14
ཡོ༌ཧཱ༌ནན༌ ཀྲོངས༌ཁན༌ནི༌ སྐོར༌།
14:1 ནེ༌ 12
1 ཏེན༌ན༌ ཏུས༌ལ༌ ཀའ༌ལོན༌ ཧེ༌རོ༌དཱ༌ལ༌ གཙོ༌བོ༌ ཡེ༌ཤུའི༌ ཆག༌ལས༌གུན༌ནི༌ སྐོར༌ལ༌ ཚོར༌ཏེ༌ 2 ཁོའེ༌, ཁོའ༌ ཁད༌ད༌ ཏང༌ཁན༌གུན༌ལ༌ ཟེརས༌, "འི༌ མི༌བོ༌ ཁྲུས༌སལ༌ཁན༌ ཡོ༌ཧཱ༌ནན༌ ཨིན༌ནོག༌, ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ པ༌སང༌ ཁོང༌ང༌ ཛད༌པ༌ ལྟན༌ཅེས༌སི༌ ཁྱུད༌ ཡོད༌ཏེ༌ ཨིན༌ནོག༌།"
3 ཧེ༌རོ༌དཱའི༌ ཡོ༌ཧཱ༌ནན༌ ཟུམས༌ཏེ༌ ལྕག༌ཐག༌ག༌ ཏགས༌ཏེ༌ ཙོན༌ཁང༌ང༌ ཀག༌ཅུགས༌ཏེ༌ ཨིན༌པིན༌། ཁོའེ༌ ཏེ༌བོ༌ ཁོ༌རང༌ངི༌ ཨ༌ཅོ༌ ཕི༌ལིབ༌བི༌ ན༌མ༌ ཧེ༌རོ༌དཱིས༌སི༌ ཕིའ༌ ཅོས༌, 4 ཅིའ༌ཟེར༌ན༌ ཡོ༌ཧཱ༌ནན༌ནི༌ ཧེ༌རོ༌དཱ༌ལ༌ མོལ༌ལད༌པིན༌, "ཁྱོ༌རང༌ངི༌ ཨ༌ཅོའེ༌ ན༌མ༌ ཉམ༌པོ༌ ན༌མ༌ ཅོ༌ཅེས༌པོ༌ དཀོན༌མཆོག༌གི༌ ཁྲིམས༌སི༌ གྱབ༌གལ༌ ཨིན༌ནོག༌།" 5 ཧེ༌རོ༌དཱ༌ལ༌ ཡོ༌ཧཱ༌ནན༌ སད༌ཉིན༌ ཡོད༌པིན༌, ཨིན༌ནའང༌ མི༌ཚོགས༌ལ༌ ཇིགས༌སད༌པིན༌ ཅིའ༌ཟེར༌ན༌ ཁོང༌གུན༌ནི༌ ཡོ༌ཧཱ༌ནན༌ལ༌ ལུང༌སྟོན༌པ༌ རྩིའད༌པིན༌།
6 ཨིན༌ནའང༌ ཧེ༌རོ༌དཱའི༌ སྐྱེ༌ཞག༌གི༌ ཞག༌ག༌, གྲོན༌པོ༌གུན༌ནི༌ དུན༌ལ༌ ཧེ༌རོ༌དཱིས༌སི༌ བུ༌མོའེ༌ རྩེས༌ཏང༌ཏེ༌ ཧེ༌རོ༌དཱ༌ སྲན༌ཏྲེ༌ ཐད༌ ཅུགས༌པ༌, 7 ཁོའེ༌ བུ༌མོའ༌ ཅི༌ གོས༌ནའང༌ ཏང༌ཨིན༌ ཟེར༌ཏེ༌ ནའ༌ ཁུརས༌། 8 བུ༌མོའེ༌ ཨ༌མའེ༌ ཟེར༌ཁན༌ ནང༌ཞིན༌, "ངའ༌ ཁྲུས༌སལ༌ཁན༌ ཡོ༌ཧཱ༌ནན༌ནི༌ གོ༌ ཐལ༌ལི༌ཞིག༌གི༌ཀ༌ སལ༌" ཟེརས༌། 9 གྱལ༌པོ༌ ཚེར༌ ཨིན༌ནའང༌ གྲོན༌པོ༌གུན༌ནི༌ དུན༌ལ༌ ནའ༌ ཁུར༌ཁན༌བོའེ༌ ཞས༌ཏེ༌ བུ༌མོའ༌ གོས༌ཁན༌བོ༌ ཏོང༌ ཟེར༌ཏེ༌ བཀའ༌ ཏངས༌། 10 ཏེ༌ནེ༌ ཙོན༌ཁང༌ངི༌ ནང༌ང༌ ཡོ༌ཧཱ༌ནན༌ནི༌ གོ༌ ཅད༌ཏེ༌ 11 ཐལ༌ལི༌ཀ༌ ཁྱོངས༌ཏེ༌ ཧེ༌རོ༌དཱིས༌སི༌ བུ༌མོའ༌ ཏངས༌། བུ༌མོའེ༌ ཏེ༌བོ༌ ཁོ༌རང༌ངི༌ ཨ༌མ༌ ཡོད༌ས༌ ཁྱོངས༌། 12 ཡོ༌ཧཱ༌ནན༌ནི༌ ལོབ༌ཕྲུགས༌གུན༌ ཡོངས༌ཏེ༌ ཁོང༌ངི༌ སྤུར༌བོ༌ ཁྱེར༌ཏེ༌ སུབས༌། ཏེ༌ནེ༌ ཁོང༌གུན༌ སོང༌ཏེ༌ ཡེ༌ཤུའ༌ ཤདས༌།
མི༌ སྟོང༌ལྔ༌ གྲངས༌ཤུག༌ག༌ ཛདས༌།
14:13 ནེ༌ 21
13 གཙོ༌བོ༌ ཡེ༌ཤུའི༌ ཏེ༌ བྱུང༌ཁན༌བོ༌ སན༌ན༌ཅིག༌ ཁོང༌རང༌ངི༌ ལོབ༌ཕྲུགས༌གུན༌ ཉམ༌པོ༌ གྲུ༌ཟིང༌ཞིག༌གི༌ ནང༌ང༌ ཞོན༌ཏེ༌ སུའང༌ མེད༌སའེ༌ ནས༌ས༌ཞིག༌ག༌ སྐྱོདས༌། མི༌ཚོགས༌སི༌ ཏེ༌བོ༌ ཚོར༌ར༌ཅིག༌ གྲོང༌ཁྱེར༌གུན༌ནེ༌ བིང༌ཏེ༌ ཡེ༌ཤུ༌ སྐྱོད༌སའེ༌ ནས༌ས༌ གྲུལ༌ཏེ༌ སོང༌། 14 གྲུ༌ཟིང༌ནེ༌ བབས༌ཏེ༌ ཡེ༌ཤུའི༌ མི༌ཚོགས༌ ཆེན༌མོ༌ ཟིགས༌ས༌ཅིག༌, ཁོང༌ང༌ ཁོང༌གུན༌ནི༌ཀ༌ སྙིང༌རྗེ༌ སྐྱེའ༌ ཛད༌ཏེ༌ ནད༌པ༌གུན༌ གྱལ༌ཅུག༌ག༌ ཛདས༌།
15 ཉི༌མ༌ སྐྱོད༌ད༌ཅིག༌ ལོབ༌ཕྲུགས༌གུན༌ ཁོང༌ ཡོད༌ས༌ ཡོངས༌ཏེ༌ ཟེརས༌, "གམ༌ཡུལ༌གུན༌ལ༌ སོང༌ཏེ༌ ཁོ༌རང༌གུན༌ནི༌ ཕིའ༌ ཟན༌ ཉོ༌ཅེས༌ལ༌ མི༌ཚོགས༌པོ༌ ལམ༌ཅུག༌ག༌ ཛད༌དའང༌ ཅིའ༌ཟེར༌ན༌ ང༌དང༌གུན༌ ཅའང༌ མེད༌སའེ༌ རི༌སྟོང༌ངི༌ ནང༌ང༌ ཨིན༌ནོག༌ ཡང༌ མུན༌ཅུའང༌ རུབ༌ཀྱིས༌ དུག༌།"
16 ཡེ༌ཤུའི༌ ལན༌སལས༌, "ཁོང༌གུན༌ ཆ༌གོས༌ མེད༌། ཁྱོ༌ཞའེ༌ ཁོང༌གུན༌ལ༌ ཟའ༌ཅེས༌ ཏོང༌།"
17 ཁོང༌གུན༌ནི༌ ཟེརས༌, "ང༌ཞའེ༌ ལག༌ག༌ ཏ༌གི༌ ལྔ༌ དང༌ ཉ༌ ཉིས༌ མ༌ནེ༌ མེད༌།"
