1 ཏེ༌ནེ༌ ངའེ༌ ལུ༌གུའི༌ ཏེ༌ ཐེ༌ཙེ༌ རྡུན༌ནི༌ ནང༌ནེ༌ ཏང༌པོ༌བོ༌ ཅགས༌ཏེ༌ ཕེའ༌ ཛད༌ད༌ལ༌ ཐོང༌། ཏེ༌ སྲོག༌ ཡོད༌ཁན༌ ཞི༌ཀོའེ༌ ཕྲོ༌ནེ༌ ཅིག༌གི༌ བྲུག༌ལྡིར༌ཁན༌ ཙོགས༌སི༌ སྐད༌དི༌ ནང༌ང༌ "ཡོང༌" མོལ༌ལ༌རག༌། 2 ངའེ༌ ཀེན༌ལ༌ ལྟས༌པ༌, ང༌ རྟ༌ ཀར༌པོ༌ཞིག༌ ཐོང༌, ཏེ༌བོའེ༌ཀ༌ ཞོན༌ཁན༌བོའེ༌ ཞུ༌ཞིག༌ ཁུར༌ཏེ༌ ཡང༌ ཁོའེ༌ གོའེ༌ཀ༌ ཐོར༌ཤོག༌ སྐོན༌ན༌ ཛད༌ཏེ༌ དུག༌། ཁོ༌ གྱལ༌ཁའ༌ ཐོབ༌ཚར༌ཁན༌ ཙོགས༌ལ༌ གྱལ༌ཁའ༌ ལེན༌ན༌ལ༌ བིངས༌།

3 ལུ༌གུའི༌ ཐེ༌ཙེ༌ ཉིས༌པ༌བོ༌ ཅགས༌ཏེ༌ ཕེའ༌ཅིག༌, སྲོག༌ ཡོད༌ཁན༌ ཉིས༌པ༌བོའེ༌, "ཡོང༌" མོལ༌ཨིན༌ཞིག༌ ཚོར༌། 4 ཏེ༌ནེ༌ ཡང༌ རྟ༌ མེ༌ ཙོགས༌ མར༌པོ༌ཞིག༌ བིང༌ཨིན༌ ཐོང༌, ཏེ༌ཀ༌ ཞོན༌ཁན༌བོའ༌ ར༌འི༌ ཆེན༌མོ༌ཞིག༌ དང༌ ཇིག༌རྟེན༌ནི༌ ཀ༌ནེ༌ ཞི༌དེ༌ མེད༌ཁན༌ ཅོ༌ཅེས༌སི༌ ཝང༌ཆ༌ སལས༌། ཏེ༌ནེ༌ ནོལ༌ཅེས༌ གོ༌ཟུགས༌ཏེ༌ མི༌གུན༌ནི༌ མ༌ ཚུལ༌ ངན༌པ༌ ཉམ༌པོ༌ ཅིག༌ དང༌ ཅིག༌ སདས༌།

5 ལུ༌གུའི༌ ཐེ༌ཙེ༌ སུམ༌པ༌བོ༌ ཅགས༌ཏེ༌ ཕེའ༌ཅིག༌, སྲོག༌ ཡོད༌ཁན༌ སུམ༌པ༌བོའེ༌ "ཡོང༌" མོལ༌ཨིན༌ཞིག༌ ཚོར༌། ངའེ༌ ཀེན༌ལ༌ ལྟས༌པིན༌ ཡང༌ རྟ༌ ནག༌པོ༌ཞིག༌ ཐོང༌, ཏེ༌ཀ༌ ཞོན༌ཁན༌བོའེ༌ ལག༌པའེ༌ ནང༌ང༌ ཏ༌ཀ༌རི༌ཞིག༌ དུག༌། 6 ཏེ༌ནེ༌ ངའེ༌ ཏེ༌ སྲོག༌ ཡོད༌ཁན༌ ཞི༌ཀོའེ༌ ཕྲོ༌ནེ༌ སྐད༌ཅིག༌གི༌, "ཞག༌ཅིག༌གི༌ ལ༌ཆའ༌ ཀྱི༌ལོ༌ག༌རམ༌ ཅིག༌གི༌ ཀྲོ༌ ཡ༌ ཀྱི༌ལོ༌ག༌རམ༌ སུམ༌མི༌ ནས༌སི༌ ཕེ༌ མ༌ནེ༌ ཉོ༌མི༌ཉན༌། ཨིན༌ནའང༌ མར༌ནག༌ དང༌ རྒུན༌ཆང༌ གུན༌ སྐོན༌མོ༌ ཆ༌ མ༌ཅུག༌ཤིག༌" མོལ༌ཨིན༌ཞིག༌ ཚོར༌།

