26
ཡེ༌ཤུ༌ སད༌ཅེས༌སི༌ ཅུས༌ངན༌ ལྡིངས༌།
26:1 ནེ༌ 5
1 གཙོ༌བོ༌ ཡེ༌ཤུའི༌ ཏེ༌ ཚང༌མ༌ མོལ༌ ཚར༌ཏེ༌ སྟིང༌ནེ༌ ཁོང༌ངི༌ ལོབ༌ཕྲུགས༌གུན༌ལ༌ མོལས༌, 2 "ཞག༌མ༌ ཉིས༌སི༌ སྟིང༌ནེ༌ པེ༌སག༌གི༌ ཏུས༌ཆེན༌ ཨིན༌ཁན༌བོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌, ཡང༌ ཏེ༌ ཞག༌ག༌ མི༌རིགས༌སི༌བུ༌ གྲ༌འོའེ༌ ལག༌ག༌ རྐྱང༌ཤིང༌ངི༌ཀ༌ རྐྱང༌ང༌ལ༌ སྟད༌ཨིན༌།"
3 ཏེ༌ནེ༌ བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌, བླ༌མ༌ ཆེན༌མོ༌ ཀ༌ཡ༌ཕཱས༌ ཟེར༌ཁན༌ནི༌ ཕོ༌གྲང༌ངི༌ ནང༌ང༌ ཛོམས༌ཏེ༌ 4 སང༌ཝའེ༌ ནང༌ང༌ ཡེ༌ཤུ༌ ཟུམས༌ཏེ༌ སད༌ཅེས༌སི༌ ཅུས༌ངན༌ ལྡིངས༌། 5 ཨིན༌ནའང༌ ཁོང༌གུན༌ནི༌ ཟེརས༌, "པེ༌སག༌གི༌ ཏུས༌ཆེན༌ནི༌ ཏུས༌ལ༌ མི༌ཟུམ༌ ཅིའ༌ཟེར༌ན༌ མི༌ཚོགས༌ལ༌ སྲོ༌ ཡོངས༌ཏེ༌ ཧི༌ལིངས༌ ཕིང༌སྲིད༌ཅེས༌ ཨིན༌ནོག༌།"
ཡེ༌ཤུའི༌ ཨུའ༌ ཏྲི༌ཞིམ༌ཅན༌ནི༌ མར༌ ལུགས༌།
26:6 ནེ༌ 13
6 གཙོ༌བོ༌ ཡེ༌ཤུ༌ བེད༌ཐཱ༌ནི༌ གྲོང༌སེབ༌བ༌ ཛེ༌ནད༌ནེ༌ ཕན༌ཁན༌ ཤི༌མོན༌ནི༌ ཁང༌པའེ༌ ནང༌ང༌ 7 ཅོག༌ཙེ༌ཀ༌ སྟེན༌ཏེ༌ ཡོད༌ཏུས༌, ཀའ༌ཡོལ༌ལི༌ ནོད༌ ཏྲི༌ཞིམ༌མི༌ མར༌ ཀུས༌པོ༌ སྐངས༌ཏེ༌ ཁུར༌ཁན༌ནི༌ བུ༌མོ༌ཞིག༌ ཡོངས༌ ཡང༌ ཏྲི༌ཞིམ༌བོ༌ ཁོང༌ངི༌ ཨུའི༌ཀ༌ ལུགས༌།
8 ཏེ༌བོ༌ ཐོང༌ང༌ཅིག༌ ལོབ༌ཕྲུགས༌གུན༌ལ༌ སྲོ༌ ཡོངས༌ཏེ༌, ཅིག༌ དང༌ ཅིག༌ག༌ ཟེརས༌, "ཅིའ༌ ཏེ༌བོ༌ གོད༌ལ༌ ཏངས༌ཏེ༌ ཨིན༌ནོག༌? 9 འི༌ ཏྲི༌ཞིམ༌མི༌ མར༌བོ༌ རིན༌ ཆེན༌མོ༌ཞིག༌ག༌ ཙོངས༌ཏེ༌ པེ༌ནེ༌བོ༌ ཉལ༌བ༌ཅན༌གུན༌ལ༌ ཏང༌ཤིག༌པིའང༌།"
10 ཡེ༌ཤུའི༌ ཏེ༌བོ༌ ཁྱེན༌ཏེ༌ ཁོང༌གུན༌ལ༌ མོལས༌, "ཁྱོ༌ཞའེ༌ འི༌ བུ༌མོའེ༌ སེམས༌ལ༌ ཅིའ༌ ནགས༌ ལྟན༌ནད༌? ཁོའེ༌ ངའེ༌ ཕིའ༌ ལས༌ ཟང༌པོ༌ ཅོས༌ཏེ༌ ཨིན༌ནོག༌། 11 ཉལ༌བ༌ཅན༌གུན༌ ཏུས༌གྱུན༌ ཁྱོ༌ཞའ༌ ཉམ༌པོ༌ ལུས༌ཨིན༌, ཨིན༌ནའང༌ ང༌ ཁྱོ༌ཞའ༌ ཉམ༌པོ༌ ཏུས༌གྱུན༌ མི༌ལུས༌། 12 ཁོའེ༌ ངའེ༌ ཟུགས༌པོའ༌ ཏྲི༌ཞིམ༌ ལུགས༌ཏེ༌ ངའེ༌ ཟུགས༌པོ༌ སྤུར༌ཁང༌ང༌ ཁྱེར༌ཅེས༌སི༌ ཕིའ༌ གྲལ༌གྲིག༌ ཅོས༌ཏེ༌ ཨིན༌ནོག༌། 13 ངའེ༌ ཁྱོ༌ཞའ༌ དེན༌བ༌ ཟེར༌རད༌, ཇིག༌རྟེན༌ གང༌པོའེ༌ ནང༌ང༌ ཀ༌རུ༌ གའ༌མོའེ༌ ནས༌ཚུལ༌ ཤད༌ནའང༌ འི༌ བུ༌མོ༌བོའེ༌ ངའ༌ ཅོས༌ཁན༌བོའང༌ ཤད༌ཏེ༌ ཁོ༌ ཨིད༌ཏུ༌ ཅོ༌ཨིན༌།"
