1 A Yicu ci ngwoꞌra ngwüngün nu, “Yiꞌral yanni yati gäbïcï ngwüjü aar ape gwanni ngwuki yadi ji, a be wäjäj bi gïdïjï danni dadi ru guy gidi yiꞌral yanni yadi gäbïcï ngwüjü aar ape gwanni gwuki! 2 Yadi jayani gïdïjï ndoo ndi ari aar gekaci lille giligoꞌro aar gatu giyaw ndi ari ngwügäbïcï gweꞌte ngindenga gilee lamiꞌratu ndi ape gwuki. 3 Arnganar be yigoꞌro yalu.

Manari gwanggalu gwuma ärrï yiꞌral yanni yiki, gïrïnyädï, na manari gwuma ang ꞌdengenaci ngwujoꞌrenyana, düdänïjänü. 4 Manari nginde gwuma ang ärrïjï yiꞌral yanni yiki yomonanu kwoꞌra täꞌrïl gomon geꞌte geꞌte, mung be kwodalu ꞌto yomonanu kwoꞌra täꞌrïl gomon geꞌte geꞌte mung ari, ‘Düdänïjïnyänü, äny gwuma joꞌrenyana,’ nga düdänïjänü.”

5 A ngwooꞌra ngwükäjäär je ci Yicung nu, “Gendaci nje ämnïng Ngwaalu gwärï.”

6 A je Yicu ci nu, “Adinari aang ätï ämnïng Ngwaalu gwooko nono läy lidi goꞌta, ngaa laadi ci daꞌri ndee diru duda, ‘Gwällïnälü nga gïdïnï giyaanu,’ na dada je ꞌdengenaci.

7 Gwïndï ne gwere ꞌdanggalanu gwätï dïnädä dati gwürïjï na ngwïyïjï yoꞌra. Ma be ari dima ila gïtäny, dati ang ci, ‘Ila nga jalu nga ape ngwony a je enye’? 8 Bärï, gwa ang manni ci, ‘Gïꞌtïjïny ngwony ngwudi eny nga ji mama nyii dünïcï ꞌdi nyi ïyï nyi eny ku nga be eny nga ïyï.’ 9 Dïnäd da aar ci yäy ꞌtu ndi ari därrü yiꞌral yicaar ye? 10 No nga nga ꞌto, Yiru gu yeꞌte yeꞌte ꞌdanggalu ma aang ärrï yiꞌral ꞌdar yanni yondacara je ndi ärrï, arar, ‘Nyii laꞌti ädï, liru ꞌdogo ngwïnäd. Yiminje ärrï yanni yïbüpïnä ꞌdänggärï ndi nje ärrï.’ ”

11 Ndi ele gwüngün kündär gani Üräjälïm, ngwumillidi kiꞌraanyala ganni güꞌrïdï Jamranganu Jälïl gwe. 12 Anni mung ji ndi ele gwadi änï ngwuꞌdunanu, aar mbudi ngwüjï ngwe ngwuru ꞌdï (10) ngwanni ngwümätï je yaamu. Aar määtä aar dünä ngwaalu ngwolanu, 13 aar urnida Yicung dula aar ari, “Wä Yicu wä Doorta, aar ang ïnä!”

14 Anni ma je Yicu engga ngwuje ci, “Ïndär, aang enggaci ngwurꞌdala ngwangina ngwalu.” Anni ma aar ji ndi ele, aar jayi nono.

15 Gweꞌte ꞌdenggenanu ngwïcïnänü ngwumbuji ndi ari gwuma jayi nono, ngwukwodalu ngwortada Ngwaalinga dulu de gwulleny. 16 Ngwele ngwüjürbäcï Yicungalu yirku ye giyoranu ngwuci yäy ꞌtu. A nginde gwuru Dijamir.

17 A be Yicu utalu, “Nyi ari nga nga ꞌdar liru ꞌdï (10) lijaw nono? A mine lanna loko gilo liru ꞌtudini kwoꞌrongo? (9). 18 Gwere gwaꞌti gwanni gwadi kwodalu ngwünäjï Ngwaalinga ngwube ru ꞌdogo ndee diru Garanye?” 19 Ngwube määtä ngwuci, “ꞌDïꞌrälü ang ele. Ämnï Ngwaalu gwunga gwuma ang gïlängïdïyï.”

