4
གཙོ༌བོ༌ ཡེ༌ཤུ༌ དང༌ ས༌མར༌རི༌ཡཱ༌མ༌ བུ༌མོ༌།
4:1 ནེ༌ 26
1 གཙོ༌བོ༌ ཡེ༌ཤུའི༌ ཁྲུས༌སལ༌ཨིན༌ ཡོ༌ཧཱ༌ནན༌ནི༌ སང༌ མང༌ང༌ ལོབ༌ཕྲུགས༌ གྱུར༌ཏེ༌ དུག༌ ཟེར༌ཏེ༌ ཕ༌རུ༌ཤི༌པ༌གུན༌ལ༌ ཚོར༌། 2 ༼ངོས༌མ༌བོ༌ ཡེ༌ཤུ༌ མན༌པ༌ ཁོང༌ངི༌ ལོབ༌ཕྲུགས༌གུན༌ནི༌ ཁྲུས༌སལ༌ལད༌པིན༌༽, 3 ཏེ༌བོ༌ ཡེ༌ཤུའ༌ ཐུག༌གྱུས༌ སྐྱོད༌ད༌ཅིག༌ ཁོང༌ ཡ༌ཧུ༌དཱའེ༌ ཡུལ༌ཇོངས༌ནེ༌ བིང༌ཏེ༌ གཱ༌ལིལ༌ལིའི༌ ཡུལ༌ཇོངས༌ལ༌ ལོགས༌ཏེ༌ སྐྱོདས༌།
4 ཡེ༌ཤུ༌ ས༌མར༌རི༌ཡཱའེ༌ ཡུལ༌ཇོངས༌ གྱུད༌ཏེ༌ སྐྱོད༌གོས༌པ༌ 5 ཁོང༌ ས༌མར༌རི༌ཡཱ༌ ཡུལ༌ཇོངས༌སི༌ སའི༌ཀར༌ གྲོང༌ཁྱེར༌, ཏུས༌ མང༌པོའེ༌ སྔུན༌ལ༌ ཡ༌ཀོབ༌བི༌ རང༌ངི༌ བུ༌ཚ༌ ཡོ༌སེབ༌བ༌ ཏངས༌ཁན༌ནི༌ ས༌ཀྱད༌དི༌ ཉེ༌མོའ༌ ལེབ༌། 6 ཏེ༌ཀ༌ ཡ༌ཀོབ༌བི༌ ཆུ༌དོང༌ཞིག༌ ཡོད༌པིན༌, ཡེ༌ཤུ༌ ཐག༌རིང༌ནེ༌ ཞབ༌གྲུལ༌ལ༌ སྐྱོད༌པ༌ ཐུག༌ངལ༌ཏེ༌ ཏེ༌ ཆུ༌དོང༌ངི༌ དུན༌ལ༌ ཞུགས༌, ཏེ༌བོ༌ ཉིང༌གུང༌ ཟོད༌ཅིག༌ག༌ ཨིན༌པིན༌། 7 ས༌མར༌རི༌ཡཱ༌མ༌ཞིག༌ ཆུ༌ ཕིང༌ང༌ལ༌ ཡོངས༌, ཡང༌ ཡེ༌ཤུའི༌ ཏེ༌ བུ༌མོ༌བོའ༌ མོལས༌, "ང༌ ཐུང༌ཅེས༌ལ༌ ཆུ༌ ཙ༌པིག༌ སལ༌།" 8 ༼ཅིའ༌ཞུ༌ན༌ ཁོང༌ངི༌ ལོབ༌ཕྲུགས༌གུན༌ ཁྲོམས༌ལ༌ ཟའ༌ཅེས༌ ཉོའ༌ལ༌ སོང༌ཏེ༌ མེད༌པིན༌༽།
9 ས༌མར༌རི༌ཡཱ༌པ༌ བུ༌མོ༌བོའེ༌ ཡེ༌ཤུའ༌ ཟེརས༌, "ཉེ༌རང༌ ཡ༌ཧུ༌དཱ༌པ༌ ཡང༌ ང༌ ས༌མར༌རི༌ཡཱ༌མ༌ཞིག༌, ཀ༌ཟུག༌གི༌ ཉེ༌རང༌ངི༌ ང༌ ཐུང༌ཅིས༌ལ༌ ཆུ༌ ཏོང༌ མོལ༌ཏེ༌ ཨིན༌" ༼ཅིའ༌ཟེར༌ན༌ ཡ༌ཧུ༌དཱ༌པ༌གུན༌ནི༌ ས༌མར༌རི༌ཡཱ༌པ༌གུན༌ ཉམ༌པོ༌ བྲེལ༌ བོར༌ར༌ མ༌ནོག༌༽།
