5
གཙོ༌བོ༌ ཡེ༌ཤུའི༌ རི༌ཀ༌ ཆོས༌ སལ༌ལ༌ ཛདས༌།
5:1 ནེ༌ 12
1 མི༌ཚོགས༌ ཆེན༌མོ༌ ཛོམ༌ཨིན༌ ཟིགས༌ས༌ཅིག༌, གཙོ༌བོ༌ ཡེ༌ཤུ༌ རི༌ཀ༌ ཀེན༌ལ༌ སྐྱོད༌ཏེ༌ ཞུགས༌ས༌ ཛདས༌། ཏེ༌ནེ༌ ཁོང༌ངི༌ ལོབ༌ཕྲུགས༌གུན༌ ཁོང༌ ཡོད༌ས༌ ཡོངས༌། 2 ཡེ༌ཤུའི༌ ཁོང༌གུན༌ལ༌ ལབ༌ཞ༌ སལ༌ཅེས༌ གོ༌ཟུག༌ ཛད༌ཏེ༌ མོལས༌,
3 དཀོན༌མཆོག༌ནེ༌ རོགས༌ ཙལ༌ཁན༌གུན༌ ཅིན༌ལབས༌ཅན༌ ཨིན༌,
ཅིའ༌ཟེར༌ན༌ ཁོང༌གུན༌ལ༌ ནམ༌ཁའེ༌ གྱལ༌སྲིད༌ ནོར༌སྐལ༌ལ༌ ཐོབ༌ཨིན༌།
4 སེམས༌སི༌ ནང༌ང༌ རྡུག༌པོ༌ ཡོད༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ དཀོན༌མཆོག༌གི༌ ཁོང༌གུན༌ལ༌ སེམས༌སོ༌ སལ༌ལ༌ ཛད༌ཨིན༌།
5 པས༌མོ༌ ཡོད༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁོང༌གུན༌ལ༌ ཇིག༌རྟེན༌ གང༌པོ༌ ནོར༌སྐལ༌ལ༌ ཐོབ༌ཨིན༌།
6 དྲང༌པོ༌ ཐེའ༌ ཛད༌ཅེས༌ལ༌ སྟོགས༌ཨིན༌ སྐོམས༌ཨིན༌ ཡོད༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁོང༌གུན༌ ཚིམ༌ཤུག༌ག༌ ཛད༌ཨིན༌།
7 ཞན༌མའ༌ སྙིང༌རྗེ༌ ལྟན༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁོང༌གུན༌ལ༌ སྙིང༌རྗེ༌ ལྟན༌ན༌ ཛད༌ཨིན༌།
8 སེམས༌ ལག༌མོ༌ ཡོད༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁོང༌གུན༌ནི༌ དཀོན༌མཆོག༌ ཇལ༌ཨིན༌།
9 ཐུན༌བྲེལ༌ ཁྱོང༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁོང༌གུན༌ལ༌ དཀོན༌མཆོག༌གི༌ ཕྲུ༌གུ༌ མོལ༌ཨིན༌།
