20
ལོ༌ སྟོང༌ཅིག༌།
20:1 ནེ༌ 6
1 ཏེ༌ནེ༌ ང༌ ཡང༌ ཕོ༌ཉ༌ཞིག༌ ནམ༌ཁའ༌ནེ༌ བབས༌ཨིན༌ ཐོང༌, ཁོང༌ངི༌ ཆག༌ག༌ ཐིལ༌ མེད༌ཁན༌ནི༌ ཏིང༌ཅན༌ ས༌དོང༌ངི༌ ཀུ༌ལིག༌ དང༌ ལྕག༌ཐག༌ ལྕིན༌ཏྲེ༌ ཆེན༌མོ༌ཞིག༌ ནམས༌ཏེ༌ དུག༌། 2 བྲུག༌ ཀ༌བོའ༌ སྔུན༌མའེ༌ ཏུས༌སི༌ རུལ༌, ཡ༌ རྡུད༌གུན༌ནི༌ གོ༌བ༌, ཡ༌ ཤེ༌ཏན༌ ཟེར༌རད༌, ཁོང༌ངི༌ ཟུམས༌ཏེ༌, ལོ༌ སྟོང༌ཅིག༌གི༌ ཕིའ༌ ཁོའ༌ ལྕག༌ཐག༌ ཉམ༌པོ༌ ཏགས༌། 3 ལོ༌ སྟོང༌ཅིག༌པོ༌ ཚར༌ཚར༌ ཚོག༌པ༌ ཤེ༌ཏན༌ནི༌ གྱལ༌ཁམས༌ ཚང༌མའེ༌ མི༌གུན༌ལ༌ གོབ༌སྐོར༌ མི༌ཏང༌ཅེས༌སི༌ ཕིའ༌, ཏེ༌ ཕོ༌ཉའེ༌ ཁོ༌ ཐིལ༌ མ༌ནེ༌ མེད༌ཁན༌ནི༌ ཏིང༌ཅན༌ ས༌དོང༌ངི༌ ནང༌ང༌ ཕངས༌, ཡང༌ ཁའ༌ ཀབས༌ཏེ༌ ཐེ༌ཙེ༌ གྱབས༌། ཏེ༌ ཏུས༌པོ༌ ཚར༌ཏེ༌ སྟིང༌ནེ༌ ཁོ༌ སྲིབ༌ཅིག༌གི༌ ཕིའ༌ ཕི༌ལོག༌ག༌ བིང༌ ཅུག༌ག༌ ཛད༌གོས༌།
4 ཏེ༌ནེ༌ ང༌ ནམ༌ཁའེ༌ ནང༌ང༌, ཁྲིམས༌ཅད༌ཅེས༌སི༌ ཝང༌ སལ༌ལ༌ ཛད༌ཁན༌གུན༌ ཞུགས༌ཁྲིས༌གུན༌ནི༌ཀ༌ ཞུགས༌ཏེ༌ ཐོང༌། ཡང༌ ང༌ གོ༌ ཅད༌ཁན༌ མི༌གུན༌ནི༌ སེམས༌ཉིད༌གུན༌ ཐོང༌, ཅིའ༌ཟེར༌ན༌ ཁོང༌གུན༌ནི༌ ཡེ༌ཤུའི༌ སྤང༌པོ༌ ཏངས༌ཏེ༌ དཀོན༌མཆོག༌གི༌ བཀའ༌ ཤད༌ཏེ༌ ཨིན༌པིན༌། ཁོང༌གུན༌ནི༌ ཇིགས༌ནང༌ཅན༌ནི༌ སེམས༌ཅན༌ ཡ༌ ཁོའེ༌ སྐུན༌དྲ༌ ཆག༌ མ༌ཕུལས༌, མ༌ཚད༌ ཁོའེ༌ སྟགས༌པོའང༌ ཁོ༌རང༌གུན༌ནི༌ ཐོད༌པ༌ ཡ༌ ལག༌པའེ༌ཀ༌ ཅོ༌ མ༌ཅུགས༌། ཁོང༌གུན༌ སོན༌ཏེའ༌ ལངས༌, ཡང༌ མ༌ཤི༌ཀ༌ ཉམ༌པོ༌ ལོ༌ སྟོང༌ཅིག༌ ཝང༌སྲུལས༌།