10 ཡེ༌ཤུའི༌ ཏེ༌ བུ༌མོ༌བོའ༌ མོལས༌, "གལ༌ཏེས༌ ཁྱོ༌རང༌ངི༌ དཀོན༌མཆོག༌གི༌ རྟགས༌པོ༌ དང༌ ཁྱོ༌རང༌ང༌ ཆུ༌ ཏོང༌ ཟེར༌ཁན༌བོ༌ ཤེས༌པིན༌ན༌ ཁྱོ༌རང༌ངི༌ ངའ༌ ཏོང༌ ཟེར༌ཏེ༌ ཡོད༌གྲོ༌, ཡང༌ ངའེ༌ ཁྱོ༌རང༌ང༌ ཚེ༌ ཏང༌ཁན༌ནི༌ ཆུ༌ ཏངས༌ཏེ༌ ཡོད༌གྲོ༌།"
11 བུ༌མོ༌བོའེ༌ ཟེརས༌, "སྤོན༌བོ༌ལེ༌ ཉེ༌རང༌ངི༌ ལག༌ག༌ ཆུ༌ ཅུ༌ཅེས༌ལ༌ ནོད༌ ཅའང༌ མི༌དུག༌, ཡང༌ འི༌ ཆུ༌དོང༌བོ༌ མ༌ ཀོན༌དྲོ༌ ཡོད༌པ༌ ཉེ༌རང༌ང༌ ཚེ༌ ཏང༌ཁན༌ནི༌ ཆུ༌བོ༌ ཀ༌ནེ༌ ཐོབ༌ཨིན༌། 12 ཅི༌ ཉེ༌རང༌ ང༌ཞ༌གུན༌ལ༌ འི༌ ཆུ༌དོང༌ སལ༌ཁན༌ ང༌ཞའེ༌ ཕ༌མེས༌པོ༌ ཡ༌ཀོབ༌བི༌ སང༌ ཇིགས༌ས༌ཞིག༌ ཨིན༌ན༌? ཁོང༌, ཁོང༌ངི༌ ཕྲུ༌གུ༌གུན༌ དང༌ ཁོང༌ངི༌ སེམས༌ཅན༌གུན༌ནི༌ འིན༌ན༌ ཆུ༌དོང༌བོའེ༌ ཆུ༌ ཐུངས༌ཏེ༌ ཨིན༌པིན༌།
13 ཡེ༌ཤུའི༌ ལན༌སལས༌, "འི༌ ཆུ༌དོང༌ནེ༌ ཆུ༌ ཐུང༌ཁན༌གུན༌ ཡང༌སྐྱར༌ སྐོམས༌ཨིན༌, 14 ཨིན༌ནའང༌ ངའེ༌ ཏང༌ཁན༌ནི༌ ཆུ༌ ཐུང༌ཁན༌གུན༌ ཡང༌སྐྱར༌ མ༌ནེ༌ མི༌སྐོམས༌། ངའེ༌ ཏང༌ཁན༌ནི༌ ཆུ༌བོ༌ ཁོང༌གུན༌ནི༌ ནང༌ང༌ ཐའ༌མེད༌པའེ༌ མི༌ཚེའེ༌ ཏང༌ཁན༌ནི༌ ཆུ༌མིག༌ག༌ གྱུར༌ཨིན༌།"
15 བུ༌མོ༌བོའེ༌ ཟེརས༌, "གཙོ༌བོ༌ ཡང༌སྐྱར༌ མ༌ནེ༌ མི༌སྐོམ༌ཅེས༌ དང༌ འི༌ཀ༌ ཆུ༌ ནེན༌ན༌ལ༌ ཡོང༌ མི༌གོ༌ཤེས༌སི༌ ཕིའ༌ ཇུ༌ཇུ༌ ཏེ༌ ཆུ༌བོ༌ ང༌ སལ༌ལ༌ ཛད༌།"
