1 Kaji nggoo a ngwooꞌra ngwudi Yicu ilaca aar otacalu ndi ari, “Gwïndï ne gwanni gwupana giyelenyanu yidi Ngwaalu?”

2 Ngwümäätä ngwurnidi gïjü gooko ngwüdünäjälä gidiliganu ꞌdenggen 3 ngwube ari, “Nggwa je ci ꞌdidanu manari ngaa lima ꞌti gwurlu ngaa ru nono yïjï yanni yooko, ngaa laꞌti la änï giyelenyanu yidi Ngwaalu aꞌtur. 4 Yäy gu no, gwanni gwa okeye ligoꞌro lüngün ngwuru nono gïjü nggee gooko, gwuru gwanni gwupana giyelenyanu yidi Ngwaalu.

5 Na gwanni gwa gwäꞌrï gïjü ganni gooko giru nono nggee ngwürïny ngwe ngwüny, nginde gwügwäꞌrïny. 6 A be gwanni gwa dudiyi gïjü gere gïyïjänü giyee yooko ganni gämnä ꞌdünggüny ngwügäbïcï ngwape gwuki, yaadi jayani ꞌdünggüngün ndi aar gekaci lille lipa giligoꞌro lüngün aar gatu giyaw yolanu ngwïꞌdätï.”

7 Ngwuje ci, “Wäj bi gwani ngwüjï ngwudi dïdlä ngwanni ngwati gäbïcï ngwüjü aar ape gwanni gwuki! Yiꞌral yanni yiki yadi ji, a be wäj bi gwani dïjï danni da diru guy gegen. 8 Manari a guy ru na gora ru gadi ang gäbïcï nga ape gwuki, üꞌrïdädälü nga gatu mbüny. Ya jayani ndi ang änï ndi midi gwüꞌrü guy nga ru dimjo ndi ari ang üllï gïlïgänü lidi gwurꞌtaling gwätï ngwuy rom na yora rom. 9 Na manari läy lunga liru la ang gäbïcï nga ape gwanni gwuki, gwällï nga gatu mbüny. Ya jayani ndi ang änï ndi midi gwubu läy leꞌte pu, ndi ari ang üllï gïlïgänü lidi yiꞌrendeny gwätï ngwäy rom.”

10 Ngwuje ci, “Arnganar be ndi ari aaꞌti la je le anidanu gilee looko looko. Ndi ari nggwa je ci, yïꞌrr yegen kerala yati ji ngwäyänü ngwudi Papa gwüny kerala giyomon ꞌdar.”* 18.10 Yitab yoko yati ari, “Ndi ari Gïjï gidi Dïjï dümnä gïndädï ndi gïlängïdïyï ngwüjü ngwanni ngwududu.”

12 Ngwuje ci, “Ngaa laraa manari gur geꞌte gätï ngwangala küüꞌrï tudini (100) ngwube dudi deꞌte, gaꞌti ga gatani ngwangalalu ngwoo ngwuru ꞌdï tudini kwoꞌrongo na tudini kwoꞌrongo (99) giyidotrala ngwele ndi mïnä ndoo dima dude? 13 Na manari diming mbuja, äny gwa je ci ꞌdidanu, gwa jayananu dangal de ndoo didudu ngwangal ngwoo ngwuru ꞌdï tudini kwoꞌrongo na tudini kwoꞌrongo (99). 14 Na yiru gu yeꞌte yeꞌte no ndi Papa gwalu kerala, gwaꞌti ämnä ndi ari gwere ꞌdenggenanu gilee looko dudi.”

15 Ngwuje ci, “Manari gwanggalu gwuma ang äpïjï gwanni gwuki, ïndädï nga gwe jalu jücü ang enggaci keng gwüngün. Ma aar ang ꞌdengenaci, nga gwuma gwäꞌrï gwanggalu. 16 Ma be ari gwuma ang ꞌti ꞌdengenaca, nga be apani dïjü deꞌte na ngwüjü rom nunnu ‘yiꞌral ꞌdar a je ngwüjï rom na täꞌrïl inggidi aar gu ru.’ 18.16 Täjïnïyä 19.15 17 Ma be ari gwuma ꞌdonya ndi ara je ꞌdengenaci, ondacar ngwïkïrïjïnä kiꞌdoonga. Ma be ari gwuma ꞌdonyaci giꞌdonga ꞌto, rujar be nono dïjü danni daꞌti lïngïdï Ngwaalinga yaa dïjï dati uti dulba.”

