16
ཧ༌ལས༌ཤེས༌སི༌ སྟགས༌ ལྟན༌ཅེས༌ལ༌ ཟེརས༌།
16:1 ནེ༌ 4
1 ཕ༌རུ༌ཤི༌པ༌གུན༌ དང༌ སད༌དུ༌ཀི༌པ༌གུན༌ ཡོངས༌ཏེ༌ གཙོ༌བོ༌ ཡེ༌ཤུའ༌ ཚོད༌ལྟས༌ཏེ༌ ཁོང༌ང༌ དཀོན༌མཆོག༌གི༌ ཝང༌ཆ༌ སལ༌ཁན༌བོ༌ ཏན༌ཏན༌ ཅོ༌ཅེས༌ལ༌ ནམ༌ཁའ༌ནེ༌ སྟགས༌ཤིག༌ སྟོན༌ ཟེརས༌།
2 ཁོང༌ངི༌ ལན༌སལས༌, "ཕི༌ཏོག༌ ནམ༌ མར༌པོ༌ ཡོད༌ད༌ ཐོང༌ཏེ༌ ཁྱོ༌ཞའེ༌ ཐོ༌རེ༌ ནམ༌ལ༌ གྱལ༌ལ༌ ཡོང༌ང༌ནོག༌ ཟེར༌དུག༌, 3 ཡང༌ ང༌ཏོག༌ སྲིན༌ནག༌ གངས༌ཏེ༌ ནམ༌ཚུབས༌ཏེ༌ ཐོང༌ན༌, དི༌རིང༌ ལུང༌རག༌ དང༌ ཆར༌པ༌ ཏང༌ང༌ནོག༌ ཟེར༌དུག༌། ཁྱོ༌ཞ༌གུན༌ནི༌ ནམ༌ཁའེ༌ ནང༌ང༌ བྱུང༌ཁན༌ནི༌ ནམ༌ལའེ༌ སྟགས༌གུན༌ ཤད༌ཉན༌དུག༌, ཨིན༌ནའང༌ ཁྱོ༌ཞ༌གུན༌ནི༌ འི༌ཏུས༌སི༌ སྟགས༌གུན༌ ཅིའ༌ ཤད༌ཉན༌ན༌ མེ༌རག༌། 4 མི༌རབས༌ ངན༌པ༌ དང༌ དཀོན༌མཆོག༌ག༌ ཨིད༌ཤེས༌ མེད༌ཁན༌གུན༌ནི༌ ནམ༌ཁའ༌ནེ༌ སྟགས༌ སྟོན༌ ཟེར༌ར༌ནོག༌། ཨིན༌ནའང༌ ལུང༌སྟོན༌པ༌ ཡོ༌ནཱའེ༌ སྟགས༌པོ༌ མ༌ནེ༌ ཡང༌སྟགས༌ཤིག༌ མི༌ལྟན༌།" ཏེ༌ནེ༌ ཁོང༌ ཁོང༌རང༌ངི༌ ལོབ༌ཕྲུགས༌གུན༌ ཉམ༌པོ༌ ཏེ༌ཀ༌ནེ༌ སྐྱོདས༌།
ཟུས༌མའེ༌ ལབ༌ཞ༌གུན༌ནི༌ ཀ༌ནེ༌ ཤང༌ སྐུལས༌།
16:5 ནེ༌ 12
5 ཚོའེ༌ ཕར༌ཀའ༌ ལེབ༌བ༌ཅིག༌ ལོབ༌ཕྲུགས༌གུན༌ལ༌ ཏ༌གི༌ ཁུར༌ར༌ལ༌ ཞེད༌ཁན༌བོ༌ ཨིད༌ཏུ༌ ཡོངས༌། 6 གཙོ༌བོ༌ ཡེ༌ཤུའི༌ ཁོང༌གུན༌ལ༌ མོལས༌, "ཕ༌རུ༌ཤི༌པ༌ དང༌ སད༌དུ༌ཀི༌པའེ༌ སྐྱུར༌ནེ༌ ཤང༌ ཅོས༌།"
