ཡོ༌ཧཱ༌ནན༌ནི༌ བྲིའ༌ཛད༌ཁན༌ནི༌ གའ༌མོའེ༌ ནས༌ཚུལ༌།
ཡོ༌ཧཱ༌ནན༌ནི༌ སྤེ༌ཆའེ༌ སྐོར༌།
གཙོ༌བོ༌ ཡེ༌ཤུའི༌ སྐུ༌ཚབས༌ ཡོ༌ཧཱ༌ནན༌ནི༌ འི༌ སྤེ༌ཆའེ༌ ནང༌ང༌ མིང༌ བྲིའ༌ མ༌ཛད༌ད༌, ཁོང༌རང༌ང༌ "ཡེ༌ཤུའི༌ ཅེས༌པ༌ ཛད༌ཁན༌ནི༌ ལོབ༌ཕྲུགས༌པོ༌" མོལ༌ཏེ༌ དུག༌། འི༌ སྤེ༌ཆའེ༌ བྲི༌ཚུལ༌ དང༌ སྔུན༌མའེ༌ ཆོས༌ཚོགས༌སི༌ འུ༌སྐྱོང༌གུན༌ གྱུད༌ཏེ༌ འི༌བོ༌ སྐུ༌ཚབས༌ ཡོ༌ཧཱ༌ནན༌ནི༌ བྲིའ༌ཛད༌ཏེ༌ ཨིན༌ཁན༌བོ༌ ང༌དང༌ང༌ ཧ༌གོའ༌ནོག༌།
ཡོ༌ཧཱ༌ནན༌ནི༌ འི༌ སྤེ༌ཆ༌བོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 50 ཉེ༌ཁོར༌ལ༌ བྲིའ༌ ཛད༌ཏེ༌ ཨིན༌ནོག༌།
ཡེ༌ཤུ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ དང༌ ཁོང༌ དཀོན༌མཆོག༌གི༌ སྲས༌ ཨིན༌ཁན༌བོའེ༌ཀ༌ ང༌དང༌ངི༌ ཏད༌པ༌ ཁྱོང༌ཅེས༌ ཡང༌ ཏེ༌ ཏད༌པ༌བོ༌ གྱུད༌ཏེ༌ ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ གྱུན༌ཚན༌བོའེ༌ ཕིའ༌ ཡོ༌ཧཱ༌ནན༌ནི༌ འི༌ སྤེ༌ཆ༌བོ༌ བྲིའ༌ ཛད༌ཏེ༌ ཨིན༌ནོག༌།
ཡོ༌ཧཱ༌ནན༌ནི༌ ཡེ༌ཤུའི༌ ལྟས༌ སོ༌སོ༌ རྡུན༌ དང༌ ལབ༌ཞའ༌ རྡུན༌ གུན༌ནི༌ སྐོར༌ལ༌ བྲི༌ཅེས༌ ཐག༌ཅད༌ད༌ ཛདས༌། འི༌ ལབ༌ཞ༌ དང༌ ལྟས༌ གུན༌ བྲེལ༌ཏེ༌ ཨིན༌ནོག༌ ཅིའ༌ཟེར༌ན༌ ལབ༌ཞ༌ ཁ༌ཅིག༌ ལྟས༌ ལྟན༌ཅེས༌པོའེ༌ བྱུངས༌ཏེ༌ ཨིན༌ནོག༌ ཡང༌ པར༌རི༌ག༌ ལབ༌ཞ༌ ཧ༌གོ༌ཅེས༌ལ༌ ལྟས༌ ལྟན༌ན༌ ཛད༌ཏེ༌ ཨིན༌ནོག༌། འི༌ ལབ༌ཞ༌ དང༌ ལྟས༌ གུན༌ནི༌, ཡེ༌ཤུ༌ ཙོགས༌ སུའང༌ མན༌ཁན༌, ཁོང༌ངི༌ ཛད༌ཁན༌གུན༌ སུའང༌ ཅོ༌མི༌ཉན༌ཅེས༌ ཡང༌ ཁོང༌ ནི༌ འི༌ ཇིག༌རྟེན༌ནི༌ སྐྱབ༌གོན༌ ཨིན༌ཁན༌བོ༌ ལྟན༌ན༌ནོག༌།