16 ཡེ༌ཤུའི༌ བུ༌མོ༌བོའ༌ མོལས༌, "སོང༌ཏེ༌ རང༌ངི༌ མག༌པ༌ འི༌ཀ༌ ཁྲིད༌ཏེ༌ ཁྱོང༌།"
17 བུ༌མོ༌བོའེ༌ ལན༌ཏངས༌, "ང༌ མག༌པ༌ མེད༌།"
ཡེ༌ཤུའི༌ ཁོའ༌ མོལས༌, "ཁྱོ༌རང༌ངི༌ ང༌ མག༌པ༌ མེད༌ ཟེར༌ཁན༌བོ༌ དྲང༌པོ༌ ཨིན༌ནོག༌། 18 ངོས༌མ༌བོ༌ ཁྱོ༌རང༌ང༌ མག༌པ༌ ལྔ༌ ཡོད༌པིན༌, དག༌ས༌ ཁྱོ༌རང༌ ཉམ༌པོ༌ ཡོད༌ཁན༌བོ༌ ཁྱོ༌རང༌ངི༌ མག༌པ༌ མན༌། ཁྱོ༌རང༌ངི༌ ཟེར༌ཁན༌བོ༌ དེན༌བ༌ ཨིན༌།"
19 བུ༌མོ༌བོའེ༌ ཟེརས༌, "གཙོ༌བོ༌ ཉེ༌རང༌ ལུང༌སྟོན༌པ༌ཞིག༌ ཨིན༌ཅེས༌ དུག༌། 20 ང༌ཞའ༌ ས༌མར༌རི༌ཡཱ༌པ༌གུན༌ནི༌, ང༌ཞའེ༌ ཕ༌མེས༌པོ༌གུན༌ནི༌ ཅོལ༌ཁན༌ནི༌ འི༌ རི༌བོའི༌ཀ༌ དཀོན༌མཆོག༌ག༌ ཅོལ༌ལད༌, ཨིན༌ནའང༌ ཁྱོ༌ཞའ༌ ཡ༌ཧུ༌དཱ༌པ༌གུན༌ནི༌ དཀོན༌མཆོག༌ག༌ ཡེ༌རུ༌ཤ༌ལེམ༌མི༌ ནང༌ང༌ ཅོལ༌གོས༌ ཅིའ༌ ཟེར༌ར༌ནོག༌?"
21 ཡེ༌ཤུའི༌ མོལས༌, "བུ༌མོ༌ ངའེ༌ ཟེར༌ཅེས༌ཅན༌བོའ༌ དེན༌ཤེས༌, ཏུས༌པོ༌ ཉེ༌མོ༌ ཡོད༌, ནམ༌ ཁྱོ༌ཞ༌གུན༌ནི༌ རང༌ངི༌ ཡབ༌ དཀོན༌མཆོག༌ག༌ འི༌ རི༌བོའི༌ཀ༌ ཡ༌ ཡེ༌རུ༌ཤ༌ལེམ༌མི༌ ནང༌ང༌ མི༌ཅོལ༌། 22 ཁྱོ༌ཞའ༌ ས༌མར༌རི༌ཡཱ༌པ༌གུན༌ནི༌ ཅོལ༌ཁན༌བོ༌ ཤེས༌ས༌ མི༌དུག༌, ང༌ཞ༌གུན༌ནི༌ ཅོལ༌ཁན༌བོ༌ ཤེས༌སད༌ ཅིའ༌ཟེར༌ན༌ ཡ༌ཧུ༌དཱ༌པ༌གུན༌ གྱུད༌ཏེ༌ ཐར༌པ༌བོ༌ ལེབས༌ཏེ༌ ཨིན༌། 23 ཨིན༌ནའང༌ ཏུས༌པོ༌ ཉེ༌མོ༌ ཨིན༌ནོག༌, མ༌ཚད༌ ལེབ༌ ཚར༌ཏེ༌ ཨིན༌, ནམ༌ དེན༌བའེ༌ ཅོལ༌ཁན༌གུན༌ནི༌ ཡབ༌ དཀོན༌མཆོག༌ག༌ ཐུག༌ཉིད༌ དང༌ དྲང༌པོའེ༌ ཐོག༌ནེ༌ ཅོལ༌ཨིན༌, ཅིའ༌ཟེར༌ན༌ འི༌ཙོགས༌ལ༌ ཅོལ༌ཁན༌གུན༌ ཡབ༌བི༌ ཙལ༌ལ༌ ཛད༌དུག༌། 24 དཀོན༌མཆོག༌ ནི༌ ཐུག༌ཉིད༌ ཨིན༌ནོག༌, ཁོང༌ང༌ ཅོལ༌ཁན༌བོའེ༌ ཁོང༌ང༌ ཐུག༌ཉིད༌ དང༌ དེན༌བའེ༌ ཐོག༌ནེ༌ ཅོལ༌གོས༌།"
25 བུ༌མོ༌བོའེ༌ ཟེརས༌, "དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཕེབ༌ཤེས༌ཅན༌བོ༌ ང༌ གྱུས༌ཡོད༌, ཁོང༌ སྐྱོད༌ད༌ཅིག༌, ང༌ཞའ༌, ཅི༌ཚང༌མ༌ ཧ༌གོ༌ཅུག༌ག༌ ཛད༌ཨིན༌།"
26 ཡེ༌ཤུའི༌ བུ༌མོ༌བོའ༌ མོལས༌, "ཁྱོ༌རང༌ ཉམ༌པོ༌ སྤེ༌ར༌ ཏང༌ཁན༌ ངའ༌ ཏེན༌ན༌བོ༌ ཨིན༌།"
ལོབ༌ཕྲུགས༌གུན༌ ལོགས༌ཏེ༌ སྐྱོདས༌།
4:27 ནེ༌ 38
27 གཙོ༌བོ༌ ཡེ༌ཤུའི༌ ཏེ༌ཟུག༌ མོལ༌ ཚར༌ར༌ཅིག༌ ཁོང༌ངི༌ ལོབ༌ཕྲུགས༌གུན༌ ལོགས༌ཏེ༌ ལེབ༌། ཡེ༌ཤུའི༌ བུ༌མོ༌ཞིག༌ ཉམ༌པོ༌ ཞལ༌ཏའ༌ སལ༌ཨིན༌ ཐོང༌པ༌ ཁོང༌གུན༌ ཧ༌ལས༌ * 4:27 ལོབ༌ཕྲུགས༌གུན༌ ཧ༌ལས༌ཀྱག༌ ཅིའ༌ཟེར༌ན༌ ཡེ༌ཤུའི༌ ཏུས༌ལ༌ ཡ༌ཧུ༌དཱ༌པ༌ ཆོས༌སི༌ གེར༌གན༌ སུ༌ཞིག༌གིའང༌ བུ༌མོ༌ ཉམ༌པོ༌ སྤེ༌ར༌ ཏང༌ང༌ མེད༌པིན༌། ཅིའ༌ཟེར༌ན༌ ཁོང༌གུན༌ནི༌ ཏེ༌ཟུག༌ ཅོ༌ཅེས༌པོ༌ ནི༌ ཏུས༌ གོད༌ལ༌ ཏང༌ཏེ༌ ཨིན༌ནོག༌ སམ༌མད༌ཀྱག༌། , ཨིན༌ནའང༌ ཡེ༌ཤུའ༌, "ཉེ༌རང༌ང༌ ཅི༌ གོས༌སད༌?" ཡ༌ "ཅི༌ཕིའ༌ ཉེ༌རང༌ངི༌ ཏེ༌ བུ༌མོ༌བོའ༌ ཞལ༌ཏའ༌ སལ༌ལད༌?" ཟེར༌ཏེ༌ སུའིང༌ མ༌ཏྲིས༌། 28 བུ༌མོའེ༌ ཆུ༌ཁར༌བོ༌ ཏེ༌ནེ༌ཀ༌ བོར༌ཏེ༌ ཁོ༌རང༌ངི༌ གྲོང༌ཁྱེར༌ལ༌ བང༌ཏངས༌ཏེ༌ སོང༌ ཡང༌ མི༌གུན༌ལ༌ ཟེརས༌, 29 "ངའེ༌ མི༌ཚེའེ༌ ནང༌ང༌ ཅོས༌ཁན༌ ཚང༌མའ༌ ཤད༌ད༌ ཛད༌ཁན༌ནི༌ མི༌བོའ༌ ལྟའ༌ལ༌ ཡོང༌ཤིག༌། ཁོང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ན༌ཧེ༌?" 30 མི༌གུན༌ གྲོང༌ཁྱེར༌ནེ༌ བིང༌ཏེ༌ ཡེ༌ཤུ༌ ཡོད༌ས༌ ཆོགས༌ལ༌ ཡོངས༌།
31 ཏེན༌ན༌ ཏུས༌ལ༌ ཡེ༌ཤུའི༌ ལོབ༌ཕྲུགས༌གུན༌ནི༌ ཁོང༌ང༌ ཟེརས༌, "ལོབ༌པོན༌ལེ༌, ཅི༌ཏོང༌ཤིག༌ དོན༌ན༌ ཛད༌།"
32 ཨིན༌ནའང༌ ཡེ༌ཤུའི༌ ཁོང༌གུན༌ལ༌ མོལས༌, "ངའ༌ ཟའ༌ཅེས༌སི༌ ཁར༌ཇི༌ཞིག༌ ཡོད༌, ཏེ༌བོའེ༌ སྐོར༌ལ༌ ཁྱོ༌ཞའ༌ ཅའང༌ གྱུས༌མེད༌།"
33 ཏེ༌བོ༌ ཚོར༌ར༌ཅིག༌ ལོབ༌ཕྲུགས༌གུན༌ནི༌ ཅིག༌ དང༌ ཅིག༌ག༌ ཟེརས༌, "སུ༌ཞིག༌གི༌ ཁོང༌ང༌ དོན༌ཏང༌ ཁྱོངས༌པིན༌ན༌ ཧེ༌?"
34 ཡེ༌ཤུའི༌ མོལས༌, "ངའེ༌ ཁར༌ཇི༌བོ༌ ནི༌ ང༌ ཀལ༌ལ༌ ཛད༌ཁན༌ནི༌ དཀོན༌མཆོག༌གི༌ ཐུགས༌ཐད༌གུན༌ ཅོ༌ཅེས༌ དང༌ ཁོང༌ངི༌ ཆག༌ལས༌ གུན༌ དྲན༌དྲ༌ གྲུབ༌ཅུག༌ཅེས༌པོ༌ ཨིན༌། 35 ཁྱོ༌ཞའ༌ ཟེར༌ལོ༌ཞིག༌ མེད༌ད༌, 'སྟོན༌ཐོག༌ སྨིན༌ཅེས༌ལ༌ ཟླ༌ཝ༌ ཞི༌ ལུས༌ཏེ༌ ཨིན༌ནོག༌'? ངའེ༌ ཁྱོ༌ཞ༌གུན༌ལ༌ ཟེར༌རད༌, རང༌རང༌ངི༌ མིག༌ ཕེས༌ཏེ༌ ཞིང༌གུན༌ལ༌ ལྟོས༌ཤིག༌, ཏེ༌ སྟོན༌ཐོག༌གུན༌ ཚོས༌ཏེ༌ རྔབ༌ས༌ རན༌ ཚར༌ཏེ༌ དུག༌། 36 