Ngwujaꞌri ngwanni ngwullu je Bulij
Timijawuj giꞌra geꞌte
Änï kitabanu
Timijawuj gwuru dïkïrïjïn diru damal kündär gani Lijitra, ngwaalu ngwani Layikuniya ken gweneno gicaar Türkïyä. Mbumbu gwüngün gwuru Dïgïrïg a be nanni gwüngün ru Dïyäwüd (Yiiru 16.1). Timijawuj gwïndäär Bulij gwe aar ape yiiru ndi ondaci ngwüjü ngwujaꞌri ngwanni ngwujaw ngwani Yicu Kirictu. Timijawuj gwuru nono gïjï ndi Bulij ngwuru dïjï danni diru ligor leꞌte pu ndi aar apajidi yiiru.
Ngwujaꞌri ngwee ngwüllïnä, yilinginna ndi ari Bulij gwugatana Timijawujing Abijuj ndi gataji ngwïkïrïjïnä düwä ngenone. Bulij gwondaca Timijawujing ndi ari ngwugirinya ngwüjü ngweꞌte ngenone aar dünäjï enggacing ngwüjü ngwujaꞌri ngwäꞌtüdï ꞌdidanu (1.3). Ngwinggidu ndi ari lanni liru yiꞌra yidi giꞌdoonga gidi Ngwaalu ladi ru ꞌtaa (3.1–13). Ngwenggaci Timijawujing ndi ari awa a ngwïkïrïjïn elelle aar ru giꞌdu gidi ngwïkïrïjïn (3.14–15). Bulij gwülädï Timijawujing ndi ari ngwuru dïnäd dijaw didi Yicu Kirictu. Ngwenggaci awa ngwarnga yiꞌdu yidi ngwüjï kiꞌdoonga gidi Ngwaalu.
Yajang yidi ngwujaꞌri
1. Aganni (1.1–2)
2. Bulij gwondaca Timijawujing giꞌdoonga ge na lanni liru yiꞌra yidi giꞌdoonga (1.3—3.16)
3. Bulij gwülädï Timijawujing yiiru ye yüngün (4.1—6.21)
1
1 Ngwujaꞌri ngwee ngwïndï ꞌdünggüny äny gwani Bulij gwuru dooꞌra dükäjäär didi Yicu Kirictu yeleny ye yidi Ngwaalu ngwuru Gilang gwege na yidi Yicu Kirictu gwuru geꞌtaji gwege.
2 Ngwükäcï nje gïjü güny ꞌdidanu ndi ämnï Ngwaalu gani Timijawuj.
Aar ang Ngwaalu ngwuru Papa na Yicu Kirictu gwuru Deleny dege aar ang ätädä yïmïꞌrä aar ang ätädä ïnäng aar ang ätädä adatingalu.
Arnganar ngwoorta ngwanni ngwuru ngwuꞌduru
3 Anaku päcä gwälü anni ïndïny Majiduniya, nunnu nga jalu ngenone kündär gani Abijuj nga girinya ngwüjü ngweꞌte ngwäꞌdï aaꞌti ba be ngwa ji ndi enggaci ngwüjü ngwujaꞌri ngwaꞌti ïndï kayalu. 4 Aar dünäjï yigoꞌro yegen ndi gwuji ondajing gwani lütülütü na ngwujaꞌri ngwani utiti ngwügürnä ngwürïny ngwanni ngwati ꞌti medadu. Ngwujaꞌri ngwanni ngwuru gu no, ngwati apa garnating aar ꞌti apu yiiru yidi Ngwaalu yanni yati ji ämnï gwe ꞌdünggüngün. 5 Bupi gwudi ngwujaꞌri ngwee gwani ämnäjïdï gwanni gwati ila giligor lanni lijuꞌranu na ligor le lanni lijaw na ndi ämnï Ngwaalu gwanni gwuru ꞌdidanu. 6 Gilo loko lima je ngwujaꞌri ngwee doda lima gwurla ndi ondaji ngwujaꞌri ngwanni ngwaꞌti ätï ngwäyänü. 7 Ngwunana ndi ru ngwoorta ngwudi yobo yidi Ngwaalu, aar ꞌti be lïngïdädï yiꞌral yorto ye ngwaalinga yondajaar je na yanni yïcïnädäär gu mama.