ལུས༌ཁན༌ནི༌ སྤེ༌ཆའ༌བོའེ༌ ནང༌ང༌ ཡོ༌ཧཱ༌ནན༌ནི༌ ཡེ༌ཤུའི༌ ཁོང༌རང༌ངི༌ཀ༌ ཏད༌པ༌ ཅོ༌ཁན༌གུན༌ལ༌ ཅིག༌ དང༌ ཅིག༌ག༌ ཅམས༌པ༌ ཅོ༌ཅེས༌སི༌ སྐོར༌ལ༌ ལབ༌ཞ༌ སལ༌ཁན༌བོ༌ མ༌ཚད༌, ཡེ༌ཤུ༌ ཁོང༌ངི༌ ཡབ༌བི༌ཀ༌ ནམ༌ཁའ༌ ལོགས༌ཏེ༌ སྐྱོད༌ནའང༌ ཁོང༌ ཁོང༌ངི༌ ལོབ༌ཕྲུགས༌གུན༌ ཉམ༌པོ༌ དམ༌པའེ༌ ཐུག༌ཉིད༌ གྱུད༌ཏེ༌ ཞུགས༌ཤེས༌པོའེ༌ཀ༌ ཤེད༌ སལ༌ཏེ༌ ཨིན༌ནོག༌།།
1
མ༌ཤི༌ཀ༌, ཐའ༌མེད༌པའེ༌ བཀའ༌།
1:1 ནེ༌ 18
1 ཇིག༌རྟེན༌ ཆགས༌སི༌ སང༌ སྔུན༌ལ༌ བཀའ༌ ཡོད༌པིན༌།
བཀའ༌བོ༌ དཀོན༌མཆོག༌ ཉམ༌པོ༌ ཡོད༌པིན༌,
ཡང༌ ཏེན༌ན༌ བཀའ༌བོ༌ ནི༌ དཀོན༌མཆོག༌ ཁོང༌རང༌ ཨིན༌པིན༌།
2 ཁོང༌ གོ༌མ༌ནེ༌ ཕར༌ལ༌ དཀོན༌མཆོག༌ ཉམ༌པོ༌ ཞུགས༌ཏེ༌ ཡོད༌པིན༌།
3 ཁོང༌ གྱུད༌ཏེ༌ དཀོན༌མཆོག༌གི༌ ཅི༌ཚང༌མ༌ ཞང༌ང༌ ཛདས༌,
ཁོང༌ མེད༌པའ༌ ཅི༌ཞིག༌གའང༌ ཞང༌ང༌ མ༌ཛདས༌།
4 ཁོང༌ ནི༌ སྲོག༌ ཚང༌མའེ༌ བྱུང༌ཁུངས༌པོ༌ ཨིན༌ནོག༌།
ཡང༌ ཁོང༌ངི༌ སྐུ༌ཚེ༌, མི༌ཚང༌མའེ༌ ཕིའ༌ འོད༌ ཨིན༌ནོག༌,
5 འི༌ འོད༌པོའེ༌ མུན༌གྲིག༌ ལྡང༌ཤན༌ ཛད༌ད༌ནོག༌,
ཡང༌ མུན༌གྲིག༌གི༌ ཏེ༌བོའ༌ ཕམ༌ཀལ༌ མི༌ཉན༌།
6 དཀོན༌མཆོག༌གི༌ མི༌ཞིག༌ ཀལ༌ལ༌ ཛདས༌, ཀ༌བོའ༌ ཡོ༌ཧཱ༌ནན༌ ཁྲུས༌སལ༌ཁན༌ ཟེར༌རད༌པིན༌། 7 ཁོང༌ གྱུད༌ཏེ༌ མི༌ཚང༌མའེ༌ ཏེ༌ འོད༌པོའེ༌ཀ༌ ཏད༌པ༌ ཁྱོང༌ཅེས༌སི༌ ཕིའ༌ ཁོང༌ ཏེ༌བོའེ༌ སྐོར༌ལ༌ སྤང༌པོ༌ ཏང༌ཅེས༌ལ༌ སྐྱོདས༌། 8 ཡོ༌ཧཱ༌ནན༌ ཁོང༌རང༌ ཏེ༌ འོད༌པོ༌ མན༌པིན༌, ཨིན༌ནའང༌ ཁོང༌ ཏེ༌ འོད༌པོའེ༌ སྐོར༌ལ༌ སྤང༌པོ༌ སལ༌ལ༌ སྐྱོདས༌། 9 མི༌ཚང༌མ༌ལ༌ འོད༌ སལ༌ཁན༌ནི༌ ཏེ༌ དེན༌བའེ༌ འོད༌པོ༌ ཇིག༌རྟེན༌ནི༌ ནང༌ང༌ སྐྱོད༌ད༌ ཛད༌ཏེ༌ ཨིན༌ནོག༌།