10 ལམ༌ དྲང༌པོའེ༌ཀ༌ གྲུལ༌ཅེས༌པོའེ༌ རྡུག༌ངལ༌ ཐོང༌ཁན༌གུན༌ ཅིན༌ལབས༌ཅན༌ ཨིན༌
ཅིའ༌ཟེར༌ན༌ ཁོང༌གུན༌ལ༌ ནམ༌ཁའེ༌ གྱལ༌སྲིད༌ ནོར༌སྐལ༌ལ༌ ཐོབ༌ཨིན༌།
11 ངའ༌ ཏད༌པ༌ ཅོ༌ཅེས༌པོའེ༌, ཞན༌མ༌གུན༌ནི༌ ཁྲེལ༌ ཅུགས༌ཏེ༌ ནགས༌བར༌དོ༌ ཡང༌ ཟུན༌ནི༌ ཏམ༌ངན༌ སྣ༌ཙོགས༌ ཕོག༌ཁན༌གུན༌ ཅིན༌ལབས༌ཅན༌ ཨིན༌། 12 གའ༌མོ༌ དང༌ ཐད༌པོ༌ ཅོ༌ཤིག༌, ཅིའ༌ཟེར༌ན༌ ནམ༌ཁའེ༌ ནང༌ང༌ ཁྱོ༌ཞའ༌ སོལ༌རས༌ ཀྲག༌པོ༌ ཡོད༌, ཁོང༌གུན༌ནི༌ ཁྱོ༌ཞའེ༌ སང༌ སྔུན༌ལ༌ ཡོངས༌ཁན༌ དཀོན༌མཆོག༌གི༌ ལུང༌སྟོན༌པ༌གུན༌ལའང༌ ཏེན༌ན༌ ཙོགས༌ ནགས༌བར༌དོ༌ ལྟན༌ཏེ༌ ཨིན༌པིན༌།
ཚཱ༌ དང༌ འོད༌།
5:13 ནེ༌ 16
13 གཙོ༌བོ༌ ཡེ༌ཤུའི༌ མོལས༌, "ཇིག༌རྟེན༌པ༌གུན༌ནི༌ ཕིའ༌ ཁྱོ༌ཞ༌གུན༌ ཚཱ༌ ཨིན༌། ཨིན༌ནའང༌ གལ༌ཏེས༌ ཚཱའེ༌ བྲོད༌པོ༌ ཡོལ༌ན༌ ཏེ༌བོ༌ ཀ༌ཟུག༌གི༌ ལོགས༌ཏེ༌ ཁྱོང༌ཨིན༌? ཏེ༌བོ༌ ཕི༌ལོག༌ག༌ ཕངས༌ཏེ༌ མི༌གུན༌ནི༌ རྐང༌པའེ༌ ཡོག༌ག༌ ནན༌ཅེས༌ མ༌ནེ༌ ཡང༌ ཅའང༌ ཕན༌ཐོགས༌ མེད༌ཀྱག༌།"
14 "ཇིག༌རྟེན༌པ༌གུན༌ནི༌ ཕིའ༌ ཁྱོ༌ཞའ༌ འོད༌ ཨིན༌ནོག༌, རི༌ཀ༌ ཡོད༌ཁན༌ནི༌ གྱལ༌ས༌ ཀབ༌ མི༌ཉན༌ཅེས༌ ཙོགས༌། 15 མི༌གུན༌ནི༌ འོད༌ ཏུགས༌ཏེ༌ གོར༌མོའེ༌ ཡོག༌ག༌ མ༌བོར༌ར༌ ནང༌ང༌ ཡོད༌ཁན༌ ཚང༌མའ༌ ཐོང༌ཅེས༌ལ༌ འོད༌སྟགས༌སི༌ཀ༌ བོར༌ཨིན༌། 16 ཏེན༌ན༌ ཙོགས༌ལ༌ ཁྱོ༌ཞའེ༌ ལས༌ ཟང༌པོ༌གུན༌ ཐོང༌ཏེ༌ མི༌གུན༌ནི༌ ཁྱོ༌ཞའེ༌ ནམ༌ཁའ༌ ཞུགས༌ཁན༌ནི༌ ཡབ༌ དཀོན༌མཆོག༌ག༌ སྟོད༌པ༌ ཕུལ༌ཅེས༌སི༌ ཕིའ༌ ཁྱོ༌ཞའེ༌ འོད༌དི༌ ལྡངས༌པོ༌ ཁོང༌གུན༌ནི༌ཀ༌ ཕོག༌ཅུག༌ཤིག༌།"