8 A lïlïngïdï ndi ari yobo yijaw manari yima ye dïjï ape yiiru mama. 9 Na ꞌto ar lenge ndi ari yobo yaꞌti aar je gïꞌtïjä dïjü danni dïdünälü, aar je be gïꞌtïjï ngwüjü ngwanni ngwati kiyi yobo aar nyurtanu, aar je gïꞌtïjï ngwüjü ngwanni ngwaꞌti lïngïdï drü didi Ngwaalu na ngwanni ngwuki, ngwanni ngwaꞌti juꞌru aar ꞌti ïndï yobo ye yidi Ngwaalu, ngwanni ngwati ꞌrinye papang je aar ꞌrinye nanning je, aar je gïꞌtïjï ngwüjü ngwanni ngwati ꞌrinyidi. 10 Yobo yïgïꞌtïjäär je ngwüjü ngwanni ngwati mïꞌrï ngwäyänü na ngwur ngwanni gwati ape ngwuru. Yïgïꞌtïjäär je ngwüjü ngwanni ngwati ummi ngwüjü aar je ellang yïnädä, aar je gïꞌtïjï ngwuꞌduru na ngwüjï ngwanni ngwati pï yiꞌrany ꞌtur, aar ärrï yiꞌral ꞌdar yanni yaꞌti aar elatu ngwujaꞌri ngwe ngwanni ngwïndï kayalu. 11 Yanni yaꞌti aar ïndï ngwujaꞌri ngwe ngwanni ngwujaw ngwanni ngwünäjïnä ngwudi Ngwaalu ngwätädäär nje Ngwaalu ngwanni ngwortana.
Bulij gwïnädï Delenya
12 Nggwati ci Delenya dege dani Yicu Kirictu yäy ꞌtu gwanni gwuminy ätä yiima gwänggädïny ndi ari äny gwuru ligor leꞌte pu, aar nyi geꞌte giyiiru yüngün. 13 ꞌDi manari gwele äny gwüllüdï Ngwaalinga nyi übïnï ngwüjälü ngwüngün nyi ꞌre ngwäy. Gwïnädïny ndi ari nggwuru deꞌrr nyi ꞌti ätï ämnïng Ngwaalu. 14 Yïmïꞌrü yidi Deleny dege yïbäläjäär nje nono yïrälü, ämnï gwe Ngwaalu na ämnï gwe gwanni gwuju ndi Yicu Kirictu.
15 Ngwujaꞌri ngwee ngene ngwätï ngwäyänü, ngwädï gu ndi ar je ämnï ꞌdar, Yicu Kirictu gwïndï ngene gïdïdlä ndi gïlängïdïyï ngwüjü ngwanni ngwuki, nono änyïng gwanni gwukana ꞌdenggen. 16 Nyi be ïnädä Ngwaalinga gwanni gwukana nono nunnu a Yicu Kirictu inggidi määtäng ligor lüngün lanni laꞌti rimitalu nyi ru gora gidi ngwüjü ngwanni ngwa ämnï nginde gwe aar mbuji miding gwudi gwurꞌtaling. 17 A denya ru na näjï ru gwudi Deleny didi gwurꞌtaling, danni dati midi gwurꞌtal, danni dati ꞌti enggana, danni diru Ngwaalu ngweꞌte pu pupud. Yiru gu.
A Bulij ola Timijawujing
18 Gïjï güny gani Timijawuj, nggwätädängä ngwujaꞌri ngwee anaku aru gu yïjïr gwani nga gwerre, nunnu ma je gwujani, nga gwa ape yongra yanni yijaw, 19 nga mätïnälü ndi ämnï Ngwaalu a ligor le lijaw. Loko lanni lima obe ngwujaꞌri ngwee gora ge, lima geraji ämnïngälü Ngwaalu gwegen nono ma dudu ape bälükä ngwugerajalu. 20 Gilo ganu lani Iminiyuj na Älïjïkändär lanni liminje ätä dijegoꞌro ngwuje reraji aaꞌti la lo Ngwaalinga.