18 ཡེ༌ཤུའི༌ མོལས༌ "ཏེ༌གུན༌ ངའེ༌ཀ༌ ཁྱོང༌།" 19 ཏེ༌ནེ༌ མི༌ཚོགས༌པོའ༌ རྩའི༌ཀ༌ དུག༌ཅེས༌ལ༌ མོལས༌། ཏ༌གི༌ ལྔ༌ དང༌ ཉ༌ ཉིས༌པོ༌ ཆག༌ག༌ ནམས༌ ཡང༌ ནམ༌ཁའ༌ ཟིགས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌, ཏ༌གི༌ ཅགས༌ཏེ༌ མི༌ཚོགས༌ལ༌ བགོ༌ཅེས༌སི༌ ཕིའ༌ ལོབ༌ཕྲུགས༌གུན༌ལ༌ སལ༌ལ༌ ཛདས༌། 20 ཁོང༌ ཚང༌མ༌ གྲང༌གྲང༌ ཟོས༌ ཡང༌ ལོབ༌ཕྲུགས༌གུན༌ནི༌ ལག༌ལུས༌གུན༌ ལྡུས༌པ༌ པག༌ཙེ༌ ཅུག༌ཉིས༌ གང༌། 21 བུ༌མོ༌ དང༌ ཕྲུ༌གུ༌གུན༌ མ༌ཐེའ༌ སྟོང༌ལྔ༌ ཟམ༌ཤིག༌ ཏེ༌རུ༌ ཟན༌ ཟའ༌ཁན༌ ཡོད༌པིན༌།
ཡེ༌ཤུའི༌ ཚོའེ༌ཀ༌ ཞབ༌གྲུལ༌ ཛདས༌།
14:22 ནེ༌ 36
22 ཏེན༌ན༌མལ༌ལ༌ གཙོ༌བོ༌ ཡེ༌ཤུའི༌ མི༌ཚོགས༌པོ༌ ལོགས༌ཏེ༌ ལམ༌ཅུག༌ག༌ ཛད༌ ཟ༌ནེ༌ ཁོང༌ངི༌ ལོབ༌ཕྲུགས༌གུན༌ ཁོང༌རང༌ངི༌ སང༌ སྔུན༌ལ༌ གྲུ༌ཟིང༌ངི༌ ནང༌ང༌ ཚོའེ༌ འ༌ངོ༌ ཆོགས༌ལ༌ ལམ༌ཅུག༌ག༌ ཛདས༌། 23 མི༌ཚོགས༌ ལོག༌ཏེ༌ ལམ༌ཅུག༌ ཚར༌ར༌ཅིག༌ ཡེ༌ཤུ༌ ཅིག༌པོ༌ རི༌ཀ༌ མོས༌ལམ༌ ཞུའ༌ སྐྱོདས༌། ཁོང༌ ཏེ༌རུ༌ ཅིག༌པོ༌ ཡོད༌དི༌ ཏུས༌ མུན༌ཅུ༌རུབ༌།
24 ཏེན༌ན༌ ཏུས༌ལ༌ གྲུ༌ཟིང༌བོ༌ ས༌ཀྱད༌ནེ༌ ཐག༌རིང༌ང༌ ལེབས༌ཏེ༌ ཡོད༌ ཟ༌ནེ༌, དུན༌ནེ༌ ལུངས༌པོ༌ ཀྲག༌པོ༌ ཡོངས༌པ༌ ཆུལ༌བག༌ གྲུ༌ཟིང༌ང༌ གྱབས༌། 25 ཧ༌ལམ༌ ང༌ཏོག༌ ཆུ༌ཚོད༌ སུམ༌པ༌ཞིག༌གི༌ཀ༌ ཡེ༌ཤུ༌ ཚོའེ༌ ཀ༌ནེ༌ གྲུལ༌ཨིན༌ ལོབ༌ཕྲུགས༌གུན༌ ཡོད༌ས༌ སྐྱོད༌། 26 ལོབ༌ཕྲུགས༌གུན༌ནི༌ ཡེ༌ཤུ༌ ཚོའེ༌ ཀ༌ནེ༌ ཞབ༌གྲུལ༌ལ༌ སྐྱོད༌ཨིན༌ ཐོང༌ང༌ཅིག༌ མ༌སྲན༌ཏྲེ༌ ཇིགས༌ཏེ༌, ཀུ༌ཅོ༌ ཏང༌ཨིན༌, "ཤིན༌དྲེ༌ ཨིན༌ནོག༌" ཟེརས༌།
