4
Démá pa má rozhnág kan
Pa sázger o washáwázáni sálárá. Gón zehi o simmi sázán. Dáuday Zabur.
1 Oo mani dádrasén Hodá! Passaw beday wahdé peryáta kanán.
Sakki o sóriáni wahdá mani dast o bánzolet pach kortant.
Maná mehr o rahmat baksh o dwáyánon gósh dár.
2 Oo mardomán! Tán kadéná mani ezzat kamsharap kanaga bit?
Tán chontá náhudagiá dósta dárét o drógay padá gardét? Ósht...
3 Bezánét ke Hodáwandá Hodádóst pa wat zortag o jetá kortagant.
Wahdé Hodáwandá tawára kanán, á eshkont.
4 Hezhmay tahá gonáh makanét.
Éshiay badalá, wapsagay wahdá, wati delá é bárawá pegr kanét o árám gerét. Ósht...
5 Barhakkén korbánig peshkash kanét o Hodáwanday sará tawkal.
6 Bázéné gwashit: “Kay ent pa má néki bekant?”
Oo Hodáwand! Wati démá pa má rozhnág kan.
7 Taw mani del cha shádániá sarréch kortag,
cha áyáni hamá wahday shádániá géshter ke dán o gallah o tázagén sharábesh báz bebant.
8 Árámiá drája kasshán o wáb ham kapán,
chiá ke tahná taw, oo Hodáwand, maná émeniay tahá nendénay.