ཀར༌ཡོད༌པ༌ ཡུ༌དཱའེ༌ ཡེ༌ཤུའ༌ ངོ༌ལོག༌ ཅོས༌།
26:14 ནེ༌ 16
14 ཏེ༌ནེ༌ ལོབ༌ཕྲུགས༌ ཅུག༌ཉིས༌སི༌ ནང༌ནེ༌ ཀར༌ཡོད༌པ༌ ཡུ༌དཱ༌ ཟེར༌ཁན༌བོ༌ བླ༌མ༌ འུ༌སྐྱོང༌གུན༌ ཡོད༌ས༌ སོང༌ཏེ༌ 15 ཏྲིས༌, "གལ༌ཏེས༌ ངའེ༌ ཡེ༌ཤུ༌ ཁྱོ༌ཞ༌གུན༌ལ༌ སྟད༌ན༌, ངའ༌ ཅི༌ ཏང༌ཨིན༌?" ཁོང༌གུན༌ནི༌ ཁོའ༌ མུལ༌ལི༌ པེ༌ནེ༌ སུམ༌ཅུ༌ ཏངས༌། 16 ཏེན༌ན༌ ཏུས༌ནེ༌ ཕར༌ལ༌ ཡུ༌དཱའེ༌ ཡེ༌ཤུ༌ སྟད༌ཅེས༌སི༌ སྐབས༌ ཙལ༌ཅེས༌ གོ༌ཟུགས༌།
ཡེ༌ཤུའི༌ ལོབ༌ཕྲུགས༌གུན༌ ཉམ༌པོ༌ པེ༌སག༌གི༌ དོན༌ཏང༌ དོནས༌།
26:17 ནེ༌ 30
17 སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ནི༌ གོ༌མའེ༌ ཞག༌ག༌, ལོབ༌ཕྲུགས༌གུན༌ གཙོ༌བོ༌ ཡེ༌ཤུའི༌ཀ༌ ཡོངས༌ཏེ༌ ཏྲིས༌, "ང༌ཞའེ༌ ཉེ༌རང༌ དོན༌ཅེས༌སི༌ ཕིའ༌ པེ༌སག༌གི༌ དོན༌ཏང༌ ཀ༌རུ༌ གྲལ༌གྲིག༌ ཅོ༌ལེ༌།"
18 ཁོང༌ངི༌ མོལས༌, "ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ ངའེ༌ ཟེར༌ཁན༌ནི༌ མི༌བོའེ༌ཀ༌ སོང༌ཏེ༌ ཁོའ༌ ཟེར༌, 'ལོབ༌པོན༌ནི༌ ཟེར༌དུག༌ ངའེ༌ ཕིའ༌ ལྡམ༌མ༌ ཛད༌ཁན༌ནི༌ ཏུས༌པོ༌ ཉེ༌མོ༌ དུག༌། ང༌རང༌ངི༌ ལོབ༌ཕྲུགས༌གུན༌ ཉམ༌པོ༌ ཁྱོ༌རང༌ངི༌ ཁང༌པའེ༌ ནང༌ང༌ ངའ༌ པེ༌སག༌གི༌ དོན༌ཏང༌ ཟེན༌།' " 19 ཏེ༌ནེ༌ ལོབ༌ཕྲུགས༌གུན༌ནི༌ ཡེ༌ཤུའི༌ མོལ༌ཁན༌ ནང༌ཞིན༌ པེ༌སག༌གི༌ དོན༌ཏང༌ངི༌ གྲལ༌གྲིག༌ ཅོས༌།
20 ཕི༌ཏོག༌ ཆའ༌ཅིག༌ ལོབ༌ཕྲུགས༌ ཅུག༌ཉིས༌ ཉམ༌པོ༌ ཡེ༌ཤུ༌ ཅོག༌ཙེ༌ཀ༌ སྟེན༌ཏེ༌ 21 དོན༌ཏང༌ དོན༌ཨིན༌ ཡོད༌ཏུས༌, ཁོང༌ངི༌ ལོབ༌ཕྲུགས༌གུན༌ལ༌ མོལས༌, "ངའེ༌ ཁྱོ༌ཞའ༌ དེན༌བ༌ ཟེར༌རད༌ ཁྱོ༌ཞའེ༌ ནང༌ནེ༌ ཅིག༌ཅིག༌གི༌ ངའ༌ ངོ༌ལོག༌ ཅོ༌ཨིན༌།"
