1 A be Yicu gatani ngwaalinga ngwoo ngwele ngwaalu ngwani Yäwüdïyä dambal Ordon. Oꞌre a ngwüjï ïlïjä ngwonyadu na anaku äbräjïng gu, ngwuje enggaci ngwujaꞌri.

2 A Ngwübärrïjï ngwoko ila aar otacalu gwadi aar ïdäjï aar ci, “Yijaw a dur geꞌte dayu düngün kaye?”

3 Ngwuje ci, “Müjä ngwara?”

4 Aar ci, “Müjä gwaru aar ulli ngwujaꞌri aar ngwe geꞌte kay.”

5 A je Yicu ci, “Müjä gwaru gu no ndi ari yigor yalu yundu, ara je be üllïjï ngwujaꞌri ngwee ngwani geꞌte dayu kay. 6 A be ꞌtuꞌtu anaku geꞌta gu Ngwaalu dïdläyü, ‘ngwugeꞌta duru aar geꞌte dayu.’ 10.6 Täküwïn 1.27 7 ‘Yiru giyee yanni yati gäbïcï duru ngwube gatani papang gwüngün na nanning aar acidi daw de düngün 8 na ngindenga ꞌdün aar ru ngwangina ngweꞌte pu.’ 10.8 Täküwïn 2.24 No, laꞌti a be rüdï rom, aar be ru leꞌte pu.

9 Yäy gu no, lanni lima je Ngwaalu gekajidi, dïjï dere daꞌti danni da je gwäꞌdänü.”

10 Anni ma aar ji ꞌdunu, a ngwooꞌra ngwüngün otacalu ngwujaꞌri ngwe ngwee ꞌto. 11 A je Yicu ci, “Dïjï dere danni da geꞌte dayu düngün kay ngwagu diꞌter, da mïꞌrï ngwäyänü ꞌdünggüngün. 12 Na manari daw dima gatani duru düngün ngwägïnï gidur diꞌter, dïmïꞌrïdï ngwäyänü.”

13 A ngwüjï äpïjä yïjü nunnu ngwuje alliji guy nono a be ngwooꞌra ngwüngün girinya ngwüjü. 14 Anni ma Yicu engga ngwujaꞌri ngwee ngwukanu ngwuje ci, “Gäbïcär yïjü aar ila ꞌdünggüny aaꞌti ya je etaci ndi ari yeleny yidi Ngwaalu yiru yidi ngwüjï ngwanni ngwuru nono yïjü giyee. 15 ꞌDidanu nggwa je ci ndi ari, dïjï danni daꞌti da ape yelenya yidi Ngwaalu nono gïjü ganni gooko, yaꞌti ying gu änänü aꞌtur.” 16 A nginde mätänï yïjü nono ngwuje gatu guy nono ngwuje onjaci.

17 Anni ma Yicu ꞌdïꞌrï gwadi ele, a gur geꞌte gwalajanu ngwadacalu giyoranu yirku ye ngwuci, “Gwani doorta danni dijaw, yiru ange yanni yinje ärrï nunnu nyi mbuji yuꞌrina yidi midi gwudi gwurꞌtaling?”

18 A Yicu ci, “Nga gwarra nyi be ci, nggwujaw, dïjï dere daꞌti danni dijaw Ngwaalu ngwuru ꞌdogo jücü. 19 Nga gwülïngïdï ngwujaꞌri ngwudi Ngwaalu ngwanni ngwuru ꞌdï ngwaru nu, ‘Aaꞌti nga gwa ꞌrinyidi, aaꞌti nga gwa mïꞌrï ngwäyänü, aaꞌti nga gwa ru duꞌram, aaꞌti nga gwa üꞌrïdä dïjü yiꞌduru nono, aaꞌti nga gwa ärräjï, dïnyädï papang gwunga na nanni.’ ” 10.19 Gwuruj 20.12; Täjïnïyä 5.16–20

20 Ngwuci, “Gwani doorta, ngwujaꞌri ngwee ꞌdar ngwümätï nje ꞌtuꞌtu ꞌdïꞌrïny gwälü yogo ye.”

21 A Yicu alliji ngwäy nono ngwombaji ngwämnï ngwuci, “Ngwujaꞌri ngweꞌte pu ngwo ngwamiꞌratu. Ïndï nga je ellang ꞌdar yanni yätä je nga gegenaci ngwüjü ngwanni ngwuru ngwuwayi nga gwa be ätï yuꞌrina kerala, nga be ila nyi gwujani.”