7 ཁོང༌གུན༌ནི༌ ཅིག༌ དང༌ ཅིག༌ག༌ ཟེརས༌, "ང༌དང༌ངི༌ ཏ༌གི༌ ཁུར༌ཏེ༌ མེད༌པ༌ ཁོང༌ངི༌ ཏེ༌བོ༌ མོལ༌ཏེ༌ ཨིན༌ནོག༌ག༌?" 8 ཡེ༌ཤུའི༌ ཏེ༌བོ༌ ཁྱེན༌ཏེ༌ ཏྲིའ༌ ཛདས༌, "ཁྱོ༌ཞའ༌ ཏད༌པ༌ ཆུ༌ངུན༌གུན༌, ཏ༌གི༌ མེད༌ཁན༌ནི༌ སྐོར༌ལ༌ ཁྱོ༌ཞ༌གུན༌ནི༌ ཅིའ༌ སྤེ༌ར༌ ཏང༌ངད༌? 9 ཏ༌རུང༌ངའང༌ ཁྱོ༌ཞ༌གུན༌ལ༌ ཧ༌མ༌གོའ༌? ཨིད༌ཏུ༌ མེ༌རག༌ག༌ ཏ༌གི༌ ལྔ༌ནེ༌ མི༌ སྟོང༌ལྔ༌ གྲངས༌ཅུགས༌ཏེ༌ ལུས༌ཁན༌ནི༌ ཏ༌གི༌ ཁྱོ༌ཞའེ༌ ལྡུས༌པ༌ པག༌ཙེ༌ ཙམ༌ གང༌, 10 ཡ༌ ཏ༌གི༌ རྡུན༌ནེ༌ མི༌ སྟོང༌ཞི༌ གྲངས༌ཅུགས༌ཏེ༌ ལུས༌ཁན༌ནི༌ ཏ༌གི༌ ཁྱོ༌ཞའེ༌ ལྡུས༌པ༌ པག༌ཙེ༌ ཙམ༌ གང༌? 11 ངའེ༌ ཏ༌གི༌ སྐོར༌ལ༌ སྤེ༌ར༌ ཏངས༌ཏེ༌ མན༌ཁན༌བོ༌ ཁྱོ༌ཞའེ༌ ཅིའ༌ ཧ༌གོའ༌ མེ༌རག༌? ཨིན༌ནའང༌ ཕ༌རུ༌ཤི༌པ༌ དང༌ སད༌དུ༌ཀི༌པའེ༌ སྐྱུར༌རི༌ ཀ༌ནེ༌ ཤང༌ ཅོས༌།"
12 ཏེ༌ནེ༌ ཁོང༌གུན༌ལ༌ ཏ༌གི༌ ཅོ༌ཅེས༌ལ༌ ཀོལ༌ཁན༌ནི༌ སྐྱུར༌རི༌ སྐོར༌ མན༌པ༌, ཕ༌རུ༌ཤི༌པ༌ དང༌ སད༌དུ༌ཀི༌པའེ༌ ལབ༌ཞ༌གུན༌ནེ༌ ཤང༌ ཅོ༌ཅེས༌ལ༌ ཞུ༌ཁན༌བོ༌ ཧ༌གོ༌།
པི༌ཏྲར༌རི༌ ཡེ༌ཤུ༌ སུ༌ ཨིན༌ཁན༌བོ༌ ཤདས༌།
16:13 ནེ༌ 20
13 གཙོ༌བོ༌ ཡེ༌ཤུ༌ ཀཱེ༌སར༌རིའ༌ ཕི༌ལི༌པི༌ ཡུལ༌ཇོངས༌ལ༌ ལེབ༌བ༌ཅིག༌, ཁོང༌ངི༌ ཁོང༌རང༌ངི༌ ལོབ༌ཕྲུགས༌གུན༌ལ༌ ཏྲིའ༌ ཛདས༌, "མི༌གུན༌ནི༌ མི༌རིགས༌སི༌བུ༌ སུ༌ ཨིན༌ནོག༌ ཟེར༌དུག༌?"
14 ཁོང༌གུན༌ནི༌ ལན༌ཏངས༌, "ཁ༌ཅིག༌གི༌ ཁྲུས༌སལ༌ཁན༌ ཡོ༌ཧཱ༌ནན༌, ཁ༌ཅིག༌གི༌ ལུང༌སྟོན༌པ༌ ཨེ༌ལི༌ཡཱ༌ ཡང༌ ཞན༌མ༌གུན༌ནི༌ ལུང༌སྟོན༌པ༌ ཡེ༌རེམ༌ཡཱ༌ ཡ༌ ལུང༌སྟོན༌པ༌གུན༌ནི༌ ཕྲོ༌ནེ༌ ཅིག༌ཅིག༌ ཞུགས༌ཏེ༌ ཨིན༌ནོག༌ ཟེར༌དུག༌།"
15 "ཨིན༌ནའང༌ ཁྱོ༌ཞའེ༌ ཅི༌ སམ༌མ༌རག༌?" ཡེ༌ཤུའི༌ ཏྲིའ༌ ཛདས༌, "ང༌ སུ༌ ཨིན༌ནོག༌?"
