16
1 ཡེ༌ཤུའི༌ མོལས༌, "ཁྱོ༌ཞ༌གུན༌ནི༌ ངའེ༌ཀ༌ ཏད༌པ༌ ཡོད༌ཁན༌བོ༌ ཕང༌ མི༌ཕང༌ཅེས༌ལ༌ ངའེ༌ འི༌ སྤེ༌ར༌ ཚང༌མ༌ ཁྱོ༌ཞ༌གུན༌ལ༌ ཤད༌ཏེ༌ ཨིན༌། 2 ཁོང༌གུན༌ནི༌ ཁྱོ༌ཞའ༌ ཆོས༌ཚོགས༌སི༌ ཕྲོ༌ནེ༌ ཕིངས༌ ཏང༌ཨིན༌། ཏེ༌ཟུག༌ ཏུས༌སང༌ ལེབ༌ཨིན༌, ཁྱོ༌ཞའ༌ སད༌ཁན༌གུན༌ནི༌ སམ༌ཨིན༌ ཁོང༌གུན༌ནི༌ དཀོན༌མཆོག༌ག༌ ཞབ༌སྟོག༌ ཞུས༌ཏེ༌ ཨིན༌། 3 ཁོང༌གུན༌ནི༌ ཏེ༌ཙོགས༌སི༌ ལས༌གུན༌ ཅོ༌ཨིན༌ ཅིའ༌ཟེར༌ན༌ ཁོང༌གུན༌ནི༌ ཡབ༌ མ༌ཤེས༌ ཡ༌ ངའང༌། 4 ཏེ༌ཏུས༌པོ༌ ལེབ༌བ༌ཅིག༌, ངའེ༌ སྔུན༌ལ༌ སྤང༌པུད༌ཁན༌བོ༌ ཁྱོ༌ཞ༌གུན༌ནི༌ ཨིད༌ཏུ༌ ཡོང༌ཅེས༌སི༌ ཕིའ༌ ངའེ༌ འི༌གུན༌ ཁྱོ༌ཞའ༌ ཤད༌ཏེ༌ ཨིན༌། སྔུན༌ལ༌ ངའེ༌ ཁྱོ༌ཞ༌གུན༌ལ༌ འི༌ ཚང༌མ༌ མ༌ཤད༌པིན༌ ཅིའ༌ཟེར༌ན༌ ང༌ ཁྱོ༌ཞ༌གུན༌ ཉམ༌པོ༌ ཡོད༌པིན༌།"
དམ༌པའེ༌ ཐུག༌ཉིད༌དི༌ ཆག༌ལས༌།
16:5 ནེ༌ 15
5 གཙོ༌བོ༌ ཡེ༌ཤུའི༌ མོལས༌, "ཏ༌ ང༌, ངའ༌ ཀལ༌ལ༌ ཛད༌ཁན༌ནི༌ ཡབ༌བི༌ སྐུན༌དུན༌ལ༌ ལོགས༌ཏེ༌ ཆའད༌, ཨིན༌ནའང༌ ཁྱོ༌ཞའེ༌ ཕྲོ༌ནེ༌ སུ༌ཞིག༌གིའང༌ ང༌ 'ཀ༌རུ༌ ཆད༌' ཟེར༌ཏེ༌ ཏྲིའ༌ མི༌དུག༌, 6 ཅིའ༌ཟེར༌ན༌ ངའེ༌ འི༌ ཚང༌མ༌ ཤད༌པ༌ ཁྱོ༌ཞའ༌ ཚེར༌ཁའེ༌ གངས༌ཏེ༌ ཡོད༌ཏེ༌ ཨིན༌ནོག༌། 7 ཨིན༌ནའང༌ ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ང༌ འི༌ཀ༌ནེ༌ ཆ༌ཅེས༌པོ༌ ཁྱོ༌ཞའེ༌ ཕིའ༌ ཕན༌ཐོགས༌ཅན༌ ཨིན༌, ཅིའ༌ཟེར༌ན༌ ནམ༌ཚོག༌པ༌ ང༌ མི༌ཆའ༌ ཏེ༌ རོགས༌ ཛད༌ཁན༌བོ༌ ཁྱོ༌ཞའེ༌ཀ༌ མི༌སྐྱོད༌, ཨིན༌ནའང༌ གལ༌ཏེས༌ ང༌ ཆ༌ན༌ ངའེ༌ ཁོང༌ ཁྱོ༌ཞའེ༌ཀ༌ ཀལ༌ཨིན༌། 8 ཁོང༌ སྐྱོད༌ད༌ཅིག༌, ཁོང༌ངི༌ ཇིག༌རྟེན༌པ༌གུན༌ནི༌ སྡིག༌པ༌, དྲང༌པོ༌ དང༌ དཀོན༌མཆོག༌གི༌ ཁྲིམས༌ཅད༌ གུན༌ནི༌ སྐོར༌ལ༌ སམ༌ཚུལ༌ ནོར༌ཏེ༌ ཨིན༌ཁན༌བོ༌ ལྟན༌ན༌ ཛད༌ཨིན༌། 9 སྡིག༌པ༌ ནི༌ ཁོང༌གུན༌ནི༌ ངའེ༌ཀ༌ ཏད༌པ༌ མིང༌ནའང༌ མི༌ཅོ༌ཅེས༌པོ༌ ཨིན༌། 10 དྲང༌པོ༌ ནི༌ ང༌ ཨིན༌ ཅིའ༌ཟེར༌ན༌ ང༌ ང༌རང༌ངི༌ ཡབ༌བི༌ཀ༌ ལོགས༌ཏེ༌ ཆའད༌ ཡང༌ ཁྱོ༌ཞ༌གུན༌ནི༌ ང༌ མི༌ཐོང༌། 11 དཀོན༌མཆོག༌གི༌ ཁྲིམས༌ཅད༌བོ༌ ནི༌ ཡོང༌ཨིན༌ ཅིའ༌ཟེར༌ན༌ དཀོན༌མཆོག༌གི༌ ཇིག༌རྟེན༌པ༌གུན༌ནི༌ཀ༌ ཝང༌སྲུལ༌ཁན༌ ཤེ༌ཏན༌ལ༌ ཁྲིམས༌ཅད༌ད༌ ཛད༌ ཚར༌ཏེ༌ ཨིན༌།"
12 "ཏ༌རུང༌ ང༌ ཤད༌རྒྱུ༌ མ༌ མང༌པོ༌ ཡོད༌, ཨིན༌ནའང༌ ཁྱོ༌ཞ༌གུན༌ལ༌ དག༌ས༌ ལྕིད༌པོ༌ ཁུར༌ ཐུབ༌ཅེས༌ མི༌དུག༌། 13 མི༌གུན༌ དྲང༌པོའེ༌ ཆོགས༌ལ༌ ཁྲིད༌ཁན༌ དམ༌པའེ༌ ཐུག༌ཉིད༌ སྐྱོད༌ད༌ཅིག༌, ཁྱོ༌ཞ༌གུན༌ལ༌ དཀོན༌མཆོག༌གི༌ དེན༌བའེ༌ ལམ༌ལྟན༌ན༌ ཛད༌ད༌ནོག༌། ཁོང༌ངི༌ ཁོང༌རང༌ངི༌ ཆོགས༌ནེ༌ མ༌མོལ༌ལ༌ ཡབ༌ནེ༌ ཚོར༌ཁན༌ ཅིག༌པོ༌ མོལ༌ལ༌ནོག༌, ཡང༌ ཁྱོ༌ཞ༌གུན༌ལ༌ ཡོང༌ཅེས༌ཅན༌ནི༌ ཏུས༌སི༌ སྐོར༌ལ༌ ཤད༌ད༌ ཛད༌ཨིན༌། 14 ཁོང༌ངི༌ ངའ༌ སྤལ༌ ཁྱོང༌ཨིན༌ ཅིའ༌ཟེར༌ན༌ ངའེ༌ ཟེར༌ཁན༌གུན༌ ཁྱོ༌ཞ༌གུན༌ལ༌ ཤད༌ད༌ ཛད༌ཨིན༌། 15 ཡབ༌བི༌ ཨིན༌ཁན༌ ཚང༌མ༌ ངའེ༌ ཨིན༌། ཏེན༌ན༌བོའེ༌ཕིའ༌ ངའེ༌ ཟེར༌རད༌ དམ༌པའེ༌ ཐུག༌ཉིད༌དི༌ ངའེ༌ ཁའ༌ནེ༌ ཚོར༌ཁན༌ ཚང༌མ༌ ཁྱོ༌ཞ༌གུན༌ལ༌ ཤད༌ད༌ ཛད༌ད༌ནོག༌།