10 ཇིག༌རྟེན༌ ཛད༌ཁན༌བོ༌ ཇིག༌རྟེན༌ནི༌ ནང༌ང༌ སྐྱོད༌ཏེའང༌, ཇིག༌རྟེན༌པ༌གུན༌ནི༌ ཁོང༌ ངོ༌ མ༌ཤེས༌། 11 ཁོང༌ ཁོང༌རང༌ངི༌ མི༌གུན༌ནི༌ཀ༌ སྐྱོདས༌, ཨིན༌ནའང༌ ཁོང༌གུན༌ནི༌ ཁོང༌ང༌ གའ༌སུས༌ མ༌ཞུས༌། 12 ཁོང༌ང༌ གའ༌སུས༌ ཞུས༌ཁན༌ ཡང༌ ཏད༌པ༌ ཅོས༌ཁན༌གུན༌ལ༌ ཁོང༌ངི༌, དཀོན༌མཆོག༌གི༌ ཕྲུ༌གུ༌གུན༌ གྱུར༌ཅེས༌སི༌ འོས༌པ༌ ཐེས༌། 13 ཁོང༌གུན༌ དཀོན༌མཆོག༌གི༌ ཕྲུ༌གུ༌, མིར༌གྱུད༌ ཡ༌ མི༌ ཐབས༌ ཡ༌ ཨ༌བའེ༌ དོད༌པའེ༌ ཞས༌ཏེ༌ མ༌གྱུར༌ར༌ དཀོན༌མཆོག༌ནེ༌ སྐྱེས༌ཏེ༌ ཨིན༌ནོག༌།
14 ཏེ༌ བཀའ༌བོ༌ སྐུ༌ལུས༌ལ༌ གྱུར༌ར༌ ཛདས༌ ཡང༌ ང༌ཞ༌གུན༌ནི༌ ཕྲོའ༌ ཞུགས༌ས༌ ཛདས༌། ང༌ཞ༌གུན༌ནི༌ ཁོང༌ངི༌ ཟིར༌རྗིད༌པོ༌ ཇལ༌, ཏེ༌ ཟིར༌རྗིད༌པོ༌ ཡབ༌བི༌ སྲས༌ ཅིག༌ཅིག༌པོ༌, ཐུག༌རྗེ༌ དང༌ དེན༌བའེ༌ གངས༌ཁན༌བོ༌ ཨིན༌།
15 ཡོ༌ཧཱ༌ནན༌ནི༌ ཁོང༌ངི༌ སྐོར༌ལ༌ སྤང༌པོ༌ སལ༌ཏེ༌ ཀུ༌ཅོ༌ ཏང༌ཨིན༌ མོལས༌, "ཁོང༌ ནི༌ ངའེ༌ ཟེར༌ཁན༌ ཏེན༌ན༌བོ༌ ཨིན༌, 'ངའེ༌ སྟིང༌ནེ༌ སྐྱོད༌ཅེས༌ཅན༌བོ༌ ངའེ༌ སང༌ ཀྲག༌པོ༌ ཞུགས༌ཏེ༌ ཨིན༌, ཅིའ༌ཟེར༌ན༌ ཁོང༌ ངའེ༌ སང༌ སྔུན༌ལ༌ ཞུགས༌ཏེ༌ ཡོད༌པིན༌'།"
16 ཁོང༌ ཐུག༌རྗེ༌ གངས༌ཏེ༌ ཡོད༌ཅེས༌པོའེ༌, ང༌དང༌གུན༌ལ༌ ཐུག༌རྗེ༌ཅན༌ནི༌ ཅིན༌ལབས༌ ཅིག༌གི༌ སྟིང༌ནེ༌ ཅིག༌ ཐོབ༌, 17 ལུང༌སྟོན༌པ༌ མོ༌ཟེས༌ གྱུད༌ཏེ༌ དཀོན༌མཆོག༌གི༌ བཀའ༌ཁྲིམས༌གུན༌ ང༌དང༌གུན༌ལ༌ སལ༌ལ༌ ཛད༌ཏེ༌ ཨིན༌པིན༌, ཡང༌ ཐུག༌རྗེ༌ དང༌ དེན༌བའེ༌ ལམ༌ ང༌དང༌གུན༌ལ༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ སལ༌ལ༌ ཛད༌ཏེ༌ ཨིན༌། 18 དཀོན༌མཆོག༌ ནི༌ སུའིང༌ མ༌ཇལ༌ལ༌ ཨིན༌ནོག༌, ཨིན༌ནའང༌ ཡབ༌ དཀོན༌མཆོག༌གི༌ སྙིང༌ནེ༌ ཅེས༌པ༌ ཛད༌ཁན༌ སྲས༌ ཅིག༌ཅིག༌པོ༌, ཀ༌བོ༌ དཀོན༌མཆོག༌ ཨིན༌, ཁོང༌ངི༌ ང༌དང༌ང༌ ཡབ༌ སྔོན༌ ཅུག༌ག༌ ཛདས༌།
