24
ཐའ༌མའེ༌ ཏུས༌སི༌ སྟགས༌གུན༌།
24:1 ནེ༌ 51
1 གཙོ༌བོ༌ ཡེ༌ཤུ༌ ཆོད༌ཁང༌ནེ༌ བིང༌ཏེ༌ སྐྱོད༌ཨིན༌ ཡོད༌ ཟ༌ནེ༌ ཁོང༌ ཡོད༌ས༌ ལོབ༌ཕྲུགས༌གུན༌ ཡོངས༌ཏེ༌ ཆོད༌ཁང༌ ཧ༌ལས༌ཤེས༌ རྩིགས༌ཏེ༌ ཡོད༌ཁན༌བོ༌ ཡེ༌ཤུའ༌ ལྟན༌ན༌ ཛདས༌། 2 ཡེ༌ཤུའི༌ ཁོང༌གུན༌ལ༌ མོལས༌, "འི༌ ཚང༌མ༌ ཁྱོ༌ཞའ༌ ཐོང༌དུག༌ག༌? ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ རྡོའ༌ ཅིག༌གའང༌ ཅིག༌གི༌ཀ༌ རྩགས༌ཏེ༌ མི༌ལུས༌, ཚང༌མ༌ ཤིག༌ཨིན༌།"
3 ཨོ༌ལིཝ༌ཝི༌ རི༌ཀ༌ ཡེ༌ཤུ༌ ཞུགས༌ཏེ༌ ཡོད༌ ཟ༌ནེ༌, ལོབ༌ཕྲུགས༌གུན༌ ཁོང༌ ཅིག༌པོ༌ ཡོད༌ས༌ ཡོངས༌ཏེ༌ ཏྲིས༌, "ང༌ཞའ༌ ཤད༌ད༌ ཛད༌དའང༌ ཏེ༌བོ༌ ནམ༌ བྱུང༌ཨིན༌། ཉེ༌རང༌ ཇིག༌རྟེན༌ནི༌ཀ༌ ལོགས༌ཏེ༌ སྐྱོད༌ཅེས༌ ཡང༌ ཏུས༌སི༌ ཐའ༌མའེ༌ སྟགས༌པོ༌ ཀ༌ཟུག༌ རིག༌ ཡོང༌ཨིན༌།
4 ཡེ༌ཤུའི༌ ལན༌སལས༌, "སུ༌ཞིག༌གིའང༌ ཁྱོ༌ཞའ༌ གོབ༌སྐོར༌ ཏང༌མི༌ཅུག༌ཅེས༌ལ༌ ཤང༌ ཅོས༌, 5 ཅིའ༌ཟེར༌ན༌ ངའེ༌ མིང༌ ཁུར༌ཏེ༌ ང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ ཟེར༌ཁན༌ མང༌པོ༌ཞིག༌ ཡོངས༌ཏེ༌ མི༌ མང༌པོའ༌ གོབ༌སྐོར༌ ཏང༌ཨིན༌། 6 ཡང༌ ཁྱོ༌ཞ༌གུན༌ནི༌ མག༌ དང༌ མག༌གི༌ སྐོར༌ལ༌ འུ༌ཡ༌གུན༌ ཚོར༌ར༌ཅིག༌, ཇིགས༌ མ༌ཇིག༌ཤིག༌; ཏེ༌གུན༌ བྱུང༌གོས༌, ཨིན༌ནའང༌ ཐའ༌མའེ༌ ཏུས༌ ཏ༌རུང༌ མི༌ལེབ༌། 7 གྱལ༌ཁམས༌ ཅིག༌ དང༌ ཅིག༌གི༌ ཡང༌ གྱལ༌སྲིད༌ ཅིག༌ དང༌ ཅིག༌གི༌ གྱབ༌གལ༌ལ༌ མག༌ ཏང༌ཨིན༌། ནས༌ས༌ མང༌པོའེ༌ ནང༌ང༌ མུ༌གེ༌ དང༌ སང༌གུལ༌ ཡོང༌ཨིན༌། 8 ཨིན༌ནའང༌ ཏེ༌ ཚང༌མ༌ ནི༌ ཕྲུ༌གུ༌ སྐྱེ༌ཅེས༌སི༌ གོ༌ཟུག༌གི༌ ཟུག༌ཟེར༌བོ༌ ཙོགས༌ ཨིན༌།"