དཀོན༌མཆོག༌གི༌ བཀའ༌ཁྲིམས༌པོ༌ ཁག༌ཅན༌ ཨིན༌།
5:17 ནེ༌ 20
17 གཙོ༌བོ༌ ཡེ༌ཤུའི༌ མོལས༌, "ང༌ མོ༌ཟེས༌སི༌ བཀའ༌ཁྲིམས༌ ཡ༌ ལུང༌སྟོན༌པ༌གུན༌ནི༌ ལབ༌ཞ༌གུན༌ མེད༌ཁན༌ ཅོའ༌ ཡོང༌ཏེ༌ ཨིན༌ནོག༌ མ༌སམ༌། ཏེ༌གུན༌ མེད༌ཁན༌ མ༌ཅོའ༌ གྲུབ༌ ཅུག༌ག༌ལ༌ ཡོངས༌པིན༌། 18 ངའེ༌ དེན༌བ༌ ཟེར༌རད༌ ནམ༌ཁའ༌ དང༌ ས༌ ཉིས༌ཀོ༌ སྟོར༌རི༌ སང༌ སྔུན༌ལ༌ དཀོན༌མཆོག༌གི༌ བཀའ༌ཁྲིམས༌སི༌ ཨི༌གེ༌ ཡ༌ ཚིག༌ཅིག༌གའང མ༌སྟོར༌ར༌ ཏེ༌ ཚང༌མ༌ དྲན༌དྲ༌ གྲུབ༌ཨིན༌། 19 གལ༌ཏེས༌ སུ༌ཞིག༌གི༌ དཀོན༌མཆོག༌གི༌ བཀའ༌རྒྱ༌ ཚང༌མའེ༌སང༌ ཆུ༌ངུན༌ཞིག༌གའང༌ ཅག༌ན༌ ཡང༌ ཏེན༌ན༌ ཙོགས༌ ཞན༌མ༌གུན༌ལ༌ ལབ༌བད༌ན༌ ཏེ༌ མི༌བོའ༌ ནམ༌ཁའེ༌ གྱལ༌སྲིད༌དི༌ ནང༌ང༌ ཚང༌མའེ༌སང༌ རིན༌མེད༌ རྩི༌ཨིན༌། ཨིན༌ནའང༌ གལ༌ཏེས༌ སུ༌ཞིག༌གི༌ བཀའ༌ སྲུངས༌ཏེ༌ ཞན༌མ༌ ཏེ༌ཙོགས༌ ཅོ༌ཅེས༌ ལབ༌བད༌ན༌ ཏེ༌ མི༌བོའ༌ ནམ༌ཁའེ༌ གྱལ༌སྲིད༌དི༌ ནང༌ང༌ རིན༌ཅན༌ རྩི༌ཨིན༌།
20 ཏ༌ ངའེ༌ ཟེར༌རད༌, གལ༌ཏེས༌ ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ གུན༌ནི༌ མི༌ཚེ༌ དྲང༌པོ༌ཞིག༌ ཕུད༌ཁན༌བོའེ༌ སང༌ ཁྱོ༌ཞའེ༌ མི༌ཚེ༌ ཕུད༌ཁན༌བོ༌ མང༌ང༌ དྲང༌པོ༌ཞིག༌ མེད༌ན༌ ནམ༌ཁའེ༌ གྱལ༌སྲིད༌དི༌ ནང༌ང༌ ཁྱོ༌ཞ༌གུན༌ མ༌ནེ༌ ཞུགས༌ མི༌ཉན༌།"
སྲོའེ༌ སྐོར༌ལ༌ ཡེ༌ཤུའི༌ ལབ༌ཞ༌ སལས༌།
5:21 ནེ༌ 26
