Ngwujaꞌri ngwanni ngwullu je
Yuwana giꞌra rom
Änï kitabanu
Ngwujaꞌri ngwee ngwobla goranu, ngwuru nono ngwullu je dooꞌra dükäjäär je dani Yuwana gïdïdlä danni diru ꞌdï tudini kwoꞌrongo (90). Nginde gwullu nunnu gwuru dooꞌra didi giꞌdoonga gidi ngwïkïrïjïn ngwucung je, “Daw danni däbräär na yïjï yüngün” (1.1).
Yuwana gwudiwayinya ngwïkïrïjïnä aar gwuji ꞌdengenacing ngwujaꞌri ngwudi Ngwaalu aar elelle ämnäjïdï gwe (1.5–6). Ngwuje girinya ndi ari aaꞌti la ätï yiꞌral yere ngwoortanga le ngwanni ngwati obe ꞌdidanung gwani Kirctu gora ge (1.7–11).
Yajang yidi ngwujaꞌri
1. Aganni (1.1–3)
2. ꞌDengenaci ngwujaꞌri ngwudi Ngwaalu (1.4–6)
3. Arngani gwani ngwoorta ngwuru ngwuꞌduru (1.7–11)
4. Aganni gwudi mïꞌrä (1.12–13)
1
Aganni
1 Ngwujaꞌri ngwee ngwïndï ꞌdünggüny gwanni gwuru mbumbu.
Ngwükäcï nje dayu danni däbrä Ngwaalu yïjï ye yüngün lanni lati nje ämnï ꞌdidanu gwe, na äny gwäꞌtüdï jücü ꞌdogo gwanni gwata je ämnï, a be ꞌdar lanni lïlïngïdï ꞌdidanung lata je ämnï ꞌto. 2 Ndi ari ꞌdidanu nggwo ꞌdengganu na gwadi gu ji ꞌdengganu gwurꞌtal. 3 Aar nje Ngwaalu ngwanni ngwuru Papa na Yicu Kirictu Gïjï gidi Papa, ätä yïmïꞌrä na ïnä na adatalu aar nje gu ji ꞌdidanu gwe na ämnï gwe.
Elelle Ämnäjïdï gwe
4 Äny gwujayanu gwulleny ndi mbuji ndi ari yïjï yoko yunga giyo yati elelle ꞌdiꞌdidanu gwe, anaku ondacaar nje gu Ngwaalu ngwuru Papa. 5 A no, nggwa ang otacalu gwani daw ndi ari ar ämnäjïdï, ngwujaꞌri ngwee ngwäꞌtüdï ngwuyang ngwee ngwüllïjä je, ngwuru ngwujaꞌri ngwanni ngwuꞌdinginar je ꞌtuꞌtu gwerre. Nggwutalu ndi ari ar ämnäjïdï. 6 A ämnäjïdï gwuru nggwee, gwanni gwondaca je gwe gwani ndi ari ar elelle ꞌdengenaci gwe Ngwaalinga ngwujaꞌri ngwüngün. Ngwujaꞌri anaku ꞌdingina je gu ꞌdar ꞌtuꞌtu gwerre, ngwuru ndi ari elellar ämnäjïdï gwe.
Arnganar Ngwuꞌduru
7 Ngwuꞌduru ngwonyadu ngwo ngwuma badalu ꞌdar gïdïdlä, ngwuru ngwüjï ngwanni ngwati ꞌdonya ndi ari Yicu Kirictu gwüllü ngwuru lingeno lidi dïjï dämnä. Dïjï diru gu no, diꞌduru diru ngwuru güwän gidi Kirictu. 8 Yäy gu no geꞌtar be ngwäyälü ngaa arngani ndi ari aaꞌti ya je doda yanni yäpädä gu yiiru, ngaa be mbuji manni guꞌru galu ku.
9 Gwere gwanni gwati ꞌti mätïnälü ngwujaꞌri ngwudi Kirictu ngwuje be dambalu ngwujaꞌri ngwe ngwudi ligoꞌro lüngün, gwaꞌti ätï Ngwaalinga. Gwanni gwati mätïnälü ngwujaꞌri ngwudi Kirictu, gwätï Papang je Gïjï ge ꞌdün. 10 A be no, manari gwere gwanni gwata je ïlïjä ngwujaꞌri ngwe ngwäꞌtüdï ngwudi Yicu, aaꞌti gwa aang ülläjälü ꞌdunu ꞌdanggalu na aaꞌti gwa aang aganni. 11 Ndi ari gwere gwanni gwadi aganni, gwa aar gwe emadi giyiꞌralanu yanni yiki yanni yating je ärrï.
Mïꞌrä
12 Äny gwätï ngwujaꞌri ngwonyadu ngwada je üllïjä, a be ngwaꞌti nje mïnä ndi ulla kwarganu na galam ge, nyi be manni geꞌte kay ndi ila ꞌdanggalu nga je ondaci ngwäyälü. A no, a jayi mbuti aar jayanu ꞌdar gwüpäng.
13 Yïjï yidi gera giru gwanggalu ganni gäbrä Ngwaalu, yagannanga.