22 ཁོང༌གུན༌ མ༌སྲན༌ཏྲེ༌ ཚེར༌ཏེ༌ ཁོང༌ང༌ ཅིག༌གི༌ སྟིང༌ནེ༌ ཅིག༌གི༌ ཏྲིས༌, "གཙོ༌བོ༌ལེ༌, ཏན༌ཏན༌ ང༌ཏ༌ མན༌གྲོ༌?" 23 ཡེ༌ཤུའི༌ ལན༌སལས༌, "ང༌ ཉམ༌པོ༌ ད༌བེན༌ ཅིག༌གི༌ ནང༌ནེ༌ ཟའ༌ཁན༌བོའེ༌ ངའ༌ གྲ༌འོའེ༌ ལག༌ག༌ སྟད༌ཨིན༌། 24 དམ༌པའེ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ ཡོད༌ཁན༌ ནང༌ཞིན༌ མི༌རིགས༌སི༌བུ༌ ཤི༌གོས༌, ཨིན༌ནའང༌ མི༌རིགས༌སི༌བུ༌ གྲ༌འོའེ༌ ལག༌ག༌ སྟད༌ཁན༌ནི༌ མི༌བོའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཏེ༌ སང༌ཏ༌ ཁོ༌ མ༌སྐྱེས༌པིན༌ན༌ ཁོའེ༌ ཕིའ༌ གྱལ༌ལ༌ ཡོད༌གྲོ༌།"
25 ཏེ༌ནེ༌ ཡེ༌ཤུ༌ གྲ༌འོའེ༌ ལག༌ག༌ སྟད༌ཅེས༌ཅན༌ནི༌ ཡུ༌དཱའེ༌ ཟེརས༌, "ལོབ༌པོན༌ལེ༌ ཏན༌ཏན༌ ང༌ཏ༌ མན༌གྲོ༌།"
ཡེ༌ཤུའི༌ མོལས༌, "འོ༌ན༌ ཁྱོ༌རང༌ ཨིན༌།"
26 ཁོང༌གུན༌ དོན༌ཏང༌ དོན༌ཨིན༌ ཡོད༌ཏུས༌, ཡེ༌ཤུའི༌ ཏ༌གི༌ ནམས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ཏེ༌ ཅག༌ག༌ ཛདས༌ ཡང༌ ལོབ༌ཕྲུགས༌གུན༌ལ༌ སལ༌ཨིན༌ མོལས༌, "འི༌བོ༌ ངའེ༌ ཟུགས༌པོ༌ ཨིན༌, ལེན༌ཏེ༌ ཟོ༌།"
27 ཏེ༌ནེ༌ དོན༌སྐྱོག༌པོ༌ ནམས༌ ཡང༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ཏེ༌ ཁོང༌གུན༌ལ༌ སལ༌ཨིན༌ མོལས༌, "ཁྱོ༌ཞའ༌ ཚང༌མའེ༌ འི༌ ནང༌ནེ༌ ཐུང༌ 28 འི༌བོ༌ ངའེ༌ ཁྲག༌ ཨིན༌ ཀ༌བོའེ༌ དཀོན༌མཆོག༌ དང༌ ཁོང༌ངི༌ མི༌གུན༌ནི༌ པར༌ལ༌ ཆད༌དོན༌བོ༌ ཏན༌ཏན༌ ཛད༌ད༌ནོག༌, ཡང༌ མི༌ མང༌པོའེ༌ སྡིག༌པའེ༌ ཕིའ༌ སྲོག༌ཆོད༌དི༌ ཚུལ༌ལ༌ ཕོས༌། 29 ངའེ༌ ཁྱོ༌ཞའ༌ ཟེར༌རད༌, འི༌ རྒུན༌ཆང༌བོ༌ ཁྱོ༌ཞ༌གུན༌ ཉམ༌པོ༌ ངའེ༌ ཡང༌སྐྱར༌ མི༌ཐུང༌ ནམ༌ཚོག༌པ༌ ང༌རང༌ངི༌ ཡབ༌བི༌ གྱལ༌སྲིད༌དི༌ ནང༌ང༌ འི༌བོའ༌ སོ༌མ༌ ཏོན༌ཏག༌ མི༌སལ༌།"
30 ཁོང༌གུན༌ནི༌ དཀོན༌མཆོག༌ག༌ སྟོད༌པའེ༌ ལུ༌ ཕུལ༌ ཚར༌ར༌ཅིག༌, ཁོང༌གུན༌ ཨོ༌ལིཝ༌ཝི༌ རིའ༌ སྐྱོདས༌།
པི༌ཏྲར༌རི༌ ཡེ༌ཤུའ༌ མི༌ཤེས༌ཟུན༌ ཏང༌ཅེས༌པོ༌ ལུང༌སྟན༌ ཛདས༌།
26:31 ནེ༌ 35
