1 Gomon ganni giru giꞌra giyomon yiru Kwoꞌra täꞌrïl, ꞌtuꞌtu dilu danu, a ngwaw apani gwuduꞌrula nggwo gwürüdäär aar elada gidimomo. 2 Aar mbuji dïꞌrïmünä dima äbrïnï kïy gidi dimomo. 3 Anni ma aar änï, aar ꞌti be mbuja ngwangina ngwudi Deleny dani Yicu. 4 Anni ma je gwe ngwaalu ji ndi elalu giyiꞌral giyee, no a ngwüjï rom (2) ngwugenna ngwureda ngwubidu pupuꞌrul ila aar je dünäcälü. 5 Yedeny ye no, a ngwaw jürbälü yirku ye gïdïyängälü. A je be ngwüjï ngwo rom ci, “Nga larra ma aang mïnï dïjälü danni dimidu ngwüjänü ngwanni ngwayu? 6 Nginde gwaꞌti ngene. Nginde gwuma ꞌdïꞌrï! Diwayinar ngwujaꞌri ngwanni ngwucara je ngwe anni ja le na Jälïl ndi ari, 7 ‘Gïjï gidi Dïjï dümnä ga aar määtä ga aar ätä ngwüjü ngwanni ngwuki, ga aar pä küꞌrälä ga jalu yomon täꞌrïl ga ꞌdïꞌrï gimidu.’ 24.7 Luka 9.22” 8 Aꞌti ngwaw diwayina ngwujaꞌri ngwüngün ngwanni ngwaru ngwe.

9 Anni ma aar oꞌra, aar ondaci ngwoꞌra ngwudi Yicu ngwoo ngwuru ꞌdï na gweꞌte (11) ngwüjïngä le ngwuꞌter ngwujaꞌri ngwee ꞌdar. 10 Ngwaw ngwo ngwuju ngwani, Märïyäm gwani Mäjïdälïyä, na Juwana na Märïyäm nanni gwudi Yagub, ngwaw ngwanu ngwoko aar ondaci ngwoꞌra ngwükäjäär je ngwudi Yicu ngwujaꞌri ngwe ꞌdar. 11 Aar ꞌti be ämnäcä ngwayu ndi ari ngwujaꞌri ngwudi ngwaw ngwuru nono ꞌtur ꞌdenggegen. 12 Aꞌti Butruj ꞌdïꞌrälü ngwugwalajanu ngwele gidimomalu. Ngwüllänü ngwenggada direda diru lari dijalu ꞌdogo diꞌrukundanu, ngwoꞌra ꞌdunu a gwe ngwaalu elalu giyiꞌral yanni yima ji.

13 A gomon nggoo geꞌte geꞌte, ngwooꞌra rom ngwudi Yicu ngwïndädï ngwuꞌdunanu ngwani Imawaj ngwujica Üräjälïmïng ngwati aar gu ele bränü kwoꞌra täꞌrïl. 14 Aar ji ndi gagitajidi ngwujaꞌri giyiꞌral ꞌdar yanni yima ji. 15 Jar gu ndi gagitajidi ngwujaꞌri ngwe no, a je gu Yicu obananu aar le ele. 16 A je gong gimine määtä aar ji yigoralu mürüd ndi lenge ndi ari nginde gwuru.

17 A je Yicu otacalu ngwuje ci, “Ngwujaꞌri ngwuru ange ngwugagitajida je kayalu?”

Aar ji ꞌrïl aar ji ngwäyänü kürüng. 18 A gweꞌte ꞌdenggenanu gwani Keleyopaj otacalu ngwuci, “A gwuru tani dïrnü deꞌte pu Üräjälïm danni daꞌti lïngïdï ndi ari yiru ange yanni yima ji yomon yanu giyee yima ele?”

19 A je Yicu ci, “Yiru ange?”

Aar ci, “Yanni yima ji ndi Yicu gwudi Najrang. Yicu nggwee gwuru dïjïr dätï yiima yipa giyiꞌral na ngwujaꞌri ngwäyänü Ngwaalu na ngwüjï ꞌdar. 20 Ndi ari awa a ngwurꞌdal ngwanni ngwuru ngweleny ngwelenyanga le ngwärï gwuma aar ape aar ätädä ngwelenya aar ꞌrinye, ndi ari aar pä küꞌrälä. 21 Nyii mine ji ndi geꞌtaji nginde gwuru be gwanni gwadi üꞌrä ngwüjälü ngwudi Yïjïräyïl! A na mine yidi ange giyee ꞌdar, yima ätï gwenene yomon täꞌrïl. 22 A be oꞌre a ngwaw ngwoko ngwärï allijalu ndïr. Ngwïndädï gidimomalu ꞌtuꞌtu gwele dilu danu 23 aar be ari lima ꞌti mbuja ngwangina ngwüngün. Ngwaru nu, länggädï yïꞌrrä yanni yondaja aar je ci nginde nggwo gwumidu. 24 A be loko ꞌdänggäränü ꞌdïꞌrï aar ele gidimomalu aar mbuja yiꞌral yätï ngwäyänü anaku aru gu ngwaw aar ꞌti be änggädï ngindeng.”

