18
ནམ༌ཁའེ༌ གྱལ༌སྲིད༌དི༌ ནང༌ང༌ ཀྲག༌ཤོག༌།
18:1 ནེ༌ 10
1 ཏེ༌ཏུས༌ ལོབ༌ཕྲུགས༌གུན༌ གཙོ༌བོ༌ ཡེ༌ཤུའི༌ཀ༌ ཡོངས༌ཏེ༌ ཏྲིས༌, "ནམ༌ཁའེ༌ གྱལ༌སྲིད༌དི༌ ནང༌ང༌ ཀྲག༌ཤོག༌ སུ༌ ཨིན༌ནོག༌?"
2 ཡེ༌ཤུའི༌ ཕྲུ༌གུ༌ ཆུ༌ངུན༌ཞིག༌ག༌ བོད༌ཏེ༌ ཁོང༌གུན༌ནི༌ སྐྱིལ༌ལ༌ ལང༌ཅུག༌ག༌ ཛདས༌། 3 ཁོང༌ངི༌ མོལས༌, "ངའེ༌ ཁྱོ༌ཞའ༌ དེན༌བ༌ ཟེར༌རད༌, གྱོད༌པ༌ ཅོས༌ཏེ༌ ཁྱོ༌ཞའེ༌ སེམས༌ ཕྲུ༌གུ༌ ཆུ༌ངུན༌ ཙོགས༌ གྱུར༌ཏེ༌ མ༌ནེ༌ ཁྱོ༌ཞ༌ ནམ༌ཁའེ༌ གྱལ༌སྲིད༌དི༌ ནང༌ང༌ མ༌ནེ༌ ཞུགས༌ མི༌ཉན༌། 4 ཏེ༌བོའེ༌ཕིའ༌ ཕྲུ༌གུ༌ ཙོགས༌ལ༌ པས༌མོ༌ གྱུར༌ཁན༌གུན༌ ནམ༌ཁའེ༌ གྱལ༌སྲིད༌དི༌ ནང༌ང༌ ཆེ༌ཤོག༌པོ༌ ཨིན༌།"
5 "ངའེ༌ མིང༌ངི༌ ནང༌ང༌ སུ༌ཞིག༌གི༌ འི༌ ཕྲུ༌གུ༌ ཙོགས༌ཤིག༌ག༌ གའ༌སུས༌ ཅོ༌ན༌ ངའ༌ གའ༌སུས༌ ཅོས༌ཏེ༌ ཨིན༌, 6 ཨིན༌ནའང༌ ང༌ ཏད༌པ༌ ཅོ༌ཁན༌ འི༌ ཆུ༌ངུན༌གུན༌ནི༌ ནང༌ནེ༌ ཅིག༌ག༌ སྡིག༌པ༌ ཅོ༌ཅུག༌གི༌ སང༌ ཁོ༌རང༌ངི༌ སྐྱེའ༌ རན༌ཐག༌གི༌ རྡོའ༌ ཆེན༌མོ༌ ཏགས༌ཏེ༌, གྱ༌ཚོའེ༌ ནང༌ང༌ ནུབས༌ཏེ༌ ཤི༌ན༌ གྱལ༌།"
7 "སྡིག༌པའེ༌ ནང༌ང༌ གྱེལ༌ཅུག༌ཁན༌ ཇིག༌རྟེན༌པ༌གུན༌ལ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཏེ༌བོ༌ ཏན༌ཏན༌ བྱུང༌ཨིན༌, ཨིན༌ནའང༌ ཏེ༌བོ༌ བྱུང༌ཅུག༌ཁན༌བོའ༌ ཙམ༌ཤིག༌གི༌ ཇིགས༌པ༌ མི༌ཡོང༌། 8 གལ༌ཏེས༌ ཁྱོ༌རང༌ངི༌ ལག༌པ༌ ཡ༌ རྐང༌པའེ༌ སྡིག༌པ༌ ཅོ༌ཅུག༌གད༌ན༌, ཅད༌ཏེ༌ ཕངས༌ཏོང༌, ལག༌པ༌ ཉིས༌ དང༌ རྐང༌པ༌ ཉིས༌ ཡོད༌ཏེ༌ ཉལ༌ཝའེ༌ ནང༌ང༌ ཕང༌ཅུག༌གི༌ སང༌, ལག༌པ༌ ཅིག༌ དང༌ རྐང༌པ༌ ཅིག༌ ཉམ༌པོ༌ ཐའ༌མེད༌པའེ༌ མི༌ཚེའེ༌ ནང༌ང༌ ཆ༌ན༌ གྱལ༌། 9 ཡང༌ གལ༌ཏེས༌ ཁྱོ༌རང༌ངི༌ མིག༌གི༌ སྡིག༌པ༌ ཅོ༌ཅུག༌ན༌, ཏེ༌བོ༌ བྲུས༌ཏེ༌ ཕངས༌ཏོང༌། མིག༌ ཉིས༌ ཡོད༌ཏེ༌ ཉལ༌ཝའེ༌ ནང༌ང༌ ཕང༌ཅུག༌གི༌ སང༌, མིག༌ ཅིག༌ ཉམ༌པོ༌ ཐའ༌མེད༌པའེ༌ མི༌ཚེའེ༌ ནང༌ང༌ ཆ༌ན༌ གྱལ༌།"
10 "འི༌ ཕྲུ༌གུ༌ ཆུ༌ངུན༌གུན༌ ཅིག༌གའང༌ རིན༌མེད༌དི༌ མིག༌ ཉམ༌པོ༌ མ༌ལྟའ༌། ངའེ༌ ཁྱོ༌ཞའ༌ ཟེར༌རད༌, ཁོང༌གུན༌ སྐྱོབ༌ཁན༌ནི༌ ཕོ༌ཉའ༌ ངའེ༌ ནམ༌ཁའེ༌ ཡབ༌བི༌ དུན༌ལ༌ ཏུས༌གྱུན༌ ཞུགས༌ཏེ༌ ཁོང༌ངི༌ ནས༌ཚུལ༌ ཤད༌ད༌ནོག༌།"
ལུག༌ སྟོར༌ཁན༌ནི༌ རུངས༌།
18:11 ནེ༌ 14
11 * 18:11 སྔུན༌མའེ༌ གིརིས༌སི༌ སྤེ༌ཆའེ༌ ནང༌ང༌ 18:11 "མི༌རིགས༌སི༌བུ༌ སྟོར༌ཏེ༌ ཡོད༌ཁན༌གུན༌ སྐྱོབ༌བ༌ལ༌ ཡོངས༌" བྲིས༌ཏེ༌ མེད༌ཏེ༌ ཨིན༌ནོག༌། 12 གཙོ༌བོ༌ ཡེ༌ཤུའི༌ མོལས༌, "ཅི༌ སམ༌མ༌རག༌? མི༌ཞིག༌ག༌ ལུག༌ གྱ༌ ཡོད༌ཁན༌བོའེ༌ ནང༌ནེ༌ ལུག༌ ཅིག༌ སྟོར༌ན༌, ཞན༌ གུབ༌ཅུ༌ གོར༌གུ༌བོ༌ རིའ༌ བོར༌ཏེ༌ སྟོར༌ཁན༌ནི༌ ལུག༌ ཅིག༌པོ༌ མི༌ཙལ༌ལ༌? 