5 ཁོང༌གུན༌ ནི༌, ཤི༌ཏེ༌ ལངས༌ཁན༌ ཏང༌པོ༌རང༌ ཨིན༌ནོག༌ ༼ཏེ༌ ལོ༌ སྟོང༌ཅིག༌པོ༌ ཚངས༌ཏེ༌ མ༌ནེ༌ ལུས༌ཏེ༌ ཡོད༌ཁན༌ནི༌ ཤི༌ཁན༌གུན༌ སོན༌ཏེའ༌ མི༌ལངས༌༽ 6 གོ༌མའེ༌ སོན༌ཏེའ༌ ལང༌ཅེས༌སི༌ ནང༌ང༌ ཐུས༌ཁན༌ནི༌ མི༌གུན༌ ཅིན༌ལབས༌ཅན༌ དང༌ དམ༌པ༌ ཨིན༌ནོག༌, ཅིའ༌ཟེར༌ན༌ ཁོང༌གུན༌ནི༌ཀ༌ ལན༌ ཉིས༌པ༌ ཤི༌ཅེས༌པོའ༌ ཝང༌ མ༌ནེ༌ མེད༌ཀྱག༌, མ༌ཚད༌ དཀོན༌མཆོག༌ དང༌ མ༌ཤི༌ཀའེ༌ བླ༌མ༌གུན༌ གྱུར༌ཏེ༌ ལོ༌ སྟོང༌ཅིག༌ ཚག༌པ༌ མ༌ཤི༌ཀ༌ ཉམ༌པོ༌ ཝང༌སྲུལ༌ཨིན༌།
ཤེ༌ཏན༌ལ༌ ཕམ༌ཀལས༌།
20:7 ནེ༌ 10
7 ལོ༌ སྟོང༌ཅིག༌ ཚང༌ང༌དང༌ ཤེ༌ཏན༌ ཙོན༌ནེ༌ ཕུད༌ཨིན༌། 8 ཁོ༌ ཇིག༌རྟེན༌ནི༌ ཆོགས༌ ཚང༌མའེ༌ གྱལ༌ཁམས༌སི༌ མི༌གུན༌ལ༌ གོབ༌སྐོར༌ ཏང༌ང༌ལ༌ གོག༌ དང༌ མ༌གོག༌ ཟེར༌ཁན༌ནི༌ ནས༌སའེ༌ཀ༌ ཆེན༌། ཁོའེ༌ མི༌ཚང༌མ༌ ཆོག༌ཤིག༌ག༌ མག༌གི༌ ཕིའ༌ ཛོམ༌ཅུག༌ཨིན༌, ཀ༌བོ༌ ཚོའེ༌ ཐའ༌མ༌ ཡོད༌ཁན༌ནི༌ པེ༌མ༌ རྩི༌ མི༌ཉན༌ཅེས༌ ཙོགས༌ མང༌པོ༌ ཡོང༌ཨིན༌། 9 ཇིག༌རྟེན༌ནི༌ ཆོགས༌ ཚང༌མ༌ནེ༌ ཁོང༌གུན༌ བིངས༌ཏེ༌ དཀོན༌མཆོག༌གི༌ མི༌གུན༌ དང༌ ཁོང༌ ཐུག༌ཉེས༌ས༌ ཛད༌ཁན༌ནི༌ གྱལ༌ས༌བོའ༌ སྐོརས༌, ཨིན༌ནའང༌ ནམ༌ཁའ༌ནེ༌ མེ༌ ཐུར༌ལ༌ བབས༌ཏེ༌, ཏེ༌ མག༌མི༌གུན༌ ཁྲེས༌སྟོར༌ ཅོའ༌ ཛདས༌།