20 Gomon geꞌte a Ngwübärrïjï ngwoko otacalu aar ci jadu gwuru gwadi gwe yeleny yidi Ngwaalu ila? A je Yicu gwäꞌräcänü ngwuje ci, “Yeleny yidi Ngwaalu yaꞌti linginna yiꞌremna nda je rurriyi ngwäy ngwe ngwalu, 21 aaꞌti la je ci, ‘Giyo ngene,’ na ‘Giyo ngenone,’ ndi ari yeleny yidi Ngwaalu giyo ꞌdanggalanu.”

22 Ngwube ci ngwoꞌra ngwüngün, “Gaji nggo gïndï ngaa la mïnï ndi engga gomon geꞌte giyomonanu yidi Gïjï gidi Dïjï dümnä gaꞌti ga aang engga. 23 Ngwüjï ngwa je ci, ‘Nggo ngenone!’ na ‘Nggo ngene!’ Aaꞌti ngaa la geraji yoralu nda je gwujani. 24 Ndi ari anaku ati gu gere enyanu kerala kïbäꞌränü ngïꞌräm, ngwube uꞌriyi ngwaalinganu ꞌdar, ꞌto ma ji manari gomon gadi ge Gïjï gidi Dïjï dümnä oꞌra, gadi gu ru no. 25 A be gwerre gwerre ga mbuji yiꞌrendenya yipa a ga gimaad gidi dïdlä ndee obe gora ge.

26 Anaku rar gu gwerre ngwüjï ngwudi Nuuwa, ya gu ru ꞌto gomon gidi Gïjï gidi Dïjï dümnä oꞌra. 27 Ngwüjï ngwuju ndi eny aar ïyï aar ji ndi agu aar ägïnï ꞌdi a gomon ila ganni gima ge Nuuwa änï gïbälükänü. A däärä ila a yaw üpïnï ngwüjü aar ayalu ꞌdar.

28 A anaku ꞌto kaji gidi Lud. Ngwüjï ngwuju ndi ꞌtäjï ngwäyänü ndi ïyï aar eny, aar illidi aar gwürï yona aar oda ngwuꞌduna. 29 A be gomon ganni gima ge Lud ꞌtü ngwugatani Jaduming, a Ngwaalu niya lïgä na gïbrïtï giru lïgä kerala aar uꞌdiyi ngwüjälü ladibur.

30 Yiꞌral ya gu ru ꞌto no komon gidi Gïjï gidi Dïjï dümnä ganni gading ge ꞌtädälü. 31 Gomon nggoo, gwanni gwujalu ngwuꞌdunala ngwätï ngwony ngwüngün gïdrü, aaꞌti gwüllädälü ndi apa. Na ꞌto gwanni gwa ji ndi gwürï giliburanu, aaꞌti gwa kwodaca gonyalu gere. 32 Diwayinar dayu didi Lud!* 17.32 Lud na daw düngün anni ma aar ru ladi abri gündärä gani Jaduma ganni gadi Ngwaalu uꞌdiyi, daw dima dünï ngwombajidi gwodan ngwugwurli ngwuru gütüm gidi ngwümündä. Täküwïn 19.26 33 Dïjï danni da mïnï ndi gïlängïdïyï ligoꞌro lüngün ling dudiyi, a dïjï danni da dudiyi ligoꞌro lüngün ling mbuji. 34 Nggwa je ci, dilunga ndoo, ngwüjï rom (2) ngwa ji ndi ndradi ngwümbür ngweꞌte pu, da äpïnï deꞌte da gätïnänï deꞌte (1). 35 Ngwaw rom (2) ngwa ji ndi ro yona gwüpäng gilille da äpïnï deꞌte (1) da gätïnänï deꞌte (1).”† 17.35 Yitab yoko yati ari, a ngwur rom ngwa ji gïtäny, da äpïnï deꞌte na da gätïnänï deꞌte.

37 A määtä a ngwooꞌra ngwüngün otacalu aar ci, “Yiꞌral giyee yadi ji ne gwani Deleny?”

A je Yicu mïꞌrïcï ngwujaꞌri ngwee ndi ari ngwuje enggaci ndi ari ya ji ya linginnalu ꞌreꞌdr anaku gwele, “Ngwaalu ngwanni ngwati gu gong ayadalu, ngwubiirta ngwati gu oꞌrajidalu.”