ལོབ༌ཕྲུགས༌གུན༌ནི༌ ཚེར༌ཁ༌ ཐད༌པོའ༌ གྱུར༌།
16:16 ནེ༌ 33
16 གཙོ༌བོ༌ ཡེ༌ཤུའི༌ མོལས༌, "ཙ༌པིག༌ཤིག༌གི༌ སྟིང༌ནེ༌ ཁྱོ༌ཞའེ༌ ང༌ མི༌ཐོང༌ ཡང༌ ཙ༌པིག༌ཤིག༌ སྟིང༌ནེ༌ ཁྱོ༌ཞའེ༌ ང༌ ཡང༌སྐྱར༌ ཐོང༌ཨིན༌།"
17 ཁོང༌ངི༌ ལོབ༌ཕྲུགས༌ ཁ༌ཅིག༌གི༌ ཁོང༌རང༌ ཅིག༌ དང༌ ཅིག༌ག༌ ཏྲིས༌, "ཁོང༌ངི༌ 'ཙ༌པིག༌ཤིག༌གི༌ སྟིང༌ནེ༌ ཁྱོ༌ཞའེ༌ ང༌ མི༌ཐོང༌ ཡང༌ ཙ༌པིག༌ཤིག༌ སྟིང༌ནེ༌ ཁྱོ༌ཞའེ༌ ང༌ ཡང༌སྐྱར༌ ཐོང༌ཨིན༌' ཡང༌ 'ཅིའ༌ཟེར༌ན༌ ང༌ ཡབ༌བི༌ཀ༌ ཆའད༌' མོལ༌ཁན༌གུན༌ནི༌ ཏོན༌བོ༌ ཅི༌ ཨིན༌ནོག༌?" 18 ཁོང༌གུན༌ནི༌ ཅིག༌ དང༌ ཅིག༌ག༌ ཏྲི༌ཨིན༌ དུགས༌, "'ཙ༌པིག༌ཤིག༌གི༌' ཏོན༌ཏག༌པོ༌ ཅི༌ ཨིན༌ནོག༌? ཁོང༌ངི༌ མོལ༌ཁན༌བོ༌ ང༌དང༌གུན༌ནི༌ ཧ༌གོའ༌ མེ༌རག༌།"
19 ཡེ༌ཤུའི༌ ཁོང༌གུན༌ནི༌ ཏེ༌བོའེ༌ སྐོར༌ལ༌ ཁོང༌ང༌ ཏྲི༌ཉིན༌ ཡོད༌ཁན༌བོ༌ ཁྱེན༌པ༌, ཁོང༌ངི༌ ལོབ༌ཕྲུགས༌གུན༌ལ༌ མོལས༌, "ཁྱོ༌ཞ༌གུན༌ནི༌ ངའེ༌, 'ཙ༌པིག༌ཤིག༌གི༌ སྟིང༌ནེ༌ ཁྱོ༌ཞའེ༌ ང༌ མི༌ཐོང༌ ཡང༌ ཙ༌པིག༌ཤིག༌ སྟིང༌ནེ༌ ཁྱོ༌ཞའེ༌ ང༌ ཡང༌སྐྱར༌ ཐོང༌ཨིན༌' ཟེར༌ཁན༌ནི༌ ཏོན༌བོ༌ ཅིག༌ དང༌ ཅིག༌ག༌ ཏྲིའ༌ད༌? 20 ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ཇིག༌རྟེན༌པ༌གུན༌ནི༌ གའ༌མོ༌ ཅོ༌ ཟ༌ནེ༌ ཁྱོ༌ཞའ༌ ངུ༌ཨིན༌, རྡུག༌པོ༌ ཅོ༌ཨིན༌། ཁྱོ༌ཞ༌གུན༌ནི༌ རྡུག༌པོ༌ ཅོ༌ཨིན༌ ཨིན༌ནའང༌ ཁྱོ༌ཞའེ༌ རྡུག༌པོ༌ ཐད༌པོའེ༌ ནང༌ང༌ གྱུར༌ཨིན༌། 21 བུ༌མོ༌ཞིག༌ག༌ ཕྲུ༌གུ༌ ཇོར༌ ཟ༌ནེ༌ ཟུ༌མོ༌ སྲན༌ཏྲེ༌ ཡོང༌ང༌ནོག༌ ཅིའ༌ཟེར༌ན༌ ཁོའེ༌ ཏུས༌པོ༌ ལེབས༌ཏེ༌ ཨིན༌ནོག༌, ཨིན༌ནའང༌ ཕྲུ༌གུ༌ ཇོར༌ ཚར༌ར༌ཅིག༌, ཁོའ༌ ཟུ༌མོ༌བོ༌ ཞེད༌ཨིན༌ ཅིའ༌ཟེར༌ན༌ ཇིག༌རྟེན༌ནི༌ ནང༌ང༌ ཕྲུ༌གུ༌ སྐྱེས༌ཁན༌བོའེ༌ཀ༌ ཁོ༌ ཐད༌པོ༌ ཆའ༌ནོག༌། 22 ཏེན༌ན༌ ཙོགས༌ལ༌, དག༌ས༌ ཁྱོ༌ཞའེ༌ རྡུག༌པོ༌ ཅོ༌ཨིན༌, ཨིན༌ནའང༌ ང༌ ཁྱོ༌ཞའ༌ ཡང༌སྐྱར༌ ཐུགས༌ པ༌སང༌ ཁྱོ༌ཞ༌གུན༌ལ༌ ཐད༌པོ༌ ཡོང༌ཨིན༌། ཁྱོ༌ཞའེ༌ ཀ༌ནེ༌ ཏེ༌ གའ༌མོ༌བོ༌ སུའིང༌ ཀོགས༌ཏེ༌ ཁྱེར༌ མི༌ཉན༌། 23 ཏེ༌ཏུས༌ལ༌ ཁྱོ༌ཞའེ༌, ང༌ ཅའང༌ ཏྲི༌ཅེས༌སི༌ སྒོས༌དོམ༌ མི༌ཡོང༌། ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ངའེ༌ མིང༌ངི༌ ནང༌ང༌ ཁྱོ༌ཞའེ༌ ངའེ༌ ཡབ༌བ༌ ཅི༌ཞིག༌ ཞུ༌ནའང༌ སལ༌ལ༌ ཛད༌ཨིན༌། 24 ཁྱོ༌ཞའེ༌ དག༌ས༌ ཚག༌པ༌ ངའེ༌ མིང༌ངི༌ ནང༌ང༌ ངའེ༌ ཡབ༌བ༌ ཅི༌ཞིག༌གི༌ ཕིའང༌ མ༌ཞུས༌། ཞུ༌ན༌ ཁྱོ༌ཞ༌གུན༌ལ༌ ཐོབ༌ཨིན༌ ཡང༌ ཐད༌པོའེ༌ གང༌ཨིན༌།"
25 "དག༌ས༌ ངའེ༌ འི༌གུན༌ སྤེ༌ གྱུད༌ཏེ༌ ཤད༌ཏེ༌ ཨིན༌, ཏུས༌པོ༌ ལེབ༌ཨིན༌, ནམ༌ ངའེ༌ ང༌རང༌ངི༌ ཡབ༌བི༌ སྐོར༌ལ༌ ཁྱོ༌ཞ༌གུན༌ལ༌ སྤེ༌ མན༌པ༌ སལ༌པོ༌ སྤེ༌ར༌ གྱུད༌ཏེ༌ ཤད༌ཨིན༌། 26 ཏེ༌ ཞག༌ག༌ ཁྱོ༌ཞའེ༌ ངའེ༌ མིང༌ངི༌ ནང༌ང༌ ཞུ༌ཝ༌ ཕུལ༌ཨིན༌། ངའེ༌ ཁྱོ༌ཞ༌གུན༌ནི༌ ཚབས༌ལ༌ ཡབ༌བ༌ ཞུ༌ཝ༌ ཕུལ༌ཨིན༌ ཟེར༌ཏེ༌ མན༌, 27 ཅིའ༌ཟེར༌ན༌ ཁྱོ༌ཞ༌གུན༌ནི༌ ངའ༌ ཅམས༌པ༌ ཅོ༌ཅེས༌ ཡང༌ ང༌ ཡབ༌བི༌ ཆོགས༌ནེ༌ ཡོང༌ཁན༌བོའ༌ ཏད༌པ༌ ཡོད༌ཅེས༌པོའེ༌ ཡབ༌ ཁོང༌རང༌ངི༌ ཁྱོ༌ཞ༌གུན༌ལ༌ ཅམས༌པ༌ ཛད༌དུག༌། 28 ང༌ ཡབ༌བི༌ ཆོགས༌ནེ༌ ཇིག༌རྟེན༌ནི༌ ནང༌ང༌ ཡོངས༌ཏེ༌ ཨིན༌, ཏ༌ ང༌ ཇིག༌རྟེན༌ བོར༌ཏེ༌ ཡབ༌བི༌ སྐུན༌དུན༌ལ༌ ལོགས༌ཏེ༌ ཆའད༌།"
29 ཏེ༌ནེ༌ ཡེ༌ཤུའི༌ ལོབ༌ཕྲུགས༌གུན༌ནི༌ ཟེརས༌, "ཏ༌ ཉེ༌རང༌ངི༌ ང༌ཞ༌གུན༌ལ༌ སྤེ༌ གྱུད༌ཏེ༌ མ༌མོལ༌ལ༌, ཞལ༌ཏ༌ སལ༌པོ༌ སལ༌པོ༌ མོལ༌ལ༌ ཛད༌དུག༌། 30 ཏ༌ ང༌ཞ༌གུན༌ལ༌ ཧ༌གོ༌, ཉེ༌རང༌ངི༌ ཅི༌ཚང༌མ༌ ཁྱེན༌ན༌ནོག༌, ཉེ༌རང༌ང༌ སུ༌ཞིག༌གིའང༌ ཏྲི༌ཝ༌ ཅོ༌ཅེས༌སི༌ སྒོས༌དོམ༌ མི༌དུག༌, ཅིའ༌ཟེར༌ན༌ ང༌ཞའེ༌ ཏྲི༌ཨིན༌ སམ༌ཁན༌གུན༌ ཉེ༌རང༌ངི༌ སྔུན༌ལ༌ ཁྱེན༌ན༌ ཛད༌དུག༌། ཏེ༌བོའེ༌ ཞས༌ཏེ༌ ཉེ༌རང༌ དཀོན༌མཆོག༌གི༌ ཆོགས༌ནེ༌ སྐྱོད༌ཏེ༌ ཨིན༌ཁན༌བོའ༌ ང༌ཞའེ༌ ཏད༌པ༌ ཅོའད༌།"
31 ཡེ༌ཤུའི༌ ཁོང༌གུན༌ལ༌ མོལས༌, "ཁྱོ༌ཞ༌གུན༌ནི༌ དེན༌བ༌ ཨིད༌ཤེས༌ ཅོའད༌ད༌? 32 ཨིན༌ནའང༌ ཏུས༌པོ༌ ལེབ༌ཨིན༌ ཡང༌ ལེབ༌ ཚར༌ཏེ༌ ཨིན༌ ནམ༌ ཁྱོ༌ཞའ༌ ཡན༌ཏེ༌ ང༌ ཅིག༌པོ༌ ཕངས༌ཏེ༌ རང༌རང༌ངི༌ ཁང༌པའ༌ ཤོར༌ཨིན༌། ཏེ༌ནེའང༌ ང༌ ཅིག༌པོ༌ མན༌ ཅིའ༌ཟེར༌ན༌ ངའེ༌ ཡབ༌ ང༌ ཉམ༌པོ༌ ཞུགས༌ཏེ༌ ཡོད༌།
33 ངའ༌ ཉམ༌པོ༌ བྲེལ༌ ཡོད༌ཅེས༌པོའེ༌, ཁྱོ༌ཞ༌གུན༌ལ༌ ཞི༌དེ༌ ཐོབ༌ཅེས༌ལ༌ ངའེ༌ འི༌ སྤེ༌ར༌གུན༌ ཟེར༌ཏེ༌ ཨིན༌། འི༌ ཇིག༌རྟེན༌ནི༌ ནང༌ང༌ ཁྱོ༌ཞ༌གུན༌ལ༌ རྡུག༌ངལ༌ ཐོང༌ཨིན༌, ཨིན༌ནའང༌ སྤོས༌པ༌ བོར༌ཤིག༌, ཇིག༌རྟེན༌ནི༌ ཝང༌སྲུལ༌པ༌གུན༌ནི༌ཀ༌ ངའ༌ གྱལ༌ ཐོབ༌ཏེ༌ ཨིན༌།"