31 ཏེ༌ནེ༌ གཙོ༌བོ༌ ཡེ༌ཤུའི༌ ལོབ༌ཕྲུགས༌གུན༌ལ༌ མོལས༌, "དི༌རིང༌ ཚན༌ལ༌ ཁྱོ༌ཞའ༌ ཚང༌མའེ༌ ངའ༌ ཕངས༌ཏེ༌ ཆེན༌ ཅིའ༌ཟེར༌ན༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌,
'ངའེ༌ ལུག༌རྫི༌བོ༌ སད༌ཅུག༌ཨིན༌,
ཡང༌ ལུག༌ཁྱུའི༌ ལུག༌གུན༌ ཡན༌ཏེ༌ ཆེན༌།'
32 "ཨིན༌ནའང༌ སོན༌ཏེའ༌ ལང༌ང༌ ཛད༌ཏེ༌ སྟིང༌ནེ༌ ང༌ ཁྱོ༌ཞའེ༌ སང༌ སྔུན༌ལ༌ གཱ༌ལིལ༌ལིའི༌ ཡུལ༌ཇོངས༌ལ༌ ཆེན༌།"
33 པི༌ཏྲར༌རི༌ ལན༌ཏངས༌, "ཚང༌མའེ༌ ཉེ༌རང༌ ཕང༌ནའང༌, ངའེ༌ ཉེ༌རང༌ མ༌ནེ༌ མི༌ཕང༌།"
34 ཡེ༌ཤུའི༌ མོལས༌, "ངའེ༌ ཁྱོ༌རང༌ང༌ དེན༌བ༌ ཟེར༌རད༌ འིན༌ན༌ ཚན༌ལ༌ ཅ༌པོའེ༌ ཅ༌སྐད༌ ཏང༌ངི༌ སང༌ སྔུན༌ལ༌, ཁྱོ༌རང༌ངི༌ ངའ༌ ལན༌ སུམ༌ མི༌ཤེས༌ཟུན༌ ཏང༌ཨིན༌།"
35 པི༌ཏྲར༌རི༌ འུ༌ཙུག༌ ཏངས༌ཏེ༌ ཟེརས༌, "ངའ༌ ཉེ༌རང༌ ཉམ༌པོ༌ ཤི༌གོས༌ནའང༌, ངའེ༌ ཉེ༌རང༌ མི༌ཤེས༌ཟུན༌ མ༌ནེ༌ མི༌ཏང༌།" ཏེན༌ན༌ ཙོགས༌ ཞན༌ ལོབ༌ཕྲུགས༌ ཚང༌མེའང༌ ཟེརས༌།
གེད༌ཤེ༌མ༌ནེ༌ ཚས༌སི༌ ནང༌ང༌ ཡེ༌ཤུའི༌ མོས༌ལམ༌ ཞུས༌།
26:36 ནེ༌ 46
36 ཏེ༌ནེ༌ གཙོ༌བོ༌ ཡེ༌ཤུ༌ ལོབ༌ཕྲུགས༌གུན༌ ཉམ༌པོ༌ གེད༌ཤེ༌མ༌ནེ༌ ཟེར༌སའེ༌ ནས༌ས༌ སྐྱོདས༌ ཡང༌ ཁོང༌ངི༌ ཁོང༌གུན༌ལ༌ མོལས༌, "ཁྱོ༌ཞ༌གུན༌ འི༌ཀ༌ དུག༌, ང༌ འ༌ཀ༌ མོས༌ལམ༌ ཞུའ༌ ཆའད༌" 37 ཁོང༌ངི༌ པི༌ཏྲར༌ ཡང༌ ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཡོ༌ཧཱ༌ནན༌ ཉིས༌ཀོ༌, ཁོང༌རང༌ ཉམ༌པོ༌ ཁྱེར༌ར༌ ཛདས༌, ཡེ༌ཤུའ༌ ཐུགས༌ཚེར༌ སྐྱོད༌ཏེ༌ ཁོང༌ ཚབས༌ས༌ ཛདས༌། 38 ཡེ༌ཤུའི༌ ཁོང༌གུན༌ལ༌ མོལས༌, "ངའེ༌ སེམས༌ལ༌ ཚེར༌ཁ༌ མ༌སྲན༌ཏྲེ༌ ཤི༌ཅེས༌ ཙོགས༌ རག༌། ང༌ ཉམ༌པོ༌ ཤན༌ ཅོས༌ཏེ༌ འི༌ཀ༌ དུག༌།"
39 ཡེ༌ཤུ༌ ཁོང༌གུན༌ནི༌ སང༌ ཙ༌པིག༌ ཐག༌རིང༌ང༌ སྐྱོད༌ཏེ༌, གྱེལ༌ཏེ༌ ཞལ༌དོང༌ སའ༌ ཕབས༌ཏེ༌, མོས༌ལམ༌ ཞུ༌ཨིན༌ མོལས༌, "ངའེ༌ ཡབ༌ལེ༌, ཞན༌ ཐབས༌ཤིག༌ ཡོད༌ན༌ འི༌ རྡུག༌ངལ༌ལི༌ ཀོ༌རེ༌བོ༌ ངའེ༌ ཀ༌ནེ༌ ཐེན༌ན༌ ཛད༌དའང༌, ཨིན༌ནའང༌ ངའེ༌ དོད༌པ༌ ནང༌ཞིན༌ མན༌པ༌, ཉེ༌རང༌ངི༌ ཐུག༌གོངས༌ ནང༌ཞིན༌ ཅོའ༌ ཛད༌།"