13 ངའེ༌ ཁྱོ༌ཞའ༌ དེན༌བ༌ ཟེར༌རད༌ གལ༌ཏེས༌ ལུག༌ སྟོར༌ཁན༌བོ༌ ཐོབ༌ན༌, མ༌སྟོར༌ཁན༌ནི༌ ལུག༌ གུབ༌ཅུ༌ གོར༌གུའི༌ སང༌ འི༌ སྟོར༌ཏེ༌ ཐོབ༌ཁན༌ནི༌ ལུག༌ ཅིག༌པོའེ༌ ཕིའ༌ ཁོ༌ མང༌ང༌ ཐད༌པོ༌ ཆེན༌། 14 ཏེན༌ན༌ ཙོགས༌ལ༌ ཁྱོ༌ཞའེ༌ ནམ༌ཁའེ༌ ཡབ༌, ཏད༌པ༌ ཡོད༌ཁན༌ འི༌ ཆུ༌ངུན༌གུན༌ནི༌ ནང༌ནེ༌ ཅིག༌གའང༌ སྟོར༌ཅེས༌ལ༌ ཐུགས༌ཐད༌ད༌ མ༌ནོག༌།"
སྤུན༌ སྡིག༌ཅན༌ཞིག༌ དྲང༌པོའེ༌ ལམ༌མི༌ཀ༌ ཁྱོང༌ཅེས༌།
18:15 ནེ༌ 20
15 "གལ༌ཏེས༌ ཏད༌པ༌ཅན༌ སྤུན༌ཞིག༌གི༌ ཁྱོ༌རང༌ངི༌ གྱབ༌གལ༌ལ༌ སྡིག༌པ༌ ཅོ༌ན༌, ཁོ༌ ཡོད༌ས༌ ཅིག༌པོ༌ སོང༌ཏེ༌ ཁོའེ༌ སྐྱོན༌བོ༌ སྟོན༌། གལ༌ཏེས༌ ཁོའེ༌ ཁྱོ༌རང༌ངི༌ ཟེར༌ཁན༌བོ༌ ཉན༌ཏེ༌ གྱོད༌པ༌ ཅོ༌ན༌, ཁྱོ༌རང༌ང༌ ཁྱོ༌རང༌ངི༌ སྤོན༌བོ༌ ཡང༌སྐྱར༌ ལོགས༌ཏེ༌ ཐོབ༌ཏེ༌ ཨིན༌ནོག༌། 16 ཨིན༌ནའང༌ གལ༌ཏེས༌ ཁོའེ༌ ཁྱོ༌རང༌ངི༌ ཟེར༌ཁན༌གུན༌ མ༌ཉན༌ན༌ 'ཟེར༌ཁན༌གུན༌ མི༌ ཉིས༌ ཡ༌ སུམ༌མི༌ སྤང༌པོ༌ ཏངས༌ཏེ༌ ཏན༌ཏན༌ ཅོ༌ཅེས༌ལ༌' ཁྱོ༌རང༌ངི༌ ཏད༌པ༌ཅན༌ སྤུན༌ ཅིག༌ ཡ༌ ཉིས༌ ཁྲིད༌ཏེ༌ ཁྱེར༌། 17 གལ༌ཏེས༌ ཁོའེ༌ ཏེ༌ སྤང༌པོ༌གུན༌ལ༌ མ༌ཉན༌ན༌, ཏེ༌ནེ༌ ཆོས༌ཚོགས༌ལ༌ ཤོད༌, ཡང༌ གལ༌ཏེས༌ ཁོའེ༌ ཆོས༌ཚོགས༌ལའང༌ མ༌ཉན༌ན༌, ཏེ༌ནེ༌ ཁོའ༌ ཁྲལ༌ནེན༌ཁན༌ དང༌ ཞན༌ ཏད༌པ༌ མེད༌ཁན༌གུན༌ ཙོགས༌ རྩི༌ཤིག༌།"