ཡོ༌ཧཱ༌ནན༌ ཁྲུས༌སལ༌ཁན༌ནི༌ སྤང༌པོ༌།
1:19 ནེ༌ 28
19 ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ ཡོད༌ཁན༌ནི༌ ཡ༌ཧུ༌དཱ༌པའེ༌ ཝང༌སྲུལ༌ཁན༌གུན༌ནི༌, བླ༌མ༌གུན༌ དང༌ ལི༌ཝི༌པ༌གུན༌ ཡོ༌ཧཱ༌ནན༌ནི༌ཀ༌ ཁོང༌ སུ༌ ཨིན༌ ཟེར༌ཏེ༌ ཏྲིའ༌ལ༌ ལམ༌ཅུགས༌། 20 ཡོ༌ཧཱ༌ནན༌ནི༌ ཐེ༌ཚོམས༌ མེད༌པ༌ སལ༌པོ༌ དང༌ དྲང༌པོ༌ མོལས༌, "ང༌ ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ མན༌།"
21 ཁོང༌གུན༌ནི༌ ཏྲིས༌, "ཏེ༌ནེ༌ ཉེ༌རང༌ སུ༌ ཞུགས༌ཏེ༌ ཨིན༌, ཉེ༌རང༌ ལུང༌སྟོན༌པ༌ ཨེ༌ལི༌ཡཱ༌ ཨིན༌ན༌?"
ཡོ༌ཧཱ༌ནན༌ནི༌ མོལས༌, "ངའ༌ མན༌།"
ཁོང༌གུན༌ནི༌ ཏྲིས༌, "ཏེ༌ནེ༌ ཉེ༌རང༌ དཀོན༌མཆོག༌གི༌ ཀལ༌ལ༌ ཛད༌ཅེས༌སི༌ ཁ༌ཆད༌ ཅོའ༌ ཛད༌ཁན༌ནི༌ ལུང༌སྟོན༌པ༌བོ༌ ཨིན༌ན༌?"
ཁོང༌ངི༌ མོལས༌, "མན༌།"
22 སྟིང༌ཇུག༌ག༌ ཏེ༌ མི༌གུན༌ནི༌ ཁོང༌ང༌ ཏྲིས༌, "ཏེ༌ནེ༌ ཉེ༌རང༌ ཨིན༌བོ༌ སུ༌ ཨིན༌, ཤོད༌དའང༌ ཅིའ༌ཟེར༌ན༌ ང༌ཞའ༌, ང༌ཞའ༌ ཀལ༌ཁན༌གུན༌ལ༌ ལན༌ཏང༌གོས༌སད༌། ཉེ༌རང༌ངི༌ རང༌ངི༌ སྐོར༌ལ༌ ཅི༌ མོལ༌ལད༌?"
23 ཡོ༌ཧཱ༌ནན༌ནི༌ ལུང༌སྟོན༌པ༌ ཡེ༌ཤ༌ཡཱའེ༌ མོལ༌ཁན༌ ནང༌ཞིན༌ལ༌ ལན༌སལས༌,
"རི༌སྟོང༌ངི༌ ནང༌ང༌ སྐད༌ ཆེན༌མོ༌ ཏང༌ཁན༌བོ༌ ང༌ ཨིན༌,
''གཙོ༌བོའེ༌ ཕེབས༌ལམ༌བོ༌ དྲང༌པོ༌ ཅོ༌ཤིག༌། * 1:23 ཡེ༌ཤ༌ཡཱའེ༌ སྤེ༌ཆའེ༌ 40:3' "
24 ཏེ༌ནེ༌ ཀལ༌ཁན༌ནི༌ ཕ༌རུ༌ཤི༌པ༌གུན༌ནི༌ 25 ཡོ༌ཧཱ༌ནན༌ལ༌ ཏྲིས༌, "གལ༌ཏེས༌ ཉེ༌རང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཡ༌ ཨེ༌ལི༌ཡཱ༌ ཡ༌ ཏེ༌ ལུང༌སྟོན༌པ༌བོ༌ མན༌ན༌, ཏེ༌ནེ༌ ཉེ༌རང༌ངི༌ ཁྲུས༌ ཅིའ༌ སལ༌ལད༌?"