40 ཏེ༌ནེ༌ ཡེ༌ཤུ༌ ལོགས༌ཏེ༌ སྐྱོདས༌ ཡང༌ ཁོང༌ ཚང༌ཀོ༌ ཉིད༌ལ༌ སོང༌ཏེ༌ ཟིགས༌། ཁོང༌ངི༌ པི༌ཏྲར༌ལ༌ མོལས༌, "ཆུ༌ཚོད༌ ཅིག༌གའང༌ ང༌ ཉམ༌པོ༌ ཉིད༌ མ༌ཏང༌ང༌ དུག༌མ༌ཉན༌ན༌? 41 ཁྱོ༌ཞའ༌ སྡིག༌པའེ༌ ནང༌ང༌ མི༌གྱེལ༌ཅེས༌སི༌ ཕིའ༌ ཉིད༌ མ༌ཏང༌ང༌ མོས༌ལམ༌ ཞུས༌། སེམས༌ཉིད༌དི༌ དོད༌པ༌ སྡིག༌པའེ༌ ནང༌ང༌ མི༌གྱེལ༌ཅེས༌ ཡོད༌ནའང༌ ཟུགས༌པོ༌ འུ༌ཐུགས༌ ཡོད༌ཏེ༌ ཨིན༌ནོག༌།"
42 ལན༌ ཉིས༌པ༌ ཁོང༌ ཙ༌པིག༌ ཐག༌རིང༌ང༌ སྐྱོད༌ཏེ༌ མོས༌ལམ༌ ཞུའ༌ ཛདས༌, "ངའེ༌ ཡབ༌ལེ༌, གལ༌ཏེས༌ འི༌ རྡུག༌ངལ༌ལི༌ ཀོ༌རེ༌བོ༌ ངའེ༌ ཐུངས༌ཏེ༌ མ༌ནེ༌ ཐེན༌ ཉན༌ཅེས༌ མེད༌ན༌, ཉེ༌རང༌ངི༌ ཐུག༌གོངས༌ ནང༌ཞིན༌ གྲུབ༌ཤིག༌།" 43 ཁོང༌ ལོགས༌ཏེ༌ སྐྱོད༌ད༌ཅིག༌, ཡང༌སྐྱར༌ ལོབ༌ཕྲུགས༌ ཚང༌ཀོ༌ ཉིད༌ལ༌ སོང༌ཏེ༌ ཟིགས༌ ཅིའ༌ཟེར༌ན༌ ཁོང༌གུན༌ སྲན༌ཏྲེ༌ ངལ༌ཏེ༌ ཡོད༌པིན༌།
44 ལོབ༌ཕྲུགས༌གུན༌ ཡང༌སྐྱར༌ བོར༌ཏེ༌ ཁོང༌ ཙ༌པིག༌ ཐག༌རིང༌ང༌ སྐྱོད༌ཏེ༌ ལན༌ སུམ༌པ༌ སྔུན༌མ༌ ཙོགས༌ལ༌ མོས༌ལམ༌ ཞུའ༌ ཛདས༌། 45 ཏེ༌ནེ༌ ཁོང༌ ལོབ༌ཕྲུགས༌གུན༌ ཡོད༌ས༌ ལོགས༌ཏེ༌ སྐྱོད༌ཏེ༌ མོལས༌, "ཏ༌རུང༌ངའང༌ ཁྱོ༌ཞའ༌ ཉིད༌ ཏང༌ཨིན༌ ངལ༌ཚོའ༌ད༌? ལྟོས༌, མི༌རིགས༌སི༌བུའ༌ ངོ༌ལོག༌ ཅོས༌ཏེ༌ སྡིག༌ཅན༌གུན༌ནི༌ ལག༌ག༌ སྟད༌ཅེས༌སི༌ ཏུས༌ཚོད༌པོ༌ ལེབ༌ ཚར༌། 46 ལོངས༌, ང༌དང༌གུན༌ ཆེན༌། ལྟོས༌, ངའ༌ ངོ༌ལོག༌ ཅོ༌ཁན༌བོ༌ ཡོང༌ང༌ལ༌།"
ཡེ༌ཤུ༌ ཟུམས༌།
26:47 ནེ༌ 56
47 གཙོ༌བོ༌ ཡེ༌ཤུའི༌ ཞལ༌ཏ༌ སལ༌ཨིན༌ ཡོད༌ ཟ༌ནེ༌ ལོབ༌ཕྲུགས༌ ཅུག༌ཉིས༌པོའེ༌ ནང༌ནེ༌ ཡུ༌དཱ༌ ཏེ༌ཀ༌ ལེབ༌, ཁོ༌ ཉམ༌པོ༌ བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཀལ༌ཁན༌ནི༌ མི༌ མང༌པོ༌ ར༌འི༌ དང༌ བེར༌ཀ༌ ཁུར༌ཏེ༌ ཡོངས༌། 48 ངོ༌ལོག༌ ཅོ༌ཁན༌བོའེ༌ ཁོང༌གུན༌ལ༌ ཡེ༌ཤུ༌ ཟུམ༌མ༌ལ༌ རྡ༌ཞིག༌ ཏང༌ཨིན༌, "ངའེ༌ པུག༌ ཏང༌ཁན༌ནི༌ མི༌བོ༌ ཁྱོ༌ཞའེ༌ ཟུམ༌" ཟེརས༌། 49 ཏེན༌ན༌མལ༌ལ༌ ཡུ༌དཱ༌ ཡེ༌ཤུ༌ ཡོད༌ས༌ ཡོངས༌ཏེ༌, "ལོབ༌པོན༌ལེ༌, ཇུ༌ལེ༌" ཟེར༌ཏེ༌ པུག༌ ཏངས༌།
