1 Anni ma Yicu ji gito gwadi änï Üräjälïm, aar ele ꞌdi aar obani ngwaalu ngwani Bidbaji Gidotrala gidi Ngwümïnïtï, a Yicu ükäjï ngwoꞌra rom (2) 2 ngwuje ci, “Ïndär aang änï ngwuꞌdunanu kiꞌra gweere, ngaa la mbuji gïndüꞌrï giru nanni gigekannalu gijica gïndüꞌrälü giru damal, ngaa je be gwäꞌdädälü nje äpïjä. 3 Ma be ari dïjï dere dima je otacalu, ngaa be ci, Deleny diru dïmïnä je ying je be gwäꞌräjä puprang.”

4 Yiꞌral giyee yiru gu nunnu aar ätï ngwäyänü yidi dïjïr danni daru,

6 A ngwooꞌra ngwo rom ele aar ärrï yiꞌral anaku ca je gu Yicu. 7 Aar apa gïndüꞌrï giru nanni na nggoo giru damal aar je gu gillici ngwuredala ngwegen a gu Yicu allala nggoo giru damal. 8 A ngwüjï ngwonyadu gillici ngwuredalu ngwegen kayalu a ngwoko agirta ngwaaꞌri aar je gillicalu kayalu. 9 Ngwüjï ngwanni ngwuju kiꞌra gweere na ngwanni ngwuju gwodan, aar ürrï dula aar opepala aar ari,

10 Anni ma Yicu änï Üräjälïm, a ngwüjï ꞌdar kündär ꞌdïꞌrä aar utalu aar ari, “Yärü gwuru nggwee?”

11 A je ngwüjï ci, “Yicu gwuru nggwee gwuru dïjïr dïndï Najra ngwaalu ngwani Jälïl.”

12 A Yicu änï kobanu ngwüꞌtüyä ngwüjü ngwillidu na ngwanni ngwïndädï ngwiliny, ngwuje bäbïläcï ngwonyalu ngwügwüꞌrübäjï ngwümbürälü ngwanni gwati aar gu ïꞌrä ngwilinyala na ngwuduꞌri ngwanni ngwati aar gu jalu ngwuje gagitu mbüny na ngwudi ellang amaam. 13 Ngwuje ci, “Yüllïnä ndi ari, ‘Ngwuꞌdun ngwüny ngwuru ngwaalu ati gu ngwüjï ilada ndi otaci Ngwaalingalu’ 21.13 Ajaya 56.7 ngwuma je be ruji, ‘ngwubang ngwudi yuꞌram.’ 21.13 Ärmïyä 7.11”

14 A ngwüjï ngwanni ngwürïmü ngwäy na ngwanni ngwuru ngwumjo, ilada ndi Yicu kobo ngwuje uꞌriyi nono. 15 A be anni ma ngwurꞌdal ngwanni ngwuru ngweleny na ngwoorta ngwudi yobo engga yiꞌral yiru yiima yiming je ärrï na yïjï kobanu aar ürrï dula aar ari, “A Gïjï gidi Däwüd näjïnï.” 16 Aar kanu aar otacalu aar ci, “Nga nggwo gwuꞌdingina ngwujaꞌri ngwee ngwaru ngwe yïje?”

A je Yicu ci, “Yäy.” Ngwuje be ci, “Ngaa laꞌti ulu ngwujaꞌri aꞌtur ngwanni ngwaru ngwe gitab ndi ari,

17 Ngwüꞌtü poor ngwuje gatani ngwele kündär gani Bidaniya nggu ndri ngenone.

18 A ꞌtuꞌtu dilu danu, anni mung ji ndi oꞌra gwadi ilada kündär, a ngwamu enyanu. 19 Ngwengga dimnigora kay gïlänï nggu elada ndi ari gwadi mbuji yimnigora ngwuje ꞌti be mbuju yere, ngwube ne ngwänï ꞌdogo ngwuci, “Nga gwaꞌta be gwa ꞌriꞌri mana aꞌtur.” Puprang no, ngwayi nono ngwundi kirom.

20 Anni ma ngwooꞌra ngwüngün engga yiꞌral giyee no, aar dibi aar ari, “Dimnigor dima gu undadanu puprang no awa?”

21 A je Yicu ci, “Nggwa je ondaci ꞌdidanu ma aang ätï ämnïng Ngwaalu, ma aang ꞌti ümïmänü, ngaa laꞌti lärrï ꞌdogo yiꞌral nono yanni yima ärrïnï gidimnigor, a be ꞌto ngaa la ci geno nggee, ‘ꞌDïꞌrü ang gätïnï giyaw,’ na ya gu ru. 22 Yiꞌral yere yanni yadi ye utalu ndi otaci Ngwaalingalu ämnï gwe Ngwaalu, ya je mbuji.”

23 Anni ma Yicu änï ngwämrä kobanu na anni mung ji ndi enggaci ngwüjü ngwujaꞌri ngwudi Ngwaalu, a ngwurꞌdal ngwanni ngwuru ngweleny na mbumbunga otacalu aar ci, “A gwärrä yiꞌral giyee yeleny ye yidi yärü? Yärü gwuru gwätädä je?”

24 A je Yicu ci, “A be äny ngwada je otacalu ngwujaꞌri ngweꞌte pu, miny ondaci, nggwa je be engaci ꞌto ndi ari yeleny yape nje ne giyee yärrïny ye yiꞌral giyee. 25 Nyïnyïnï gwudi Yuwana gwïndï ne? Gwïndï kerala gwalla gwïndï ngwüjï ngwümnä?”