26 ཡོ༌ཧཱ༌ནན༌ནི༌ ཁོང༌གུན༌ལ༌ ལན༌སལས༌, "ངའེ༌ མི༌གུན༌ལ༌ ཆུ༌ ཉམ༌པོ༌ ཁྲུས༌ ཏང༌ངད༌, ཨིན༌ནའང༌ ཁྱོ༌ཞ༌གུན༌ནི༌ ཕྲོའ༌ ཁྱོ༌ཞའེ༌ མ༌ཤེས༌ཁན༌ནི༌ མི༌བོ༌ ཞུགས༌ཏེ༌ ཡོད༌། 27 ཁོང༌ ངའེ༌ སྟིང༌ནེ༌ སྐྱོད༌ཨིན༌, ངའ༌ ཁོང༌ངི༌ ཞབ༌ཤི༌ ཙོགས༌ལ༌ ཞབ༌པུལ༌ ལྡམས༌ཁན༌བོ༌ ཀྲོལ༌ཅེས༌སི༌ འོས༌པ༌ མེད༌།"
28 འི༌ ཚང༌མ༌ ཡོ༌ཧཱ༌ནན༌ནི༌ མི༌གུན༌ལ༌ ཁྲུས༌སལ༌སའེ༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ ཡོད༌ཁན༌ནི༌ བེད༌ཐཱ༌ནི༌ གྲོང༌ཁྱེར༌ལ༌ བྱུང༌།
ཡེ༌ཤུ༌ དཀོན༌མཆོག༌གི༌ ལུ༌གུ༌།
1:29 ནེ༌ 34
29 ཐོ༌རེ༌ཟུག༌པོ༌ ཡོ༌ཧཱ༌ནན༌ནི༌ ཡེ༌ཤུ༌ ཁོང༌རང༌ ཆོགས༌ལ༌ སྐྱོད༌ད༌ ཟིགས༌ཏེ༌ མོལས༌, "ལྟོས༌ཤིག༌ ཁོང༌ ནི༌ དཀོན༌མཆོག༌གི༌ ལུ༌གུ༌, ཇིག༌རྟེན༌པ༌གུན༌ནི༌ སྡིག༌པ༌ མེད༌ཁན༌ ཅོའ༌ ཛད༌ཁན༌བོ༌ ཨིན༌ནོག༌། 30 ཁོང༌ ཏེན༌ན༌བོ༌ ཞུགས༌ཏེ༌ ཨིན༌, ཀ༌བོའེ༌ སྐོར༌ལ༌ ངའེ༌ ཟེར༌པིན༌, 'ངའེ༌ སྟིང༌ནེ༌ སྐྱོད༌ཅེས༌ཅན༌བོ༌ ངའེ༌ སང༌ ཀྲག༌པོ༌ ཞུགས༌ཏེ༌ ཨིན༌ ཅིའ༌ཟེར༌ན༌ ཁོང༌ ངའེ༌ སང༌ སྔུན༌ལ༌ ཞུགས༌ཏེ༌ ཡོད༌པིན༌།' 31 སྔུན༌ལ༌ ངེའང༌ ཁོང༌ ངོ༌ མ༌ཤེས༌, ཨིན༌ནའང༌ ཨིས༌ར༌ཨེལ༌པ༌གུན༌ལ༌ ཁོང༌ སྔོན༌ཅུག༌ཅེས༌སི༌ ཕིའ༌, ངའེ༌ ཆུ༌ ཉམ༌པོ༌ ཁྲུས༌ ཏང༌ཨིན༌ ཡོངས༌པིན༌།"
32 ཏེ༌ནེ༌ ཡོ༌ཧཱ༌ནན༌ནི༌ སྤང༌པོ༌ སལས༌, "ངའེ༌ དམ༌པའེ༌ ཐུག༌ཉིད༌ ཕུར༌གོན༌ཞིག༌གི༌ ཚུལ༌ལ༌ ནམ༌ཁའ༌ནེ༌ བབས༌ཏེ༌ ཁོང༌ངི༌ཀ༌ ཞུགས༌ས༌ལ༌ ཐོང༌། 33 གོ༌མ༌ ངའེ༌ ཁོང༌ སུ༌ ཨིན༌ཁན༌བོ༌ ངོ༌ཤེས༌ས༌ མེད༌པིན༌, ཨིན༌ནའང༌ ང༌ ཆུ༌ ཉམ༌པོ༌ ཁྲུས༌ ཏང༌ང༌ལ༌ ཀལ༌ལ༌ ཛད༌ཁན༌བོའེ༌ མོལས༌, 'ཁྱོ༌རང༌ངི༌ དམ༌པའེ༌ ཐུག༌ཉིད༌ བབས༌ཏེ༌ ཞུགས༌ས༌ལ༌ ཐོང༌ཁན༌བོའེ༌, དམ༌པའེ༌ ཐུག༌ཉིད༌ ཉམ༌པོ༌ ཁྲུས༌སལ༌ལ༌ ཛད༌ཨིན༌།' 34 ངའེ༌ ཁོང༌ ཇལ༌པ༌ ངའེ༌ ཁོང༌ དཀོན༌མཆོག༌གི༌ སྲས༌ ཨིན༌ཁན༌བོའེ༌ སྤང༌པོ༌ ཏང༌ངད༌།"
གཙོ༌བོ༌ ཡེ༌ཤུའི༌ ལོབ༌ཕྲུགས༌ ཏང༌པོ༌།
1:35 ནེ༌ 42
35 སྟིང༌མ༌ ཞག༌ག༌ ཡོ༌ཧཱ༌ནན༌ ཡང༌སྐྱར༌ ཁོང༌རང༌ངི༌ ལོབ༌ཕྲུགས༌ ཉིས༌ ཉམ༌པོ༌ ཡོད༌པིན༌, 36 ཁོང༌ངི༌ ཡེ༌ཤུ༌ ཏེ༌ཀ༌ནེ༌ གྲུལ༌ཨིན༌ སྐྱོད༌ད༌ལ༌ ཟིགས༌ཏེ༌ མོལས༌, "ལྟོས༌ཤིག༌, ཁོང༌ དཀོན༌མཆོག༌གི༌ ལུ༌གུ༌ ཨིན༌ནོག༌", 37 ཡང༌ ཡོ༌ཧཱ༌ནན༌ནི༌ ལོབ༌ཕྲུགས༌ ཉིས༌ཀོའ༌ ཁོང༌ངི༌ ཏེ༌ཟུག༌ མོལ༌ལ༌ ཚོར༌ར༌ཅིག༌, ཁོང༌གུན༌ ཡེ༌ཤུའི༌ སྟིང༌རང༌ནེ༌ སོང༌།
38 ཡེ༌ཤུའི༌ གྱབ༌ ལོགས༌ཏེ༌ ཁོང༌གུན༌ སྟིང༌རང༌ནེ༌ ཡོང༌ང༌ ཟིགས༌པ༌, ཁོང༌གུན༌ལ༌ ཏྲིའ༌ ཛདས༌, "ཁྱོ༌ཞའ༌ ཅི༌ གོས༌སད༌?"
ཁོང༌གུན༌ནི༌ ལན༌ཏངས༌, "རབ༌བི༌" ༼ཡང༌ན༌ "ལོབ༌པོན༌ལེ༌"༽ "ཉེ༌རང༌ ཀ༌རུ༌ ཞུགས༌སད༌?"
39 ཡེ༌ཤུའི༌ ཁོང༌གུན༌ལ༌ ལན༌སལས༌, "ང༌ ཉམ༌པོ༌ ཡོངས༌ཏེ༌ ལྟོས༌ཤིག༌།" ཏེ༌ནེ༌ ཁོང༌ ཉིས༌ཀ༌ ཡེ༌ཤུ༌ ཉམ༌པོ༌ སོང༌ཏེ༌ ཁོང༌ ཞུག༌སི༌ ནས༌ས༌བོ༌ ཐོང༌། ཏེ༌ ཟ༌ནེ༌ ཕི༌ཏོག༌གི༌ ཆུ༌ཚོད༌ ཞི༌པ༌ ཟོད༌ སོང༌པ༌ ཏེ༌ ཚན༌བོ༌ ཁོང༌གུན༌ ཡེ༌ཤུ༌ ཉམ༌པོ༌ དུགས༌།
40 ཡོ༌ཧཱ༌ནན༌ནི༌ མོལ༌ཁན༌གུན༌ ཚོར༌ཏེ༌, ཡེ༌ཤུའི༌ གྱབ༌ནེ༌ བྲངས༌ཁན༌ ཉིས༌སི༌ ནང༌ནེ༌ ཅིག༌པོ༌ ཤི༌མོན༌ པི༌ཏྲར༌རི༌ ནོ༌ ཨེན༌གྲིརུ༌ ཨིན༌པིན༌། 41 ཚང༌མའེ༌ སང༌ སྔུན༌ལ༌ ཨེན༌གྲིརུ༌འི༌ ཁོའེ༌ ཨ༌ཅོ༌ ཤི༌མོན༌ པི༌ཏྲར༌ ཙལ༌ཏེ༌ ཁོའ༌ ཟེརས༌, "ང༌ཞའ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ༼ཡང༌ན༌ སྐོའ༌ ཛད༌ཁན༌བོ༌༽ ཐོབ༌།"