16 ཤི༌མོན༌ པི༌ཏྲར༌རི༌ ལན༌ཏངས༌, "ཉེ༌རང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, སོན༌པོ༌ དཀོན༌མཆོག༌གི༌ སྲས༌ ཨིན༌ནོག༌།"
17 ཡེ༌ཤུའི༌ མོལས༌, "ཡོ༌ནཱའེ༌ བུ༌ཚ༌ ཤི༌མོན༌ ཁྱོ༌རང༌ ཅིན༌ལབས༌ཅན༌ ཨིན༌ནོག༌། ཏེ༌བོ༌ ཁྱོ༌རང༌ང༌ མིའི༌ ཆོགས༌ནེ༌ མན༌པ༌ ངའེ༌ ནམ༌ཁའེ༌ ཡབ༌བི༌ སྔོན༌ཅུག༌ག༌ ཛད༌ཏེ༌ ཨིན༌། 18 ངའེ༌ ཁྱོ༌རང༌ང༌ ཟེར༌རད༌, ཁྱོ༌རང༌ པི༌ཏྲར༌ * 16:18 གིརིས༌སི༌ སྐད༌དི༌ ནང༌ང༌ པི༌ཏྲར༌རི༌ ཏོན༌ནི༌ བྲག༌ ཨིན༌ནོག༌། ཨིན༌ནོག༌, ཡང༌ འི༌ བྲག༌གི༌ཀ༌ ངའེ༌ ང༌རང༌ངི༌ ཆོས༌ཚོགས༌ རྩིག༌ཨིན༌། ཤེ༌ཏན༌ནི༌ ཝང༌ངའི༌ ངའེ༌ ཆོས༌ཚོགས༌ལ༌ ཕམ༌ཀལ༌ མ༌ནེ༌ མི༌ཉན༌། † 16:18 གིརིས༌སི༌ སྐད༌དི༌ ནང༌ང༌ "ཉལ༌ཝའེ༌ གྱས༌སྒོ༌གུན༌ནི༌ ངའེ༌ ཆོས༌ཚོགས༌པོའ༌ ཕམ༌ཀལ༌ མི༌ཉན༌" ཟེར༌ཏེ༌ བྲིས༌ཏེ༌ དུག༌། 19 ནམ༌ཁའེ༌ གྱལ༌སྲིད༌དི༌ ཀུ༌ལིག༌གུན༌ ངའེ༌ ཁྱོ༌རང༌ང༌ ཏང༌ཨིན༌། ཇིག༌རྟེན༌ནི༌ཀ༌ ཁྱོ༌རང༌ངི༌ གོངས༌པ༌ མ༌ཏང༌ཁན༌བོའ༌ ནམ༌ཁའེ༌ དཀོན༌མཆོག༌གིའང༌ གོངས༌པ༌ སལ༌ལ༌ མི༌ཛད༌, ཡང༌ ཇིག༌རྟེན༌ནི༌ཀ༌ ཁྱོ༌རང༌ངི༌ གོངས༌པ༌ ཏང༌ཁན༌བོའ༌ ནམ༌ཁའེ༌ དཀོན༌མཆོག༌གིའང༌ གོངས༌པ༌ སལ༌ལ༌ ཛད༌ཨིན༌།
20 ཏེ༌ནེ༌ ཁོང༌རང༌ངི༌ ལོབ༌ཕྲུགས༌གུན༌ལ༌ ཁོང༌ མ༌ཤི༌ཀ༌ ཨིན༌ཁན༌བོ༌ སུའང༌ མ༌ཤད༌ མོལ༌ཏེ༌ བཀའ༌ སལས༌།
ཡེ༌ཤུའི༌ ཁོང༌རང༌ ཀྲོང༌ཤེས༌སི༌ སྐོར༌ལ༌ ལུང༌སྟན༌ ཛདས༌།
16:21 ནེ༌ 28
21 ཏེ༌ནེ༌ཕར༌ལ༌ གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌, ཁོང༌ ཡེ༌རུ༌ཤ༌ལེམ༌མ༌ སོང༌ཏེ༌ ཡ༌ཧུ༌དཱ༌པའེ༌ འུ༌སྐྱོང༌གུན༌, བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ རྡུག༌ངལ༌ མང༌པོ༌ ལྟན༌ཏེ༌ སད༌ཅེས༌ ཡང༌ ཞག༌ སུམ༌པའེ༌ ཞག༌ག༌ སོན༌པོ༌ ལང༌ཅེས༌སི༌ སྐོར༌གུན༌ ཧ༌གོ༌ཅུག༌ཅེས༌ གོ༌ཟུག༌ ཛདས༌།