Aar ondajidi aar ari, “Manari a lima ari, ‘Gwïndï kerala,’ nginde gwunje ci, ‘Ngaa mine arra ma aang ꞌti ämnä?’ 26 Na manari a lima ari, ‘Gwïndï ngwüjï ngwümnä,’ ngwüjï ngwunje ꞌdïꞌrädä nono, ndi ari Yuwana gwuru dïjïr ngwäyänü ꞌdenggen.” 27 Aar ci, “Gwaꞌti nyii gwe lïngïdï ngwaalinga.”

A je Yicu gwäꞌräcänü ngwuje ci, “A mine äny ꞌto gwaꞌti gwa je enggaci ndi ari yeleny yidi yärü yiru giyee yärrï nyi ye yiima giyee.”

28 Ngwuje mïꞌrïcï ngwujaꞌri ngwuje ci, “Ngaa laraa? Gur geꞌte gätï yïjü rom. Ngwube urnidi Gaanning ngwuci, ‘Gwani gïjï güny, ïndï gwene ang apa yiiru gidaartanu didi yügïrï.’

29 Ngwube ci, ‘Nggwäꞌtüdï gwadi ele’ ngwube aji ngwïrïyï ngwäyälü ngwüꞌdïꞌrï ngwele.

30 A be papa ele ndi Gwoone ngwuci, ngwujaꞌri ngwanni ngwuci ngwe Gaanning. A Gwoone ci, ‘Yäy äny gwele gwani mbumbu gwüny.’ Ngwuꞌti be ïndï.

31 Yïjï giyee rom, gïndï ne ganni gima ärrï yiꞌral yanni yïmïnï je mbumbu gwüngün?”

Aar ari, “Gaanni gwuru.”

A je Yicu ci, “Äny gwa je ci ꞌdidanu ndi ari ngwudulba na ngwedr, ngwa ji ngwa je gatani ngwänï giyelenyanu yidi gerala. 32 Ndi ari Yuwana gwumadinu ndi ara je enggaci gay gidi dünälü ngaa ꞌti be ämnäcä ngwujaꞌri ngwüngün, a be ngwudulba na ngwedr ru ngwämnäcä. ꞌDi ꞌto anni ma aang engga yiꞌral giyee, ngaa lima ꞌti joꞌrenyana aang ämnï ꞌdünggün.”

33 Ngwuje ci, “ꞌDinginar ngwujaꞌri ngweꞌte ngwee mana. Gur gidi dïyäng gïkwüdï yügïrï gidaartanu, ngwuje be gwalaci ngwuluti dilo didi ündï yügïrï ngwodada gangida ngwube gätïjänï ngwäänä ngwüꞌdïꞌrï ngwele ngwaalu ngwolanu. 34 Anni ma ji a gaji ji gito gidi uni yügïrï, ngwükäjï ngwïnädä ngwüngün ndi ari aar ütïjä yügïrï yüngün. 35 A ngwäänü määtä ngwïnädä ngwüngün, deꞌte aar pïdä na deꞌte aar ꞌrinye na deꞌte aar aca yoꞌrr ye. 36 Oꞌre ngwükäjä ngwïnädä ngwuꞌter ngwonyadana ngwïnäd ngwele ngwudi gwerreng. Oꞌre a je ngwäänü ärrä yïrïgïnä nono ärräär je gu lele lidi gwerreng. 37 Gwodanalu ngwuje ükäcï gïjü güngün ngwari, ‘La denya gïjü güny.’

38 A be anni ma ngwäänü engga gïjü güngün aar gu abingada aar ari, ‘Giru be nggee gidi yuꞌrin. Ilar ar ꞌrinye a yuꞌrin ru yege.’ 39 No aar määtä, aar aar gatu kulu poor gidaarti didi yügïrï aar ꞌrinye.”

40 Ngwuje ci, “Yäy gu no, ma ji ma gur gidi daarti didi yügïrï ila, gadi be ärrä ngwäänä ngwoo?”

41 Aar ci, “Gwa määtä ngwäänä ngwoo ngwuki ngwuje ꞌrinye yiꞌrany yanni yiki gwa ape daarti ding ätädä ngwäänä ngwuꞌter ngwanni gwadi ape yiiru nggu mbuji guꞌru güngün ma gaji ila gidi uni.”

42 A je be Yicu ci, “Ngaa laꞌti ulu ngwujaꞌri kitabanu aꞌtur ndi ari,

43 Ngwuje ci, “Yäy gu no, nggwa je ci ꞌdidanu ndi ari yeleny yidi Ngwaalu yaji ya aar je apada ya aar je ätädä ngwüjü ngwanni ngwadi ꞌriꞌriyi yuula yüngün. 44 Gwanni gwa ïꞌdädä koꞌrr nggee, gwa üꞌrïꞌtïnänü nyandil nyandil na gwanni gwa goꞌrr nggee ïꞌdädä nono gwa äcäjïnänü mimindeny.”

45 Anni ma ngwurꞌdal ngwanni ngwuru ngweleny na Ngwübärrïjï ꞌdingini ngwujaꞌri ngwee ngwümïꞌrïdï je Yicu, aar lenge ndi ari londijaja je Yicu nono. 46 Aar mïnï gay gadi aar ge määtä a je be yedeny eny ngwüjï ndi ari ngwüjï ngwänggädï ndi ari nginde gwuru dïjïr.