22 Yiꞌral ye giyee a gur ïꞌdïyï ngwäyänü kürüng. Ngwele girunu ndi ari nginde gwünänü gwulleny.

23 A Yicu gwurli ngwombajidalu ngwuci ngwoꞌra ngwüngün nu, “Yojema ngwüjï ngwanni ngwünänü ndi änï giyelenyanu yidi Ngwaalu!”

24 A ngwaalu elalu ngwooꞌra ngwüngün ngwujaꞌri ngwüngün a be Yicu gwäꞌräjänü ngwari, “Gwani yïjï, yojema gwulleny ndi änï giyelenyanu yidi Ngwaalu! 25 Yijanalu torneny ndi damla ꞌtü kïïy gidi yïbrä ndi ari a dïjï danni dïnänü änï giyelenyanu yidi Ngwaalu.”

26 Oꞌre a ngwaalu elanalu ngwooꞌra ngwe aar ondajidi aar ari, “Manari yiꞌral yiru gu no, amne yärü gwuru gwanni ngwa mbuji gilanging?”

27 A je Yicu alliji ngwäy nono ngwuje ci, “Yojema gïdïjï dümnä a be Ngwaalu, yaꞌti ojema. Yiꞌral ꞌdar Ngwaalu yaꞌti ojema.”

28 A Butruj ci, “Änyängä lima gatana ngwonyalu ꞌdar ar ang gwujani!”

29 A Yicu gwäꞌräcänü ngwuci, “ꞌDidanu nggwa je ci, gwere gwaꞌti gwanni gwa gatani ngwuꞌduna na ngwenggen ngwuru ngwur na yera ngwugatani papang na nanni na yïjï na giruny güngün gwani äny na gwani ngwujaꞌri ngwanni ngwujaw, 30 gwa amiꞌrati nding je ape yomonanu küüꞌrï tudini (100) yonyadana gïdïdlä ndee (gwani ngwuꞌdun, ngweengga ngwuru ngwur na yera, nanninga, yïjï na ngwuruny na übïnïngälü) gïdïdlä ndäꞌdï ndi ila, miding gwudi gwurꞌtaling. 31 A be lonyadu lanni gilo liru yiꞌra, laji la ji gwodan na lanni liju gwodan, laji la ru yiꞌra.”

32 A je Yicu oda kayalu ladi allu Üräjälïm a ngwaalu elalu ngwooꞌra ngwe ngwüngün a yedeny eny ngwüjü ngwanni ngwugwujana je. Oꞌre a Yicu apada ngwoꞌra ngwükäjäär je ngwüngün ngwoo ngwuru ꞌdï na rom (12) gay geꞌte ngwuje ondaci ndi ari yiru ange yanni yadi ele ndi ji ꞌdünggüngün. Ngwuje ci, 33 “Alanga ladi allu Üräjälïm, na Gïjï gidi Dïjï dümnä ga aar ge gwurlanu ga aar ätädä ngwurꞌdala ngwanni ngwuru ngweleny na ngwoorta ngwudi yobo ga aar ge obalu giyiꞌrany ga aar ätädä ngwüjü ngwuru Garany, 34 ga aar ärrï yïdäpängä ga aar gwonynya ngwäyänü ga aar pï lacal le ga aar ꞌrinye. Ga jalu gidimomanu yomon täꞌrïl ga be ꞌdïꞌrï.”

