1 Aaꞌti a gwa girinya dïmäyïnä diru dur dulu de, nga be ärrï nono mbumbung gwunga. Lanni liru ngwamal ärrä je nono ngwanggalu, 2 na ngwaw ngwuru ngwämäyïn, ärrä je nono nanning je, na ngwaw ngwanni ngwüꞌdïꞌrälü, ärrä je nono ngwanggalu yiꞌral ye ꞌdar yanni yijuꞌru.

3 Arngaca ngwedela mama ngwanni ngwuru ngwedel ꞌdidanu ngwaꞌti ätï ngwüjänü. 4 A be dedel danni dätï yïjü, ngwätï ngwügürnä ngwuru yïjï, yiiru yegen gwerre gwerre, aar elelle yiiru ye yidi yobo, aar arngani ngwüjü ngwegen gïdrü no ya gwäꞌräcï mbumbung je na nanning je na ngwügüürnä ngwegen dämjä giyigoꞌro yegen, giyee yati jada Ngwaalinganu. 5 Dedel danni diru diwayi ꞌdidanu, dïgätïnänälü jücü, ngwätädä Ngwaalinga geꞌtajing gwüngün ngwugwuji ngwujaꞌri ngwani otaci Ngwaalingalu dilu de na lingen le nunnu a Ngwaalu gataji düwä. 6 A be dedel danni digwuja amiꞌra gwudi lingeno, dayu gïlïgïꞌrïm elelle gwüngün gwuru ꞌtur. 7 Ondaca ngwüjü ngwujaꞌri ngwee, nunnu ꞌto, aaꞌti gwere gwa ji gwa yiꞌral ïꞌdä nono. 8 A be dïjï danni dati ꞌti monaca ngwüjü ngwüngün, gwece gwece gwani ngwüjï ngwüngün gïdrü, gwuma gatu ämnïng Ngwaalu mbüny gwuma kani gïdïjï daꞌti ämnä Ngwaalu.

9 Dedel danni da aar ülläjï ngwürïny gidillucu didi ngwedel ngwanni ngwati je giꞌdoonga gataji düwä, ngwuru danni dätï ngwüdläyü ngwüꞌtänälü ꞌdï nyärläl (60). Ngwuru danni diruca duru düngün ligor leꞌte pu gwele gwerre,* 5.9 Dägïnä gwele gidur deꞌte pu. 10 ngwulinginni ndi ari dapu yiꞌral yanni yijaw, ndi ari dïꞌrünïyä yïjü yiꞌral yijaw, dijaw yïrnü, dülläjä ngwüjälü ngwudi Ngwaalu ꞌdunu ꞌdünggüngün ngwuyi ngwüjü yora nono ngwudi Ngwaalu. 5.10 Yuwana 13.1–17; Täküwïn 18.4 Digataja ngwüjü düwä ngwanni ngwuju gïdïrbänü, ngwüꞌdïꞌrï yiiru ye ꞌdar yanni yijaw.

11 A gwani ngwedel ngwanni ngwüꞌdïꞌrälü, aaꞌti ngwa je ülläjï gidillucu ndee. Ndi ari ma ji ma je amiꞌra gwegen gwudi lingeno dami geꞌtajing gwegen ndi Kirictu, ngwa bupi ndi ägïnï. 12 No la obalu yigoꞌro ye yegen, ndi ari lima kiyi ngwujaꞌranu ngwanni ngwaraar ngwe gwerre. 13 Ya ji giyee gay geꞌte, la äbräjï ndi ru ngwujagiꞌral la rcalu lir lir ngwuꞌdunanu. Laꞌti la ru ngwujagiꞌral ꞌdogo, la be gwurla ꞌto ndi änïjï ngwüjü nono aar änï giyiꞌralanu yäꞌtüdï yegen, aar ädïnï ndi ondaji ngwujaꞌri ngwäꞌtüdï ngwadi aar ngwe ari. 14 Yäy no, nggwa ola ngwedela ngwanni ngwüꞌdïꞌrälü aar ägïnï, aar linge, aar ruyi ngwuꞌduna ngwegen, aaꞌti la gïꞌtïjï güwänü gubuꞌru ndi aar nje ngwüjï ondajaji yiꞌral nono yere. 15 Yiru gu ndi ari ngwedel ngwanni ngwüꞌdïꞌrälü, ngwoko ngwo ngwuma ꞌtü kay poor ꞌdidanu ngwuma gwuji dijegoꞌro. 16 Dïkïrïjïn danni diru daw dätï ngwedela gïdrü, ngwuje iye aaꞌti ngwungwe ꞌrïgädï giꞌdonga gidi Ngwaalu, nunnu a giꞌdoonga burni ndi ombaji ngwedela ngwanni ngwaꞌti ätï ngwüjänü.

17 Mbumbunga lanni lati ombaji yiꞌral yidi giꞌdoonga gidi Ngwaalu mama, lädï gu ndi aar je gendacani guꞌru, gwece gwece lanni lati ape yiiru ndi ondaji aar enggaci ngwüjü. 18 Ndi ari gitab gidi Ngwaalu garu nu, “Aaꞌti a gwa gekaci gindri ngwüjïrtï ngwulem ndi eny ma ge ji ndi uꞌri yona,” 5.18 Täjïnïyä 25.4 na ndi ari, “Gwanni gwati ape yiiru, gwati aar ätä guꞌru güngün.” 5.18 Luka 10.7 19 Aaꞌti a gwa ämnï ngwujaꞌri ngwäbïngädäär je mbumbung nono, nga je be ämnï ꞌdogo manari ngwüjï ngwuma ji rom (2) gwalla täꞌrïl (3) ngwanni ngwänggädï je. 5.19 Täjïnïyä 17.6; 19.15 20 Lanni lati ape gwuki, gïrïnyädï je ngwäyänü ngwüjï, nunnu a yedeny eny ngwüjü aar arngani.

21 Nggwa ang olada ngwäyänü Ngwaalu na ndi Yicu Kirictu na yïꞌrr yanni yäbräär je, ndi rime ngwujaꞌri ngwee aaꞌti ngwa ang ngwe uti ngwüjänü, aaꞌti ngwa ang ngwe ämnänï ngwüjü ngwoko.

22 Aaꞌti nga büdädï ndi alliji ngwüjü ngwuy nono ndi ape yiiru, aaꞌti a gwa acidi ndi ke gwudi ngwüjï ngwuꞌter. Arngana ligoꞌro lunga nga juꞌri.

23 Gäbïcä ïyïng yaw yümnä ꞌdogo, ati ang be drü diꞌrica dooko gwani lari lunga lanni lati ang enyanu na dümdï danni dati ang määtä pïd pïd.

24 Ke gwudi ngwüjï ngwoko nggwo gwulinginna, gwati je madina gweere aar enggani gwerre gwerre gomon gaꞌtina gidi obalu. Na ke gwudi ngwüjï ngwoko gwati ji ngwube ꞌtädälü gwodan. 25 Yiru gu yeꞌte yeꞌte ꞌto no ndi ari, yiꞌral yanni yijaw yilinginna ꞌdi ꞌto yanni yati ꞌti engganalu no, yaꞌti ya änälü ya ꞌtädïnälü gilingenalu.