42 ཨེན༌གྲིརུ༌འི༌ ཤི༌མོན༌ ཁྲིད༌ཏེ༌ ཡེ༌ཤུའི༌ཀ༌ ཁྱེརས༌། ཡེ༌ཤུའི༌ ཁོའ༌ ཟིགས༌ཏེ༌ མོལས༌, "ཁྱོ༌རང༌ ཡོ༌ཧཱ༌ནན༌ནི༌ བུ༌ཚ༌ ཤི༌མོན༌ མན༌ན༌? ཏ༌ནེ༌ཕར༌ལ༌ ཁྱོ༌རང༌ངི༌ མིང༌ང༌ ཀྱེ༌ཕས༌ ༼ཡང༌ན༌ པི༌ཏྲར༌༽ ཟེར༌ཨིན༌།
ཕི༌ལིབ༌ དང༌ ན༌ཐན༌ནི༌འེལ༌ ལྡམ༌མ༌ ཛདས༌།
1:43 ནེ༌ 51
43 ཐོ༌རེ༌ཟུག༌པོ༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌ལ༌ སྐྱོད༌ཅེས༌ ཐག༌ཅད༌ད༌ ཛདས༌། ཕི༌ལིབ༌ ཐོབ༌བ༌ཅིག༌ ཁོང༌ངི༌ ཁོའ༌ མོལས༌, "ངའེ༌ སྟིང༌རང༌ནེ༌ ཡོང༌།" 44 ཕི༌ལིབ༌, ཨེན༌གྲིརུ༌ དང༌ པི༌ཏྲར༌རི༌ གྲོང༌ཁྱེར༌ བེད༌སའི༌ད༌ ཨིན༌པིན༌།
45 ན༌ཐན༌ནི༌འེལ༌ ཐོབ༌བ༌ཅིག༌ ཕི༌ལིབ༌བི༌ ཟེརས༌, "མོ༌ཟེས༌ དང༌ ལུང༌སྟོན༌པ༌གུན༌ནི༌ བྲིའ༌ ཛད༌ཁན༌ནི༌ མི༌བོ༌ ང༌ཞའ༌ ཐོབ༌། ཁོང༌ ནི༌ ཡོ༌སེབ༌བི༌ བུ༌ཚ༌ ན༌ཙ༌རེད༌པ༌ ཡེ༌ཤུ༌ ཨིན༌ནོག༌།"
46 ན༌ཐན༌ནི༌འེལ༌ལི༌ ཁོའ༌ ཟེརས༌, "ན༌ཙ༌རེད༌ནེ༌ མི༌ ཟང༌པོ༌ཞིག༌ བིང༌ སྲིད༌ད༌ནོག༌ག༌?" ཕི༌ལིབ༌བི༌ ཁོའ༌ ཟེརས༌, "ཡོངས༌ཏེ༌ ལྟོས༌།"
47 ཡེ༌ཤུའི༌ ན༌ཐན༌ནི༌འེལ༌ ཡོང༌ང༌ ཟིགས༌ཏེ༌ ཁོའེ༌ སྐོར༌ལ༌ མོལས༌, "ལྟོས༌ཤིག༌, འི༌ མི༌བོའ༌ ཨིས༌ར༌ཨེལ༌པ༌ ཟེར༌ཅེས༌ འོས༌པ༌ ཨིན༌ནོག༌, ཅིའ༌ཟེར༌ན༌ ཁོའེ༌ སུ༌ཞིག༌གའང༌ མ༌ནེ༌ གོབས༌མི༌སྐོར༌།"
48 ན༌ཐན༌ནི༌འེལ༌ལི༌ ཡེ༌ཤུའ༌ ཟེརས༌, "ཉེ༌རང༌ངི༌ ང༌ ཀ༌ཟུག༌གི༌ ཁྱེན༌ནད༌།"
ཡེ༌ཤུའི༌ ཁོའ༌ མོལས༌, "ཕི༌ལིབ༌བི༌ བོད༌དི༌ སང༌ སྔུན༌ལ༌ ངའེ༌ ཁྱོ༌རང༌ ཕིག༌ ཁ༌ཟས༌སི༌ ལྕང༌མའེ༌ ཡོག༌ག༌ དུགས༌ཏེ༌ ཐོང༌།"