35 A yïjï yidi Jäbädï Yagubinga Yuwana gwe ila ꞌdünggüngün aar ci, “Gwani doorta, änyängä lïmïnä ndi nje ärrïjï yiꞌral yere yanni yadi ar ye otacalu.”

36 A je Yicu ci, “Yiru ange yinana je nda je ärrïjï?”

37 Aar ci, “Gäbïcï nje ar ang jicalu a gweꞌte jalu kaama a gweꞌte jalu kängïr ndi näjï gwunga.”

38 A je be Yicu ci, “Nga nga laꞌti lïngïdï yiꞌral yorto ye ngwaalinga yara ye, ngaa la burni ndi ïyï ginya ganni gadi nyi ïyï nga nyïnyïnï nyïnyïnï gwe gwanni gwadi nyi gwe nyïnyïne?”

39 Aar ci, “Yäy nyängä la burni.”

A je be Yicu ci, “Ngaa la ïyï ginya ganni gadi nyi ïyï na nyïnyïnï gwanni gwadi nyi gwe nyïnyïnï. 40 A be jalu kaama güny na kängïr güny, yüny yäꞌtüdï nda je ätädä. Yiru yidi ngwüjï ngwanni ngwügïꞌtïjäär je.”

41 Anni ma gu ngwooꞌra ngwoo ꞌdï (10) ꞌdingini no, aar kanu ngwujaꞌri ngwudi Yagubinga Yuwana gwe. 42 A je Yicu urnidi gwüpäng ngwuje ci, “Ngaa lïlïngïdï ndi ari lanni lati aar je engga liru ngweleny ngwudi dïdlä ngwati ruyi ngwüjü yelenya yiima ye, na lanni liru yiꞌra yegen lati aar je gu pä yelenyala. 43 A be aaꞌti yiꞌral giyee ya ji ꞌdanggalanu, manni gwanni gwa mïnï ndi ru dïjï dipa ꞌdanggalanu, gäbïcär ngwuru dïnäd dalu. 44 Gwanni gwa mïnï ndi ru giꞌra, gäbïcär ngwuru dïnäd didi ngwüjï ꞌdar. 45 Ndi ari ꞌto Gïjï gidi Dïjï dümnä gaꞌti ïndädï ndi aar äpïjï yiiru a be gïndädï ndi äpïjï ngwüjü yiiru na ndi dudiyi ligoꞌro lüngün nunnu ngwüꞌrä ngwüjälü ngwonyadu.”

46 Aar be ila ngwaalu ngwani Ariya. Anni ma Yicunga ngwooꞌra ngwe ngwüngün na ngwüjü ngwonyadu ji ndi ꞌtü aar gatani gündärä gani Ariya, a gur gïrïmü ngwäy gani Bartimawuj (yani gïjï gidi Timawuj) gijalu kay gïlänï ndi geraci ngwüjü guy.

47 Anni mung ꞌdingini Yicu gwe gwudi Najrang ngwürrï dula ngwari, “Wä Yicu Gïjï gidi Däwüd, ang ïnä.”

48 A ngwüjï girinya nunnu ngwugwugindi ngwürränï dula gwulleny ngwari, “Gïjï gidi Däwüd, ïnädïny.”

49 A Yicu dünï ngwari, “Urnidar.” No, aar urnidi guru nggoo gïrïmü ngwäy aar ci, “Ju be ꞌdäny nga ꞌdïꞌrälü nggwoone gwurnidanga.” 50 Ngwüꞌdïꞌrä ngwugatu direda düngün gay geꞌte ngwüꞌdïꞌrä ngwila ndi Yicu.

51 A Yicu ci, “Yiru ange yinana je nga je ärrïjï?”

A gur nggoo gïrïmü ngwäy ci, “Gwani doorta, äny ngwunana ndi ombajidalu.”

52 A Yicu ci, “Ïndï, ämnï Ngwaalu gwunga gwuma ang uꞌriyi nono.” Puprang no, ngwuꞌri ngwäy ngwüꞌdïꞌrï ngwugwoda Yicung kayalu.