18 Ngwuje ci, “Nggwa je ci ꞌdidanu, yere yanni ya je gekajidi gïdïyängälü ya gïkïnï ꞌto kerala na yanni ya je gäꞌdälü gïdïyängälü ya gäꞌdänälü ꞌto kerala.”

19 Ngwuje ci, “Na ꞌdidanu nggwa je ci ꞌto ndi ari, manari ngwüjï rom (2) ngwuma gekajidi ngwujaꞌri ngwere ngene gïdïyängälü, yanni yïmïnäär je, ya aar je mbuji ndi Papa gwüny gwanni gwati ji kerala. 20 Ndi ari manari ngwüjï rom (2) na täꞌrïl (3) ngwuma oꞌrajidalu ngwürïny ngwe ngwüny, äny gwa ji gidiliganu ꞌdenggen.”

21 A be Butruj ele ngwotacalu ngwuci, “Gwani Deleny manari gwänggärï gwuminy ärrïjï yiꞌral yanni yiki, yomonanu ümn nyi be düdänïjänü? Manari gwuminy ärrïjï yiꞌral yanni yiki yomonanu kwoꞌra täꞌrïle (7)?”

22 A be Yicu ci, “Nggwa je ci yäꞌtüdï yomonanu kwoꞌra täꞌrïl (7) aar ru yomonanu ꞌdï kwoꞌra täꞌrïl kwoꞌra täꞌrïl (77). 23 Yäy gu no, yeleny yidi gerala yiru nono deleny dibupa ndi otaci ngwïnädälü ngwong ngwe ngwanni ngwätädïng je. 24 Anni mung ji nding je otacalu, aar äpïjä dïnäd dïmïnädïng bartad nono gwuru ngwüüꞌrï ꞌdï (10,000).† 18.24 Bartad gweꞌte pu gwätï dinaranu ngwüüꞌrï nyärläl (6,000). 25 Anni mung ꞌti ätï ndi gïꞌtïjï, a deleny düngün dinga ngwujaꞌri ndi ari aar ellang ngindeng, dayu düngün, yïjü yüngün na ngwong ngwanni ngwätïng je ꞌdar ngwugeꞌte dämjä. 26 A dïnäd kwucalu yirku ye giyoranu ngwüpäcälü ngwuci, ‘Dünïcïny gwoko nggwa ang ꞌtücï dämjä dunga ꞌdar.’ 27 Ngwïnädä delenya düngün, ngwüdüdänïjï dämjänü düngün ngwügäbïcï ngwele.

28 A be dïnäd ndoo ꞌtü ngwumbuji dïnädä diru gimaad güngün dïmïnädïng dinar nono diru küüꞌrï tudini (100). Ngwümäätä ngwänïcï ngwuy gidullu ngwuru dading gwogwornyaji ngwuci, ‘Tücïny dämjä düny.’

29 A dïnäd diru gimaad güngün kwucalu yirku ye giyoranu ngwüpäcälü ngwuci, ‘Dünïcïny gwoko nggwa ang ꞌtücï dämjä dunga!’ 30 Ngwube ꞌdonyalu ꞌtïbüny ngwape ngwätädä ngwüjü aar giki ꞌdi ngwugeꞌte dämjä.

31 Anni ma gu ngwïnäd ngwuru ngwenggen engga ngwujaꞌri ngwee, aar kanu gwulleny aar ele aar ondaci delenya degen ngwujaꞌri ngwee ꞌdar ngwanni ngwärrïnä. 32 A doorta düngün urnidi gïdrü ngwuci, ‘Nga nggwee gwuru dïnäd diki äny gwäbräjängä dämjä dunga ꞌdar ndi ari nga gwüpäcïnyälü. 33 Gwanggalu gwaꞌti gwadi ang ïnä ꞌto anaku ïnädïny go?’ 34 Güündä ge, a doorta düngün ape ngwätädä ngwüjü aar pï lacal le ꞌdi ngwugeꞌte dämjälü ꞌdar danni dïmïnädäär nono.”

35 Ngwuje ci, “Yiru yeꞌte yeꞌte ndi ari Papa gwüny gwanni gwati ji kerala gwa je gu ärrï ꞌto no ꞌdogo manari nga gwuma düdänïjï gwanggalanu ꞌtuꞌtu giligoranu lunga.”