18 "ངའེ༌ ཁྱོ༌ཞའ༌ དེན༌བ༌ ཟེར༌རད༌ ཇིག༌རྟེན༌ནི༌ཀ༌ ཁྱོ༌ཞའེ༌ གོངས༌པ༌ མ༌ཏང༌ཁན༌བོའ༌ ནམ༌ཁའེ༌ དཀོན༌མཆོག༌གིའང༌ གོངས༌པ༌ སལ༌ལ༌ མི༌ཛད༌, ཡང༌ ཇིག༌རྟེན༌ནི༌ཀ༌ ཁྱོ༌ཞའེ༌ གོངས༌པ༌ ཏང༌ཁན༌བོའ༌ ནམ༌ཁའེ༌ དཀོན༌མཆོག༌གིའང༌ གོངས༌པ༌ སལ༌ལ༌ ཛད༌ཨིན༌།"
19 "ཡང༌སྐྱར༌ ངའེ༌ ཁྱོ༌ཞ༌གུན༌ལ༌ ཟེར༌རད༌, གལ༌ཏེས༌ ཇིག༌རྟེན༌ནི༌ཀ༌ ཏད༌པ༌ཅན༌ ཉིས༌ ཞུ༌ཝ༌ ཕུལ༌ཅེས༌ལ༌ ཅི༌ཞིག༌གི༌ཀ༌ ཁའ༌ཆམས༌ན༌, ཏེ༌བོ༌ ངའེ༌ ནམ༌ཁའེ༌ ཡབ༌བི༌ ཁྱོ༌ཞའེ༌ ཕིའ༌ ཅོའ༌ ཛད༌ཨིན༌། 20 ཅིའ༌ཟེར༌ན༌ ཀ༌རུ༌ ངའེ༌ མིང༌ ཁུར༌ཁན༌ ཉིས༌ ཡ༌ སུམ༌ ཛོམ༌མད༌ ང༌ ཏེ༌རུ༌ ཁོང༌གུན༌ ཉམ༌པོ༌ ཡོད༌།"
སྙིང༌རྗེ༌ མེད༌ཁན༌ནི༌ ཡོག༌པོའེ༌ རུངས༌།
18:21 ནེ༌ 35
21 ཏེ༌ནེ༌ པི༌ཏྲར༌ གཙོ༌བོ༌ ཡེ༌ཤུ༌ ཡོད༌ས༌ ཡོངས༌ཏེ༌ ཏྲིས༌, "གཙོ༌བོ༌ལེ༌, གལ༌ཏེས༌ ངའེ༌ སྤུན༌ཞིག༌གི༌ ངའེ༌ གྱབ༌གལ༌ལ༌ སྡིག༌པ༌ ཅོ༌ན༌, ཏེ༌ནེ༌ ལན༌ ཙམ༌ ངའེ༌ ཁོའ༌ ཤགས༌པ༌ ཏང༌གོས༌? ལན༌ རྡུན༌ † 18:21 ཡེ༌ཤུའི༌ ཏུས༌ལ༌ ཡ༌ཧུ༌དཱ༌པའེ༌ ལོབ༌ཞ༌ ནང༌ཞན༌ སུ༌ཞིག༌གི༌ ཁྱོ༌ཞའེ༌ གྱབ༌གལ༌ལ༌ སྡིག༌པ༌ ཅོ༌ན༌ ཁོའ༌ ལན༌ སུམ༌ ཤགས༌པ༌ ཏང༌གོས༌། པི༌ཏྲར༌རི༌ 'ལན༌ རྡུན༌ ཤགས༌པ༌ ཏང༌ང༌' ཟེར༌ ཟ༌ནེ༌ ཁོའེ༌ སྒོས༌དོམ༌མི༌ སང༌ མང༌ང༌ ཏངས༌ཏེ༌ ཨིན༌ སམ༌། ཏང༌ན༌ གྲིག༌ག༌ ལེ༌?"