10 ཏེ༌ནེ༌ མི༌ཚང༌མ༌ལ༌ གོབ༌སྐོར༌ ཏང༌ཁན༌ནི༌ རྡུད༌གུན༌ནི༌ གོ༌བ༌, མུ༌ཟི༌ མེའ༌ ཞེན༌ཨིན༌ ཡོད༌ཁན༌ནི༌ ཚོའེ༌ ནང༌ང༌ ཕངས༌, ཀ༌བོའེ༌ ནང༌ང༌ ཇིགས༌ནང༌ཅན༌ནི༌ སེམས༌ཅན༌ དང༌ ལུང༌སྟོན༌པ༌ ཟུས༌མ༌ གུན༌ ཕངས༌ཏེ༌ ཨིན༌པིན༌། ཡང༌ ཁོང༌གུན༌ལ༌ ཏུས༌གྱུན༌ནེ༌གྱུན༌ ཉིན༌ཚན༌ མེད༌པ༌ རྡུག༌ངལ༌ ཐོང༌ཨིན༌།
ཁྲིམས༌ཅད༌དི༌ ཞག༌།
20:11 ནེ༌ 15
11 ཏེ༌ནེ༌ ངའེ༌ ཞུགས༌ཁྲིས༌ ཀར༌པོ༌ ཀྲག༌པོ༌ཞིག༌ དང༌ ཏེ༌ཀ༌ ཞུགས༌ཁན༌བོ༌ ཐོང༌། ཁོང༌ ཇལ༌ལ༌ཅིག༌ ཇིག༌རྟེན༌ དང༌ ནམ༌ཁའ༌ གུན༌ ཁོང༌ངི༌ དུན༌ནེ༌ ཤོར༌ཏེ༌ སོང༌, ཡང༌ ཏེ༌ནེ༌ཕར༌ལ༌ སུ༌ཞིག༌གིའང༌ ཏེ༌གུན༌ མ༌ཐོང༌། 12 ཏེ༌ནེ༌ ང༌ ཤི༌ཁན༌ ཇིགས༌པོ༌ དང༌ ཉམ༌ཤུང༌ མི༌གུན༌, དཀོན༌མཆོག༌གི༌ ཞུགས༌ཁྲིས༌སི༌ དུན༌ལ༌ ལངས༌ཏེ༌ ཐོང༌། ཡང༌ སྤེ༌ཆ༌ ཕེ༌ཁན༌གུན༌ནི༌ ཕྲོའ༌ ཐའ༌མེད༌པའེ༌ མི༌ཚེའེ༌ སྤེ༌ཆ༌བོའང༌ དུག༌། སྤེ༌ཆ༌གུན༌ནི༌ ནང༌ང༌ ཁོང༌གུན༌ནི༌ ཅོས༌ཁན༌གུན༌ བྲིའ༌ ཛད༌ཏེ༌ ཡོད༌ཁན༌ ནང༌ཞིན༌, ཁོང༌གུན༌ལ༌ ཁྲིམས༌ཅད༌ སལ༌དུག༌། 13 གྱ༌ཚོའེ༌ ཏེ༌ནང༌ང༌ ཤི༌ཁན༌ནི༌ མི༌གུན༌ ཕུདས༌, ཡང༌ ཤི༌ཅེས༌ དང༌ ཤི༌ཁན༌གུན༌ནི༌ ནས༌སེའང༌ ཤི༌ཁན༌ནི༌ མི༌གུན༌ ཕུདས༌། ཏེ༌ ཤི༌ཁན༌ ཚང༌མའ༌ ཁོ༌རང༌གུན༌ནི༌ ལས༌ ནང༌ཞིན༌ལ༌ ཁྲིམས༌ཅད༌ སལ༌ལ༌ ཛདས༌། 14 ཏེ༌ནེ༌ ཤི༌ཅེས༌ དང༌ ཤི༌ཁན༌ནི༌ ནས༌ས༌ གུན༌ མེ༌ བར༌ཨིན༌ ཡོད༌ཁན༌ནི༌ ཚོའེ༌ ནང༌ང༌ ཕངས༌, འི༌ ཚོ༌བོའ༌ ཤི༌ཅེས༌ ཉིས༌པ༌ ཟེར༌ར༌ནོག༌། 15 ཐའ༌མེད༌པའེ༌ མི༌ཚེའེ༌ སྤེ༌ཆའེ༌ ནང༌ང༌ མིང༌ བྲིས༌ཏེ༌ མེད༌ཁན༌གུན༌, མེ༌ བར༌ཨིན༌ ཡོད༌ཁན༌ནི༌ ཚོའེ༌ ནང༌ང༌ ཕང༌ང༌ ཛདས༌།