21 གཙོ༌བོ༌ ཡེ༌ཤུའི༌ མོལས༌, "དཀོན༌མཆོག༌གི༌ ང༌དང༌ངི༌ ཕ༌མེས༌པོ༌གུན༌ལ༌ མོལ༌ཁན༌བོ༌ ཁྱོ༌ཞའེ༌ ཚོར༌ཏེ༌ ཨིན༌ནོག༌། མི༌ མ༌སད༌, མི༌ སད༌ཁན༌གུན༌ལ༌ ཁྲིམས༌ཅད༌ ཕོག༌ཨིན༌། 22 ཨིན༌ནའང༌ ངའེ༌ ཟེར༌རད༌ རང༌ངི༌ སྤུན༌ལ༌ སྲོ༌ ཅོ༌ཁན༌བོའང༌ ཁྲིམས༌ཅད༌ ཕོག༌ཨིན༌། ཡང༌ རང༌ངི༌ སྤུན༌ལ༌ སྨད༌ར༌ ཏང༌ཁན༌བོའང༌ ཁྲིམས༌ཁུང༌ང༌ ཁྱོང༌ཨིན༌། གལ༌ཏེས༌ 'ཁྱོ༌རང༌ངི༌ སྤུན༌ཞིག༌ག༌ བུང༌བུ༌ སམ༌མེད༌ ཨིན༌ནོག༌' ཟེར༌ན༌ ཁྱོ༌རང༌ང༌ ཉལ༌ཝའེ༌ མེ༌ ཆད༌པ༌ ཕོག༌ཅེས༌སི༌ ཇིགས༌པ༌ ཨིན༌ནོག༌།
23 ཏེ༌བོའེ༌ཕིའ༌ ཆོད༌ཁྲི༌ཀ༌ ཆོད༌པ༌ ཕུལ༌ལི༌ ཏུས༌, གལ༌ཏེས༌ རང༌ངི༌ སྤུན༌ཞིག༌གི༌ གྱབ༌གལ༌ལ༌ ངན༌པ༌ ཅོས༌ཁན༌བོ༌ ཁྱོ༌རང༌ང༌ ཨིད༌ཏུ༌ ཡོང༌ན༌, 24 ཆོད༌ཁྲིའི༌ དུན༌ལ༌ ཆོད༌པ༌ བོར༌ཏེ༌ གོ༌མ༌ རང༌ངི༌ སྤུན༌ ཉམ༌པོ༌ ཐུན༌བྲེལ༌ ཅོས༌, ཏེ༌ནེ༌ སོང༌ཏེ༌ ཆོད༌པ༌ ཕུལ༌།
25 ཁྱོ༌རང༌ང༌ ཉད༌ཀལ༌ཏེ༌ ཁྲིམས༌ཁུང༌ང༌ ཁྱེར༌ཁན༌བོ༌ ཉམ༌པོ༌ ཏེ༌རུ༌ ལེབ༌བི༌ སང༌ སྔུན༌ལ༌ ལམ༌མ༌ གྱོགས༌པ༌ ནང༌གྲིག༌ ཅོས༌། ཏེ༌ མན༌ན༌ ཁོའེ༌ ཁྱོ༌རང༌ ཁྲིམས༌པོན༌ལ༌ སྟད༌སྲིད༌ཅེས༌ ཨིན༌ནོག༌, ཡང༌ ཁྲིམས༌པོན༌ནི༌ ཁྲིམས༌ཁུང༌ངི༌ མག༌སྤོན༌ལ༌ སྟད༌ཏེ༌ ཁྱོ༌རང༌ ཙོན༌ཁང༌ང༌ ཀག༌ཨིན༌། 26 ངའེ༌ ཁྱོ༌ཞའ༌ དེན༌བ༌ ཟེར༌རད༌, ཁྱོ༌རང༌ ཙོན༌ཁང༌ནེ༌ ཏེ༌ཏེ༌ཚོག༌པ༌ མི༌ཕུད༌ ནམ༌ཚོག༌པ༌ ཁྱོ༌རང༌ངི༌ ཆད༌པའེ༌ པེ༌ནེ༌ ཚང༌མ༌ མི༌ཤལ༌།
ལོག༌ཡེམ༌མི༌ སྐོར༌།
5:27 ནེ༌ 30
27 གཙོ༌བོ༌ ཡེ༌ཤུའི༌ མོལས༌, "དཀོན༌མཆོག༌གི༌ མོལ༌ཁན༌བོ༌ ཁྱོ༌ཞའེ༌ ཚོར༌ཏེ༌ ཨིན༌ནོག༌, 'རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ མ༌ཅོ༌'། 28 ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, བུ༌མོའ༌ ལུས༌བྲེལ༌ལི༌ དོད༌པ༌ ཉམ༌པོ༌ ལྟའ༌ཁན༌བོའེ༌, ཁོ༌རང༌ངི༌ སྙིང༌ངི༌ ནང༌ང༌ ཁོ༌རང༌ངི༌ ཞིད༌མད༌ མན༌ཁན༌ནི༌ ཏེ༌ བུ༌མོ༌ ཉམ༌པོ༌ ལུས༌བྲེལ༌ ཅོས༌ཏེ༌ ཨིན༌ནོག༌། 29 གལ༌ཏེས༌ ཁྱོ༌རང༌ངི༌ མིག༌ ཡས༌པའེ༌ ཁྱོ༌རང༌ང༌ སྡིག༌པ༌ ཅོ༌ཅུག༌གད༌ན༌, ཏེ༌ མིག༌པོ༌ བྲུས༌ཏེ༌ ཕངས༌ཏོང༌, ལུས༌ གང༌པོ༌ ཉལ༌ཝའེ༌ ནང༌ང༌ ཕང༌ངི༌ སང༌ ལུས༌སི༌ ཁག༌ཅིག༌ མེད༌ཁན༌ ཆ༌ན༌ གྱལ༌། 30 ཡང༌ གལ༌ཏེས༌ ཁྱོ༌རང༌ངི༌ ལག༌པ༌ ཡས༌པའེ༌ ཁྱོ༌རང༌ང༌ སྡིག༌པ༌ ཅོ༌ཅུག༌གད༌ན༌, ཏེ༌ ལག༌པ༌ ཅད༌ཏེ༌ ཕངས༌ཏོང༌, ལུས༌ གང༌པོ༌ ཉལ༌ཝའེ༌ ནང༌ང༌ ཕང༌ངི༌ སང༌ ལུས༌སི༌ ཁག༌ཅིག༌ མེད༌ཁན༌ ཆ༌ན༌ གྱལ༌།
ཞིད༌མད༌ ཅད༌ཅེས༌སི༌ སྐོར༌།
5:31 ནེ༌ 32
31 གཙོ༌བོ༌ ཡེ༌ཤུའི༌ མོལས༌, "ཁྱོ༌ཞའེ༌ འི༌བོ༌ ཚོར༌ཏེ༌ ཨིན༌ནོག༌, 'ན༌མ༌ ཅད༌ཁན༌ནི༌ བུ༌ཚའེ༌ ཁོ༌རང༌ངི༌ ན༌མ༌ ཅད༌ཁན༌བོའ༌ ཅད༌ཁན༌ནི༌ ལག༌ཁྱེར༌ ཏང༌གོས༌།' 32 ཨིན༌ནའང༌ ངའེ༌ ཁྱོ༌ཞ༌གུན༌ལ༌ ཟེར༌རད༌, རང༌ངི༌ ཞིད༌མད༌ མན༌ཁན༌ ཉམ༌པོ༌ ལུས༌བྲེལ༌ ཅོ༌ཅེས༌སི༌ ནས༌ལུག༌ མ༌སྟོགས༌, སུ༌ཞིག༌གི༌ ཁོ༌རང༌ངི༌ ན༌མ༌ ཅད༌ན༌, ཁོའེ༌ ཏེ༌ བུ༌མོ༌བོའ༌ ལོག༌ཡེམ༌ ཅོ༌ཅུགས༌ཏེ༌ ཨིན༌ནོག༌། ཡང༌ ཏེ༌ བུ༌མོ༌ ཉམ༌པོ༌ ན༌མ༌ ཅོ༌ཁན༌བོའེང༌ ལོག༌ཡེམ༌ ཅོས༌ཏེ༌ ཨིན༌ནོག༌།
ནའ༌ སྐྱལ༌ཅེས༌སི༌ སྐོར༌།
5:33 ནེ༌ 37