9 "ཏེ༌ནེ༌ ཁྱོ༌ཞའ༌ རྡུག༌ངལ༌ ལྟན༌ཅེས༌ལ༌ སྟད༌ཏེ༌ སད༌ཨིན༌། ཁྱོ༌ཞའེ༌ ངའེ༌ ནང༌ང༌ ཏད༌པ༌ ཅོ༌ཅེས༌པོའེ༌ གྱལ༌ཁམས༌ ཚང༌མའེ༌ མི༌གུན༌ནི༌ ཁྱོ༌ཞ༌གུན༌ལ༌ ནཕ༌རད༌ ཅོ༌ཨིན༌། 10 ཏེ༌ཏུས༌ལ༌ མི༌ མང༌པོའེ༌ ངའེ༌ ནང༌ང༌ ཏད༌པ༌ ཅོ༌ཁན༌བོ༌ ཕང༌ཨིན༌ ཡང༌ ཁོ༌རང༌ ཅིག༌ དང༌ ཅིག༌ག༌ ནཕ༌རད༌ ཅོས༌ཏེ༌ གྲ༌འོའེ༌ ལག༌ག༌ སྟད༌ཨིན༌། 11 ཟུས༌མའེ༌ ལུང༌སྟོན༌པ༌ མང༌པོ༌ ཡོངས༌ཏེ༌ མི༌ མང༌པོའ༌ གོབ༌སྐོར༌ ཏང༌ཨིན༌། 12 ཇིག༌རྟེན༌ནི༌ ནང༌ང༌ ངན༌སེམས༌ གྱས༌ཤེས༌པོའེ༌ མང༌པོ༌ཞིག༌གི༌ དཀོན༌མཆོག༌ དང༌ མི༌གུན༌ནི༌ ཕིའ༌ ཡ༌ཤ༌བོ༌ ཉམས༌ཨིན༌། 13 ཨིན༌ནའང༌ ཐའ༌མ༌ ཚོག༌པ༌ ངའེ༌ཀ༌ ཏད༌པ༌ སྟན༌པོ༌ བོར༌ཁན༌གུན༌ ཐར༌ཨིན༌། 14 གྱལ༌ཁམས༌ ཚང༌མའེ༌ མི༌གུན༌ནི༌ ཚོར༌ཅེས༌སི༌ ཕིའ༌ ཇིག༌རྟེན༌ གང༌པོའེ༌ ནང༌ང༌ ནམ༌ཁའེ༌ གྱལ༌སྲིད༌དི༌ གའ༌མོའེ༌ ནས༌ཚུལ༌བོ༌ ཤད༌ཨིན༌, ཏེ༌ནེ༌ ཏུས༌སི༌ ཐའ༌མ༌ ལེབ༌ཨིན༌།"
15 "ཁྱོ༌ཞའེ༌, ལུང༌སྟོན༌པ༌ དཱ༌ནི༌ཨེལ༌ལི༌ དམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཁན༌ 'ཁམ༌ལོག༌ ཚི༌ཏུ༌ ཅོ༌ཁན༌བོ༌' དམ༌པའེ༌ ཆོད༌ཁང༌ངི༌ ནང༌ང༌ ཐོང༌ང༌ཅིག༌, ༼སིལ༌ཁན༌གུན༌ནི༌ ངའེ༌ ཟེར༌ཅེས༌ཅན༌གུན༌ནི༌ཀ༌ སྣང༌ང༌ ཏོང༌༽ 16 ཡ༌ཧུ༌དཱའེ༌ ཡུལ༌ཇོངས༌སི༌ ནང༌ང༌ དུག༌ཁན༌གུན༌ རི༌གུན༌ལ༌ ཤོར༌གོས༌། 17 ཁང༌པའེ༌ ཁ༌ཐོག༌ག༌ ཡོད༌ཁན༌གུན༌ ཡོག༌ག༌ བབས༌ཏེ༌ ཁང༌པའེ༌ ནང༌ང༌ ནོར༌གུན༌ ལེན༌ན༌ལ༌ མ༌ཆ༌། 18 ཞིང༌ངི༌ཀ༌ ལས༌ ཅོ༌ཨིན༌ ཡོད༌ཁན༌གུན༌ ལོགས༌ཏེ༌ ཁང༌པའ༌ ཀོས༌ ཁྱོང༌ང༌ལ༌ མ༌ཆ༌། 19 ཏེ༌ཏུས༌ལ༌ སྐྱེ༌ཅེས༌མ༌ དང༌ ཕྲུ༌གུའ༌ པི༌བི༌ ཏང༌ཁན༌ནི༌ ཨ༌མ༌གུན༌ལ༌ ཙམ༌ཤིག༌གི༌ ཇིགས༌ནང༌ མ༌ནོག༌། 20 ཁྱོ༌ཞའ༌ ཤོར༌ཅེས༌སི༌ ཏུས༌པོ༌ དགུན༌ཏུས༌ ཡ༌ ཤབ༌བད༌དི༌ ངལ༌ཚོའེ༌ ཞག༌ག༌ མི༌བྱུང༌ཅེས༌ལ༌ མོས༌ལམ༌ ཞུས༌། 21 ཏེ༌ཏུས༌ལ༌ འི༌ཟམ༌ རྡུག༌ངལ༌ ཀྲག༌པོ༌ བྱུང༌ཨིན༌, ཀ༌བོ༌ ཇིག༌རྟེན༌ ཛད༌པ༌ནེ༌ ཕར༌ལ༌ དག༌ས༌ ཚག༌པ༌ མ༌བྱུང༌ང༌ ཨིན༌ནོག༌ ཡང༌ སྟིང༌ཞིན༌ནའང༌ མི༌བྱུང༌། 22 གལ༌ཏེས༌ ཏེ༌ཏུས༌པོ༌ ཉུ༌ངུན༌ མ༌ཛད༌པིན༌ན༌ སུ༌ཞིག༌གའང༌ སོན༌ཏེའ༌ ལུས༌ཏེ༌ མེད༌གྲོ༌, ཨིན༌ནའང༌ ལྡམ༌མ༌ ཛད༌ཁན༌གུན༌ནི༌ ཏོན༌ལ༌ ཏེ༌ཏུས༌པོ༌ ཉུ༌ངུན༌ ཅོའ༌ ཛདས༌།"
23 "ཏེ༌ཏུས༌ལ༌ གལ༌ཏེས༌ སུ༌ཞིག༌གི༌ ཁྱོ༌ཞའ༌, 'ལྟོས༌ཤིག༌ མ༌ཤི༌ཀ༌ འི༌ཀ༌ནེ༌ ཡ༌ འ༌ཀ༌ནེ༌ ཞུགས༌ཏེ༌ དུག༌' ཟེར༌ན༌ ཨིད༌ཤེས༌ མ༌ཅོ༌། 24 ཅིའ༌ཟེར༌ན༌ མ༌ཤི༌ཀ༌ ཟུས༌མ༌ དང༌ ལུང༌སྟོན༌པ༌ ཟུས༌མ༌ གུན༌ ཡོངས༌ཏེ༌ ཧ༌ལས༌སི༌ ཛད༌པ༌ དང༌ ལྟས༌གུན༌ ལྟན༌ཏེ༌ དཀོན༌མཆོག༌གི༌ ལྡམ༌མ༌ ཛད༌ཁན༌གུན༌ལའང༌ གོབ༌སྐོར༌ ཏང༌ཅེས༌སི༌ རྩོན༌གྲུས༌ ཅོ༌ཨིན༌ ཨིན༌ནའང༌ ཏང༌ མི༌ཉན༌། 25 ཤང༌ ཅོས༌, ཏུས༌པོ༌ ལེབ༌བི༌ སང༌ སྔུན༌ལ༌ ངའེ༌ ཁྱོ༌ཞའ༌ ཤད༌ཏེ༌ ཨིན༌།"