22 ཡེ༌ཤུའི༌ ལན༌སལས༌, "ངའེ༌ ཁྱོ༌རང༌ང༌ ཟེར༌རད༌, ལན༌ རྡུན༌ མན༌པ༌ རྡུན༌ཅུ༌པ༌ ལན༌ རྡུན༌ ཏོང༌།"
23 "སྤེར༌ན༌ ནམ༌ཁའེ༌ གྱལ༌སྲིད༌ ནི༌, ཁོ༌རང༌ངི༌ ཡོག༌པོ༌གུན༌ནི༌ ཀ༌ནེ༌ རྩི༌རུག༌ ལེན༌ཅེས༌ལ༌ ཐག༌ཅད༌ཁན༌ནི༌ གྱལ༌པོ༌ ཙོགས༌ ཨིན༌། 24 རྩི༌རུག༌ ལེན༌ཅེས༌ གོ༌ཟུག༌ག༌ཅིག༌, གྱལ༌པོའེ༌ དུན༌ལ༌ ཀ༌རོར༌ མང༌པོའེ༌ པེ༌ནེ༌ བུ༌ལོན༌ ཡོད༌ཁན༌ནི༌ མི༌ཞིག༌ ཁྱོངས༌། 25 བུ༌ལོན༌ ཤལ༌རྒྱུ༌ མེད༌ པ༌སང༌ གྱལ༌པོའེ༌ ཏེ༌ མི༌བོ༌, ཁོའེ༌ ན༌མ༌ དང༌ ཕྲུ༌གུ༌གུན༌ ཡང༌ ནོར༌ ཡོད༌ཁན༌ ཚང༌མ༌ ཙོངས༌ཏེ༌, བུ༌ལོན༌ ཤལ༌ཅེས༌ལ༌ བཀའ༌ ཏངས༌།"
26 "ཡོག༌པོ༌ གྱལ༌པོའེ༌ དུན༌ལ༌ གྱེལ༌ཏེ༌ ཇུ༌ཇུ༌, 'ངའ༌ ཉམ༌པོ༌ ཟོད༌པ༌ ཛད༌, གྱགས༌པ༌ ངའེ༌ བུ༌ལོན༌ གང༌པོ༌ ལོགས༌ཏེ༌ ཕུལ༌ཨིན༌', ཟེར༌ཏེ༌ ཞུ༌ཝ༌ ཕུལས༌། 27 གྱལ༌པོའ༌ སྙིང༌རྗེ༌ སྐྱེས༌, ཡང༌ ཁོའེ༌ བུ༌ལོན༌བོ༌ མེད༌ཁན༌ ཅོས༌ཏེ༌ ཁོ༌ ཆ༌ཅུགས༌།"
28 "ཨིན༌ནའང༌ ཡོག༌པོ༌ ཕི༌ལོག༌ག༌ སོང༌ཏེ༌ སྟིང༌ནེ༌ པེ༌ནེ༌ ཉུ༌ངུན༌ སྟོན༌ ཁ༌ཅིག༌ བུ༌ལོན༌ལ༌ ཏང༌ཁན༌ནི༌ ཁོའེ༌ ཕྲོ༌པ༌ ཡོག༌པོའེ༌ཀ༌ སོང༌, ཡང༌ ཁོ༌ ཟུམས༌ཏེ༌ སྐྱེ༌ ལྡམས༌ཏེ༌, 'ངའེ༌ བུ༌ལོན༌ ལོགས༌ཏེ༌ ཏོང༌' ཟེརས༌"
29 "ཁོའེ༌ ཕྲོ༌པ༌ ཡོག༌པོའེ༌ སའེ༌ཀ༌ གྱེལ༌ཏེ༌ ཇུ༌ཇུ༌, 'ངའ༌ ཉམ༌པོ༌ ཟོད༌པ༌ ཛད༌ གྱགས༌པ༌ ངའེ༌ བུ༌ལོན༌ ལོགས༌ཏེ༌ ཕུལ༌ཨིན༌' ཟེར༌ཏེ༌ ཞུ༌ཝ༌ ཕུལས༌། 30 ཨིན༌ནའང༌ ཁོའེ༌ ཞུ༌ཝ༌བོ༌ མ༌ཉནས༌ མ༌ཚད༌ བུ༌ལོན༌ ཤལ༌ཤལ༌ ཚོག༌པ༌ ཁོ༌ ཙོན༌ཁང༌ང༌ ཀག༌ཅུགས༌།"