33 གཙོ༌བོ༌ ཡེ༌ཤུའི༌ མོལས༌, "ང༌དང༌ངི༌ ཕ༌མེས༌པོ༌གུན༌ལ༌ འི༌ ཟེར༌ཁན༌བོའང༌ ཁྱོ༌ཞ༌གུན༌ནི༌ ཚོར༌ཏེ༌ ཨིན༌ནོག༌། ནའ༌ ཁུར༌ཁན༌བོ༌ མ༌ཅག༌, ཨིན༌ནའང༌ ཁྱོ༌ཞའེ༌ གཙོ༌བོ༌ ཉམ༌པོ༌ ནའ༌ ཁུར༌ཁན༌བོ༌ གྲུབ༌ཅུག༌། 34 ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, ནའ༌ མ༌ནེ༌ མ༌ཁུར༌ཤིག༌, ནམ༌ཁའེ༌ ནའ༌ མ༌ཁུར༌ ཅིའ༌ཟེར༌ན༌ ནམ༌ཁའ༌ ནི༌ དཀོན༌མཆོག༌གི༌ ཞུགས༌ཁྲིས༌ ཨིན༌, 35 ཡ༌ ཇིག༌རྟེན༌ནི༌ ནའ༌ མ༌ཁུར༌ ཅིའ༌ཟེར༌ན༌ ཇིག༌རྟེན༌ནི༌ཀ༌ དཀོན༌མཆོག༌གི༌ ཞབས༌ བོར༌ར༌ ཛད༌ད༌ནོག༌, ཡ༌ ཡེ༌རུ༌ཤ༌ལེམ༌མི༌ ནའ༌ མ༌ཁུར༌ ཅིའ༌ཟེར༌ན༌ ཡེ༌རུ༌ཤ༌ལེམ༌ ནི༌ ཀྲག༌པོ༌ གྱལ༌པོའེ༌ གྱལ༌ས༌ ཨིན༌། 36 རང༌ངི༌ གོའི༌ ནའ༌ མ༌ཁུར༌ ཅིའ༌ཟེར༌ན༌ ཁྱོ༌ཞའ༌ ཁྱོ༌ཞའེ༌ སྲ༌ ཅིག༌གའང༌ ཀར༌པོ༌ ཡ༌ ནག༌པོ༌ ཅོ༌ཉན༌ན༌ མ༌ནོག༌། 37 ཁྱོ༌ཞའེ༌ ལན༌བོ༌ ཨིན༌ན༌ ཨིན༌ ཡ༌ མན༌ན༌ མན༌ ཟེར༌ ཅིའ༌ཟེར༌ན༌ འི༌གུན༌ནི༌ སང༌ ཐལ༌ཏེ༌ ཅི༌ཞིག༌ ཟེར༌ནའང༌ ཤེ༌ཏན༌ ངན༌པ༌ནེ༌ བྱུང༌ང༌ནོག༌།"
ངན༌པའེ༌ ལན༌ལ༌ ངན༌པ༌།
5:38 ནེ༌ 42
38 གཙོ༌བོ༌ ཡེ༌ཤུའི༌ མོལས༌, "ཁྱོ༌ཞའེ༌ འི༌བོའང༌ ཚོར༌ཏེ༌ ཨིན༌ནོག༌, ཆད༌པ༌ སྐྱོན༌བོ༌ནའང༌ ཟོབ༌གོས༌, 'མིག༌གི༌ ལན༌ལ༌ མིག༌, སོའི༌ ལན༌ལ༌ སོ༌', 39 ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, ཁྱོ༌ཞའ༌ ངན༌པ༌ ཅོ༌ཁན༌བོའ༌ ཏེན༌ན༌ ཙོགས༌ ལན༌ མ༌ཏང༌ཤིག༌། གལ༌ཏེས༌ སུ༌ཞིག༌གི༌ གྲམ༌པ༌ ཡས༌པའ༌ གྲམ༌ལྕགས༌ ཏང༌ན༌, གྲམ༌པ༌ ཡོ༌མའང༌ གྲམ༌ལྕགས༌ ལེན༌ན༌ལ༌ སྟོན༌། 40 གལ༌ཏེས༌ སུ༌ཞིག༌གི༌ ཁྱོ༌རང༌ང༌ སྐྱོན༌ ཀལ༌ཏེ༌ ཁྲིམས༌ཁུང༌ང༌ ཁྱེར༌ཏེ༌ ཆད༌པའེ༌ ཚུལ༌ལ༌ ཁྱོ༌རང༌ངི༌ ཀྲི༌ལེན༌བོ༌ ཏོང༌ ཟེར༌ན༌ རང༌ངི༌ ཀོས༌པོའང༌ ཏངས༌ཏོང༌། 41 གལ༌ཏེས༌ སུ༌ཞིག༌གི༌ ཁྱོ༌ཞའ༌ ཀི༌ལོ༌མི༌ཀྲར༌ ཅིག༌ ཝང༌ ཏངས༌ཏེ༌ གྲུལ༌ཅུག༌ན༌, ཁོ༌ ཉམ༌པོ༌ ཀི༌ལོ༌མི༌ཀྲར༌ ཉིས༌ གྲུལ༌ཏོང༌། 42 ཏོང༌ ཟེར༌ཁན༌བོའ༌ ཏངས༌ཏོང༌, ཁྱོ༌ཞའེ༌ཀ༌ སྐྱིའ༌ ཡོང༌ཁན༌བོའ༌ ལག༌སྟོང༌ང༌ ལམ༌མ༌ཅུག༌།"
གྲ༌འོའ༌ ཅམས༌པ༌ ཅོས༌།
5:43 ནེ༌ 48
43 གཙོ༌བོ༌ ཡེ༌ཤུའི༌ མོལས༌, "ཁྱོ༌ཞ༌གུན༌ནི༌ འི༌བོ༌ ཚོར༌ཏེ༌ ཨིན༌ནོག༌, 'ཁྱིམ༌ཚེས༌པ༌ ཅམས༌པ༌ ཡང༌ གྲ༌འོ༌གུན༌ལ༌ ནཕ༌རད༌ ཅོས༌'། 44 ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, གྲ༌འོ༌གུན༌ལ༌ ཅམས༌པ༌ ཅོས༌ ཡང༌ ཁྱོ༌ཞའ༌ ནགས༌བར༌དོ༌ ལྟན༌ཁན༌གུན༌ནི༌ ཕིའ༌ མོས༌ལམ༌ ཏོབ༌, 45 ཏེ༌ཟུག༌ ཅོ༌ན༌ ཁྱོ༌ཞའ༌, ནམ༌ཁའ༌ ཞུགས༌ཁན༌ནི༌ ཡབ༌བི༌ ལམ༌མི༌ཀ༌ གྲུལ༌ལ༌ནོག༌། ཉི༌མའེ༌ འོད༌ དང༌ ཆར༌པ༌ གུན༌ དཀོན༌མཆོག༌གི༌ ཟང༌ངན༌ མ༌ཕེའ༌ མི༌ཚང༌མ༌ལ༌ སལ༌ལ༌ནོག༌། 46 གལ༌ཏེས༌ ཁྱོ༌ཞའ༌ ཅམས༌པ༌ ཅོ༌ཁན༌གུན༌ལ༌ ཁྱོ༌ཞའེ༌ ཅམས༌པ༌ ཅོ༌ན༌, ཁྱོ༌ཞའ༌ སོལ༌རས༌ ཅིའ༌ ཐོབ༌ཨིན༌? གོབ༌སྐོར༌ ཏང༌ཁན༌ནི༌ ཁྲལ༌ནེན༌ཁན༌གུན༌ནིའང༌ ཏེ༌ཟུག༌ ཅོའ༌ནོག༌། 47 གལ༌ཏེས༌ ཁྱོ༌ཞའེ༌ སྤུན༌ལ༌ ཅིག༌པོའ༌ ལོན༌ སྲུལ༌ན༌, ཞན༌མ༌གུན༌ནི༌ སང༌ ཁྱོ༌ཞའེ༌ མང༌ང༌ཞིག༌ ཅི༌ ཅོས༌ཏེ༌ ཨིན༌? ཞན༌ ཆོས༌ལུག༌གི༌ མི༌གུན༌ནིའང༌ ཏེ༌ཟུག༌ ཅོའ༌ མ༌ནོག༌ག༌? 48 ཏེ༌བོའེ༌ཕིའ༌ ཁྱོ༌ཞའེ༌ ནམ༌ཁའེ༌ ཡབ༌, ཕུན༌སུམ༌ཚོགས༌པ༌ ཞུགས༌ཁན༌ ཙོགས༌ལ༌ ཁྱོ༌ཞའང༌ ཕུན༌སུམ༌ཚོགས༌པ༌ ཡོང༌གོས༌།"