50 ཡེ༌ཤུའི༌ ཁོའ༌ མོལས༌, "ཛ༌འོ༌, ཁྱོ༌རང༌ ཅོའ༌ལ༌ ཡོངས༌ཁན༌བོ༌ ཅོས༌།" ཏེ༌ནེ༌ ཁོང༌གུན༌ ཡོངས༌ཏེ༌ ཡེ༌ཤུ༌ ཟུམས༌ ཡང༌ ལྕག༌ཐག༌ ཉམ༌པོ༌ ཏགས༌། 51 ཧུན༌མེད༌ལ༌ ལོབ༌ཕྲུགས༌ ཅིག༌གི༌ ཁོ༌རང༌ངི༌ ར༌འི༌ ཕིངས༌ཏེ༌ བླ༌མ༌ ཆེན༌མོའེ༌ ཡོག༌པོའ༌ གྱབས༌ཏེ༌ ཁོའེ༌ ནམ༌ཅོག༌པོ༌ ཅད༌ཏངས༌།
52 ཡེ༌ཤུའི༌ ཁོའ༌ མོལས༌, "ར༌འི༌ ཤུབས༌སི༌ ནང༌ང༌ གྱོང༌ ཅིའ༌ཟེར༌ན༌ ར༌འི༌ ཀོལ༌ཁན༌ ཚང༌མ༌ ར༌འི༌ ཀ༌ནེ༌ ཤི༌ཨིན༌། 53 ཁྱོ༌རང༌ངི༌ ཅི༌ སམ༌, གལ༌ཏེས༌ ངའེ༌ ང༌རང༌ངི༌ ཡབ༌བ༌ ཞུ༌ན༌ ཏེན༌ན༌མལ༌ལ༌ ཕོ༌ཉའེ༌ མག༌མི༌ ཀྲངས༌ མེད༌ཤིག༌ ངའ༌ སྐྱོབ༌བ༌ ཀལ༌ལ༌ མི༌ཛད༌ད༌? 54 ཨིན༌ནའང༌ གལ༌ཏེས༌ ཏེ༌བོ༌ ངའེ༌ ཅོ༌ན༌, ཏེ༌ནེ༌ དམ༌པའེ༌ སུང༌རབས༌སི༌ ནང༌ང༌ འི༌གུན༌ ངའེ༌ཀ༌ བྱུང༌གོས༌ མོལ༌ཁན༌བོ༌ ཀ༌ཟུག༌གི༌ དྲན༌དྲ༌ གྲུབ༌ཨིན༌།"
55 ཏེ༌ནེ༌ ཡེ༌ཤུའི༌ ཁོང༌ ཟུམ༌ཁན༌གུན༌ལ༌ མོལས༌, "ར༌འི༌ དང༌ བེར༌ཀ༌ ཁུར༌ཏེ༌ ང༌ ཟུམ༌མ༌ ཡོངས༌ཏེ༌ ཅི༌ ང༌ ཅག༌པ༌ ཨིན༌ནོག༌ག༌? ཆོད༌ཁང༌ངི༌ ནང༌ང༌ ཞག༌ཏང༌ ངའེ༌ ལབ༌ཞ༌ ཏང༌ ཟ༌ནེ༌ ཁྱོ༌ཞའེ༌ ང༌ ཅིའ༌ མ༌ཟུམས༌པིན༌? 56 ཨིན༌ནའང༌ དམ༌པའེ༌ སུང༌རབས༌སི༌ ནང༌ང༌ ལུང༌སྟོན༌པའེ༌ བྲིས༌ཁན༌གུན༌ གྲུབ༌ཅེས༌སི༌ ཕིའ༌ འི༌ ཚང༌མ༌ བྱུང༌གོས༌།" ཏེ༌ནེ༌ ཁོང༌ ཕངས༌ཏེ༌ ལོབ༌ཕྲུགས༌ ཚང༌མ༌ ཤོར༌།
ཡེ༌ཤུ༌ ཡ༌ཧུ༌དཱ༌པའེ༌ ཚོགས༌དུའི༌ དུན༌ལ༌ ཁྱེརས༌།
26:57 ནེ༌ 68
57 གཙོ༌བོ༌ ཡེ༌ཤུ༌ ཟུམ༌ཁན༌གུན༌ནི༌, ཁོང༌ བླ༌མ༌ ཆེན༌མོ༌ ཀ༌ཡ༌ཕཱས༌སི༌ཀ༌ ཁྱེརས༌, ཀ༌རུ༌ ཆོས༌ཁྲིམས༌ལ༌ ཁས༌པ༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ ཛོམས༌ཏེ༌ ཡོད༌པིན༌། 58 ཨིན༌ནའང༌ པི༌ཏྲར༌ བླ༌མ༌ ཆེན༌མོའེ༌ ཕོ༌གྲང༌ངི༌ གྱང༌སྐོར༌ ཚོག༌པ༌ ཐག༌རིང༌ཞིག༌ནེ༌ ཁོང༌ངི༌ གྱབ༌ནེ༌ སོང༌ ཡང༌ ནང༌ཀུག༌ག༌ སོང༌ཏེ༌ ཡེ༌ཤུའ༌ ཅི༌ ཅོ༌རུག༌ ལྟའ༌ལ༌ སྲུང༌ཁན༌གུན༌ ཉམ༌པོ༌ སའེ༌ཀ༌ དུགས༌།