རྔབ༌ས༌ ཏང༌ཁན༌གུན༌ལ༌ ལ༌ཆ༌ གྱལ༌ལ༌ ཐོབ༌ཨིན༌ ཨིན༌ནོག༌, ཡང༌ མི༌གུན༌ ཐའ༌མེད༌པའེ༌ མི༌ཚེའེ༌ ནང༌ང༌ ཁྱོང༌ཅེས༌པོ༌ ཁོང༌ངི༌ རྔ༌ཁན༌ནི༌ ཁ༌ཟས༌པོ༌ ཨིན༌ནོག༌། ཏེ༌ནེ༌ ས༌འོན༌ ཏབ༌ཁན༌ དང༌ རྔབ༌ས༌ ཏང༌ཁན༌ ཉིས༌ཀོའ༌ ཙམ༌ཤིག༌གི༌ སྐྱིད༌པོ༌ མི༌ཡོང༌། 37 འི༌ ཟེར༌ལོ༌བོ༌ དེན༌བ༌ ཨིན༌ནོག༌, 'ཅིག༌གི༌ ཏབ༌ཨིན༌, ཞན༌ཞིག༌གི༌ རྔ༌ཨེན༌།' 38 ངའེ༌ ཁྱོ༌ཞ༌གུན༌ ཁྱོ༌ཞའེ༌ མ༌ཏབ༌ཁན༌ནི༌ སྟོན༌ཐོག༌པོ༌ རྔའ༌ལ༌ ཀལ༌པིན༌། ཞན༌མ༌གུན༌ནི༌ རྩོན༌གྲུས༌ སྲན༌ཏྲེ༌ ཅོས༌ ཡང༌ ཁྱོ༌ཞ༌གུན༌ནི༌ ཁོང༌ངི༌ རྩོན༌གྲུས༌སི༌ བྲས༌བུ༌གུན༌ རྔས༌།"
ས༌མར༌རི༌ཡཱ༌པ༌གུན༌ནི༌ ཏད༌པ༌ ཅོས༌།
4:39 ནེ༌ 42
39 ཏེ༌ བུ༌མོ༌བོའེ༌, གཙོ༌བོ༌ ཡེ༌ཤུའི༌ ངའེ༌ མི༌ཚེའེ༌ ནང༌ང༌ ཅོས༌ཁན༌ ཚང༌མའ༌ ཤད༌ད༌ ཛདས༌ ཟེར༌ཨིན༌ སྤང༌པོ༌ ཏངས༌ པ༌སང༌ ས༌མར༌རི༌ཡཱ༌པ༌ མང༌པོ༌ཞིག༌གི༌ ཡེ༌ཤུའི༌ཀ༌ ཏད༌པ༌ ཅོས༌། 40 ཏེ༌ནེ༌ ས༌མར༌རི༌ཡཱ༌པ༌གུན༌ ཡེ༌ཤུ༌ ཡོད༌ས༌ ཡོངས༌ཏེ༌ ཇུ༌ཇུ༌ ཁོང༌གུན༌ ཉམ༌པོ༌ ཞུགས༌ས༌ ཛད༌ ཟེར༌ཏེ༌ ཞུ༌ཝ༌ ཕུལས༌པ༌, ཁོང༌ ཞག༌མ༌ ཉིས༌ ཏེ༌རུ༌ ཞུགས༌། 41 ཁོང༌ངི༌ ལབ༌ཞ༌གུན༌ ཚོར༌ཏེ༌ ཞན༌མི༌ མང༌པོ༌ཞིག༌གི༌ ཏད༌པ༌ ཅོས༌། 42 མི༌གུན༌ནི༌ ཏེ༌ བུ༌མོ༌བོའ༌ ཟེརས༌, "ང༌ཞའེ༌ ཁྱོ༌རང༌ངི༌ ཟེར༌ཁན༌ནི༌ སྤེ༌ར༌ ཚོར༌ཅེས༌ ཅིག༌པོ༌ མན༌པ༌, ང༌ཞ༌རང༌ངི༌ ནམ༌ཅོག༌ནེ༌ ཁོང༌ངི༌ མོལ༌ཁན༌གུན༌ ཚོར༌ཅེས༌པོའེ༌ ཏད༌པ༌ ཅོའད༌, ཡང༌ དེན༌བ༌ འི༌ མི༌བོ༌ ཇིག༌རྟེན༌པ༌གུན༌ནི༌ སྐྱབ༌གོན༌ ཨིན༌ཁན༌བོ༌ ང༌ཞའེ༌ ཤེས༌སད༌།"