31 "ཞན༌ ཡོག༌པོ༌ ཕྲོ༌པ༌གུན༌ལ༌ ཏེ༌བོ༌ ཐོང༌ཏེ༌ སྲོ༌ སྲན༌ཏྲེ༌ ཡོངས༌, ཡང༌ གྱལ༌པོ༌ ཡོད༌ས༌ སོང༌ཏེ༌ བྱུང༌ཁན༌ ཚང༌མ༌ ཤདས༌། 32 ཏེ༌ནེ༌ གྱལ༌པོའེ༌ ཡོག༌པོ༌ སྙིང༌རྗེ༌ མེད༌ཁན༌བོ༌ བོད༌ཏེ༌ ཁྱོངས༌ ཡང༌ ཁོའ༌ ཟེརས༌, 'ཡོག༌པོ༌ ངན༌པ༌ ཁྱོད༌, ཁྱོ༌རང༌ངི༌ ང༌ ཇུ༌ཇུ༌ ཞུས༌པ༌ སྙིང༌རྗེ༌ སྐྱེས༌ཏེ༌, ངའེ༌ ཁྱོ༌རང༌ངི༌ བུ༌ལོན༌ ཚང༌མ༌ མེད༌ཁན༌ ཅོས༌པིན༌། 33 ངའ༌ ཁྱོ༌རང༌ངི༌ཀ༌ སྙིང༌རྗེ༌ སྐྱེའ༌ ཙོགས༌ལ༌, ཁྱོ༌རང༌ངའང༌ ཁྱོ༌རང༌ངི༌ ཕྲོ༌པའེ༌ཀ༌ སྙིང༌རྗེ༌ སྐྱེ༌ མ༌གོས༌ས༌?' 34 གྱལ༌པོའ༌ སྲོ༌ ཡོངས༌ཏེ༌, བུ༌ལོན༌ གང༌པོ༌ ཤལ༌ཤལ༌ ཚོག༌པ༌ ཁོ༌ ཙོན༌ཁང༌ང༌ ཀགས༌ཏེ༌ ནགས༌ ལྟན༌ན༌ལ༌ བཀའ༌ ཏངས༌།"
35 "གལ༌ཏེས༌ ཁྱོ༌ཞའེ༌ ཁྱོ༌ཞ༌རང༌ངི༌ སྤུན༌ལ༌ སྙིང༌ནེ༌ ཤགས༌པ༌ མ༌ཏང༌ན༌ ངའེ༌ ནམ༌ཁའེ༌ ཡབ༌བིའང༌ ཁྱོ༌ཞ༌ རེ༌རེ༌ ཉམ༌པོ༌ ཏེན༌ན༌ ཙོགས༌ ཅོ༌ཨིན༌།"
*18:11 18:11 སྔུན༌མའེ༌ གིརིས༌སི༌ སྤེ༌ཆའེ༌ ནང༌ང༌ 18:11 "མི༌རིགས༌སི༌བུ༌ སྟོར༌ཏེ༌ ཡོད༌ཁན༌གུན༌ སྐྱོབ༌བ༌ལ༌ ཡོངས༌" བྲིས༌ཏེ༌ མེད༌ཏེ༌ ཨིན༌ནོག༌།
†18:21 18:21 ཡེ༌ཤུའི༌ ཏུས༌ལ༌ ཡ༌ཧུ༌དཱ༌པའེ༌ ལོབ༌ཞ༌ ནང༌ཞན༌ སུ༌ཞིག༌གི༌ ཁྱོ༌ཞའེ༌ གྱབ༌གལ༌ལ༌ སྡིག༌པ༌ ཅོ༌ན༌ ཁོའ༌ ལན༌ སུམ༌ ཤགས༌པ༌ ཏང༌གོས༌། པི༌ཏྲར༌རི༌ 'ལན༌ རྡུན༌ ཤགས༌པ༌ ཏང༌ང༌' ཟེར༌ ཟ༌ནེ༌ ཁོའེ༌ སྒོས༌དོམ༌མི༌ སང༌ མང༌ང༌ ཏངས༌ཏེ༌ ཨིན༌ སམ༌།