7 ལུ༌གུའི༌ ཐེ༌ཙེ༌ ཞི༌པ༌བོ༌ ཅགས༌ཏེ༌ ཕེའ༌ཅིག༌, ངའེ༌ ཏེ༌ སྲོག༌ ཡོད༌ཁན༌ ཞི༌པ༌བོའི༌, "ཡོང༌" མོལ༌ཨིན༌ཞིག༌ ཚོར༌། 8 ངའེ༌ ལྟས༌པ༌ ང༌ གོག༌ཐལ༌ ཙོགས༌ དོག༌ ཡོད༌ཁན༌ནི༌ རྟ༌ཞིག༌ ཐོང༌, ཏེ༌ཀ༌ ཞོན༌ཁན༌བོའ༌ ཤི༌ཅེས༌ ཡང༌ ཏེ༌བོའེ༌ སྟིང༌རང༌ནེ༌, ཡོང༌ཁན༌ནི༌ ཕྲོ༌པ༌བོའ༌ ཤི༌ཁན༌གུན༌ནི༌ ས༌ཆ༌ ཟེར༌དུག༌། ཏེ༌ ཉིས༌ཀོའ༌ ཇིག༌རྟེན༌ནི༌ ཁག༌ཞིའི༌ ནང༌ནེ༌ ཁག༌ཅིག༌ག༌ ར༌འི༌, མུ༌གེ༌, ནད༌ དང༌, རིའི༌ སེམས༌ཅན༌གུན༌ གྱུད༌ཏེ༌ མི༌གུན༌ སད༌ཅེས༌སི༌ ཝང༌ཆ༌ སལ༌ལ༌ ཛདས༌།

9 ལུ༌གུའི༌ ཐེ༌ཙེ༌ ལྔ༌པ༌ ཅགས༌ཏེ༌ ཕེའ༌ཅིག༌, ཆོད༌ཁྲིའི༌ ཡོག༌ག༌, དཀོན༌མཆོག༌གི༌ བཀའ༌ ཁའ༌ཉན༌ཏེ༌ མ༌ཤི༌ཀའེ༌ཀ༌ ཨིད༌ཤེས༌ ཅོ༌ཁན༌ནི༌ སྤང༌པོ༌ ཏང༌ཅེས༌པོའེ༌ སད༌ཁན༌ནི༌ སེམས༌ཉིད༌གུན༌ ངའེ༌ ཐོང༌། 10 ཏེ༌གུན༌ནི༌ གཙོ༌བོའ༌ ཀུ༌ཅོ༌ ཏང༌ཨིན༌ ཟེརས༌, "ཀུན༌ཝང༌ གཙོ༌བོ༌ལེ༌, དམ༌པ༌ དང༌ དྲང༌པོ༌, ཉེ༌རང༌ངི༌ འི༌ ཇིག༌རྟེན༌པ༌ ཏད༌པ༌ མེད༌ཁན༌ མི༌གུན༌ལ༌, ཤགས༌ མ༌ཛད༌ད༌ ཡང༌ ང༌ཞའེ༌ ཁྲག༌གི༌ ལན༌ མ༌སལ༌ལ༌ ནམ༌ཚོག༌པ༌ སྲུངས༌ཏེ༌ ཞུག༌ཤེན༌ ལེ༌" 11 ཏེ༌ནེ༌ ཏེ༌ ཚང༌མ༌ལ༌ ཀོས༌ ཀར༌པོ༌ སལ༌ལ༌ ཛདས༌, ཡང༌ ཁོང༌ ཙོགས༌ལ༌ ཁོང༌གུན༌ནི༌ ཕྲོ༌པ༌ སྤུན༌ ཡེ༌ཤུའི༌ ཞབ༌སྟོག༌པ༌ སད༌ཅེས༌ཅན༌ གུན༌ནི༌ ཀྲངས༌ཀ༌ དྲན༌དྲའ༌ ཆ༌ཆ༌ ཚག༌པའ༌, ཁོང༌གུན༌ལ༌ ཙ༌པིག༌ ངལ༌ཚོས༌ ཅེས༌ལ༌ མོལས༌།

