᤱᤒᤠ ᤐᤠ᤺ᤴᤏᤡᤴ ᤏᤡ᤺ᤵᤔᤠ ᤁᤧᤛᤢᤰᤐᤠ ᤛᤢᤶᤒᤥᤎᤠᤛᤠᤒᤠ ᤀᤠᤳᤋᤡᤴᤏᤠᤱ ᤂᤥ᤺ᤔᤠ ᤛᤢᤰᤔᤧᤍᤧᤳᤋᤧᤴᤗᤥ॥ 5 ᤜᤧᤰᤁᤩᤠᤱ ᤋᤢᤶᤗᤠᤶᤗᤥ᤺ᤒᤠᤎᤡᤰᤗᤧ ᤀᤡᤱᤃᤠ᤹ ᤔᤧᤳᤋᤠᤱ. “ᤔᤧᤜᤠᤒᤧᤏᤧ᤹ᤀᤥ᥄ ᤀᤥᤔᤧᤳᤋᤧ᤹. ᤕᤜᤢᤍᤠ ᤛᤢᤘᤠᤱᤒᤠ ᤌᤡᤖᤡᤱᤒᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ᤺ᤸᤗᤧ ᤁᤴ ᤏᤢᤛᤡ ᤀᤣ᤺ᤵᤛᤠᤵᤜᤠ᤹ ᤀᤱᤔᤠ ᤜᤧᤰᤁᤩᤠᤱ ᤛᤠᤵᤁᤡᤳᤋᤡᤴ ᤑᤠ᤺ᤱᤔᤠ ᤛᤢᤰᤋᤢ᤹ᤖᤥ॥”

6 ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤒᤣᤛᤠᤱ. ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤏᤢ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ. ᤔᤧᤸᤗᤢᤰᤛᤠ᤺ᤴ* ᤔᤧᤸᤗᤢᤰᤛᤠ᤺ᤴ–ᤕᤧᤛᤢᤖᤧ ᤗᤳᤇᤠ ᤁᤢᤔᤡᤱ॥ ᤕᤧᤛᤢ᤺ᤴ ᤔᤧᤛᤧᤖᤢᤀᤠᤱ ᤘᤕᤧᤒᤠ ᤔᤧᤸᤗᤢᤰᤛᤠ᤺ᤴ ᤜᤧᤰᤁᤣ ᤌᤠ᤺ᤶᤛᤡᤱ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹ ᤛᤧ᤺ᤵᤔᤠᤛᤡ ᤑᤠ᤹ᤀᤠᤱ ᤕᤧᤛᤢ᤺ᤴ ᤛᤡᤍᤢᤱᤈᤓᤠ ᤐᤥ᤺ᤰᤂᤧ॥ ᤔᤧᤸᤗᤢᤰᤛᤠ᤺ᤸᤗᤧ ᤏᤢᤛᤡ ᤁᤢᤍᤠᤱᤜᤠ᤹ᤖᤧ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤔᤡᤴ ᤔᤡᤰᤛᤣ᤺ᤴ ᤀᤠᤒᤡ॥ ᤂᤢᤏᤧ᤹ ᤏᤢᤛᤡ ᤁᤢᤔᤡᤰᤜᤠ᤹ᤖᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤢᤏᤧ᤹ ᤏᤡ᤺ᤛᤢᤒᤠ ᤐᤠ᤺ᤴᤏᤡᤴ ᤔᤡᤰᤛᤣ᤺ᤴ ᤀᤠᤒᤡ॥ ᤕᤧᤒᤧᤒᤠ ᤏᤡ᤺ᤛᤢᤱ॥ ᤂᤧᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤁᤢᤀᤡᤛᤡ᤺ᤰ ᤆᤥᤃᤧᤖᤥ॥ ᤂᤧᤸᤗᤧ ᤏᤢᤛᤡ ᤁᤢᤍᤠᤱᤜᤠ᤹ ᤕᤢᤅᤧ ᤜᤧᤰᤁᤩᤠᤱ ᤏᤢᤛᤡ ᤁᤢᤔᤡᤰᤜᤠ᤹ ᤔᤧᤒᤳᤇᤧᤖᤥ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤠᤰ ᤐᤡᤛᤠᤱ ᤐᤠᤱᤄᤢᤛᤡᤒᤠ ᤏᤢᤛᤡ ᤁᤢᤛᤣᤛᤣᤔᤠᤱᤛᤡᤖᤥ॥ 7 ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤴ ᤋᤩᤧᤀᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤸᤗᤧ ᤁᤢᤈᤢᤵᤛᤠᤱ ᤜᤢᤰᤁᤥᤗᤠᤶ ᤂᤧᤴ ᤛᤠᤵᤁᤡᤳᤋᤡᤴ ᤕᤠᤱᤛᤡᤱ॥ 8 ᤂᤧᤴ ᤛᤠᤵᤁᤡᤳᤋᤡᤴ ᤕᤠᤱᤛᤡᤱᤅᤡᤸᤗᤧ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤏᤢ ᤏᤧᤳ-ᤗᤡ (᥈᥊) ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤍᤃᤡ ᤛᤠᤶᤒᤥ᤺ᤴ ᤔᤧᤓᤴᤇᤡᤱ॥ ᤂᤧᤴ ᤁᤧᤖᤧᤰᤗᤧ ᤂᤢᤏᤡ᤹ ᤜᤢᤰᤁᤥ ᤛᤠᤖᤠᤱᤃᤡ ᤜᤧᤰᤋᤱᤒᤠ ᤔᤢᤰᤗᤠ ᤏᤢ ᤛᤠᤱᤛᤡᤱᤖᤧ ᤁᤧᤍᤡᤶᤒᤠ ᤛᤠᤶᤔᤩᤠᤱ ᤂᤥᤷᤕᤠᤜᤠ᤹ ᤔᤧᤃᤳᤋᤢ॥ ᤂᤧᤴ ᤛᤠᤱᤛᤡᤱᤅᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤋᤢᤘᤠᤖᤥ॥ 9 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤁᤢᤛᤱ ᤛᤠᤶᤗᤥᤎᤡᤰ ᤛᤠᤶᤔᤧᤔᤧᤳᤋᤢᤖᤥ.

