1 I nau ku gani oe i maana a God ma a Christ Jesus na wane na tara ka ketoa na tooa da mouri gi ma na tooa da mae gi, ma ka ooli mai hai ka aaofia. Haia, nau ku gani oe, 2 eeri oko ainitalo ana Faarongolaa Diana. Ma oko aade aagau uria na iililana ana si kada gi sui. Ma oko bulasia na lioda na tooa gi, ma oko ngatafida, ma oko kwaiareida, si kada oko faatolomai ana gwaromaabea. 3 Sulia tara ka dao na ana si kada na tooa gi langi dasi fafurongo naa uria na faatolomaia mamana. Ma da dooria ada lealaa sulia na kwaidooria gera i talada, ma daka nani ada uria na wane faatolomai oro gi haia da haea na doo gi na da doori rongoa. 4 Ma gera ka aabulo eꞌete ada faasia na fafurongolana na mamanaa ma daka fafurongoa ada na uunuunua haungailana gi. 5 Haia, oe mone, oko susuli oe i talamu ana si kada gi sui, ma oko tasa dongaa ana raoa oe boroi ana si kada afetai gi. Ma oko iilia amu na raoa oe ana na ainitalongailaa ana na Faarongolaa Diana, ma oko iilia na raoa gi sui ana na raolaa oe fuana a God.

6 Haia, ma ni nau mone, e dao na ana si kada fuana daka haumaeli nau naa iilingia na kwaisuusilaa. 7 I nau ku faasuia naa na raolaa gi sui na a God e falea fuagu iilingia na wane na e lalao ma ka faasuia na lalaolaa, ma ku dau ngado na ana na manata mamanalaa. 8 Ma na kwaiaraa nau ka maasi nau naa, sulia na too oꞌololaa nau. Ma a Lord, na wane ni ketolaa ana na oꞌoloa naa tara ka falea na kwaiaraa nae fuagu ana fe dani tara nia ka ooli mai ana. Ma taifili nau ka langi, ma na tooa gi sui na da rakediana fuana a Christ ma daka kwaimaasimaasia na faatailana mai.

9 Oko hasi rigita eeri oko dao aliꞌali siagu. 10 Sulia a Demas e rakediana ana fuana dongaa na molaagali naa, ma ka tafusi nau ma ka lea na ana uria i Tesalonika. Ma a Kresens e lea na ana uria i Galesia, ma a Titus ka lea na ana uria i Dalmatia. 11 Tee taifilia a Luke go na e too fai nau. Lea doo oko talaia mai a Mark fai oe, sulia i nia e bobola fai nia na adomilagu ana na raolaa. 12 I nau ku oodua naa a Taekikus uria i Efesus. 13 Ma si kada o lea mai ana, oko ngalia mai na maku tekwa nau baa ku tafusia mai siana a Karfus i Troas. Ma oko ngalia laugo mai na buka nau baa gi, ma tasa ana na buka diana nau baa gi na da haungainia ana na ungana na sipsip gi.

14 A Aleksanda na wane na e rao ana kakai halo gi, e falea na fiilaa baita asianaa fuagu. Ma tara a Lord ka duua si doo na nia e iilida. 15 I oe laugo, oko aadaada diana suli oe, sulia nia e oote nia asianaa ana na faarongoa golu.

16 Haia, ana na eetana si kada gera keto nau ana, langi ta wane kasi adomi nau go. Na tooa gi sui da eekwatai nau na ada. Nau ku fooa eeri a God kasi falea mone ana na kwaelaa fuada uria si doo nae. 17 Sui, a Lord naa e too fai nau ma ka faarigita nau eeri kuka bobola fai nia na ainitalongailana na faarongolaa loulou fuana tooa maadiu oro gi eeri daka rongoa ada. Ma a Lord ka faamouri nau faasia na kwaelaa ana na ui anilagu fuana doo fai ae kwasi gi. 18 Ma a Lord tara ka faamouri nau faasia na doo taꞌa gi sui, ma ka ngali nau uria laona na Initooa nia i langi. Na initooa baita ka too fuana sulia dani firi! Amen.

19 Nau ku falea na bae dianalaa nau gi fuana ni Prisila ma na aarai nia a Akuila, ma na aebara a Onesiforus. 20 A Erastus e too i Korint, ma nau ku tafusia mai a Trofimus i Miletus, sulia nia e matai. 21 O hasi rigita hai oko dao i seenaa i nao ana si kada ana gwagwaria.

A Iubulus ma a Pudens ma a Linus ma ni Kladia, ma na tooa manata mamana gi ana a Christ sui na da too i seenaa, da falea laugo kou na bae dianalaa gera gi fuamu.

22 Nau ku fooa eeri a Lord ka too fai oe, ma na faadianalaa a God ka too fai gamu sui.