59 བླ༌མ༌ ཆེན༌མོ༌ དང༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌ ཚང༌མའེ༌ ཡེ༌ཤུ༌ སད༌ཉན༌ཅེས༌སི༌ ཟུན༌ནི༌ སྤང༌པོ༌ ཙལས༌། 60 མི༌ མང༌པོའེ༌ ཟུན༌ནི༌ སྤང༌པོ༌ ཏང༌ནའང༌ ཁོང༌ སད༌ཉན༌ཅེས༌སི༌ སྤང༌པོ༌ཞིག༌ མ༌ཐོབ༌། སྟིང༌ཇུག༌ག༌ མི༌ ཉིས༌ ཡོངས༌ཏེ༌ 61 ཟེརས༌, "འི༌ མི༌བོའེ༌ ཟེར༌ར༌རག༌པིན༌, 'ངའེ༌ དཀོན༌མཆོག༌གི༌ ཆོད༌ཁང༌ ཤིགས༌ཏེ༌, ཞག༌ སུམ༌མི༌ ནང༌ང༌ ཡང༌སྐྱར༌ རྩིག༌ཉན༌ཨིན༌'།"
62 ཏེ༌ནེ༌ བླ༌མ༌ ཆེན༌མོ༌ ལངས༌ཏེ༌ ཡེ༌ཤུའ༌ ཟེརས༌, "ཁྱོ༌རང༌ངི༌ གྱབ༌གལ༌ལ༌ སྤང༌པོ༌ ཏང༌ཁན༌གུན༌ལ༌ ལན༌ཏང༌ང༌ མེད༌ད༌? རང༌ སྐྱོབ༌ཅེས༌སི༌ ཕིའ༌ ཁྱོ༌རང༌ང༌ ཟེར༌ཅེས༌ མེད༌ད༌?" 63 ཨིན༌ནའང༌ ཡེ༌ཤུ༌ ཅུབ༌ཅད༌ཏེ༌ ཞུགས༌། ཏེ༌ནེ༌ བླ༌མ༌ ཆེན༌མོའེ༌ ཟེརས༌, "ངའེ༌ ཁྱོ༌རང༌ང༌ དཀོན༌མཆོག༌ སོན༌པོའེ༌ ནའ༌ ཀལ༌ལད༌, ང༌ཞའ༌ ཤོད༌དའང༌ ཁྱོ༌རང༌ ལྡམ༌མ༌ ཛད༌ཁན༌ནི༌ མ༌ཤི༌ཀའ༌, དཀོན༌མཆོག༌གི༌ སྲས༌ ཨིན༌ན༌?"
64 ཡེ༌ཤུའི༌ མོལས༌, "འོ༌ན༌ ཉེ༌རང༌ངི༌ ཟེར༌ཁན༌བོ༌ ཨིན༌, ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, མ༌འོངས༌པའེ༌ ཏུས༌སི༌ ནང༌ང༌ མི༌རིགས༌སི༌བུ༌ ཀུན༌ཝང༌ དཀོན༌མཆོག༌གི༌ ཆག༌ ཡས༌པའེ༌ ཁྲིས༌སི༌ཀ༌ དུགས༌ཏེ༌, ཡང༌ ནམ༌ཁའེ༌ སྲིན༌ནི༌ཀ༌ ཞོན༌ཏེ༌ ཡོང༌ང༌ ཁྱོ༌ཞའེ༌ ཐོང༌ཨིན༌།"
65 ཏེ༌ནེ༌ བླ༌མ༌ ཆེན༌མོ༌ ཁོ༌རང༌ངི༌ ཀོས༌པོ༌ ཤགས༌ ཡང༌ ཟེརས༌, "ཁོའེ༌ དཀོན༌མཆོག༌ག༌ དད༌ལོག༌ ཅོས༌ཏེ༌ ཨིན༌ནོག༌། ང༌དང༌ང༌ འི༌ སང༌ མང༌ང༌ སྤང༌པོ༌ ཅི༌ གོས༌ཨིན༌? ཁོའེ༌ དད༌ལོག༌ ཅོ༌ཁན༌བོ༌ དག༌ས༌རང༌ ཁྱོ༌ཞའེ༌ ཚོར༌ཏེ༌ ཨིན༌ནོག༌། 66 ཁྱོ༌ཞའེ༌ ཅི༌ ཐག༌ཅད༌དད༌?" ཁོང༌གུན༌ནི༌ ལན༌ཏངས༌, "ཁོ༌ སད༌གོ༌ཤེས༌སི༌ འོས༌པ༌ ཨིན༌ནོག༌།"
67 ཏེ༌ནེ༌ ཁོང༌གུན༌ནི༌ ཁོང༌ངི༌ ཞལ༌དོང༌ངི༌ཀ༌ ཐུ༌ གྱབས༌ཏེ༌ མུལ༌ཁྲུག༌ ཅོས༌ཏེ༌ རྡུངས༌ ཡང༌ ཞན༌གུན༌ནི༌ ཁོང༌ང༌ གྲམ༌ལྕགས༌ དང༌ 68 ཧབ༌གོད༌ ཏང༌ཨིན༌ ཟེརས༌, "ལྡམ༌མ༌ ཛད༌ཁན༌ནི༌ མ༌ཤི༌ཀ༌ ང༌ཞའ༌ ལུང༌སྟན༌ སལ༌ལའང༌, ཁྱོ༌རང༌ང༌ རྡུང༌ཁན༌བོ༌ སུ༌ ཨིན༌ནོག༌?"