49 ན༌ཐན༌ནི༌འེལ༌ལི༌ ཟེརས༌, "ལོབ༌པོན༌ལེ༌, ཉེ༌རང༌ དཀོན༌མཆོག༌གི༌ སྲས༌ དང༌ ཁོང༌ངི༌ ཨིས༌ར༌ཨེལ༌ལི༌ ཕིའ༌ སྐོའ༌ ཛད༌ཁན༌ནི༌ གྱལ༌པོ༌ ཨིན༌ནོག༌།"
50 ཡེ༌ཤུའི༌ ན༌ཐན༌ནི༌འེལ༌ལ༌ མོལས༌, "ངའེ༌ ཁྱོ༌རང༌ ཕིག༌ ཁ༌ཟས༌སི༌ ལྕང༌མའེ༌ ཡོག༌ག༌ དུགས༌ཏེ༌ ཐོང༌ ཟེར༌པ༌ ཁྱོ༌རང༌ངི༌ ཏད༌པ༌ ཅོས༌ཏེ༌ ཨིན༌ན༌? ཁྱོ༌རང༌ངི༌ འི༌ སང༌ ཧ༌ལས༌ཤེས༌སི༌ ལས༌ ཆེའ༌ ཐོང༌ཨིན༌།" 51 ཡེ༌ཤུའི༌ ཏ༌རུང༌ངའང༌ མོལས༌, "ངའེ༌ ཁྱོ༌རང༌ང༌ དེན༌བ༌ ཟེར༌རད༌, ཁྱོ༌རང༌ངི༌ ནམ༌ཁའ༌ བེས༌ཏེ༌ ཡང༌ དཀོན༌མཆོག༌གི༌ ཕོ༌ཉ༌གུན༌, ང༌ མི༌རིགས༌སི༌བུའི༌ཀ༌ ཛགས༌ཨིན༌ ཡང༌ བབས༌ཨིན༌ ཐོང༌ཨིན༌། † 1:51 གོ༌ཟུག༌ ཟེར༌ཁན༌ནི༌ སྤེ༌ཆའེ༌ ནང༌ང༌ 28:10 ནེ༌ 17 ཚོག༌པ༌ འི༌ཟུག༌ བྲིས༌ཏེ༌ དུག༌། ཡ༌ཀོབ༌ ཁོ༌རང༌ངི༌ ཨ༌ཅོ༌ ཨི༌སུ༌ནེ༌ ཤོར༌ཏེ༌ སོང༌ཏེ༌ རྡོའ༌ཞིག༌གི༌ཀ༌ ཉིད༌ལོགས༌ ཟ༌ནེ༌ ཁོའེ༌ ཉིད༌ལམ༌མི༌ ནང༌ང༌ ཕོ༌ཉ༌ མང༌པོ༌ཞིག༌ སྲེས༌ཀ༌ཞིག༌, ཀ༌བོ༌ ཇིག༌རྟེན༌ནི༌ ཀ༌ནེ༌ ནམ༌ཁའ༌ ཚོག༌པ༌ལ༌ ཡོད༌ཁན༌བོའེ༌ཀ༌ ཆ༌ཡོང༌ ཏང༌ཨིན༌ཞིག༌ ཐོང༌ཀྱག༌། "
*1:23 1:23 ཡེ༌ཤ༌ཡཱའེ༌ སྤེ༌ཆའེ༌ 40:3
†1:51 1:51 གོ༌ཟུག༌ ཟེར༌ཁན༌ནི༌ སྤེ༌ཆའེ༌ ནང༌ང༌ 28:10 ནེ༌ 17 ཚོག༌པ༌ འི༌ཟུག༌ བྲིས༌ཏེ༌ དུག༌། ཡ༌ཀོབ༌ ཁོ༌རང༌ངི༌ ཨ༌ཅོ༌ ཨི༌སུ༌ནེ༌ ཤོར༌ཏེ༌ སོང༌ཏེ༌ རྡོའ༌ཞིག༌གི༌ཀ༌ ཉིད༌ལོགས༌ ཟ༌ནེ༌ ཁོའེ༌ ཉིད༌ལམ༌མི༌ ནང༌ང༌ ཕོ༌ཉ༌ མང༌པོ༌ཞིག༌ སྲེས༌ཀ༌ཞིག༌, ཀ༌བོ༌ ཇིག༌རྟེན༌ནི༌ ཀ༌ནེ༌ ནམ༌ཁའ༌ ཚོག༌པ༌ལ༌ ཡོད༌ཁན༌བོའེ༌ཀ༌ ཆ༌ཡོང༌ ཏང༌ཨིན༌ཞིག༌ ཐོང༌ཀྱག༌།