12 ལུ༌གུའི༌ ཐེ༌ཙེ༌ དྲུག༌པ༌བོ༌ ཅགས༌ཏེ༌ ཕེའ༌ཅིག༌, སང༌གུལ༌ ཀྲག༌པོ༌ཞིག༌ ཡོངས༌། ཉི༌མ༌བོ༌ རས༌ ནག༌པོ༌ ཙོགས༌ མུན༌གྲིག༌ ཡང༌ ཟླ༌ཝ༌ ནི༌ ཁྲག༌ ཙོགས༌ མར༌པོ༌ གྱུར༌། 13 ཏེ༌ནེ༌ ལུང༌རག༌ ཀྲག༌པོའེ༌ སྐུལ༌ཅེས༌པོའེ༌ ལྕང༌མའེ༌ ཀ༌ནེ༌ སྨིན༌ མ༌སྨིན༌ཁན༌ནི༌ ཕིག༌གི༌ ཁ༌ཟས༌ བུད༌ད༌ ཙོགས༌ལ༌ ནམ༌ཁའེ༌ ནང༌ང༌ ཡོད༌ཁན༌ནི༌ སྐར༌མ༌གུན༌ ཇིག༌རྟེན༌ནི༌ཀ༌ བུད༌། 14 ཡང༌ ནམ༌ཁའ༌བོ༌ ཤོག༌རིལ༌ སྲིལ༌ལ༌ ཙོགས༌ལ༌ མེད༌ཁན༌ སོང༌། རི༌ ཚང༌མ༌ དང༌ ཚོ༌ལིང༌གུན༌, ཡོད༌སའེ༌ ནས༌སའེ༌ ཀ༌ནེ༌ ཐེན༌ཏེ༌ མི༌དུག༌།

15 ཏེ༌ནེ༌ ཇིག༌རྟེན༌ནི༌ གྱལ༌པོ༌གུན༌, གྱལ༌ལུ༌གུན༌, མག༌མི༌ སྤོན༌བོ༌ ཇིགས༌པོ༌གུན༌, ཆུག༌པོ༌གུན༌, ཝང༌ཅན༌གུན༌, ཚེ༌ཡོག༌ དང༌ རང༌ཝང༌ཅན༌ནི༌ མི༌ཚང༌མ༌, གྲག༌ཕུགས༌ དང༌ རིའི༌ ཕོ༌ལོངས༌སི༌ ཕྲོའ༌ ཨིབ༌དུག༌། 16 ཡང༌ ཏེ༌ མི༌གུན༌ནི༌ རི༌ ཐོན༌པོ༌གུན༌ དང༌ གྲག༌གུན༌ལ༌, "ཞུགས༌ཁྲིས༌སི༌ཀ༌ ཞུགས༌ཏེ༌ ཡོད༌ཁན༌ ཡང༌ ལུ༌གུའི༌ ཐུགས༌སྲོ༌ནེ༌ ཨིབ༌ཅེས༌སི༌ ཕིའ༌ དིབས༌ཏེ༌ ང༌ཞ༌གུན༌ ཀོབ༌ཤིག༌གའང༌། 17 ཅིའ༌ཟེར༌ན༌ ཁོང༌ངི༌ ཐུགས༌སྲོའེ༌ ཇིགས༌ནང༌ཅན༌ནི༌ ཞག༌པོ༌ ལེབ༌ ཚར༌ཏེ༌ ཨིན༌ནོག༌, སུའ༌ ཏེ༌གུན༌ ཁུར༌ ཐུབ༌ཨིན༌" ཟེརས༌།