26 "གལ༌ཏེས༌ སུ༌ཞིག༌གི༌ 'མ༌ཤི༌ཀ༌ འ༌ རི༌སྟོང༌ངི༌ ནང༌ང༌ དུག༌' ཟེར༌ན༌ མ༌ཆ༌, ཡ༌ 'ཁོང༌ འ༌ ནང༌ནེ༌ དུག༌' ཟེར༌ན༌ ཨིད༌ཤེས༌ མ༌ཅོ༌། 27 སྐམ༌ལག༌གི༌ འོད༌ ནམ༌ཁའེ༌ ནང༌ང༌ ཤར༌ནེ༌ ནུབ༌ ཚག༌པ༌ ཁྱེབས༌ས༌ ཙོགས༌, མི༌རིགས༌སི༌བུ༌ ལོགས༌ཏེ༌ ཡོང༌ ཟ༌ནེའང༌ ཆེན༌། 28 རོ༌ ཡོད༌ས༌ ཤ༌ ཟའ༌ཁན༌ནི༌ ཅ༌གུན༌ ཁོར༌ར༌ནོག༌། ༼ཁྱོ༌ཞའེ༌ ཏེ༌ སྟགས༌གུན༌ བྱུང༌ང༌ ཐོང༌ང༌ཅིག༌ ཐའ༌མའེ༌ ཏུས༌ ལེབ༌ཅེས༌པོ༌ ཁྱོ༌ཞའ༌ ཧ༌གོ༌གོས༌༽།"
29 "ཏེ༌ཏུས༌སི༌ རྡུག༌ངལ༌ལི༌ ཅབ༌ སྟིང༌ནེ༌,
'ཉི༌མ༌ མུན༌གྲིག༌ གྱུར༌ཨིན༌,
ཟླ༌ཝའེ༌ འོད༌ མི༌ཏང༌
ནམ༌ནེ༌ སྐར༌མ༌གུན༌ བུད༌ཨིན༌
ཡང༌ ནམ༌ཁའེ༌ ཝང༌གུན༌ སྲུག༌ག༌ ཛད༌ཨིན༌། * 24:29 ཡེ༌ཤ༌ཡཱའེ༌ སྤེ༌ཆའེ༌ 13:10, 34:4 དང༌ ཡོ༌ཨེལ༌ལི༌ སྤེ༌ཆའེ༌ 2:10'
30 "ཏེ༌ནེ༌ མི༌རིགས༌སི༌བུ༌ ཡོང༌ཅེས༌སི༌ སྟགས༌ ནམ༌མི༌ ནང༌ང༌ བྱུངས༌པ༌ ཇིག༌རྟེན༌ནི༌ གྱལ༌ཁམས༌ ཚང༌མའེ༌ མི༌གུན༌ནི༌ ཉ༌ངན༌ ཅོ༌ཨིན༌། ཏེ༌ནེ༌ ཁོང༌གུན༌ནི༌ མི༌རིགས༌སི༌བུ༌ ཝང༌ དང༌ ཟིར༌རྗིད༌ ཀྲག༌པོ༌ ཉམ༌པོ༌ སྲིན༌ནི༌ཀ༌ དུགས༌ཏེ༌ ཡོང༌ང༌ ཐོང༌ཨིན༌། 31 ཏུང༌སྐད༌ ཆེན༌མོ༌ ཕུའ༌ཅིག༌ ཁོའེ༌, ཕོ༌ཉ༌གུན༌ ཇིག༌རྟེན༌ གང༌པོའེ༌ ནང༌ནེ༌ ཁོ༌རང༌ངི༌ ལྡམ༌ཁན༌གུན༌ ལྡུ༌ཅེས༌ལ༌ ཀལ༌ཨིན༌།"
32 "ཕིག༌ ཁ༌ཟས༌སི༌ ལྕང༌མའེ༌ ཀ༌ནེ༌ ལབ༌ཞ༌ ལེན༌ནའང༌; ཏེ༌བོའེ༌ ཡལ༌ག༌ སྔོན༌པོ༌ སོང༌ཏེ༌ ལོ༌མ༌ སོ༌མ༌ བིང༌ང༌ཅིག༌, ཡར༌ ཉེ༌མོ༌ ལེབ༌ཁན༌བོ༌ ཤེས༌ས༌ནོག༌། 33 ཏེན༌ན༌ ཙོགས༌ལ༌ ཁྱོ༌ཞ༌གུན༌ནི༌ ཏེ༌ སྟགས༌ ཚང༌མ༌ ཐོང༌ང༌ཅིག༌, ང༌ ལོགས༌ཏེ༌ ཡོང༌ཅེས༌སི༌ ཏུས༌ ཉེ༌མོ༌, སྒོའེ༌ དུན༌ལ༌ ལེབས༌ཏེ༌ ཡོད༌ཁན༌བོ༌ ཁྱོ༌ཞ༌གུན༌ནི༌ ཤེས༌ཨིན༌། 34 ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ མི༌རབས༌པོ༌ མེད༌ཁན༌ ཆེ༌ སང༌ སྔུན༌ལ༌ ཏེ༌ ཚང༌མ༌ བྱུང༌ཨིན༌། 35 ནམ༌ཁའ༌ དང༌ ཇིག༌རྟེན༌ ཉིས༌ཀོ༌ མེད༌ཁན༌ ཆེན༌, ཨིན༌ནའང༌ ངའེ༌ ཟེར༌ཁན༌གུན༌ མེད༌ཁན༌ མ༌ནེ༌ མི༌ཆ༌།"
36 "ཏེ༌ ཚང༌མ༌ བྱུང༌ཅེས༌སི༌ ཞག༌ ཡ༌ ཏུས༌ཚོད༌པོ༌ དཀོན༌མཆོག༌ ཡབ༌ ཅིག༌པོའ༌ མ༌ནེ༌ ཡང༌ སུའང༌ གྱུས༌མེད༌, ནམ༌ཁའེ༌ ཕོ༌ཉ༌ ཡ༌ བུ༌ཚའང༌། 37 མི༌ དྲང༌པོ༌ ནོ༌ཨཱའེ༌ ཏུས༌ལ༌ བྱུང༌ཁན༌ ཙོགས༌ མི༌རིགས༌སི༌བུ༌ ཡོང༌ངི༌ ཏུས༌ལའང༌ བྱུང༌ཨིན༌། 38 ཇིག༌རྟེན༌ནི༌ཀ༌ ཆུ༌ལོག༌ ཡོང༌ངི༌ སང༌ སྔུན༌ལ༌, ནོ༌ཨཱ༌ གྲུ༌ཟིང༌ངི༌ ནང༌ང༌ ཆ༌ཆ༌ ཚག༌པ༌ མི༌གུན༌ ཟེན༌ དང༌ ཐུང༌ཨིན༌, ན༌མ༌ ཅོ༌ཨིན༌ དང༌ བག༌མ༌ ཏང༌ཨིན༌ དུགས༌། 39 ཆུ༌ལོག༌ ཡོངས༌ཏེ༌ ཁོང༌ ཚང༌མ༌ ཁྱེར༌ཏེ༌ ཤི༌ཤི༌ ཚོག༌པ༌ ཁོང༌གུན༌ལ༌ ཏེ༌ བྱུང༌ཅེས༌པོ༌ གྱུས༌ ཅའང༌ མེད༌པིན༌, ཏེན༌ན༌ ཙོགས༌ མི༌རིགས༌སི༌བུ༌ ཡོང༌ ཟ༌ནེའང༌ བྱུང༌ཨིན༌།"
40 "ཞིང༌ངི༌ཀ༌ ཡོད༌ཁན༌ མི༌ ཉིས༌སི༌ ནང༌ནེ༌ ཅིག༌པོ༌ ནམ༌ཁའ༌ ཁྱེར༌ར༌ ཛད༌ཨིན༌ ཡང༌ ཅིག༌པོ༌ བོར༌ཨིན༌། 41 རང༌ཐག༌གི༌ཀ༌ ཀྲོ༌ ཐག༌ཨིན༌ ཡོད༌ཁན༌ བུ༌མོ༌ ཉིས༌སི༌ ནང༌ནེ༌ ཅིག༌པོ༌ ནམ༌ཁའ༌ ཁྱེར༌ར༌ ཛད༌ཨིན༌ ཡང༌ ཅིག༌པོ༌ བོར༌ཨིན༌།"