པི༌ཏྲར༌རི༌ ཡེ༌ཤུ༌ མི༌ཤེས༌ཟུན༌ ཏངས༌།
26:69 ནེ༌ 75
69 པི༌ཏྲར༌ ཕི༌ལོག༌ག༌ ཕོ༌གྲང༌ངི༌ ཚོམས༌སི༌ ནང༌ང༌ དུགས༌ཏེ༌ ཡོད༌ ཟ༌ནེ༌, ཡོག༌མོ༌ཞིག༌ ཁོ༌ ཡོད༌ས༌ ཡོངས༌ཏེ༌ ཟེརས༌, "གཱ༌ལིལ༌ལི༌པ༌ ཡེ༌ཤུ༌ ཉམ༌པོ༌ ཁྱོ༌རང༌ངའང༌ མེད༌པིན༌ན༌?"
70 ཨིན༌ནའང༌ ཁོའེ༌ ཁོང༌ ཚང༌མའེ༌ དུན༌ལ༌ ཟུན༌ ཏངས༌ཏེ༌ ཟེརས༌, "ཁྱོ༌རང༌ངི༌ ཅི༌ ཟེར༌ཏེ༌ ཨིན༌ ངའ༌ ཧ༌གོའ༌ མེ༌རག༌།"
71 ཏེ༌ནེ༌ ཁོ༌ གྱས༌སྒོའེ༌ཀ༌ སོང༌, ཏེ༌རུ༌ ཞན༌ ཡོག༌མོ༌ཞིག༌གི༌ ཁོ༌ ཐོང༌ཏེ༌ ཉེ༌ཁོར༌ལ༌ ཡོད༌ཁན༌གུན༌ལ༌ ཟེརས༌, "འི༌ མི༌བོ༌ ན༌ཙ༌རེད༌པ༌ ཡེ༌ཤུ༌ ཉམ༌པོ༌ དུག༌པིན༌།"
72 ཁོའེ༌ ཡང༌སྐྱར༌ མི༌ཤེས༌ཟུན༌ ཏང༌ཨིན༌ ནའ༌ སྐྱལ༌ཏེ༌ ཟེརས༌, "ཏེ༌ མི༌བོ༌ ངའེ༌ ཤེས༌ས༌མེད༌།"
73 ཙ༌པིག༌ཤིག༌གི༌ སྟིང༌ནེ༌ ཏེ༌ཀ༌ ལངས༌ཏེ༌ ཡོད༌ཁན༌གུན༌ པི༌ཏྲར༌ ཡོད༌ས༌ སོང༌ཏེ༌ ཟེརས༌, "ཏན༌ཏན༌ ཁྱོ༌རང༌ ཁོའེ༌ ཕྲོ༌པ༌གུན༌ནི༌ ནང༌ནེ༌ ཅིག༌ ཨིན༌ནོག༌ ཅིའ༌ཟེར༌ན༌ ཁྱོ༌རང༌ངི༌ སྤེ༌ར༌ ཏང༌ཚུལ༌བོ༌ གཱ༌ལིལ༌ལི༌པ༌ ཙོགས༌ རག༌།"
74 པི༌ཏྲར༌རི༌ ཁོ༌ ངན༌ ཕོག༌ཤིག༌ ཟེར༌ཨིན༌ ནའ༌ སྐྱལ༌ཏེ༌ ཟེརས༌, "ངའེ༌ ཏེ༌ མི༌བོ༌ ཤེས༌ས༌མེད༌།" ཏེན༌ན༌མལ༌ལ༌ ཅ༌པོའེ༌ སྐད༌ ཏངས༌།
75 ཏེ༌ནེ༌ པི༌ཏྲར༌ལ༌ ཡེ༌ཤུའི༌, "ཅ༌པོའེ༌ ཅ༌སྐད༌ ཏང༌ངི༌ སང༌ སྔུན༌ལ༌, ཁྱོ༌རང༌ངི༌ ངའ༌ ལན༌ སུམ༌ མི༌ཤེས༌ཟུན༌ ཏང༌ཨིན༌" མོལ༌ཁན༌བོ༌ ཨིད༌ཏུ༌ ཡོངས༌, ཡང༌ ཁོ༌ ཕི༌ལོག༌ག༌ སོང༌ཏེ༌ མ༌སྲན༌ཏྲེ༌ ངུས༌།