95
Má Hodáay dastay ramag én
1 Byáét Hodáwandá pa galé názénén,
pa wati nejátay talárá pa shádehi kukkára kanén.
2 Byáét pa shogrgozári áiay bárgáhá rawén,
pa shádehi kukkára kanén, sawta janén o áiá satá kanén,
3 ke Hodáwand mazanshánén Hodá ent,
sajjahén “hodáyáni” masterén bádsháh.
4 Zeminay johli hamáiay dastá ant o
kóháni borzi ham hamáiayg ant.
5 Daryá Hodáwandayg ent ke wat addhi kortag,
hoshkén zemin ham hamáiay dastán jórh kortag.
6 Byáét, sará jahla kanén o sojdaha kanén,
wati addh kanókén Hodáwanday bárgáhá kóndhána kapén,
7 ke hamá may Hodá ent o
má, áiay charágáhay mardom,
hamáiay dastay ramag én.
Drégatá shomá maróchi áiay tawár beshkotén:
8 “Wati delán á paymá sarkash makanét ke kawmá Meribáyá kort,
ke kawmá á róchi Massahay gyábáná kort.* 95:8 Bechár Dargwaz 17:7. Meribá o Massah yakkén jágahay nám ant ke Esráilián ódá Hodáay náshogri kort.
9 Ódá shomay pirénán maná chakkáset o ázmáesh kort,
bell ke mani kortagén káresh distagatant.
10 Tán chel sálá cha á naslá bézár atán,
gwashton: ‘É anchén mardom ant ke delesh gomráh ant o
mani ráhána nazánant,’
11 Gorhá man wati hezhmá sawgend wárt ke
‘é hechbar mani ásudagiá sara nabant.’ ”
*95:8 95:8 Bechár Dargwaz 17:7. Meribá o Massah yakkén jágahay nám ant ke Esráilián ódá Hodáay náshogri kort.