97
Nur pa pahrézkárán keshaga bit
1 Hodáwand bádsháhia kant,
zemin shádehi bekanát o
sajjahén tayábi sardhagár gal bátant.
2 Jambar o tahári áiay chapp o chágerdá ant,
adl o ensáp, áiay tahtay bonhesht o bonyád ant.
3 Ás áiay démá rawán ent o
cha har némagá áiay dozhmenán éra bárt.
4 Áiay grók jaháná róshná kant,
zemina gendit o larzit.
5 Hodáwanday démá kóh chó mómá ápa bant,
sajjahén jahánay Hodáwanday démá.
6 Ásmán áiay adlay járá janant o
sajjahén kawm áiay shán o shawkatá gendant.
7 Á sajjahén mardom sharmsára bant ke bot sojdaha kanant,
hamá ke náhudagén botáni poshtá pahra bandant.
Oo sajjahén “hodáyán”! Áiá sojdah kanét.
8 Sahyun eshkont o shádehia kant o
Yahudiahay jenek* 97:8 Yahudiahay jenek, bezán Yahudiahay sajjahén mardom. gal ant
cha tai dadrasiá, oo Hodáwand!
9 Chiá ke taw, oo borzén arshay Hodáwand, sajjahén zeminay sará mazanshán ay,
taw sajjahén “hodáyáni” sará báládast ay.
10 Shomá ke Hodáwandá dósta dárét,
cha badiá naprat kanét,
chiá ke á Hodádóstáni zenday negahpán ent o
áyán cha badkáráni dastá nejáta dant.
11 Nur pa pahrézkárán keshaga bit o
shádehi pa nékdelán.
12 Oo pahrézkárán! Hodáwanday bárgáhá shádehi kanét o
áiay pákén námá benázénét.