ཡེ༌ཤུའི༌ ལོན༌པོ༌ཞིག༌གི༌ བུ༌ཚ༌ ཕན༌ཅུག༌ག༌ ཛདས༌།
4:43 ནེ༌ 54
43 ཞག༌ ཉིས༌སི༌ སྟིང༌ནེ༌ གཙོ༌བོ༌ ཡེ༌ཤུ༌ ཡང༌ གཱ༌ལིལ༌ལིའི༌ ཡུལ༌ཇོངས༌ ཆོགས༌ལ༌ ལོགས༌ཏེ༌ སྐྱོདས༌། 44 ༼ཡེ༌ཤུའི༌ སྔུན༌ལ༌ ལུང༌སྟོན༌པ༌ སུ༌ཞིག༌གའང༌ ཁོ༌རང༌ངི༌ ཡུལ༌ལི༌ ནང༌ང༌ རྩི༌ཝ༌ མི༌ཐོབ༌ མོལ༌ཏེ༌ ཨིན༌པིན༌༽ 45 ཁོང༌ གཱ༌ལིལ༌ལིའ༌ ལེབ༌བ༌ཅིག༌, གཱ༌ལིལ༌ལི༌པ༌གུན༌ནི༌ ཁོང༌ང༌ གའ༌སུས༌ ཞུས༌ ཅིའ༌ཟེར༌ན༌ པེ༌སག༌གི༌ ཏུས༌ཆེན༌ ཟ༌ནེ༌ ཡེ༌རུ༌ཤ༌ལེམ༌མི༌ ནང༌ང༌ ཡེ༌ཤུའི༌ ཛད༌ཁན༌ ཚང༌མ༌ ཁོང༌གུན༌ནི༌ ཐོང༌།
46 ཡེ༌ཤུ༌ ལན༌ ཉིས༌པ༌ གཱ༌ལིལ༌ལིའི༌ ཡུལ༌ཇོངས༌སི༌ ཀ༌ནཱ༌ གྲོང༌ཁྱེར༌ལ༌ སྐྱོདས༌, ཀ༌རུ༌ ཁོང༌ངི༌ ཆུ༌ རྒུན༌ཆང༌ང༌ གྱུར༌ ཅུག༌ག༌ ཛད༌ཏེ༌ ཨིན༌པིན༌། ཀ༌ནཱའེ༌ ཉེ༌མོའ༌ ཀ༌ཕར༌ན༌ཧུམ༌ གྱལ༌སའེ༌ ནང༌ང༌ ལོན༌པོ༌ཞིག༌གི༌ བུ༌ཚའ༌ ཟུ༌མོ༌ ཡོངས༌ཏེ༌ ཡོད༌པིན༌། 47 ལོན༌པོའ༌ ཡེ༌ཤུ༌ ཡ༌ཧུ༌དཱ༌ནེ༌ གཱ༌ལིལ༌ལིའ༌ ལོགས༌ཏེ༌ སྐྱོད༌ཏོག༌ ཟེར༌ཏེ༌ ཚོར༌པ༌ ཁོ༌ ཡེ༌ཤུ༌ ཡོད༌ས༌ སོང༌ ཡང༌ ཇུ༌ཇུ༌ སྐྱོད༌ཏེ༌ ཁོའེ༌ བུ༌ཚ༌ ཤི༌ཀྱིས༌ ཡོད༌ཁན༌བོ༌ ཕན༌ཅུག༌ག༌ ཛད༌ ཟེར༌ཏེ༌ ཞུ༌ཝ༌ ཕུལས༌།
48 ཡེ༌ཤུའི༌ ལོན༌པོ༌བོའ༌ མོལས༌, "ཁྱོ༌ཞ༌གུན༌ནི༌ ཧ༌ལས༌ཤེས༌སི༌ ལྟས༌ དང༌ སྟགས༌ ཐོངས༌ཏེ༌ མ༌ནེ༌ ཏད༌པ༌ མི༌ཅོ༌།"