25 A je be Yicu ci nu, “Nga nga larra ma gu ru ngweꞌrr no, nga lamiꞌratu ndi ämnï ngwujaꞌri ꞌdar ngwanni ngwondaja je ngwïjïr! 26 Yaꞌti gu manni rüdï ndi ari gwanni Gwubrutaar yelenya gwadi ïyï dïrbä ndee ku gwerre gwerre ꞌdi ngwube änï ndi näjïnï gwüngün kerala?” 27 A je Yicu enggaci ngwujaꞌri ngwündäjïnä giligoꞌro lüngün giyitabanu ndari yädäälü ngwujaꞌri ngwe ngwanni ngwullu je Müjä na ngwanni ngwullu je ngwïjïr ꞌdar.

28 Anni ma aar ji gito gito kündär ganni gïndädäär gu, a Yicu arri nono gwadi elada gweere. 29 Aar määtä aar ꞌdonyalu ꞌtïbüny aar ci, “Ar jalu lingen lima ele ngwalu ngwadi ru degera.” A no ngwele aar le ji.

30 Anni ma aar jalu ladi eny, ngwape yona ngwuje ngwuci Ngwaalinga yäy ꞌtu ngwuje üꞌränü ngwuje ätädä. 31 Aꞌti ngwäy ngwegen ïgïtïnä aar lenge ngindeng ngwuje be dudalu ngwäyänü nyïrül. 32 Aar otajidalu aar ari, “Yaꞌti nje na mine uꞌdiyanu ꞌtur giyigoranu gwele ma aar nje enggaci aar nje ondaci ngwujaꞌri ngwaru ngwe yitabo?”

33 Aar gu ꞌdïꞌrädänü puprang ngeno aar oꞌre Üräjälïm. Ngenone aar mbuji ngwoꞌra ngwoo ngwuru ꞌdï na gweꞌte (11) ngwudi Yicu ngwoꞌrajidalu gwüpäng ngwüjïngä le ngwoko 34 aar ji ndi ari, “Yiru gu ꞌdiꞌdidanu, Deleny dima ꞌdïꞌrï nginde gwüꞌtädïjä Jamaaningalu!” 35 A je ꞌti ngwooꞌra ngwoo rom enggaci yiꞌral yanni yima ji gwele kayalu, a awa aar lenge ndi ari Yicung gwuru anni mung üꞌrü yonanu.

36 Ju gu na ngwooꞌra ngwoo rom ndi ondaji ngwujaꞌri ngwoo no, a Yicu ila ngwüdünï gidiliganu ꞌdenggen ngwuje aganni ngwuje ci, “A adatalu ji ꞌdanggalu.”

37 Aar allalu kwodber a je yedeny eny gwulleny aar ji ndi ari länggädï giboꞌrra. 38 A je be nginde ci nu, “A larra ma ara je yedeny eny? Ange gwuru ngaa be allalu kwodber a ümïmänü ji giyigoranu yalu giyiꞌral giyee? 39 Änggädär ꞌdi ngwuy ngwüny nga engga yora yüny. Äny gwuru. Akaniny nono ngaa lenge ndi ari giboꞌrr gaꞌti ätï ngwangina ngwuꞌti ätï yuya nono änggädä je gu ꞌdünggüny.” 40 Anni mung gu ari no, ngwuje enggaci ngwuy na yora yüngün. 41 Anni aaꞌti aar na ämnä giyiꞌral giyee lapana je jayanu gwulleny a je le ngwaalu elalu, ngwuje otacalu ngwuje ci, “Ngaa lätï ngwony ngwere ngene ngwudi enye?” 42 Aar ätädä ngwuuma ngwoko ngwumanu 43 ngwuje ape ngwuje eny ngwäyänü ngwegen.

44 Ngwuje be ci nu, “Yiꞌral yiru giyee yanni yenggaca je anni jar na, ndi ari yiꞌral ꞌdar yanni yüllïnä yani äny kitabanu gidi Yobo yidi Müjä na yanni yullu je ngwïjïr na yidi Mäjïmür yadi ele ndi ätï ngwäyänü.” 45 Ngwuje ïgïtïyï yiꞌranya yegen ndi lenge ngwujaꞌri ngwudi yitab. 46 Ngwuje ci nu, “Yiru giyee yanni yüllïnä ndi ari, gwanni Gwubrutaar yelenya gwadi ïyï dïrbä ngwayi gwa aar ꞌdïꞌrïyälü komon ganni gadi ru täꞌrïl 47 na yüllïnä ꞌto ndi ari ngwüjï ngwondaci ngwüjü ꞌdar giyen ngwujaꞌri ngwudi Ngwaalu ngwürïny ngwe ngwüngün nunnu aar joꞌrenyana giyiꞌral yegen yanni yiki a je Ngwaalu düdänïjänü. Aar enggaci ngwüjü ꞌdar, gwerre gwerre Üräjälïm. 48 Ngaa liru länggädï yiꞌral giyee yiju na ngaa liru ladi ondaci ngwüjü ngwuꞌter. 49 Äny gwada je ükäcä Lïgïꞌrïmä lanni Lijuꞌru lanni laru le Papa gwüny. A be jaralu kündär ngene ꞌdi a yiima üllä kerala aar je gu üllänü.”

50 Anni mung je ape aar ngwe ꞌtänü kerel gito gito gidi gündär gani Bidaniya, ngenone ngwalliji ngwuy ngwuci Ngwaalinga yäy ꞌtu gwani ngindenga. 51 Anni mung ji ndi ci Ngwaalinga yäy ꞌtu gwani ngindenga, ngwüꞌdïꞌrï ngwallu kerala. 52 Aar kwucalu yirku ye aar oꞌra Üräjälïm lijayanu gwulleny. 53 Ati aar ele kobo yomon ꞌdar ndi elngaci Ngwaalinga aar je ortada.