22 པི༌ཏྲར༌རི༌ ཁོང༌ སོ༌སོའ༌ ཁྱེར༌ཏེ༌ ཁའ༌སྐྱེས༌ ཡང༌ ཟེརས༌, "གཙོ༌བོ༌ལེ༌, ཏེ༌ཟུག༌ དཀོན༌མཆོག༌གི༌ ཆ༌ཅུག༌ག༌ མི༌ཛད༌། ཉེ༌རང༌ང༌ འི༌ཙོགས༌ མ༌ནེ༌ ཆའ༌ མ༌གོས༌།"
23 ཡེ༌ཤུའི༌ པི༌ཏྲར༌ ཆོགས༌ལ༌ ཟིགས༌ཏེ༌ མོལས༌, "ཤེ༌ཏན༌, ང༌ནེ༌ ཐག༌རིང༌ང༌ སོང༌། ཁྱོ༌རང༌ངི༌ ངའ༌ སྒག༌གྱབ༌ ཅུག༌ག༌ནོག༌། ཁྱོ༌རང༌ངི༌ སམ༌ཚུལ༌ དཀོན༌མཆོག༌གི༌ ཆོགས༌ནེ༌ མན༌པ༌, མིའི༌ ཆོགས༌ནེ༌ ཨིན༌ནོག༌།"
24 ཏེ༌ནེ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, "ངའེ༌ སྟིང༌རང༌ནེ༌ ཡོང༌ང༌ ཐད༌ཁན༌གུན༌, རང༌དོད༌ ཕངས༌ཏེ༌ རང༌ངི༌ རྡུག༌ངལ༌ལི༌ རྐྱང༌ཤིང༌ ཁུར༌ཏེ༌ ངའ༌ བྲངས༌གོས༌། 25 རང༌སྲོག༌ སྐྱོབ༌ཉིན༌ ཡོད༌ཁན༌གུན༌ནི༌ དེན༌བའེ༌ མི༌ཚེ༌ སྐྱལ༌ཨིན༌, ཨིན༌ནའང༌ ངའེ༌ ཕིའ༌ ཁོ༌རང༌ངི༌ སྲོག༌ སྐྱལ༌ཁན༌གུན༌ལ༌ དེན༌བའེ༌ མི༌ཚེ༌བོ༌ ཐོབ༌ཨིན༌། 26 མི༌ཞིག༌ག༌ ཇིག༌རྟེན༌ གང༌པོ༌ ཐོབ༌ཏེའང༌ རང༌ངི༌ ཐའ༌མེད༌པའེ༌ མི༌ཚེ༌ སྐྱལ༌ན༌ ཅི༌ ཕན༌ཐོགས༌, ཡ༌ ཏེ༌བོའེ༌ ཚབས༌ལ༌ མི༌ཞིག༌གི༌ ཅི༌ ཏང༌ཉན༌ཨིན༌? 27 མི༌རིགས༌སི༌བུ༌ ནམ༌ཁའེ༌ ཡབ༌བི༌ ཟིར༌རྗིད༌དི༌ ནང༌ང༌ ཁོང༌ངི༌ ཕོ༌ཉ༌ ཉམ༌པོ༌ ཡོངས༌ཏེ༌, མི༌ རེ༌རེའ༌ རང༌རང༌ངི༌ ལས༌ ནང༌ཞིན༌ སོལ༌རས༌ ཏང༌ཨིན༌། 28 ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ཀ༌ ཡོད༌ཁན༌ ཁ༌ཅིག༌གི༌ མི༌རིགས༌སི༌བུ༌ ཁོ༌རང༌ངི༌ གྱལ༌སྲིད༌དི༌ ནང༌ང༌ སྐྱོད༌ཅེས༌པོ༌ ཐོང༌ཏེ༌ མ༌ནེ༌ མི༌ཤི༌།"