11 ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤖᤡᤰ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤰᤗᤠ᤺ᤴ ᤂᤧᤵᤛᤢᤱᤅᤠᤱ ᤀᤥᤔᤧᤳᤋᤢᤱᤛᤡᤱᤅᤡᤸᤗᤧ ᤂᤧᤵᤔᤥ ᤜᤠᤱᤕᤢᤰᤏᤠ᤺ᤴ ᤏᤢ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤜᤧᤰᤁᤩᤠᤱ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤂᤡᤖᤡ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤕᤧᤒᤧᤒᤠ ᤏᤡ᤺ᤛᤢᤱ॥ 12 ᤂᤧᤱᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤶᤔᤧᤗᤥᤖᤧᤖᤥ.

13 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤛᤡᤃᤠᤱᤒᤠ. ᤜᤧᤰᤁᤩᤠᤱ ᤘᤠᤜᤱᤅᤥᤒᤠ ᤁᤧᤖᤧᤰ ᤐᤠᤌᤢᤱᤛᤠᤜᤠ᤹ ᤀᤰᤂᤣᤗ᤹ᤖᤡᤰ ᤛᤠᤶᤔᤧᤗᤥᤖᤧᤒᤠ ᤂᤧᤵᤛᤢᤱᤗᤥ.

14 ᤜᤧᤰᤁᤩᤠᤱ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤖᤧ “ᤀᤠᤔᤧᤴ” ᤔᤧᤒᤠ᤺ᤳᤋᤢ. ᤜᤧᤰᤁᤩᤠᤱ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤛᤠᤶᤒᤥ᤺ᤴ ᤔᤧᤓᤴᤇᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠ᤺ᤴ ᤛᤣᤘᤠ ᤔᤧᤈᤥᤃᤢᤛᤡᤖᤥ॥