49 ལོན༌པོ༌བོའེ༌ ཟེརས༌, "གཙོ༌བོ༌ ངའེ༌ ཕྲུ༌གུ༌ ཤིའི༌ སང༌ སྔུན༌ལ༌ སྐྱོད༌ད༌ ཛད༌དའང༌།"
50 ཡེ༌ཤུའི༌ ཁོའ༌ མོལས༌, "ཏ༌ སོང༌ ཁྱོ༌རང༌ངི༌ བུ༌ཚ༌ མི༌ཤི༌།" ཁོའེ༌ ཡེ༌ཤུའི༌ མོལ༌ཁན༌བོའ༌ དེན༌ཤེས༌ ཡང༌ ཁང༌པ༌ ལོགས༌ཏེ༌ ཆ༌ཅེས༌ གོ༌ཟུག༌།
51 ཁོ༌ ལམ༌བར༌ལ༌ ཡོད༌ ཟ༌ནེ༌, ཁོའེ༌ ཡོག༌པོ༌གུན༌ ཁོའེ༌ བུ༌ཚ༌ ཟུ༌མོ༌ ཡོངས༌ཁན༌བོ༌ གྱལ༌ཏེ༌ ཁམ༌ཟང༌ གྱུར༌ཁན༌ནི༌ ནས༌ཚུལ༌ ཤད༌ད༌ལ༌ ཡོངས༌། 52 ལོན༌པོ༌བོའེ༌ ཁོའེ༌ བུ༌ཚ༌བོ༌ ཙམ༌ ཟོད༌ཤིག༌ག༌ གྱལ༌ ཟེར༌ཏེ༌ ཏྲིས༌པ༌ ཁོང༌གུན༌ནི༌ ཟེརས༌, "དའང༌ ཛར༌རེ༌ ཆུ༌ཚོད༌ ཅིག༌པ༌ ཟོད༌ཅིག༌ག༌ ཁོའེ༌ ཚད༌པོ༌ མེད༌ཁན༌ སོང༌།" 53 ཏེ༌ནེ༌ ཨ༌བ༌བོའ༌, ཏེན༌ན༌ ཏུས༌པོའེ༌ཀ༌ ཡེ༌ཤུའི༌ ཁོའ༌, "ཁྱོ༌རང༌ངི༌ བུ༌ཚ༌ མི༌ཤི༌" མོལ༌ཁན༌བོ༌ ཨིད༌ཏུ༌ ཡོངས༌། ཁོ༌ དང༌ ཁོའེ༌ ནང༌ཚང༌ གང༌པོའེ༌ ཡེ༌ཤུའི༌ཀ༌ ཏད༌པ༌ ཅོས༌། 54 ཏེ༌བོ༌ ཡ༌ཧུ༌དཱ༌ནེ༌ གཱ༌ལིལ༌ལིའ༌ སྐྱོད༌ཏེ༌ ཡེ༌ཤུའི༌ ཧ༌ལས༌ཤེས༌སི༌ ཛད༌པ༌ ཉིས༌པ༌བོ༌ ཛད༌ཏེ༌ ཨིན༌པིན༌།
*4:27 4:27 ལོབ༌ཕྲུགས༌གུན༌ ཧ༌ལས༌ཀྱག༌ ཅིའ༌ཟེར༌ན༌ ཡེ༌ཤུའི༌ ཏུས༌ལ༌ ཡ༌ཧུ༌དཱ༌པ༌ ཆོས༌སི༌ གེར༌གན༌ སུ༌ཞིག༌གིའང༌ བུ༌མོ༌ ཉམ༌པོ༌ སྤེ༌ར༌ ཏང༌ང༌ མེད༌པིན༌། ཅིའ༌ཟེར༌ན༌ ཁོང༌གུན༌ནི༌ ཏེ༌ཟུག༌ ཅོ༌ཅེས༌པོ༌ ནི༌ ཏུས༌ གོད༌ལ༌ ཏང༌ཏེ༌ ཨིན༌ནོག༌ སམ༌མད༌ཀྱག༌།