27 ཨིན༌ནའང༌ ཏེན༌ན༌མལ༌ལ༌ ཡེ༌ཤུའི༌ ཁོང༌གུན༌ལ༌ མོལས༌, "ཇིགས༌ མ༌ཇིགས༌ ང༌ ཨིན༌། ཧམ༌པ༌ ཅོས༌།"
28 པི༌ཏྲར༌རི༌ ལན༌ཏངས༌, "གཙོ༌བོ༌ ཉེ༌རང༌ ཨིན༌ན༌ ངའ༌ ཆུའི༌ཀ༌ གྲུལ༌ཏེ༌ ཉེ༌རང༌ ཡོད༌ས༌ ཡོང༌ མོལ༌ལའང༌།"
29 ཡེ༌ཤུའི༌, "ཡོང༌" མོལས༌།
པི༌ཏྲར༌ གྲུ༌ཟིང༌ནེ༌ བབས༌ཏེ༌ ཆུའི༌ཀ༌ གྲུལ༌ཨིན༌ ཡེ༌ཤུ༌ ཡོད༌ས༌ སོང༌། 30 ཨིན༌ནའང༌ ལུངས༌པོ༌ སྲན༌ཏྲེ༌ དང༌ ཆུལ༌བག༌ ཐོང༌ང༌ཅིག༌ ཁོ༌ ཇིགས༌ ཡང༌ ནུབ༌ཅེས༌ གོ༌ཟུག༌པ༌ ཀུ༌ཅོ༌ ཏངས༌ཏེ༌ ཟེརས༌, "གཙོ༌བོ༌ལེ༌, ང༌ སྐྱོབ༌བ༌ ཛད༌།"
31 ཏེན༌ན༌མལ༌ལ༌ ཡེ༌ཤུའི༌ ཆག༌ རྐྱང༌ང༌ ཛད༌ཏེ༌ ཁོ༌ ཟུམས༌, "ཏད༌པ༌ ཆུ༌ངུན༌ ཡོད༌ཁན༌ ཁྱོ༌རང༌ངི༌ ཐེ༌ཚོམས༌ ཅིའ༌ ཅོའད༌" མོལས༌།
32 ཁོང༌ ཉིས༌ཀོ༌ གྲུ༌ཟིང༌ངི༌ ནང༌ང༌ ཞོན༌ན༌ཅིག༌ ལུངས༌པོ༌བོ༌ ཆད༌། 33 གྲུ༌ཟིང༌ངི༌ ནང༌ང༌ ཡོད༌ཁན༌གུན༌ནི༌ ཁོང༌ང༌ ཅོལ༌ཨིན༌ ཟེརས༌, "དེན༌བ༌, ཉེ༌རང༌ དཀོན༌མཆོག༌གི༌ སྲས༌ ཨིན༌ནོག༌།"
34 ཁོང༌གུན༌ ཚོའེ༌ འ༌ངོ༌ ཆོགས༌ལ༌ སྐྱོདས༌ ཡང༌ ཆུའི༌ ཐའ༌མ༌ གེ༌ནེ༌ས༌རེད༌དི༌ གྲོང༌ཁྱེར༌ལ༌ ལེབ༌། 35 ཏེ༌ གྲོང༌ཁྱེར༌པ༌གུན༌ནི༌ ཡེ༌ཤུ༌ ཨིན༌ཁན༌བོ༌ ངོ༌ཤེས༌པ༌ ཉེ༌ཁོར༌རི༌ ནས༌ས༌ ཚང༌མ༌ལ༌ ཡེ༌ཤུ༌ སྐྱོད༌ཏེ༌ དུག༌ ཟེར༌ཏེ༌ ལོན༌ ཀལས༌། མི༌གུན༌ནི༌ ཟུ༌མོ༌ ཡོད༌ཁན༌ ཚང༌མ༌ ཁོང༌ ཡོད༌ས༌ ཁྱོངས༌། 36 ཁོང༌གུན༌ནི༌ ཟུ༌མོ༌ ཡོད༌ཁན༌གུན༌ལ༌ ཡེ༌ཤུའི༌ ནམ༌ཟའེ༌ ཀྲུ༌ཞིག༌ག༌ ལག༌པ༌ རྩེ༌ ཅུག༌ག༌ ཛད༌ཅེས༌ལ༌ ཇུ༌ཇུ༌ ཟེར༌ཨིན༌ ཞུ༌ཝ༌ ཕུལས༌, ཡང༌ ཁོང༌ངི༌ ནམ༌ཟའ༌ ལག༌པ༌ རྩེ༌ཁན༌ ཚང༌མ༌ ཕན༌།