42 "ཏེ༌བོའེ༌ཕིའ༌ ཤང༌ ཅོས༌, ཅིའ༌ཟེར༌ན༌ ཁྱོ༌ཞ༌གུན༌ལ༌ ཁྱོ༌ཞའེ༌ གཙོ༌བོ༌ ཡོང༌ཅེས༌སི༌ ཞག༌པོ༌ གྱུས༌མེད༌ཏེ༌ ཨིན༌ནོག༌། 43 ཨིན༌ནའང༌ འི༌བོ༌ ཧ༌གོ༌ཤིག༌, གལ༌ཏེས༌ ཚན༌ལ༌ རྐུན༌མ༌ ཡོང༌ཅེས༌སི༌ ཏུས༌ཚོད༌པོ༌ ཁང༌དག༌ག༌ གྱུས༌ཡོད༌པིན༌ན༌, ཁོ༌ སྲུངས༌ཏེ༌ དུགས༌ཏེ༌ ཁོའེ༌ ཁོ༌རང༌ངི༌ ཁང༌པའེ༌ ནང༌ང༌ རྐུན༌མ༌ ཞུགས༌ མི༌ཅུག༌། 44 ཏེན༌ན༌བོའེ༌ཕིའ༌ ཁྱོ༌ཞའ༌ ཏུས༌གྱུན༌ གྲལ༌གྲིག༌ དུག༌གོས༌ ཅིའ༌ཟེར༌ན༌ ཁྱོ༌ཞ༌གུན༌ནི༌ རེ༌ཝ༌ མེད༌དི༌ ཏུས༌ལ༌ མི༌རིགས༌སི༌བུ༌ ཡོང༌སྲིད༌ཅེས༌ ཨིན༌ནོག༌།"
45 "སྤོན༌བོའེ༌ ཁོ༌རང༌ངི༌ ཁང༌པའེ༌ ལྟ༌སྟོག༌ དང༌ ཞན༌ ཡོག༌པོ༌གུན༌ལ༌ ཏུས༌སི༌ཀ༌ ཞག༌ཏང༌ངི༌ ཁར༌ཇི༌ ཏང༌ཅེས༌སི༌ ཕིའ༌ སྐོས༌ཁན༌ ཨིད༌ཤེས༌ཅན༌ དང༌ ཤེས༌རབས༌ཅན༌ནི༌ ཡོག༌པོ༌ སུ༌ ཨིན༌ནོག༌? 46 སྤོན༌བོ༌ ལོགས༌ཏེ༌ ཡོང༌ང༌ཅིག༌ ཡོག༌པོ༌བོའེ༌ ཁོའེ༌ སྐོས༌ཁན༌ནི༌ ལས༌པོ༌ ཅོ༌ཨིན༌ ཐོང༌ན༌ ཁོའ༌ སོལ༌རས༌ ཏང༌ཨིན༌། 47 ངའེ༌ ཁྱོ༌ཞའ༌ དེན༌བ༌ ཟེར༌རད༌, སྤོན༌བོའེ༌, ཁོ༌རང༌ངི༌ ནོར༌ ཚང༌མ༌ ལྟ༌སྟོག༌ ཅོ༌ཅེས༌སི༌ ཁག༌པོ༌ ཁོའ༌ ཏང༌ཨིན༌། 48 ཨིན༌ནའང༌ ཡོག༌པོ༌བོ༌ ངན༌པ༌ ཨིན༌ན༌ ཁོའེ༌, 'ངའེ༌ སྤོན༌བོ༌ ཏུས༌ཡུན༌རིང༌ ལོགས༌ཏེ༌ མི༌ཡོང༌' སམས༌ཏེ༌ 49 ཁོ༌རང༌ངི༌ ཕྲོ༌པ༌ ཡོག༌པོ༌གུན༌ལ༌ རྡུང༌ཅེས༌ གོ༌ཟུག༌ ཅོས༌ཏེ༌, ར༌རོས༌ཁན༌གུན༌ ཉམ༌པོ༌ ཟེན༌ ཆང༌ ཐུང༌ཨིན༌ དུག༌ཨིན༌། 50 ཁོའེ༌ རེ༌ཝ༌ མི༌ཅོའེ༌ ཞག༌ག༌ ཡང༌ ཁོའ༌ གྱུས༌མེད༌དི༌ ཏུས༌ཚོད༌པོའེ༌ཀ༌ སྤོན༌བོ༌ ཡོངས༌ཏེ༌ 51 ཁོ༌ ཏུམ༌པ༌ཏུམ༌པའེ༌ ནང༌ང༌ སྟུབས༌ཏེ༌ ཁ༌ཆོས༌པ༌གུན༌ ཉམ༌པོ༌ བོར༌ཨིན༌, ཏེ༌རུ༌ ནགས༌ སྲན༌ཏྲེ༌ ཞས༌ཏེ༌ ངུ༌ཅེས༌ དང༌ སོ༌ སྲིག༌ཅེས༌ ཡོང༌ཨིན༌།